Felfai Tein Tehtekhaan Awkah Cawnpiak Kan Si
“Jerusalem khua le Judea ram vialte le Samaria ram ah le vawlei cung khuazakip ah ka tehte nan si lai.”—LAMKALTU 1:8.
1, 2. Piter rian cu zeidah a si i, aho nih dah cu rian cu a pek?
“NAZARETH khuami Jesuh [nih] . . . mi sinah thawngṭha chim awk le amah cu Pathian nih a nungmi he a thi mi he an biaceihtu ah a ser cang ti tehte khaangtu ah a kan fial.” (Lamkaltu 10:38, 42) Mah bia in khan Piter nih Kornelias le a innchungkhar sinah thawngṭha chimtu si dingah rian a hmuhnak kha a rak fianter.
2 Zei tikah dah Jesuh nih mah rian kha a rak pek? A thoṭhanmi Jesuh nih van a kai hlante i a rak chimmi kha Piter nih a ruat i a si men lai. Kha lioah khan zumhawktlak a zultu pawl kha Jesuh nih hitin a rak ti hna: “Jerusalem khua le Judea ram vialte le Samaria ram ah le vawlei cung khuazakip ah ka tehte nan si lai.” (Lamkaltu 1:8) Asinain, mah hlan ah khan Jesuh zultu pakhat a simi Piter nih Jesuh a zumhnak kong midang chimh ding a si ti kha a hngalh.
Kum Thum Chung Cawnpiaknak
3. Jesuh nih zei khuaruahhar thil dah a rak tuah i Piter le Andru kha zei sawmnak dah a rak chimh hna?
3 C.E. 29 i tipil a in dih hnu thla tlawmpal ah, Jesuh nih Galili Rili ah nga a rak tlaimi Piter le Andru kha phung a va chimh hna. Zan khuadei sur an vorh len nain zeihmanh an tlai lo. Asinain, Jesuh nih hitin a rak ti: “Ti thuhnak lei ah khin na lawng hi hei thawn deuh law nangmah le na hawile nih khan nan sur khan nga kha chep hna u.” Jesuh chim ningin an tuah tikah “nga cu tamtuk hringhran an tlaih hna caah an sur cu tleh dih hnek aa zal.” Khuaruahhar kha a hmuh tikah Piter cu ṭih phang in a um nain, Jesuh nih “na thinphang hlah, atu thawk in mi na tlai cang hna lai” tiah a ti.—Luka 5:4-10.
4. (a) Jesuh nih a zultu pawl tehte an khaan khawh nakhnga zeitindah a timhtuah hna? (b) Jesuh le a zultu pawl phungchim rianṭuannak kha tahchunh ahcun zeitindah a si lai?
4 Piter le Andru lawng si loin Zebedi fapale Jeim le Johan nih an lawng kha an kal tak hna i Jesuh kha an zulh colh. Kum thum dengmang, Jesuh phungchimnak ah amah he an kalṭi i thawng-ṭha chimtu in cawnpiak an si. (Matthai 10:7; Marka 1:16, 18, 20, 38; Luka 4:43; 10:9) Mah caan a dih lei C.E.33 Nisan 14 ah Jesuh nih hi ti hin a rak ti hna: “Keimah a ka zummi paoh nih ka tuahmi thil hi an tuah khawh ve lai—hi hna nakin a ngan deuhmi hmanh hi an tuah khawh hna lai.” (Johan 14:12) Jesuh zultu nih Jesuh tuah mi nak tam deuh in felfai tein tehte an khaan lai. Nai i an cawnmi bantuk in anmah le hnu i zultu a hung si hngami nih “khuazakip” ah “caan dongh tiangin” tehte an khaan lai.—Matthai 28:19, 20.
5. Zei lam hna in dah Jesuh nih a zultu pawl a cawnpiak mi hna in ṭhatnak kan hmuh khawh?
5 Kannih cu “chan donghnak” ah kan nung. (Matthai 24:3) Hmasa zultu hna he kan i lawh lo nak cu, Jesuh he kal ṭi in mi phung a chimhmi hna kan hmuh lomi hi a si. Asinain, zeitindah phung a rak chim i a zultu kha zeidah a rak cawnpiak hna timi kong Baibal kan relnak thawngin mah cawnpiaknak khan ṭhathnemnak kan hmu kho ko. (Luka 10:1-11) Asinain, hi capar ahhin Jesuh nih a zultu pawl a rak hmuhsakmi hna a biapi tukmi, phungchimnak rian cung i lungput hmaan ngeihnak kong kha i ruah a si lai.
Mi Ca Siaherhnak
6, 7. Zei a sining nih dah Jesuh a phungchimnak kha hmual a ngeihter i, khakha zeitindah kan i zohchunh khawh?
6 Zeiruangah Jesuh nih hmual ngei ngaiin tehte a rak khaan? A ruang pakhat cu mi kha an zawn a ruah tuk hna ca le a siaherh hna caah a si. Salm caṭialtu nih Jesuh cu “a dermi le sifakmi cungah zangfahnak a ngei” lai tiah a rak chimchung. (Salm 72:13) Kha profet chimchungbia kha a rak tlinter taktak. Voikhat i a cangmi kha Baibal nih hitin a chim: “Mi zapi kha a hmuh hna tikah, khaltu a ngei lomi tuu bantuk in lung rethei le awlok chong in an um kha a hmuh hna caah a zaang an fak ngaingai.” (Matthai 9:36) Sualnak ngan a tuahmi hna hmanh nih a siaherh hna nak kha an hmuh i mah nih khan amah sinah a hnuh hna.—Matthai 9:9-13; Luka 7:36-38; 19:1-10.
7 Nihin ah kha bantuk in mi kan siaherh hna nak kan langhter a si ahcun hmual a ngei ve lai. Phungchim rianṭuannak i kal hlanah, kan kalpimi thawngpang hi an caah zei tluk indah a biapit ti kha caan tlawmpal la in ruat. An tonmi harnak hna hi Pennak lawng nih a tei khawh lai ti zong kha ruat. Aho nih dah thawngpang hi a lehrulh lai ti na hngalh lo caah, a ṭhatnak lei in hmuhnak ngei. Na va fuhpanhmi a dang pakhat cu amah bawmh awkah nangmah bantuk pakhatkhat a hmuh nakhnga thla a rak cammi a si kho men!
Dawtnak Nih A Forhfial
8. Jesuh i zohchunh in, thawngṭhabia chim dingah a zultu hna cu zeinihdah a forh hna?
8 Jesuh chimmi thawngṭhabia cu minung hmai ah a biapi bik thil hna asimi Jehovah duhnak tlinternak, A min upatnak le Cungnung bik a nawlngeihnak fianternak he aa sengtlai. (Matthai 6:9, 10) Jesuh nih a Pa a dawt ruangah a dongh tiang zumhfek tein um awk le kha kong a fianter laimi Pennak kong kha felfai tein thanh awkah forhfial a si. (Johan 14:31) Nihin Jesuh zultu hna zong kha nih khan a forh ve hna i, phungchimnak ah teima tein an i tel. Lamkaltu Johan nih thawngṭhabia chim u law zultu ah va ser hna u timi nawlbia tel in ‘a nawlbia kan zul ti cu Pathian kan dawt ti nak a si ko’ tiah a rak ti.—1 Johan 5:3; Matthai 28:19, 20.
9, 10. Pathian dawtnak lengin, zei kan dawtnak nih dah felfai tein tehte khaan awkah a kan forh?
9 Jesuh nih a zultu hna kha hitin a rak ti hna: “Nan ka dawt ahcun ka nawlbia kha nan zulh hna lai. Ka nawlbia kha a cohlang i a zulmi paoh cu keimah a ka dawmi kha an si.” (Johan 14:15, 21) Cucaah, Jesuh dawtnak nih biatak tehte khaan ding le a dang Jesuh fialmi ngaih dingah a kan forhfial awk a si. A thawhṭhan hnu a langh lio voikhat ah, Jesuh nih Piter kha “ka tuu fatete kha zohkhenh hna, . . . Ka tuu kha zohkhenh hna, . . . Ka tuu kha zohkhenh hna” tiah a rak ti. Cutin tuah awkah Piter kha zei nih dah a rak forh. ‘Na ka daw maw? . . . na ka daw maw? . . . na ka daw maw?’ tiah Jesuh nih Piter a rak hal ṭhan lengmang lioah a phi kha a langhter. A si ko, Jesuh a dawtnak nih Piter kha felfai tein tehte khaan awk, Jesuh “tutete” kawl awk le thlaraulei tuukhal pakhat si dingah a rak forh.—Johan 21:15-17.
10 Nihin ah, Piter bantuk in Jesuh he naih tein kan um ṭi lo. Asinain, Jesuh nih kan caah zeidah a tuah ti cu ṭha tein kan hngalh. “Mi vialte kan ca i a thihnak” a dawtnak ngan nih kan lungthin kha a forhfial. (Hebru 2:9; Johan 15:13) “Khrih nih kan ca i a ngeihmi dawtnak nih cun a kan uk. . . . minung nih hin an nunchung ah anmah ca lawngah nung ti loin, . . . [Khrih] ca i an nun nakhnga caah a si” timi ca a rak ṭial lio i Piter ruahmi kha kan ruat ve. (2 Korin 5:14, 15) A kan dawtu Jesuh dawtnak kan upat ngaingai ti le felfai tein tehte khaan awk rian i biatak tein kan ṭuannak thawngin amah kan dawt ti kha kan langhter. (1 Johan 2:3-5) Jesuh raithawinak man kha sawsawh in ruat in phungchimnak rian zei rel loin um kha kan duh bal lai lo.—Hebru 10:29.
A hmaanmi Lungthin Peknak
11, 12. Hi vawlei i Jesuh a rat hnawh chan cu zeidah a si i, khakha zeitindah a lungthin a rak pek?
11 Pontius Pilat hmai i a um lioah, Jesuh nih “hi vawlei ah ka chuah chan le ka rat chan cu biatak kong chim hi a si” tiah a rak ti. (Johan 18:37) Jesuh nih biatak tehte khaannak kha zeihmanh in a lung vahvaihternak nawl a pe lo. Cucu Pathian duhnak a si.
12 Kha kong he aa tlaiin Jesuh kha Satan nih a rak hneksak. Jesuh tipil a in dih hnu tlawmpal ah, Satan nih “vawlei cung peng le ram vialte le an sunparnak vialte kha” pe in hi vawlei minthangmi i cannak kha kan pek lai a rak ti. (Matthai 4:8, 9) A hnu ah, Judah mi nih siangpahrang ah ser an rak duh. (Johan 6:15) Mah pek an timhmi kha Jesuh nih a cohlan ahcun thil ṭha a chuak lai, siangpahrang a si ahcun minung ca ṭhatnak a tuah khawh deuh lai tiah cheukhat nih an ti khawh men. Asinain, Jesuh nih kha bantuk ruahnak kha a duh lo. A lungthin a rak pekmi cu biatak tehte khaan tu kha si.
13, 14. (a) Zeinihdah Jesuh kha a lungthin a rak vaihter lo? (b) Thilri lei in a si a fak ko nain, zeidah a tuah khawh?
13 Cupin ah, Jesuh nih chaw le va dawi zulhnak in khan a lungthin a rak vaihter lo. Cucaah amah cu mi rum a rak si lo. Amah pumpak inn hmanh a rak ngei lo. Voikhat ah “cenghngia nih cun kua an ngei i vate cu bu an ngei, sihmanhsehlaw Mi Fapa cu riahnak hmun hmanh a ngei lo” tiah a rak chim. (Matthai 8:20) Baibal ningin Jesuh a thih lioah, a sungmi a ngeihmi thil cu a hnipuan lawng kha a si i khakha Rom ralkap pawl nih camcawhfung zuh in an rak i lak. (Johan 19:23, 24) Jesuh nuncan cu a sung maw? Sung hrimhrim hlah!
14 Jesuh nih mi rum bik a tuah khawh mi nak tamdeuh in midang ca ṭhatnak a rak tuh. Paul nih “nannih nih kan Bawipa Jesuh vel kha nan hngalh ko: a rum nain nanmah ruangah sifak ah a cang, cu ti a can cu a sifahnak khan nannih kha rumter an duh hna caah a si” tiah a rak chim. (2 Korin 8:9; Filipi 2:5-8) Jesuh cu thilri lei in a si a fak ko nain, toidormi kip a tlingmi zungzal nunnak an hmuh khawh nakhnga lam a rak hun. A cungah kan i lawm tuk! Cun Pathian duhnak tuahnak ah a lungthin a pek caah a hmuhmi laksawng caah kan i lawm taktak!—Salm 40:8; Lamkaltu 2:32, 33, 36.
15. Chawva nakin zeidah man a ngei deuh?
15 Jesuh kha fakpi in i zohchunh aa zuammi tuchan Khrihfa hna zong chawva dawizulhnak in an lung an i vaihter lo. (1 Timote 6:9, 10) Mi rummi cu nuncan nuam ngaiin an nung ko nain hmai lei zungzal ca cu an chawva cungah aa hngat lo ti kha an hngalh. Khrihfa pakhat a thih tikah, a thilri le a chawva hna cu Jesuh a rak thih lio i a hnipuan a ca i man a rak ngeih lo bantuk khan a caah man a ngei ve ti lai lo. (Phungchimtu 2:10, 11, 17-19; 7:12) Khrihfa pakhat a thih tik i a ngeihmi man a ngei taktakmi cu Jehovah le Jesuh Khrih he aa pehtlaihnak pakhat lawng kha a si.—Matthai 6:19-21; Luka 16:9.
Ralchannak Kha Dontu Siter Hlah
16. Jesuh nih ralchannak kha zeitindah a rak leh?
16 Jesuh nih biatak tehte a khaannak i a lungthin a pekmi kha ralchannak nih a lung a vaihter lo. Hi vawlei i a phungchim rianṭuannak kha raithawinak ca i a thihnak in a dong lai ti a hngalhmi hmanh nih a lung a rak donghter lo. Jesuh kong kha Pual nih hitin a rak chim: “Hmailei lunglawmhnak aa ruahchanmi ruangah khan vailam cung i thih ningzahnak cu zeihmanh ah a rel lo i atu cu Pathian bawiṭhutdan orhlei kam ah khan a hung ṭhu cang.” (Hebru 12:2) Jesuh nih “ningzahnak cu zeihmanh ah a rel lo” ti kha philhhlah. A ka dohtu pawl nih zeitindah an ka ruah hnga ti kha a thin a rak phang lo. Pathian duhnak tuahnak tu ah khan a lungthin a rak pek.
17. Jesuh inkhawhnak in zeidah kan i cawn khawh?
17 Paul nih Jesuh inkhawhnak kha hmangin Khrihfa hna kha hitin a forh hna: “A inmi thil kha ruat hna hmanh u, mi sual mi nih kha tlukin an huatnak a in peng ko kha ruat hmanh u. Cucaah cun nan lung dong in maw ngol sual lai u ci.” (Hebru 12:3) A hmaan ko, ralchannak asilole nihsawhnak nifa ton cu tha a dih kho. “Pakhatkhat tuah” awkah a kan forhmi rualchan ceihphainak a si kho menmi hi vawlei tukforhnak doh tikah tha a hung ba kho. Sihmanhsehlaw Jesuh bantuk in fek tein Pennak kha kan nunnak ah hmasa bik ah chiah in Jehovah bawmhnak kha kan i ruahchan.—Matthai 6:33; Rom 15:13; 1 Korin 2:4.
18. Piter sin i Jesuh chimmi bia in zei cawn awk ṭha dah kan i lak khawh?
18 Jesuh nih a thih cang lai nak kong a zultu pawl a rak chimh tik hna ah khan a lung a vai lo ti kha a lang. Piter nih Jesuh kha amah le amah i “zangfah” awkah a rak forh i “hi thil cu na cungah tlung sawh hlah seh” tiah a rak ti. Jehovah duhnak tuah awk i a biakhiahnak a derter khomi zei paoh kha Jesuh nih a rak ngai duh lo. Jesuh cu aa hun i mer i Piter cu “Satan, ka sinin chuak tuah. Na ruahnak hi Pathian ruahnak si loin minung ruahnak a si caah nang cu a ka tlukrilhtertu lung na si” tiah a rak ti. (Matthai 16:21-23, NW) Kannih zong minung ruahnak kha al awkah cubantukin biakhiahnak tuah hram u sih. Cu nakin, Pathian ruahnak tu nih kan hruai zungzal hram seh.
Ṭhathnemnak Taktak A Chuak
19. Khuaruahhar thil tampi a rak tuah ko nain, Jesuh i a biapi bikmi Pathian rian cu zeidah a si?
19 Messiah a si kha fianternak caah Jesuh nih khuaruahhar thil tampi a rak tuah. Mithi hmanh a rak thawhter hna. Mah a tuahmi nih khan mibu lungthin kha a rak lak, asinain Jesuh cu luhmuhzi tuah awk men caah hi vawlei ah a rak ra mi a si lo. Biatak tehte khaan awkah a rak ra. Pumsa lei thil a tuahpiakmi hna zei ṭhathnemnak paoh chikkhat ca lawng a si ti kha a hngalh. A thoṭhan mi hna hmanh an thi ṭhan lai. Biatak a chimnak thawng lawng in cheukhat kha zungzal nunnak a hmuhter khawh hna lai.—Luka 18:28-30.
20, 21. A hmaanmi Khrihfa hna nih ṭhatnak tuahnak ah zeitindah an tlarit?
20 Nihin mi cheukhat nih sizung an saknak in siseh, vawlei sifakmi hna caah a dang rian hna an ṭuannak thawngin siseh Jesuh tuahmi rian ṭha kha cawn an i zuam. Thil a cheukhat ah, an pumpak ngeihmi tampi dih in an tuah caah an lung thawhnak cu lawmh awk a tlak ko; asinain zei an tuahmi pek chanhnak paoh caan tawite ca lawng a si. Pennak lawng nih zungzal luatnak a chuahter lai. Cucaah, Jehovah Hngaltu hna cu Jesuh bantukin mah Pennak kong biatak tehte khaannak ah an lungthin an pek.
21 A taktak ah, a hmaanmi Khrihfa hna cu ṭhatnak an tuah. Paul nih “cucaah a caan kan ngeih fate, mi cungah ṭhatnak tuah kha i zuam u sih law zumhnak lei i kan rualchan a simi hna cungah khan i zuam khun u sih” tiah a rak ṭial. (Galati 6:10) Har caan ah asilole mi pakhatkhat bawmhnak a herh tikah, kan innpa asilole Khrihfa unau hna cungah “ṭhatnak tuah” kha kan i cawngor lo. Sihmanhsehlaw, biatak tehte khaannak kha biapi bik ah kan chiah.
Jesuh Nunning In Cawng
22. Zeicah Khrihfa hna nih an innpa kha phung an chimh hna?
22 Paul nih “thawngṭha cu chim loin rak um ning law zeitluk in dik ka caah a poi hnga” tiah a rak ṭial. (1 Korin 9:16) Phungchimnak nih a chimtu he a theitu he nunnak a hmuhter hna caah, thawngṭhabia kha zei rel loin a rak um lo. (1 Timote 4:16) Kannih zong kan phungchim rianṭuannak kha cutin kan hmuh ve. Kan innpa kha bawmh kan duh hna. Jehovah kan dawt kha langhter kan duh. Jesuh kan dawtnak le a kan dawtnak ngan kan upatnak kha langhter kan duh. Cucaah, thawngṭha kha kan chim i “minung duhnak kha si ti loin Pathian duhnak tu” kha kan tuah.”—1 Piter 4:1, 2.
23, 24. (a) Khuaruahhar ngatlaihnak in khan zei cawn awk dah kan i lak? (b) Ahote dah nihin ah felfai tein tehte a khaang?
23 Jesuh bantuk in, mi nih an kan nihsawh tikah asilole kan thawngpang kha thinhung ngaiin an hlawt tikah kan lung kan vaihter ve lo. Jesuh nih Piter le Andru kha ka zul u tiah a rak auh hna lio i khuaruahhar a tuahmi khan thil pakhat kan i cawn. Jesuh nawl ngai in, langhternak in nga um lo dawh a si nak ti hmanhah kan sur kan vorh ahcun kan ngatlaihnak cu ṭhatnak tampi a chuak lai ti kha kan hngalh. Khrihfa ngatlaitu tampi cu nga um lo dawh a simi ti ah kum khua in an ṭuan hnuah nga tampi an tlaih. A dang cu nga tampi hmuh khawhnak ah an i ṭhial i cuka ahcun tampi an tlaih. Biatak tehte kan khaannak kha kan ngol lai lo. Phungchimnak rian cu liim a si cang tiah vawlei cung khua zei ka hmanhah Jesuh nih a thanh rih lo ti kha kan hngalh.—Matthai 24:14.
24 Atu nuai ruk leng a simi Jehovah Hngaltu hna cu ram 230 leng kai ah an rian a tam. Kum 2005 February 1, chuah Vennak Innsang ah kum 2004 rianṭuannak kum chung ah vawlei pumpi an rianṭuannak report kha a um lai. Kha report nih khan phungchimnak rian cung i Jehovah thluachuahnak nganpi kha a langhter lai. Hi thil ningcang a hmunh rih lio caan ah, Paul i lung a thawhtermi hi bia hi kan lungah camter hram u sih: “Phung kha chim hna; a biapi ti in tuah.” (2 Timote 4:2, NW) Mah rian kha liim a si cang tiah Jehovah nih a ti hlan tiang felfai tein tehte khaang peng hna u sih.
Tu kum thawkin Jehovah Hngaltu hna i kum khat chung report cu January 1 Vennak Innsang ah telh a si ti lai lo. Cunak cha cun, February 1 chuah ah telh a si lai.
[Cahmai 13nak i Hmanthlak]
Na Let Kho Maw?
• Jehsuh nih a zultu pawl a cawnpiaknak hna in zeitindah ṭhatnak kan hmuh khawh?
• Phung a chimhmi hna cungah Jesuh nih zei lungput dah a rak ngeih?
• Felfai tein tehte khaan awkah zeinihdah a kan forh?
• Jesuh bantuk in, zei lam hna in dah Pathian duhnak tuahnak ah kan lung kan pek khawh?