Fim Law Pathian Kha Ṭih!
“BAWIPA ṭih cu fimnak hramthawknak a si.”—PHUNGTHLUKBIA 9:10.
1. Zeiruangah mi tampi nih Pathian ṭihnak he aa tlaimi ruahnak kha hngalhthiam an i harh?
PATHIAN a ṭihmi tiin mi pakhatkhat cu auh a si tikah thangṭhat a si tiah rak ruah caan a um. Nihin ah minung tampi nih Pathian ṭih cu chan nih a liam tak cangmi le hngalhthiam awk a harmi ruahnak in an hmuh. ‘Pathian cu dawtnak a si ahcun zeicah ṭih awk a si?’ tiah biahalnak an tuah men lai. Annih caah ṭihnak cu a ṭhalo lei kap le therphannak phun khi a si. Asinain, a hmaanmi Pathian ṭihnak cu a sullam a kau ngaimi a si i intuarnak menmen lawng a si lo.
2, 3. A hmaanmi Pathian ṭihnak ah zeidah aa tel?
2 Baibal nih cun Pathian ṭihnak kha duh nungmi sining ṭha in a hman. (Isaiah 11:3) Pathian ṭih timi cu upatnak nganpi pek le Pathian lung a lawmhter lomi thil tuah duh hrimhrim lo kha a si. (Salm 115:11) Cu ṭihnak ahcun Pathian ziaza phunglam hna kha i tlaih in felfai tein zulh le Pathian nih a hmaan/hmaanlo a ti ningin nun duhnak hna aa tel. Hi bantuk a ṭhahnemmi ṭihnak cu “Pathian cungah ngeih awk a biapi bikmi lungput a si i mah nih a ṭhami umtu ziaza a chuahter i ṭhatlonak vialte a hrialter” tiah cherhchannak pakhat nih a ti. Cucaah, “BAWIPA ṭih cu fimnak hramthawknak a si” tiah Baibal nih a timi hi aa tlak ngai.—Phungthlukbia 9:10.
3 Angaite in, Pathian ṭihnak ah minung nunning kap tampi aa tel. Mah cucu fimnak he lawng si loin lawmhnak, daihnak, rumnak, nunsaunak, ruahchannak, bochannak le fekte in zumhnak hna he zong aa pehtlai. (Salm 2:11; Phungthlukbia 1:7; 10:27; 14:26; 22:4; 23:17, 18; Lamkaltu 9:31) Mah ṭihnak cu zumhnak le dawtnak he aa tlai ngaimi a si. Cun Pathian le minung hawi he i pehtlaihnak he zong aa tlai. (Deuteronomi 10:12; Job 6:14; Hebru 11:7) Pathian ṭihnak ah vancung kan Pa nih pakhat cio cungah siaherhnak a ngei ti le kan sualnak kha ngaihthiam awkah timhcia in a um ti zumh fiannak ngeih zong aa tel. (Salm 130:4) A sualnak aa ngaichih lomi pawl lawng nih Pathian ṭihnak an ngeih awk a si.a—Hebru 10:26-31.
Jehovah Ṭih Awkah Cawnnak
4. ‘Bawipa Pathian ṭih’ awk cawnnak ah zei nih dah a kan bawmh khawh?
4 Fimnak in biakhiahnak tuah le Pathian thluachuahnak hmuhnak dingah Jehovah ṭih cu a biapi bikmi a si caah zeitindah “BAWIPA Pathian ṭih” cu kan cawn khawh lai? (Deuteronomi 17:19) Pathian a ṭihmi nule pa pawl i zohchunhawk hna kha “kanmah cawnpiaknak caah” Ca Thiang chungah ṭial an si. (Rom 15:4) Pathian ṭihnak a sullam taktak kha kan hngalhthiam nakhnga mah zoh-chunhawk hna lak i pakhat a simi hlan lio Israel Siangpahrang David kong kha i ruah u sih.
5. David kha tuu a khalhnak nih Pathian ṭih awkah zeitindah a bawmh?
5 Israel Siangpahrang hmasa bik Sawl nih Pathian kha ṭih loin minung a ṭih hna caah Jehovah nih a rak hlawt. (1 Samuel 15:24-26) David tu cu a nunning le Jehovah he pehtlaihnak ṭha a ngeihmi nih Pathian a ṭih taktakmi a si kha a langhter. A ngakchiat lio ah apa tuu kha David nih a rak khalh tawn hna. (1 Samuel 16:11) Zan i arfi le thlapa vang tangah tuu a khalhnak in Jehovah ṭih kha a hun thiam. A kau hringhranmi vanrang i hmun bite lawng kha David nih a rak hmuh khawh nain Pathian cu upat awk tlak a si ti kha hmaan tein biachahnak a rak tuah khawh. Ahnu ah hitin a rak ṭial: “Nangmah na sermi van le an hmun ciote ah na chiahmi hna thlapa le arfi hna khi ka zoh tikah, minung hi zeidah a si i na hnak kar ah na tenh?”—Salm 8:3, 4.
6. Jehovah lianhngannak a hngalhnak nih David thinlung kha zeitindah a umter?
6 David nih arfi in a khatmi van a kauh zia le amah a hmet ning kha aa tahchunh tikah a lung a rak suk ngaingai. Mah nih lauter can ah Jehovah kha hitin a rak thangṭhat: “Van nih khin Pathian sunparnak fiangte in a langhter i a tuahmi thil kha fiang tein a kan hmuhsak.” (Salm 19:1) David nih Pathian kha a upat caah Jehovah he pehtlaihnak ṭha a hun ngei i a tlingmi BAWIPA phunglam cawn le zulh a rak duh. “Pathian, nangmah lawnglawng hi a ṭhawngmi na si, nangmah lawnglawng hi khuaruahhar a tuah khotu na si. BAWIPA, tuah seh ti na ka duhmi kha ka cawnpiak law na nawl kha felte in ka zulh lai; ka lungthin a dih umnak in na rian ka ṭuan nakhnga ka cawnpiak ko” tiah hla a sak tikah David a lungthin zeitindah a um lai kha ruat hmanh.—Salm 86:10, 11.
7. Goliath doh awkah Pathian ṭihnak nih David kha zeitindah a bawmh?
7 Filistine mi hna nih Israel ram kha an doh tikah pe kua le a cheu a sangmi an mi ṭhawng bik Goliath nih: “Nanmah caah mi pakhat i thim u law, keimah sinah hin rung seh. Keimah kha a ka doh khawh i a ka thah ahcun, kannih cu nan sal kan si ko lai” tiah Israel mi pawl kha zawmhtaih in a rak ti hna. (1 Samuel 17:4-10) Sawl le a ralkap pawl cu an thin a phang ngaingai nain David tu cu a thin a phang lo. Jehovah pakhat lawng ṭih ding a si ti le zeitluk ṭhawnnak a ngeimi an si hmanh ah minung cu ṭih awk an si lo ti kha a rak hngalh. Cucaah David nih Goliath kha “Israel ralkapbu hna i Pathian, . . . min khan kan chuah hnawh; . . . hi aa pummi vialte nih hin, vainam le fei in BAWIPA khamhnak hi a si lo ti kha an hngalh nakhnga; zeitintiah hi raltuknak cu BAWIPA ta a si” tiah a ti. Cuticun David nih Jehovah bawmhnak in an mi ṭhawngpa cu lungherhchehnak le lung pakhat in a tei.—1 Samuel 17:45-47.
8. Baibal chung i Pathian a ṭihmi hna zohchunhawk nih zeidah a kan cawnpiak?
8 Kannih zong David a tonmi harnak asiloah ral bantuk phun kha kan ton khawh men. Cuti a si ahcun zeidah kan tuah khawh? David le hlan lio a dang zumhawktlak pawl bantukin Pathian ṭih bu tein kan tuah khawh. Pathian ṭihnak nih minung ṭihnak kha a tei khawh. Pathian i zumhawktlak sal Nehemiah nih ralchanhtu hna i hneknak a tongmi a phun hawi Israel mi pawl kha hitin a rak forh hna: “Annih cu ṭih hna hlah u. A lian a ngan i ṭih a nungmi Bawipa kha hngal camcin tuah u.” (Nehemiah 4:14) David, Nehemiah le a dang zumhawktlak Pathian salle pawl nih Jehovah ṭanpinak thawngin Pathian pekmi rian kha tlamtling in an rak ṭuan khawh. Kannih zong Pathian kan ṭih ve a si ahcun kan ṭuan khawh ve lai.
Pathian Ṭih Bu In Harnak Kha Teinak
9. Zei bantuk thil sining tangah dah David nih Pathian a ṭihnak kha a rak langhter?
9 David nih Goliath kha a thah hnu ah, Jehovah nih teinak tampi a rak hmuhter. Asinain, a nahchuakmi Sawl nih a hmasa ah hnawhnam in, cun zernak in le a hnu ah a ralkapbu in David kha thah awkah aa zuam. David cu siangpahrang si dingin Jehovah nih bia a kamh nain kum tam nawn a rak zam, ral a rak do i Jehovah nih siangpahrang a pek lainak caan kha a rak hngak. Hi caan chung vialte, David nih a hmaanmi Pathian ṭihnak a rak langhter.—1 Samuel 18:9, 11, 17; 24:2.
10. David nih thil ṭihnung a ton lio ah Pathian ṭihnak kha zeitindah a rak langhter?
10 Voikhat ah, David cu Goliath a rak umnak Gath khua i Filistine siangpahrang Akhish sinah a rak zam. (1 Samuel 21:10-15) Mah siangpahrang salle nih David cu kan ral a si tiah an rak phuan. Kha bantuk ṭihnungmi thil umtuning ah zeitindah David nih a rak tuah? A lungthin dih umnak in Jehovah sinah thla a rak cam. (Salm 56:1-4, 11-13) A luat nakhnga a rak i hruhter nain a luatnak taktak cu Jehovah thawngin a si kha a hngalh. David cu a thinlung dihlak in Jehovah aa bochan i a zumhnak nih Pathian a ṭih taktakmi a si kha a langhter.—Salm 34:4-6, 9-11.
11. David bantukin hneksaknak tangah Pathian ṭihnak zeitindah kan langhter khawh?
11 Nan harnak tei awkah kan bawmh hna lai timi Pathian biakamnak kan zumhnak thawngin David bantukin Pathian ṭihnak kan langhter khawh ve. David nih hitin a rak ti: “Na nunnak kha BAWIPA pe law, amah kha i bochan law amah nih an bawmh lai.” (Salm 37:5) Cucaah kan harnak kha kanmah nih zeihmanh tawnghtham loin Jehovah nih a ṭhatter lai tiah i ruahchan in Pathian kut ah chiah kha a chim duhmi a si lo. David cu thla lawng cam in zeihmanh tuah loin a rak um lo. Jehovah pekmi thazang ṭhawnnak le fimnak kha hmangin harnak tei awkah a rak i zuam nain minung zuamnak lawngin hlawhtlinnak hmuh khawh a si lo kha David nih a hngalh. Kannih zong cuticun kan tuah ve awk a si. Kan si khawh chungin kan i zuam hnu lawngah Jehovah kut ah kan chiah lai. Jehovah i bochan loin zeihmanh kan tuah khawh lo caan a um tawn. Hi bantuk caan cu Jehovah ṭihnak langhternak ding caan a si. David nih lungthin takte in a rak chimmi hi bia in hin thazang kan i lak khawh: ‘Jehovah cu amah a ṭihmi hna hawikom a si.’—Salm 25:14, NW.
12. Zeicah thlacamnak kha biapi tuk in chiah a herh i zei bantuk lungput dah a zungzal in kan ngeih lo awk a si?
12 Cucaah, kan thlacamnak le Pathian he kan i pehtlaihnak kha a biapi in kan ruah awk a si. Jehovah sin i thla kan cam tikah “Pathian a fuhmi paohpaoh nih cun, Pathian cu a um i amah a kawl mi cu laksawng a pek hna, ti kha” kan zumh awk a si. (Hebru 11:6; Jeim 1:5-8) Pathian nih a kan bawmh tikah lamkaltu Paul nih ruahnak a kan cheuh bantukin “lunglawmhnak” kan langhter awk a si. (Kolose 3:15, 17) Hmuhtonnak tampi a ngeimi chiti thuhmi Khrihfa pakhat nih a chimmi minung bantuk si cu kan duh lo. Hitihin a chim: “Pathian kha rian ṭuanpiaktu vancungmi in an ruah. An herh tikah an kut rinter in hei kawh i an duhmi kha an hmuh tikah Pathian cu an philh.” Cu bantuk lungput cu Pathian ṭihnak ngeih lo a si.
Pathian Ṭihnak Thinlung A Zorchuk Tikah
13. David nih zeitik lio ah dah Pathian phunglam a rak zulh lo?
13 Harnak caan chungah Jehovah sinin bawmhnak a hmuhmi nih khan David cu Pathian ṭihnak a ngeihter i a zumhnak kha a ṭhawnter. (Salm 31:22-24) Asinain, David cu thil sining pathum ah harnak nganpi tong tiangin Pathian a ṭihnak a rak zor. A pakhatnak ah Jehovah i biakamnak kuang kha Jerusalem lei ṭhialnak ah Pathian nawlbia ningin Levi mi nih an liang in put canah leng in a rak phorhter hna. Leng mawngtu Uzzah nih Kuang a sawnmi kha a kut in a hei banh i zeirel lo in a tuah caah a thi colh. Uzzah nih sualnak nganpi a tuah nain a taktak ti ahcun David nih Pathian nawlbia a zulh lo ruangah kha thil ṭihnung kha a rak chuakmi a si. Pathian ṭih timi cu a phunglam ningin tuah tinak a si.—2 Samuel 6:2-9; Nambar 4:15; 7:9.
14. David nih Israel mi a rel hnanak nih zeidah a chuahter ?
14 A hnu ah, Satan forhnak ruangah David nih Israel mi ralkap pawl kha a rak rel hna. (1 Chanrelnak 21:1) Cuti David nih a tuahnak in khan Pathian a ṭih lo kha a langhter i mah ruangah Israel mi 70,000 an rak thi. David cu Jehovah hmai ah aa ngaichih nain amah le a mi hna nih sunghnak nganpi an rak ton.—2 Samuel 24:1-16.
15. Zeiruangah David nih nu le pa sualnak a tuah?
15 David nih chikkhat te cu Pathian ṭihnak a ngeih lo caah Uriah nupi Bathsheba he sualnak a rak tuah. Zuanzamnak asiloah midang nupi mitthit hmanh a palh kha David nih a hngalh. (Exodus 20:14, 17) David nih Bathsheba ti aa kholh a hmuhnak caan in khan mah thil cu aa thawk. David nih Pathian a ṭih taktak a si ahcun khulrang in a mit a ṭhial lai i a ruahnak kha ka dang ah a kalter lai. Cuti tuah can ah, Pathian ṭihnak ngei ti lo tiangin David nih a ṭhawngmi duhnak he a zoh ti cu a fiang. (Matthai 5:28; 2 Samuel 11:1-4) Jehovah nih a chung muru tiangin a hngalh dih cikcek kha David nih a philh.—Salm 139:1-7.
16. Palhnak a tuahmi ruangah David nih zei harnak dah a in?
16 David le Bathsheba a thli in sualnak an tuah hnu ah fapa pakhat an ngei. A rauh hlan ah, Jehovah nih profet Nathan a thlah i David sualnak kha a langhter. Cu tikah, a lung a hung pem i Pathian ṭihnak a ngei ṭhan i a sualnak aa ngaichih. Pathian nih a hlawt nakhnga lo le a thiang thlarau kha a sinin a lak nakhnga lo Jehovah kha a nawl. (Salm 51:7, 11) Jehovah nih David kha a ngaihthiam i dantatnak a ṭhumhpiak nain a sualnak ruangah a chuakmi harnak hna in cun a khamh lo. An fate a thih hnu in David innchungkhar ah ngaihchiatnak aa thawk. Pathian a ṭihnak a zor caah a sunghmi cu a va ngan hringhran dah!—2 Sa-muel 12:10-14; 13:10-14; 15:14.
17. Sualnak tuah ruangah a chuakmi lungkuainak kha tahchunhnak pe.
17 Nihin zongah cu bantukin Pathian kha ṭih loin thil ṭhalo kan tuah ahcun caan saupi tiang a ṭhalomi a phichuak kan in lai. Ramdang ah rian a ṭuanlio ah Khrihfa a simi a va nih a cungah zumhawktlak loin a um kha a nupi nih a hngalh tikah a lau tuk ning le ngaihchia ngai in a ṭah kha na mitthlam ah cuanter hmanh. A va nih a nupi upatnak le zumhnak a hmuh ṭhan nakhnga a caan tampi a lak lai. Pathian a ṭih taktak a si ahcun mah bantuk ngaihchiatnak kha a hrial khawh lai.—1 Korin 6:18.
Pathian Ṭihnak Nih Sualnak Tuah Kha A Kham
18. Satan aa tinhmi cu zeidah a si i zei lam dah a hman?
18 Satan nih vawlei ziaza kha khulrang in a ṭumchukter. A hlei in a hmaanmi Khrihfa hna ziaza kha hrawh a duh. Cuti a si nakhnga, thinlung ah a lut colhmi, mit nih a hmuhmi le hna nih a theihmi kha a hman. (Efesa 4:17-19) A thurhnawmmi hmanthlak, biachim holhrel le a ziaza a ṭhalomi hna he lakhruak in i ton tikah zeitindah na lehrulh lai?
19. Khrihfa pakhat kha tukforhnak a tonmi tei awkah Pathian ṭihnak nih zeitindah a bawmh?
19 Europe ram i Khrihfa upa a ṭuanmi, innchungkhar i pa a simi sibawi Andre kong hi ruat hmanh.b Sii-inn i zan rian a ṭuan caan ah sibawi nu pawl nih nu le pa sualnak tuah an sawm i a chantling ah minung lungthin aa suaimi ca tete kha an benhpiak. Andre nih mah an lemsoinak kha fekte in a rak al. Cu lengah, a ṭhalomi pawngkam in i ṭial awkah hmun dang ah rian a kawl. Nihin ah, a umnak ram i Jehovah Hngaltu hna zung ṭengnge ah caan cheu in rian a ṭuan. Pathian ṭih a ṭhat le thluachuah tampi a chuahter ti kha a sining nih a langhter.
20, 21. (a) Pathian ṭihnak nih sualnak tuah lo dingin zeitindah a kham khawh? (b) A hun changtu capar ah zeidah kan i ruah lai?
20 A hmaan lomi ruahnak kha kan thinlung chungah kan riahter peng a si ahcun kanmah ta a si lomi thil hmuhnak ding caah a sung tukmi Jehovah he kan i pehtlaihnak hlohthlau duh tiangin kan si kho. (Jeim 1:14, 15) Asinain, Jehovah kan ṭih a si ahcun kan ziaza a rawhter khomi minung, hmunhma, tuahsernak hna le nuamh-saihnak hna kha kan hrial hna lai. (Phungthlukbia 22:3) Zeitluk hmanh in ningzah kan huah le mah ṭhatnak hlawt in kan nun hmanh ah Pathian mithmai ṭha hmuhnak he tahchunh tikah zeihmanh lo an si. (Matthai 5:29, 30) Pathian ṭih timi cu a thurhnawmmi thil vialte, ziaza a rawhtermi thil paohpaoh kha tuah hramhram loin ‘santlailo thil kha biapi i kan rel sual nakhnga lo’ kan mit kaa dang ah ṭhial kha a si. Cuti kan tuah a si ahcun, Jehovah nih ‘kan cungah ṭhatnak a tuah’ lai i kan herh taktakmi thil kha a kan pek lai tiah kan zumh khawh.—Salm 84:11; 119:37.
21 Pathian ṭihnak taktak he tuahṭuan cu a zungzal in fimnak lam a si. Lawmhnak taktak hrampi zong a si fawn. (Salm 34:9) Mah khakha a hun changtu capar nih a fianter lai.
[A Tanglei Fianternak]
a Min thlen a si.
b Jehovah Hngaltu hna chuahmi 2001, December 1, Vennak Innsang i “Jehovah Ṭihnak Lungput Ngeih I Zuam” timi capar kha zoh.
Na Fianter Kho Maw?
• Pathian ṭihnak ah zei bantuk Khrihfa ziaza hna dah aa tel?
• Pathian ṭihnak nih minung ṭihnak kha zeitindah a tlauter?
• Thlacamnak ah aa tlakmi hmuhnak kan ngeih kha zeitindah kan langhter khawh?
• Pathian ṭihnak nih sualnak tuah kha zeitindah a kham?