Na Nunnak Laksawng Kha Hmaantein Sunsak
“Kannih nih Pathian nung kha kan biak khawh nakhnga santlailo mi rian kan tuah tawnmi kan chiaṭha thleidannak lungthin chung i a caammi kha a thi in a kan thenh piak lai.”—HEBRU 9:14.
1. Nunnak kan sunsak ngaingai nak a langhtertu thil cu zeidah asi?
NUNNAK kha zeitluk in dah na sunsak tiah hal na si ahcun zeitindah na leh lai. Kanmah nunnak siseh, midang nunnak siseh kan sunhsak ngaingai hna. Cucaah, kan zawt tikah i thlop awkah asiloah hmaan tein ngandamnak chek awkah sibawi sinah kan kal ko lai. Kan zapi in nun le ngandam kan duh. Tar le mi tlamtling lo hmanh nih thih an duh lo; nun peng an duh.
2, 3. (a) Phungthlukbia 23:22 nih zei kong dah a langhter khun? (b) Pathian cu Phungthlukbia 23:22 i rian he khan zeitindah aa pehtlaih?
2 Nunnak na sunhsakning nih midang he naa pehtlaihnak cungah a hnorsuan. Tahchunhnak ah, Pathian Bia nih hitin nawl a kan pek: “Nangmah an hringtu na pa kha a bia va ngai, na nu kha a tar tikah va serhsat hlah.” (Phungthlukbia 23:22) ‘Bia ngaih’ ti tikah hin biafang pawl va theih men khi asi lo; mah phungthlukbia nih a chim duhmi cu theih i ngaih khi asi. (Exodas 15:26; Deuteronomi 7:12; 13:18; 15:5; Joshua 22:2; Salm 81:13) Zeiruangah Baibal nih bia a kan ngaihter? Na nu le na pa kha nangmah nakin an upat deuh ruangah asilole an hmuhtonmi a tam deuh ruang menmen caah asi lo. Langhtermi a ruang cu “an hringtu” an si caah asi. Cheukhat Baibal lehnak ahcun mah cacang kha “Na nunnak an petu na pa kha a bia va ngai” tiin an leh. Na nunnak kha na sunsak ahcun mah nunnak hrampi cungah khan rian kan ngei tiah na ruah ko lai.
3 A hmaanmi Khrihfa pakhat na si ahcun, na nunnak hrampi cu Jehovah asi tiah na cohlan ko lai. Amah thawngin na “nung;” i na “cawlcang” kho, pum in hngalhnak a ngei khomi thilnung pakhat in na cawl kho; atu na “um” cang i zungzal nunnak ca telin hmailei caah khua tuaktan in timhtuah khawh asi. (Lamkaltu 17:28; Salm 36:9; Phungchimtu 3:11) Nunnak he aa tlaiin midang khiingthlai ning nakin Pathian hmunhning bangin tuah na duh caah Phungthlukbia 23:22 he aa tlaiin Pathian bia kha nawl ngai tein ‘ngaih’ ding asi.
Nunnak Kha Upat
4. Minung tuanbia hramthawk ah, nunnak upatnak kong kha zeitindah a hung biapit?
4 Minung tuanbia hram thawkah, Jehovah nih minung kha zeiruang hmanhah (ningcang loin asiloah) nunnak hmannak nawl a rak pek hna lo kha fiang tein a rak langhter. A nah a chuak i a thin a hun ruangah Kain nih a sual lomi a nau Abel kha a rak thah. Kain nih nunnak he aa tlai in cutin biakhiahnak nawl a ngei tiah na ruat maw? Pathian nih cun a ruat lo. Pathian nih “Zeicahdah hi thil ṭhalo hi na tuah? Ngai hmanh! Nangmah nih na chuahmi na nau thisen nih khan vawlei in a ka auh lengmang ko” tiah Kain kha bia a rak hal. (Genesis 4:10) Vawlei i Abel thisen nih khan a nunnak kha aiawh ti kha philhhlah, amah cu ruru hranghrang in thah asi i, a phuhlam piak awkah Pathian kha a nawl.—Hebru 12:24.
5. (a) Pathian nih Noah chanah zei thlauhmi dah a rak chim i cucu ahote he dah aa pehtlaih? (b) Mah thlauhmi cu zeiti sullam in dah a biapimi kehlan pakhat asi?
5 Buanchukcho hnu in, minung ciruang cu minung pariat lawng he nuncan thar in khan a rak thawk. Mi vialte he aa pehtlaimi thawngthanhnak pakhat ah, Pathian nih nunnak le thi cung i a lungput kha a rak fianter deuh. Pathian nih minung nih saram a sa kha ei khawh asi tiah a ti ko nain, thlauhmi kha hitin a rak chim: “Saram vialte le thlaihring vialte cu nan ei khawh hna lai; an dihlak in rawl caah kan pek hna; asinain sa kha a chung i thi a um lioah cun nan ei lai lo. Zeicahtiah nunnak cu thi cu asi.” (Genesis 9:3, 4) Mah kha Judah miphun cheukhat nih a nung liomi saram i a sa le a thi kha nan ei lai lo ti duhnak asi tiin a sullam an leh. Sihmanhsehlaw Pathian nih a rak thlauhmi cu nun pehnak caah thi hman asi ti kha ahnu ah fiangte in a langhter. Mahlengah, Noah hmangin Pathian pekmi nawlbia ah thi he aa tlaiin Pathian i a sunglawimi timhnak—minung zungzal nunnak a hmuhter hngami timhnak kha tlam a tlinter hngami a biapimi kehlan pakhat asi.
6. Pathian nih nunnak a sunhsak kha Noah sinah zeitindah fak khunin a rak langhter?
6 Pathian nih hitin a chim chap: “Pakhatkhat nih an in thah hna ahcun, thihnak in dan ka tat hna lai. Nanmah an thattu hna saram cu ka thah hna lai [“thil nung paohpaoh sinin an nunnak ka hal hna lai,” NW] i ahohmanh a minung hawi a thatmi cu dan ka tat hna lai. A minung hawi a thatmi cu a minung hawi nih an thah ve lai. Zeicahtiah Pathian nih minung cu Pathian mui keng in a sermi asi.” (Genesis 9:5, 6) Pathian nih minung i a thisen kha a nunnak in a hmuh ti kha minung innchungkhar dihlak sin i thanhmi khan na hngalh khawh ko. Sertu nih minung kha nunnak a pek caah thisen nih a aiawhmi nunnak kha ahohmanh nih a thah awk asi lo. Kain bantukin, pakhatkhat nih mi a thah ahcun a thattu nunnak kha Sertu nih ‘hal ve’ nak nawl a ngei.
7. Pathian nih Noah sin i a thanhmi thisen kong kha zeicahdah theih kan duh awk asi?
7 Pathian nih a thanhmi thawngin thisen kha ningcang loin hman lo awkah minung kha nawl a pek hna. Ziah cutin nawl a pek hnga ti theih na duh maw? Zeicahdah Pathian nih thisen kongah cuticun a hmuh hnga? A phi cu Baibal chung i a biapi bik cawnpiaknak hna lakah pakhat asi ve. Church tampi nih mah cawnpiaknak kha zei an rel lo hmanhah, mah cucu Khrihfa thawngpang i a biapi bik kong asi. Mah cawnpiaknak cu zeidah asi, na nunnak, na biakhiahnak le na tuahsernak hna he zeitindah aa pehtlaih?
Thisen—Zeitindah Hman Khawh Asi?
8. Nawlbia chungah, thisen hmannak he aa tlaiin Jehovah nih zei ri dah a chiah?
8 Jehovah nih Israel miphun sinah nawlbia a rak pek tik hna ah khan nunnak le thisen kong kha a dikthlir deuh in a rak fianter. Kha lio caan ahkhan Pathian nih aa timhmi tlamtlinter awkah thil dang pakhat a rak tuah rih. Nawlbia nih changvut, chiti le mitsurhang ti bantuk kha Pathian sin pekchanh awk a hal ti cu na hngalh ko lai. (Levitikas 2:1-4; 23:13; Nambar 15:1-5) Mah chungah saram raithawi awk zong aa tel. Kha kongah khan Pathian nih hitin a rak ti: “Titsa nunnak cu thi chungah a um i nan nunnak ca i biakṭheng cung i remnak sernak caah kan pekmi hna asi; Zeitintiah nunnak thawng cun thi cu remnak sertu cu asi. Cucaah Israel mi cu, ‘Nannih lakah ahohmanh nih thi nan ei lai lo.’ ” Cun ramvaipa asiloah lothlopa nih ei awk caah saram kha a thah ahcun a thi a zor lai i leidip in a khuh lai tiah Jehovah nih nawl a pek chap hna. Vawlei hi Pathian ke chiahnak asi i, vawlei cung i thisen thletnak thawngin Nunnak Petu sinah nunnak a phan ṭhan ti kha an cohlan tinak asi.—Levitikas 17:11-13; Isaiah 66:1.
9. Nawlbia nih a langhtermi thi hman khawhnak lam khat cu zeidah asi i, aa timhmi cu zeidah asi?
9 Mah nawlbia cu kanmah caah sullam a ngei lomi biaknaklei phunglam pakhat men asi lo. Zeicahdah Israel miphun nih thi an ei lo ti kha naa cinken maw? Pathian nih: “Cucaah Israel mi cu, Nannih lakah ahohmanh nih thi nan ei lai lo” tiah a rak ti hna. Zeiruangah asi? “Titsa nunnak cu thi chungah a um i nan nunnak ca i biakṭheng cung i remnak sernak caah kan pekmi hna asi.” Mah in hin minung nih thi nan ei lai lo tiah Pathian nih Noah sin i nawl a rak pekmi a ruang kha a kan hngalhter ti kha na hngal maw? Thi cu a sunglawimi sullam a keng i nunnak tampi a khamh khomi a hleikhun in hman awkah a dang tein chiah ding thil i hmuh awkah Sertu nih a rak khiah. Sualnak khuhnak (ngaihthiamnak) caah thisen cu a biapimi hmun in aa tel. Nawlbia ningin thi hman ding i Pathian nih a awnhmi lam khat cu Jehovah ngaihthiamnak hmuh a duhmi Israel miphun hna nih biakṭheng cungah ngaihthiamnak ca i hman awk lawng kha asi.
10. Zeicahdah saram thi nih sualnak kha tlingte in a thenh khawh lo, sihmanhsehlaw nawlbia tang i raithawinak hna nih zei ralrinnak dah a pek hna?
10 Mah cucu Khrihfa phung he aa ṭhenmi asi lo. Pathian timhpiakmi mah nawlbia muisam kha sawh in lamkaltu Paul nih hitin a rak ṭial: “Nawlbia ning ahcun zei paohpaoh hi thisen in thenh asi i sualnak hi thisen luanh lawnglawng in ngaihthiam asi.” (Hebru 9:22) Rai an thawimi nih khan Israel miphun kha mitling, sualnak ngei loah a canter kho hna lo ti kha Paul nih fiang tein a rak fianter. Hitin a rak ṭial: “Raithawinak nih khan, an sualnak tu kha, kum fate in a hngalhter lengmang hna. Zeitintiah cawtum thi le meheh thi nih cun sualnak kha a hlo kho taktak bal lo.” (Hebru 10:1-4) Sihmanhsehlaw, mah raithawinak hna cu a ṭhahnem ṭhiamṭhiam ko. Mah nih khan Israel miphun kha sualnak a ngeimi an si ti le sual thenhnak taktak hmuh awkah kha lawng khan a za lo ti kha ralrinnak a pek hna. Asinain, saram nunnak a aiawhmi thisen nih minung sualnak a thenh taktak khawh lo ahcun, a thenh kho hngami thi a um hnga maw?
Nunnak Petu I Sullam Fianternak
11. Saram thi raithawinak nih pakhatkhat a sawh ti kha zeitindah kan hngalh?
11 A ngaingai ti ahcun nawlbia nih hin Pathian duhnak hlawh tlinter awkah hmual a ngei deuhmi thil pakhat kha ṭha tein a kan zohter. Paul nih “asi ahcun, Nawlbia cu zei sullam ah dah pek asi kun?” tiah bia halnak a tuah. Amah nih hitin a lehṭhan: “Zei hi dah palhnak asi ti langhtertu caah khan pek asi i cucu Pathian nih bia aa kammi Abraham tefa a phak hlantiang kha rak um seh ti caah khan pek asi cu asi. Nawlbia cu vancungmi nih khan pek chin asi i a karlak ah lamkaltu minung pakhat [Moses] kha a rak um.” (Galati 3:19) Cu bantuk ṭhiamṭhiam in Paul nih hitin a ṭialṭhan: “A taktak le a ngaingai a simi thil kha Judah phung nih hin tling ngaingai le hmaan ngaingai in a langhter kho lo. A ra dingmi thil ṭha mui-thlam ceu a rak si.”—Hebru 10:1.
12. Thi kong he aa tlaiin Pathian timhmi a hung fiannak kha zeitindah kan hngalh khawh?
12 A tawinak in Noah chan kha kan zoh-ṭhan ahcun minung nih an nunnak caah saram i a sa kha an ei khawh ko nain a thi bel cu nan ei lai lo tiah Pathian nih nawl a rak pek hna. Ahnuah, Pathian nih “titsa nunnak cu thi chungah a um” tiah a rak ti. Asi, thi nih nunnak kha a aiawh tiah Pathian nih a hmuh i: “Nan nunnak ca i biakṭheng cung i remnak sernak caah kan pekmi hna asi” tiah a rak ti. Asinain, Pathian timhmi a hung fian deuh nakhnga a ṭha khunmi thil dang pakhat a hung um rih lai. Nawlbia nih a ra dingmi thil ṭha kha a mui-thlam in a rak langhter chung. Zei thil ṭha dah asi?
13. Zeiruangah Jesuh thihnak hi a biapit?
13 A taktak cu Jesuh thihnak kha asi. Jesuh thing cung i an thlai le an hrem kha na hngalh. Amah cu misual pakhat bantukin a rak thi. Paul nih hitin a rak ṭial: “Zeihmanh a tuah kho lomi kan si ko lioah khan, cu can thengte ahcun miṭhalo mi kan caah Khrih kha a thi. . . Asinain Pathian nih cun zeitluk in dah a kan dawt kha hi tihin a langhter: kannih cu misual kan si ko rih lioah hin Khrih cu kan caah a thi.” (Rom 5:6, 8) Kan ca i Khrih a thihnak thawngin kan sualnak kha khuh awkah tlanhnak man a rak kan timh piak. Mah tlanhnak man cu Khrihfa thawngpang i a biapi bik kong asi. (Matthai 20:28; Johan 3:16; 1 Korin 15:3; 1 Timote 2:6) Cucu thi le nunnak he zeitindah aa pehtlaih i, na nunnak tah zeitindah aa tel ve?
14, 15. (a) Efesa 1:7 lehmi Baibal cheukhat nih Jesuh thihnak kha fakkhunin zeitindah an langhter? (b) Efesa 1:7 i zei a kong dah kan hrelh sual khawh?
14 Cheukhat biaknak chungmi hna nih “ka caah Jesuh a thi” tiah an ti i Jesuh thihnak kha a hleikhun in an langhter tawn. Efesa 1:7 kha cheukhat Baibal lehnak nih zeitindah an leh ti kha ruat-hmanh: “A thihnak nih a kan luatter, phundang in cun, kan sualnak hna kha a kan thenhpiak.” (Frank Scheil i The American Bible, 1902) “Khrih thihnak nih kannih cu a kan luatter, cucu kan sualnak kha ngaihthiam kan si tinak asi.” (Nihin Mirang Lehnak, 1966) “Khrih nih a nunnak kha rai a thawi caah kan luat cang, cucu sual ngaihthiamnak timi luatnak kha asi.” (William Barclay i Biakam Thar, 1969) “Khrih thihnak thawngin kan sualnak ngaihthiam kan si i kan luat cang.” (Holh Lettu i Biakam Thar, 1973) Kha lehnak hna nih khan Jesuh thihnak kha a hleikhun in an langhter ti kha na hngalh ko lai. Cheukhat nih, ‘Jesuh thihnak cu a biapi taktak. Cuti asi ahcun, hi lehnak hna ahhin zeital a bau mei?’ an ti men lai.
15 A ngaingai ti ahcun mah lehnak hna lawng kha naa bochan ahcun, a biapi tukmi thil pakhat na hrelh sual khawh men, mah nih khan Baibal thawngpang na hngalhthiamnak kha ri a ngeihter men lai. Mah lehnak hna nih khan Efesa 1:7 i a hrampi ṭialnak i “thi” tiah sullam a ngeimi Grik biafang kha a hrelh. Cucaah, Lai Biakamthar Baibal ti bantuk Baibal tampi cu a hrampi ṭial ningin tling deuh in an leh: “Amah thi chuahnak he kanni tlai i kannih nih tlanhnak le ngaihthiamnak kha kan hmuh cang.”
16. “Amah thi” tiah lehmi nih khan zeidah a kan theihter ding asi?
16 “Amah thi” tiah lehmi hi a sullam a thuk ngai i mah nih hin thil tampi a kan hngalhter awk asi. Mitling Jesuh thihnak in a za lo ti a kan hngalhter. Jesuh nih nawlbia a mui-thlam kha a rak tlinter, a hleiin Ngaihthiamnak Ni ah asi. Kha a hleikhunmi ni ahkhan, thimmi saram hna kha rai an rak thawi hna. Cun tlangbawi ngan nih khan saram thi cheukhat kha, biakinn i hmun thiang bik khaan ah khan a va kalpi i Pathian hmaika i va um bang khin Pathian sinah a va pek.—Exodus 25:22; Levitikas 16:2-19.
17. Ngaihthiamnak Ni mui-thlam kha Jesuh nih zeitindah a rak tlinter?
17 Paul nih a fianter bangin Jesuh nih Ngaihthiamnak Ni mui-thlam kha a rak tlinter. Hmasa bik ah, Israel ram i tlangbawi ngan nih kumkhat ah voikhat hmun thiang bik khaan ah a lut i thisen kha aa put i “amah ca le mi nih hngalh loin an tuahmi sualnak caah Pathian sinah khan a pek” tiah a rak chim. (Hebru 9:6, 7) Mah bantuk khan Jesuh cu thlarau in a thawh hnuah van ah a kai. Anih cu thi le sa a ngei lomi Thlarau in, ‘kanmah caah Pathian’ hmai ah khan, a chuak kho. Pathian kha zeidah a pek? Hmuh khawhmi thil si loin a sullam aa phundang tukmi thil pakhat kha a rak pek. Paul nih hitin a rak peh: “Tlangbawi ngan Khrih kha . . . Hmun Thiang Bik chungah a va luh tikah, raithawinak i pekchanh awkah cawfa thi siseh, meheh thi siseh, aa put lo, amah thi thengte kha aa put i khamhnak kha a kan serpiak . . . meheh thi le cawtum thi le khanghmi cawfa . . . in an thianlonak kha thenh piak an si . . . Cu hna hmanh nih cu bantuk in a tuah khawh ahcun, Khrih thisen nih cun, zeitluk in dah a tuah khawh chinchin lai! Zungzal hmunmi Thlarau in a tlingmi raithawinak bantuk in Pathian sinah amah le amah cu aa pe. Kannih nih Pathian nung kha kan biak khawh nakhnga santlailo mi rian kan tuah tawnmi kan chiaṭha thleidannak lungthin chung i a caammi kha a thi in a kan thenh piak lai.” Asi, Jesuh nih a nunnak thisen man kha Pathian a rak pek.—Hebru 9:11-14, 24, 28; 10:11-14; 1 Piter 3:18.
18. Thi kong Baibal chimmi hna hi nihin Khrihfa hna caah zeicah a biapit awk asi?
18 Pathian biatak nih thi kong he aa tlaimi Baibal chimmi kha a kan hngalhter, Pathian nih thi kha zeiruangah cutin a hmuh ti le, khakha kannih nih zeitindah kan hmuh ding asi ti le thi hmanning kong he aa tlaiin Pathian ri serpiakmi kha zeicah kan upat ding asi ti kha kan hngalh hna lai. Khrihfa Grik Baibal rel tikah Khrih thisen kong tampi cherhchanmi kha na hmuh ko lai. (Rinli kulh kha zoh.) Kha hna nih khan Khrihfa pakhat cio nih ‘Khrih thisen’ zumh ding asi ti kha fiangte in a langhter. (Rom 3:25) “Amah [Jesuh] thi thletnak thawng” lawnglawng in sual ngaihthiam kan si i Pathian he remnak tuah khawh asi. (Kolose 1:20, Lai Biakamthar Baibal) Mah hi vancungah Jesuh he uktu ṭuan dingah Jesuh he a hleiin biakamnak a tuahmi hna kongah asi taktak. (Luka 22:20, 28-30; 1 Korin 11:25; Hebru 13:20) Cun a ra laimi ‘harnak nganpi’ in a luat i vawlei cung paradis i zungzal nunnak a hmu hngami, nihin “mibu nganpi” ca zongah asi ve. Langhternak in, annih nih “tufa thi chungah an puan kha an suk’—Biathlam 7:9, 14.
19, 20. (a) Zeiruangah Pathian nih thi hmannak kong ah riser kha a duh i, khakha zeitindah kan ruah awk asi? (b) Kannih nih zeikong dah hngalh duhnak kan ngeih ding asi?
19 Pathian hmaiah thi hi a hleiin sullam a ngei ti kha a fiang. Kannih ca zongah cutin asi ve awk asi. Thi biapi i a chiami Sertu nih minung thi hmannak kongah rikhiahnak nawl a ngei. Kan nunnak kha biapi ah a chiah i zungzal nunnak ah a hruaimi lam pakhat lawng asimi a biapi ngaimi lam pakhat in hman dingah thi kha a dangte in a rak chiah. Mah lam ahkhan a sunglawimi Jesuh thi aa tel. Mah nunnak khamhnak lam ahkhan Jehovah Pathian nih kan caah Jesuh thi kha a hman ruangah a cungah kan lung aa lawm tuk kho! Kan caah Jesuh nih a thisen kha raithawinak i a thlet ruangah amah cung zongah kan lung aa lawmh awk asi! Lamkaltu Johan nih a langhtermi hi lungput hi kan hngalhthiam khawh taktak ko: “Kannih cu a kan dawt i a thihnak [“a thisen,” NW] thawngin kan sualnak chung khan a kan chuah i a Pathian le a Pa rian kha tlangbawi bantukin a ṭuantu dingah siangpahrang phunah a kan ser. Cu Jesuh cungah cun sunparnak le ṭhawnnak kha zungzal in zungzal tiang um camcin ko seh! Amen.”—Biathlam 1:5, 6.
20 A fim bikmi Nunnak-Petu kan Pathian nih hi nunnak khamhnak lam hi hlan liopi khan a rak timh diam cang. Cu asi caah, ‘Mah nih khan kan biakhiahnak le kan tuahsernak cungah zei hmual dah a ngeih awk asi?’ tiah biahalnak kan tuah men lai. Mah biahalnak cu a changtu capar ah langhter asi lai.
[Cahmai 18nak i Hmanthlak]
Zeitindah Na Leh Lai?
• Abel le Noah kong ṭialmi in thi cung i Pathian hmuhning kong zeidah kan cawn khawh?
• Nawlbia chungah, Pathian nih thi hmannak kongah zei ri dah a khiah i, zeiruangah a khiah?
• Ngaihthiamnak Ni i zei mui-thlam kha dah Jesuh nih zeitindah a tlinter?
• Jesuh thisen nih kan nunnak kha zeitindah a khamh khawh?
[Cahmai 17nak i Hmanthlak]
Zei Thi Nih Dah Nunnak A Khamh Khawh
[Cahmai 17nak i Hmanthlak]
“Nanmah lila kha i veng u law nan zohkhenh awkah Thiang Thlarau nih an pekmi hna Turun kha ṭhate in va zohkhenh hna u. Pathian nih amah Fapa thihnak [“thisen,” NW] thawngin a mah ta ah aa ser mi khrihfabu tukhal kha si ko u.”—Lamkaltu 20:28.
“A thihnak [“thisen,” NW] hmanh nih Pathian he a kan remter ahcun zeitluk in dah Pathian thinhunnak chung cun amah nih cun a kan khamh chinchin lai.”—Rom 5:9.
“Hi vawlei cungah hin ruahchannak ngei lo le Pathian ngei loin khua nan rak sa. Sihmanhselaw atu cu Khrih Jesuh he nan i pehtlaihnak thawngin lamhlatpi i a rak um tawn mi kha khrih i thihnak [“thisen,” NW] nih lamnaite ah an chiah cang hna.—Efesa 2:12, 13.
“Fapa nih Pathian sinak tlamtlingte in a chungah a ngeih cu Pathian biakhiahnak thawngin asi. . . . Pathian nih a Fapa vailamtahnak cung i a thihnak [“thisen,” NW] thawng khan remnak a ser.”—Kolose 1:19, 20.
“Cucaah ka u le ka nau hna, Jesuh thihnak [“thisen,” NW] thawngin Hmun Thiang Bik chungah khan luhnak nawl kan ngei cang.”—Hebru 10:19.
“Santlailo nan pupa nunphung in an luattertu hna cu zeidah asi kha nan hngalh, . . . nanmah luatnak man cu a sungmi thi, dotlaklonak zeihmanh a ngei lomi tufa thi bantuk Khrih thi kha asi.”—1 Piter 1:18, 19.
“Sihmanhsehlaw ceunak chung i a um bantuk in kannih zong ceunak chung i kan um ahcun pakhat le pakhat hawikomhnak kan ngei i a Fapa Jesuh thi nih khan kan sualnak vialte in a kan thenh.”—1 Johan 1:7.
“Ca-uk lak awk le khenhnak phoih awk kha naa tlak, Nangmah nih thahnak kha na huah cang i, na thisen thawngin Pathian caah leicung miphun le holh le peng kip lak-in mi kha na tlanh hna.”—Biathlam 5:9, Lai Biakamthar Baibal.
“Kannih kan unau hna sual a puhtu, . . . kha, vancung in lengah hlonh asi cang. Kan unau hna nih amah cu Tufa thi thawngin le an chimmi bia biatak a simi thawngin an tei cang.”—Biathlam 12:10, 11.