Jehovah Bawmhnak Kha Na Cohlang Maw?
“Bawipa cu a ka bawmtu a si, zeihmanh ka ṭih lai lo.”—HEBRU 13:6.
1, 2. Kan nunnak ah Jehovah bawmhnak le lamhruainak cohlan cu zeicah a biapit?
NA ke in tlang lam pakhat ah khual na tlawng tiah hei ruat hmanh. Asinain nangmah lawng si loin lamhruaitu pakhat a kal ve i, amah cu cuka hmun ah a ṭha bik lamhruaitu a si. Amah cu nangmah nakin hmuhtonnak le thazang a ngei deuh suaumau ko nain, lung sau tein na pawng ah a kal. A caancaan ah naa chuih i na rilh kha a hmuh. Na himnak zawnruah in, a hleiin ṭihnungmi hmun khan luat khawh awkah nangmah bawmh awkah a kut an chanh. Amah bawmhnak kha na al hnga maw? Ṭihnung na ton caah na al bal lai lo.
2 Khrihfa hna in, a harmi lam ah kan kal. Mah a harmi lam ahkhan kanmah te lawng in kan kal lai maw? (Matthai 7:14) Kal hlah, kan hmuh khawhmi lakah a ṭha bik Lamhruaitu Jehovah Pathian nih minung kha amah he kal ṭi nak nawl a pek hna tiah Baibal nih a ti. (“Genesis 5:24; 6:9, NW”) A salle kalnak ah Jehovah nih a bawm hna maw? “Keimah cu Bawipa nan Pathian ka si i ṭhawnnak kan pek hna; ‘Nan thinphang hlah u, kan bawmh hna lai,’ ” tiah a ti. (Isaiah 41:13) A cunglei kan bianabia i lamhruaitu bantukin, Jehovah nih amah he kalṭi a duhmi hna kha zangfah ngaiin a bawmh hna i i hawikawmhnak nawl a pek hna. Ahohmanh nih amah bawmhnak al kan duh lai lo ti cu a fiang ko!
3. Hi i ruahceihnak ahhin zei biahalnak hna dah kan i ruah lai?
3 Hmasa capar ah, Jehovah nih hlanlio chan a mi hna a bawmh hna nak a lam phun li kha kan rak i ruah cang. Kha bantuk khan tuchan a mi hna tah a bawm hna maw? Mah bantuk bawmhnak pakhatkhat kan cohlan ti kha zeitindah kan fianter khawh? Mah biahalnak hna kha ruat u sih. Cutin ruahnak thawngin Jehovah cu a kan Bawmtu taktak a si tiah fek deuh in kan hun zumh khawh lai.—Hebru 13:6.
Vancungmi Bawmhnak
4. Zeiruangah tuchan Pathian salle hna cu vancungmi nih an kan bawmh lai tiah fek tein an zumh khawh?
4 Jehovah i tuchan a salle cu vancungmi nih an bawm hna maw? An bawmh hna. A tak ti ahcun, biatu taktak hna kha ṭihnung in khamh awkah mit hmuh khawhmi tu cun tuchan ah an lang ti lo. Baibal chan hmanhah, vanmi cu a caancaan te lawngah cutin an rak lang. An rak bawmh hna nak a tam deuh cu tuchan bantukin, mit hmuh khawh lo in a si. Zeiti a si hmanhah, vanmi nih an kan bawmh ti kha Pathian salle nih an hngalh tikah an thazang a tlung ngaingai. (2 Siangpahrang 6:14-17) Kannih zong cutin si ve awk a kong ṭha kan ngei.
5. Phungchimnak rian ah vanmi an i tel ve ti kha Baibal nih zeitindah a langhter?
5 Jehovah a vancungmi hna nih a hleikhunmi rian i kan i tel tikah khin a kan siaherh khun. Cucu zei rian dah a si? Biathlam 14:6 ah a phi hitin kan hmuh khawh: “Vawlei cung mi vialte, phun kip, ram kip, holh kip le mi kip sin i thanh awk a simi zungzal Thawng Ṭha aa phorh i van lai i a zuangmi vancungmi pakhat kha ka hmuh.” Mah “zungzal Thawng Ṭha” cu donghnak a phak hlanah, “miphun vialte hna ca i tehte si awkah . . . khuaza kip ah chim a si lai” tiah Jesuh nih a rak chimchungmi, “Pennak kong Thawng Ṭha” he aa sengtlai ti cu a fiang. (Matthai 24:14) A taktak ahcun, vanmi nihcun direct in phung an chim lo. Mah a biapimi rian hi Jesuh nih minung kha a pek hna. (Matthai 28:19, 20) Mah rian liimnak ah a fim i a ṭhawngmi thlarau thilnung nih a kan bawmh ti theih cu thazang a tlunter a si lo maw?
6, 7. (a) Vanmi nih kan phungchimnak rian a kan bawmh ti kha zeinihdah a langhter? (b) Jehovah a vancungmi bawmhnak hmuh awkah zeitindah kan hnabei a sei khawh?
6 Vanmi nih kan rian a kan bawmh ti a langhtertu thil ngan a um. Tahchunhnak ah, Jehovah Hngaltu pawl phungchim an kal tikah, biatak hmuhnak caah Pathian sin i atu naite ah thlacam in bawmhnak a halmi he atu le tu an i tong tiah kan theih tawn. Mah hmuhtonnak hna cu aa tong sual menmi pei a si ko cu ti a si tawn. Vanmi bawmhnak in “Pathian kha ṭih u law a lianhngannak kha thangṭhat u” timi “vanlai i a zuangmi vancungmi” nih a rak thanhmi tuah awk i a cawngmi an tam deuh chin lengmang.—Biathlam 14:7.
7 Nang tah Jehovah i a ṭhawngmi vancungmi bawmhnak kha hmuh na duh maw? Na duh a si ahcun na phungchimnak rian ah na si khawh chungin ṭuan. (1 Korin 15:58) Jehovah pekmi mah a hleikhunmi rian kha lunglawm te le siang tein kan ṭuan ahcun vanmi bawmhnak kha kan hmu kho.
Nawlngei Bik Vancungmi Sinin Bawmhnak
8. Van ah Jesuh cu zei a sung ngaimi hmun dah a hmuh i, zeicah cucu kan caah tha petu a si?
8 Jehovah nih vancungmi bawmhnak phundang zong a kan pek. “A hmai cu nika bantuk a si” i khuaruahhar in “a ṭhawngmi vanmi” pakhat kong kha Biathlam 10:1 nih a chim. Mah langhnak i hmuhmi vanmi nih vancung lei ṭhawnnak in sunparnak a hmumi Jesuh Khrih a langhter ti cu a fiang. (Biathlam 1:13, 16) Jesuh cu vanmi a si taktak maw? A si tiah ti a si, zeicahtiah amah cu vancungmi bawibik a si. (1 Thesalon 4:16) Vancungmi bawibik ti cu zeidah a si? A sullam cu “a ngan bik mi vancungmi” asiloah “nawlngei bik vancungmi “ tinak a si. Jesuh cu Jehovah thlarau fale lakah a ṭhawng bikmi a si. Jehovah nih amah cu A vancungmi ralkapbu dihlak uktu ah a ser. Mah vanmi bawibik cu a ṭhawngmi bawmtu hrampi taktak a si. Zei lam hna in dah a si?
9, 10. (a) Kan sual tikah Jesuh nih “bawmtu” in zeitindah a kan tuahpiak? (b) Jesuh nunning in zei bawmhnak dah kan hmuh khawh?
9 Tarpa lamkaltu Johan nih hitin a rak ṭial: “Pakhatkhat nih sualnak nan tuah ahcun, a dingmi Jesuh Khrih, Pa sin i bia a kan chimpiaktu [“bawmtu,” NW] kha kan ngei ko.” (1 Johan 2:1) Zeicahdah Johan nih a hleiin “sualnak” kan tuah tikah Jesuh cu a kan “bawmtu” a si tiah a ti? Nifate kan sual ca le cu sualnak nih thihnak ah a kan hruai caah a si. (Phungchimtu 7:20; Rom 6:23) Sihmanhsehlaw Jesuh nih kan sualnak caah a nunnak kha tlanhnak ca in a pek. Kan caah zangfah a hmangmi Pa kha a kan nawlpiak. Kha bantuk bawmhnak kha kannih pakhat cio nih kan herh. Cucu zeitindah kan cohlan khawh lai? Kan sualnak i ngaihchih in Jesuh raithawinak a hram kha hngatchan in ngaihthiamnak hal a hau. Cun kha kan sualnak kha tuah-ṭhan ti lo zong a herh fawn.
10 Jesuh cu kan ca i a thih lengah a tlingmi nunning i zohchun awk zong a kan chiahpiak. (1 Piter 2:21) Sualnak ngan hrial in Jehovah Pathian lung kan ton khawh nakhnga a nunning nih lam a kan hmuhsak i zulh ding lam hngalh awk a kan bawmh. Cu bantuk bawmhnak kan hmuh caah kan i lawm a si lo maw? A dang bawmtu pek nan si rih lai tiah Jesuh nih a zultu hna kha a rak kamh hna?
Thiang Thlarau Bawmhnak
11, 12. Jehovah thlarau cu zeidah a si, cucu zeitluk in dah a ṭhawn i, nihin ah zeicah kan herh?
11 Jesuh nih hitin bia aa kam: “Ka Pa kha ka hal lai i bawmtu a dang, biatak thlarau cu an pek hna lai i nan sinah a zungzal in a um lai. Amah cu vawlei nih cun a hmuh khawh lo i a hngalh khawh lo caah a cohlang kho lo.” (Johan 14:16, 17) Mah “biatak thlarau” asilole thiang thlarau cu mi pakhat a si lo, Jehovah rianṭuan ṭhawnnak tu a si. Cu ṭhawnnak cu tah khawh a si lo. Jehovah nih vanraang sernak, a sunglawimi khuaruahhar thil hna langhternak le biathlam in a duhnak langhternak caah a ṭhawnnak kha a hman. Kha bantuk khan a thlarau kha Jehovah nih nihin ah a hman ti lomi hi, mah kha kan herh ti lo caah a si maw?
12 A si lo! Hi “harnak caan” ahhin Jehovah thlarau kha hlanlio nakin kan herh khun. (2 Timote 3:1) Thlarau nih hneksaknak hna kha inkhawh awkah thazang a kan pek. Jehovah le thlaraulei kan unaunu unaupa hna he a kan naihtertu ziaza ṭha hna kha ṭhanchoter awkah a kan bawmh. (Galati 5:22, 23) Cu a si caah Jehovah sinin mah a ṭha ngaingaimi bawmhnak khan zeitindah ṭhatnak kan hmuh khawh?
13, 14. (a) Jehovah nih a mi kha lunglawm tein thiang thlarau a pek hrimhrim hna tiah zeicah kan zumh khawh? (b) Thiang thlarau laksawng kan cohlang takak lo ti kha zei kan tuahsernak nih dah a langhter khawh?
13 Pakhatnak ah, thiang thlarau hmuh awk caah thlacam kan herh. Jesuh nih “hi tluk in nan ṭhalo ko na hin nan fale kha thil ṭha pek cu nan hngalh ahcun, vancung i a ummi nan Pa nih cun amah kha Thiang Thlarau a halmi cu zeitluk in dah a pek chinchin hna lai” tiah a rak ti. (Luka 11:13) A si, a ṭha bik cem Pa kha ruah tikah Jehovah lawnglawng a si. Zumhnak he lungtak in thiang thlarau kan hal ahcun, mah laksawng a kan pek duh lai lo cu a ruah in ruah khawh lomi a si. Cucaah biahal awk cu thlarau hmuh awkah kan hal maw? ti a si. Nifa kan thlacamnak ah mah kha kan hal chih awk a si.
14 Pahnihnak ah, mah thlarau kha kan hmu i mah he aa ruangin kan nung. A biana ah: Khrihfa pakhat cu hornak hmanthlak zoh duhnak lungthin kha tei aa zuam hei ti u sih. Mah a thurmi a zia kha doh awkah thiang thlarau bawmhnak kha thlacam in a hal. Cun Khrihfa upa kha ruahnak a hal hna i kha bantuk a thurmi thil pawng kal hmanh kha hrial awkah a fiangmi biakhiahnak tuah ding in ruahnak an cheuh. (Matthai 5:29) An ruahnak cheuhnak kha zei rel loin kha thil nih khan a leem rih ah tah? Bawmhnak caah thiang thlarau ka pe tiah a thlacamnak he aa ruang in a tuah maw a si? Asiloah, Pathian thlarau kha ngaihchiatter in kha laksawng sungh ding a tuah dah a si? (Efesa 4:30) A taktak ah, Jehovah sinin mah khuaruahhar bawmhnak kan hmu peng ti kha a fian nakhnga kan tuahnak kip ah a si khawh chung in i zuam kan hau.
Pathian Bia Sinin Bawmhnak
15. Baibal biapi ah kan chiah ti kha zeitindah kan langhter khawh?
15 Baibal cu kum tampi chung Jehovah i zumhawktlak a salle a bawmtu hna hrampi pakhat a si. A thiangmi Cathiang hi cauk dang sawsawh bantuk men in hmu loin, a ṭhawng ngaimi bawmtu hrampi a si tiah kan i chingchiah a herh. Mah bawmhnak kha cohlan tikah thazang chuah a hau fawn. Baibal rel kha kan tuah tawn lengmangmi zia pakhat ah canter kan herh.
16, 17. (a) Salm 1:2, 3 nih Pathian nawlbia rel a ṭhathnemnak kha zeitindah a langhter? (b) Salm 1:3 nih teima tein tuahṭuan a hauh kha zeitindah a langhter?
16 Salm 1:2, 3 nih Pathian lung a tongmi kong kha hitin a chim: ‘Aa lawmhnak cu Bawipa nawlbia tu ah khan a si i cu nawlbia cu chunzan in a ruat. Tiva tampi kam ah a khomi [“cinmi,” NW] thingkung, a caan hmaante in a thei a tlai i a hnah a uei bal lomi bantuk a si. A tuahmi thil kip ah khua awng a tong.’ Hi Baibal cang nih a chimduhmi hi na hmuthiam maw? Mah bia hna kha rel i tiva kam i a khomi thladem ngei thingkung pakhat aa dawhnak le a nuammi hmunhma kha a langhter tiah ti a fawi te. Cuka hmun i chunhnu caan tawite vun i hngilh ta cu a va nuam lai dah! Sihmanhsehlaw caṭialtu nih i dinhnak kong a kan ruahtermi a si lo. Cu he aa ralkah in, teima tein tuahnak kong tu a chimmi a si. Zeitin in dah a si?
17 Mah thladem ngei thingkung hi tiva kam ah a mah duh in a khomi thingkung pakhat a si lo ti kha philhhlah. A hmun thimmi ‘tiva tampi kam ah’ timh ciammam tein “cinmi” thingthei kung pakhat a si. Thingkung pakhat cu tiva pakhatnak tam ahcun zeitindah cin khawh a si lai? Thingthei dum a ngeitu nih a man a sungmi a thingthei kung hram pawl kha ti pek awkah kahcham tilak hna kha ṭha tein a cawh men lai. Ah, atu cu a chimduhmi a fiang cang! Kan thlarau lei zongah tampi tuah piak kan si caah mah thingkung bantukin kan thanchomi hi a si. A dik a hmaanmi biatak ti a kan pemi bupi he kan i hawikawm nain, mah tinvo cio kha mah nih tuah a si lai. Kan lungthin ah Pathian Bia biatak a phanh nakhnga ṭhate in ruah le kherhlai in mah a sungmi ti kha kanmah theng nih a dopmi kan si a herh. Cutin tuahnak thawngin, kannih zong theiṭha kan tlai ve lai.
18. Kan biahalnak Baibal in a phi kan hmuh nakhnga zeidah a herh?
18 Baibal kha hrawl i kan chiahnak men in ṭhatnak kan hmu lai lo. Baibal ca cu mit chinh in ca hmai kau i theih duhmi kan biahalnak a phi a umnak cahmai hmuh khawh a simi thil a si lo. Biachahnak kan tuah tikah, phummi rothil bantuk in “Pathian hngalhnak” kha kan cawh a hau. (Phungthlukbia 2:1-5) Cu sette ti kan herhmi he aa kheng bakmi Baibal cawnpiaknak kan hmuh nakhnga a tamdeuh cu teima te le ralring tein kherhlainak tuah a hau tawn. Kherhlainak tuahnak caah Baibal hrambunhmi cauk tampi kan ngei. Kha hna kha hmangin lungtho tein Pathian Bia fimnak kha kan cawh tikah, Jehovah bawmhnak kan hman taktak mi a si.
Zumtu Hawi Sinin Bawmhnak
19. (a) Vennak Innsang le I Hlau! capar hna kha zumtu hawi hmangin pekmi bawmhnak in zeicah hmuh awk a si? (b) Kan journal chung i capar pakhat thengte nih zeitindah an bawmh?
19 Jehovah i minung a salle cu pakhat le pakhat a zungzal aa bawmmi hrampi an hung si. Jehovah nih cucu a thleng cang maw? A thleng lo. Zumtu hawi sinin kan herhmi bawmnak kha a caan bak te ah kan rak hmuhmi kha kannih pakhat cio nih ruah khawh a si. A biana ah, hnemhnak na herh caan, harnak pakhat tonghtham awkah asiloah na zumhnak caah zuamcawhnak pakhat na ton i bawmhnak na herh tikah an bawmtu Vennak Innsang asilole I Hlau! i capar cheukhat kha naa cinken ti maw? Jehovah nih ‘a caan hmaante in rawl petu’ dingah rian a pekmi “zumhawk a tlakmi le a fimmi sal” hmangin an bawmh.—Matthai 24: 45-47.
20. Khrihfa upa hna nih zei lam hna in dah “minung laksawng” an si kha an langhter?
20 Asinain, a caancaan ahcun, direct deuh in zumtu hawi sinin bawmhnak hmuh a si tawn. Khrihfa upa pakhat nih kan lung a suk ngaimi phung a chimnak asiloah harnak ton caan ah tukhal lennak a kan tuahnak asilole kan derthawmnak kha hmu in khakha tei awkah zangfahnak tein a kan cawnpiak caan hna a um. Lawmhnak a langhtermi Khrihfa nu pakhat nih Khrihfa upa pakhat bawmhnak he aa tlaiin hitin a rak ṭial: “Lohmun rianṭuannak ah, caan a la i ka lungchung ummi phuan awkah a ka forh. Zahan ah, ka lungchung um bia ka ruah khawh hngami pakhatkhat ka tonter tiah Jehovah sinah thla ka cam. A thaizing ah, mah unaupa nih khan zawnruahnak in bia a ka ruah. Kum tampi chung Jehovah nih a rak ka bawmh ning kha hmuhthiam awkah a ka bawmh. Mah Khrihfa upa a ka thlahpiak caah Jehovah cungah kaa lawm.” Khrihfa upa pawl nih kha cubantuk lam hna in khan nunnak lam cung i inkhawhnak ngeih awkah Jesuh Khrih hmangin Jehovah nih a kan pekmi “minung laksawng” an si kha an langhter.—Efesa 4:8, NW.
21, 22. (a) Filipi 2:4 i hmuhmi cawnpiaknak kha khrihfabu chungmi nih an zulh tikah zeidah a chuak? (b) Zeicahdah a hmete mi zangfah tuahserhnak hmanh hmual a ngeih.?
21 Khihfa upa lawng si loin, zumh-awktlak Khrihfa pakhat cio nih “midang duhning kha hmuh thiam i zuam u law nanmah duhnak lawng kha ruat hlah u” timi thawchuahhnawhmi nawlbia hi zulh an duh. (Filipi 2:4) Mah cawnpiaknak kha Khrihfabu chungmi nih an hman tikah lunghmui ngai a simi zangfah tuahserhnak a chuak. Tahchunhnak ah, innchungkhar pakhat cu duak tiah ngaihchiatnak a phunphun an tong. Papi pakhat nih a fanute kha dawr ah aa kalpi. Inn an ṭinlei ah, mawṭaw accident an tong. A fanute cu a thi; a pa cu cei ngaiin hma a pu. Sizung in a chuah tikah, hmasa ahcun zeihmanh a tuah kho lomi mi tlamtling lo a si. A nupi cu amah lawng nih an pa kha a zohkhenh caah a ba ngaite i a lungthin a mawlmok. Cucaah khrihfabu i nuva pahnih nih mah a ngaih a chiami nuva hna kha an inn ah an lak hna i zarh tam nawn chung an zohkhenh hna.
22 A ngaite ti ahcun zangfah tuahsernak cu mah bantuk ngaihchiatnak thil le mah zawnruah lo lawng a si lo. Cheukhat bawmhnak cu a hmete. Sihmanhsehlaw zeitluk hmemi zangfahnak a si hmanhah, mah caah kan i lawm a si lo maw? Bawmhnak na herh liote ah unaunu asilole unaupa pakhat sin in zangfahnak bia fangkhat asilole zawnruah tuahsernak pakhat na hmuhmi kha na ruat kho maw? Kha bantuk khan Jehovah nih a kan zohkhenh tawn.—Phungthlukbia 17:17; 18:24.
23. I zuam in pakhat le pakhat kan i bawmh tikah Jehovah nih zeitindah a hmuh?
23 Midang bawmh awk caah Jehovah hmanmi si na duh maw? Cu tinvo ṭha cu aa hung. Kha bantuk naa zuammi kha Jehovah nih a sunhsak taktak. A Bia nih hitin a ti: “Mi sifak cungah zangfahnak na ngeih ahcun Bawipa kha chaw na coih bantuk a si. Bawipa nih tlingte in an cham lai.” (Phungthlukbia 19:17) Unaunu unaupa hna ca i kan i peknak thawngin lunglawmhnak nganpi a ra. (Lamkaltu 20:35) Mi sinin a dang tein a ummi hna nih cun kha bantuk mi va bawmhnak i i lawmhnak siseh mi nih rak bawmh i i lawmhnak siseh an ngei lo. (Phungthlukbia 18:1) Cucaah, pakhat le pakhat thazang kan i pek khawh nakhnga Khrihfa pumhnak ah hmaan tein hmun khat ah i pum u sih.—Hebru 10:24, 25.
24. A luan ciami caan i Jehovah i a sunglawimi thil khuaruahhar kan hmuh lo ruangah kan sung tiah zeicahdah ruah ding a si lo?
24 Jehovah i a kan bawmh ning lam hna ṭhate in ruah cu lung a nuamhter a si lo maw? Jehovah nih aa tinhmi tlinter awkah a sunglawimi khuaruahhar thil a rak tuah lioah kan rak chuah rih lo caah, kan sung tiah ruah a herh lo. A biapi taktakmi cu zumhawktlak tein kan hmunh nakhnga kan herhmi bawmhnak vialte Jehovah nih a kan pek mi tu hi a si. Zumhnak ah inkhawhnak kan ngeih hna ahcun, tuanbia lakah Jehovah i a sunglawi bik cem khuaruahhar hna le a sungparmi a rianṭuannak hna kha nung buin kan hmuh hna lai! “Bawmhnak cu Jehovah sinin ka hmuh” timi kum 2005 i kan kum cang baibal kha kan hna a tla ti kan langhter khawh nakhnga Jehovah nih dawtnak in a kan bawmhmi kha cohlang in tlingte in hman awkah biakhiak hna u sih.—Salm 121:2, NW.
Zeitindah Na Ruah?
Tuchan ah Jehovah nih
• vancungmi hmangin
• a thiang thlarau hmangin
• thawchuahhnawhmi a Bia hmangin
• zumtu hawile hmangin kan herhmi bawmhnak kha zeitindah a kan pek?
[Cahmai 24nak i Hmanthlak]