Jehovah Cu Sunhsak A Hmangmi Pathian A Si
“Pathian cu miding lo a si lo. Rian nan rak ṭuanmi le . . . amah nan dawtnak kha a philh lai lo.”—HEBRU 6:10.
1. Jehovah nih Moab minu Ruth a sunsak kha zeitindah a rak langhter?
JEHOVAH nih a duhnak tuah awkah lungthin tak tein a kawlmi hna i an i zuamnak kha a sunsak tuk i laksawng tampi a pek hna. (Hebru 11:6) Zumhfekmi Boaz nih Pathian sining hna lak i duhnungmi mah sining kha a hngalh caah, nuhmei a simi a vapa nu kha dawtnak in a zohkhenhtu Moab minu Ruth kha hitihin a rak ti: “BAWIPA nih na tuah ciami cu in rul sehlaw, BAWIPA, Israel Pathian . . . nih cun, tampi in laksawng in pe ko seh!” (Ruth 2:12) Pathian nih Ruth kha thluachuah a pe maw? A pek taktak! Amah kong cu Baibal ah ṭial a si! Cu lengah, Boaz he an i um i Siangpahrang David le Jesuh Khrih i an pi a hung si. (Ruth 4:13, 17; Matthai 1:5, 6, 16) Hi zohchunh awk cu Jehovah nih a salle a sunhsak hna a langhtermi Baibal chung khumhmi tampi lak ah pakhat lawng a si.
2, 3. (a) Jehovah a langhtermi sunsaknak kha zei nih dah chingchiah awk tlak a siter? (b) Zeiruangah Jehovah nih a hmaanmi sunsaknak a langhter khawh? Tahchunhnak in fianter.
2 Jehovah nih amah leikap in sunsaknak langhter a bau ahcun mah cucu dinlonak in a ruah. Hebru 6:10 nih hitin a chim: “Pathian cu miding lo a si lo. Rian nan rak ṭuanmi le nan Khrihfa hawi nan rak bawmh tawn hna i atu zongah nan bawmh ko rih hna thawngin nan langhtermi amah nan dawtnak kha a philh lai lo.” Minung cu a sual i Pathian sunparnak a bau ko na hmanh in Pathian nih amah a ṭihzahmi a sunsak hna a langhter cu i cinken awk tlak hrimhrim a si.—Rom 3:23.
3 Kan tlin lo caah Pathian ṭihzah in kan tuahṭuannak hna cu san a tlai lo, Pathian thluachuah hmuh awkah kan i tlak lo tiah kan ruah men lai. Asinain, Jehovah nih kan lungput le kan sining hna kha a hngalhthiam i thinlung dihlak in a rian kan ṭuanmi kha a sunsak. (Matthai 22:37) Tahchunhnak ah: Nu a simi pakhat nih a cabuai cungah a man a fak lem lomi ṭhi laksawng an pekmi kha a hmuh. Mah laksawng cu man a ngei lo tiah a kam ah a thawn khawh men. Asinain, laksawng he aa tel chihmi catlap ah mah laksawng cu a fanute nih ka khawnmi tangka dihlak in ka cawkmi a si tiah a ṭial. Atu ah a nu nih laksawng kha hmuhning thar in a hmuh cang. Mitthli ha in a fanute kha a kuh lai i a sunsak zia kha a chim lai.
4, 5. Sunsaknak langhternak ah Jesuh nih Jehovah kha zeitindah aa zohchunh?
4 Jehovah nih kan lungput le ri kan ngeihmi kha tling tein a hngalh caah kan si khawh chungin kan ṭuanmi cu a tlawm ah siseh, a tam ah siseh a sunsak. Hi kong ah Jesuh nih a Pa kha tling khitkhet in aa zohchunh. Baibal chung i nuhmeinu phaisa sen pahnih kong kha ruat ṭhan hmanh. “Jesuh nih a pawngkam kha a hei zoh i Biakinn tangka chiahnak ah mirum mi nih an thawhlawm an thlak kha a hmuh hna; cun a si a fak ngaingaimi nuhmeinu zong nih phaisa sen pahnihte a thlak ve kha a hmuh. Cun aa thawh i, ‘Hihi kan chimh hna: Hi a si a fakmi nuhmeinu nih hin a taktak ti ahcun hawi dang vialte nakin tam deuh a sanh. Zeicahtiah a dang tham nih cun an chawva a hleivuang kha pei an pek ko cu, sihmanhsehlaw hi nu nih hin cun, a si a fak na tein, a nunnak ding ca i aa chiahmi kha pei a dihlak in a pek cu,’ tiah a ti.”—Luka 21:1-4.
5 Mah nu cu nuhmei le sifak a simi a sining kha Jesuh nih a hngalh caah a pekmi thawhlawm i a man taktak kha a hngalhthiam i a rak sunsak. Jehovah zong cuticun a si ve tiah kan chim khawh. (Johan 14:9) Kan sining zeiti a va si hmanh ah sunhsak a hmangmi Pathian le a Fapa i mithmai ṭha hmuh khawh a si hngalh cu zeitluk thazang petu dah a si?
Pathian A Ṭihmi Ethiopia Mipa kha Jehovah Nih Laksawng A Pek
6, 7. Ebed-melek a sunsak kha Jehovah nih zeiruangah le zeitindah a rak langhter?
6 Jehovah nih a duhnak a tuahmi pawl a sunsak hna kha Cathiang ah atu le atu a langhter lengmang. Pathian a ṭihmi Ethiopia mipa Ebed-melek he an i pehtlaihning kha ruat hmanh. Jeremiah he chan chankhat ah a nung ṭimi a si i zumhawktlak lo Judah Siangpahrang Zedekiah sinum a si. Judah siangpahrang fapa hna nih profet Jeremiah kha dohnak chuahter awkah a forhtu tiah a ding loin an puh i rawl ṭam in thihter awkah tikhor chungah an thlak kha Ebed-melek nih a hngalh. (Jeremiah 38:1-7) Jeremiah kha a chimmi thawngpang ruangah an huat tuk ti a hngalh i a nunnak caah ṭihnung a si nain Ebed-melek nih siangpahrang kha a rak nawl. Ralṭha ngai in Ethiopia mipa nih hitihin a chim: “Siangpahrang ka bawipa, hi mi hna nih profet Jeremiah cung i an tuahmi hi a ṭha hrimhrim lo. Annih nih khor chungah an hlonh i khua chung i rawl a um ti lo tikah a umnak hmun ah khan rawl ṭam in a thi lai.” Siangpahrang nawlpeknak bangin Ebed-melek nih mi 30 a kalpi hna i Pathian profet kha a rak khamh.—Jeremiah 38:8-13, NW.
7 Ebed-melek nih zumhnak in a tuahmi kha Jehovah nih a rak hmuh i cu zumhnak nih cun a rak ngeih khawh menmi zei ṭihnak hmanh kha tei awkah a rak bawmh. Cuticun, Jehovah nih a rak sunsak kha a langhter i Jeremiah hmangin Ebed-melek kha hitin a rak ti: “Zohhmanh, hi khua kong i ka bia kha ṭhatnak caah si loin chiatnak caah ka tlinter lai . . . Sihmanhsehlaw nang cu khi ni ah cun kan huhphenh lai i na ṭihmi hna kut chungah chanh na si lai lo . . . Nang cu him tein kan zohkhenh lai . . . na ka bochan caah . . . na nunnak he tal cun na luat lai.” (Jeremiah 39:16-18) A ṭha lomi Judah siangpahrang fapa hna kut in le Jerusalem a hrawktu Babilon mi hna kut in Jeremiah a khamh bantukin Jehovah nih Ebed-melek kha a rak khamh. Salm 97:10 nih hitihin a ti: “[Jehovah nih] a mi kha a huhphenh hna i miṭhalo pawl kut chung khan a chuah hna.”
“A Thlite In Nan Tuahmi A Hmutu Nan Pa Nih Khan Laksawng An Pek Hna Lai”
8, 9. Jesuh nih a langhter bantukin Jehovah nih zei bantuk thlacamnak dah a sunsak?
8 Pathian ṭihzah in kan nun kan langhtermi kha Jehovah nih a sunsak ti a fiantermi a dang langhternak kha thlacamnak he aa tlaimi Baibal chimmi kongah kan hmuh. “Miṭha mi hna thlacamnak cu [Pathian] nih a lawmh” tiah mifim pakhat nih a rak ṭial. (Phungthlukbia 15:8) Jesuh chan lio i biaknak lamhruaitu pawl cu lungtak tein si loin mi thangṭhat hmuh duh ah zapi hmai ah thla an rak cam. “Annih cu an laksawng kha tling tein an hmu cang” tiah Jesuh nih a rak ti. Asinain a zultu pawl kha hitihin a rak cawnpiak hna: “Nannih cu thla nan cam tikah, nan inn khaan chungah va lut u law, innka vaa khar khumh u law, cuticun hmuh khawh lomi nan Pa sinah khan va cam u. Cun a thli tein nan tuahmi a hmutu nan Pa nih khan laksawng an pek hna lai.”—Matthai 6:5, 6.
9 Mi zapi hmai i thlacam kha Jesuh nih sual a rak phaw lo, amah thengte thil sining cheukhat ah zapi hmai ah thla a rak cam. (Luka 9:16) Mi dang thangṭhatnak hmuh ruah ah si loin lungthin tak tein thla kan cam tikah Jehovah nih a sunsak tuk. Pumpak kan thlacamnak hna cu Pathian kan dawtnak le amah kan i bochannak zeitluk in dah a thuh ti a langhtermi a si. Cucaah, Jesuh nih thlacam awkah hmun king a rak kawl tawn lengmang cu khuaruahhar awk a si lo. Voikhat cu “zingkate” ah cuticun a rak tuah. Cun caan dang ah “thlacam awkah amah lawng tein tlang ah khan a kai.” Lamkaltu 12 a thim hna hlan zan ah amah lawng in zan khuadei thla a rak cam.—Marka 1:35; Matthai 14:23; Luka 6:12, 13.
10. Kan thlacamnak nih lungtak te le lungthin cungah zeitluk tiang dah a si kha a langhter ahcun zeidah fekte in kan zumh khawh?
10 Jehovah nih a Fapa lungthin tak tein thla a cammi ṭha tein a ngaih lai kha ruat hmanh! A chel caan ah Jesuh nih “aihramnak le mitthli he thlacamnak le nawlnak kha a tuah . . . caah Pathian nih a theih.” (Hebru 5:7; Luka 22:41-44) Kan thlacamnak nih kan lungthin taktak le a thuh puanh kha a langhter tikah vancung kan Pa nih ṭha tein le sunsak ngai in a ngaih lai ti kha kan zumh khawh. A hmaan ko, Jehovah nih “a autu vialte hna cu an pawng khan a um hnawh hna, lungtak in a autu vialte hna cu.”—Salm 145:18.
11. A thli tein kan tuahmi he aa tlai in Jehovah nih zeitindah a ruah?
11 A thli tein a sin i kan thlacamnak kha Jehovah nih a sunsak ahcun a thli tein nawl kan ngaihnak zong a sunsak hrimhrim lai! A si, Jehovah nih a thli tein kan tuahmi kha a hngalh. (1 Piter 3:12) Kanmah lawng in kan um lio ah Jehovah cungah zumhawktlak tein a nawl kan ngaihnak thawngin “lung ṭengnge” kan ngeih lo kha kan langhter a si, mah lungthin nih kan lungput kha a thianter i dinnak ah a kan fehter. (1 Chanrelnak 28:9) Cu bantuk ziaza hna nih Jehovah lung a lawmhter!—Phungthlukbia 27:11; 1 Johan 3:22.
12, 13. Zeitindah kan lungthin le kan ruahnak kan kilven khawh i zumhawktlak zultu Nathanael bantuk kan si khawh?
12 Cu ti a si caah, zumhawktlak Khrihfa hna nih thinlung le ruahnak a thurhnawmhtermi zaang-ennak le hurnak hmanthlak hna zohnak ti bantuk a thlithup in tuahmi sualnak hna kha an doh. Sualnak cheukhat kha mi hmuh lo dingin thuh khawh a si nain, “Pathian sinin thuh khawhmi thil zeihmanh a um lo. Sermi thil vialte hi an dihlak in a hmaika ah an lang dih hirhiar” ti kha kan hngalh. (Hebru 4:13; Luka 8:17) Jehovah duh lomi thil hrial awkah fakpi in kan i zuamnak thawngin a thiangmi chiaṭha thleidannak lungthin kan ngei i Pathian nih a kan cohlan ti kan hngalh caah kan i lawm. A si, “zeizong vialte ah Pathian nawl a zul i a hmaanmi thil a tuah zungzal i a bia bia hmaan le biatak a si” mi hna kha Jehovah nih a sunsak hna ti cu lunghrin awk a um lo.—Salm 15:1, 2.
13 Asinain, ṭhatlonak in a khatmi hi vawlei ah zeitindah kan lungthin le ruahnak cu kan kilven khawh? (Phungthlukbia 4:23; Efesa 2:2) Thlarau lei timhtuahpiakmi vialte in ṭhathnemnak tling tein i lak lengah aa tlak lomi duhnak kha pawi in sualnak a hrin nakhnga lo khulrang in tuahnak thawngin a ṭhalomi kha hrial in a ṭhami kha tuah awkah i zuam awk a si. (Jeim 1:14, 15) Jesuh nih Nathanael kha “amah khi hlenthawinak lungthin zeihmanh a ngei lomi a si” a ti bantukin nang zong ti na si ahcun zeitluk in dah naa nuamh lai kha ruat hmanh. (Johan 1:47) Barthelomeo tiah zong auh a simi Nathanael cu Jesuh lamkaltu 12 lakah pakhat a hung si.—Marka 3:16-19.
‘Zumhawk A Tlakmi le Zaangfah A Thiammi Tlangbawi Ngan’
14. Mari tuahserning lehrulhnak ah Jesuh le mi dang zeitindah an i thleidan?
14 “Hmuh khawh lomi Pathian” Jehovah “mui” a simi Jesuh nih a thiangmi lungthin he Pathian rian a ṭuanmi hna sunsaknak ah tling khitkhet in a Pa nawl aa cawn zungzal. (Kolose 1:15) Tahchunhnak ah, Jesuh a nunnak aa pek hlan ni nga ah Jesuh le a zultu cheukhat cu Bethani khua i Simon inn ah khual an si. Cu ni zanlei ah, Lazaruh far, Martha nau Mari nih “a man a sung ngaingaimi (kumkhat rianṭuan man tluk a simi) zihmui phun ṭha phun” kha a rak i put i Jesuh a lu le a ke ah a toih. (Johan 12:3) A cheukhat nih “zeicahdah hi thil hi hiti in a sawksam ee?” tiah an ti. Asinain Jesuh nih Mari tuahmi kha hmuhning dang in a hmuh. A rauh hlan ah a thih lai le vui a si lainak kha ruat in Jesuh nih mah tuahsernak kha siannak nganpi le sullam ngei ngaimi in a rak hmuh. Cucaah Jesuh nih Mari kha mawhchiat can ah a rak thangṭhat. “Hi thawngṭha hi vawlei cung khua zakip i an chimnak hmun paoh ah, a tuahmi thil hi amah philhlonak ah chim a si zungzal ve lai,” tiah a ti.—Matthai 26:6-13.
15, 16. Jesuh minung in a nunnak le Pathian rian a ṭuannak nih zeitindah ṭhatnak a kan pek?
15 Cu bantukin sunsak a hmangmi Jesuh kan Hruaitu a si cu zeitluk in dah a ṭhat! Jesuh vawlei ah minung in a nunnak nih khan Jehovah chiahpiakmi rian caah timhlamh a siter—a hmasa bik ah chiti thuhmi Khrihfa hna le a hnu ah vawlei cung dihlak caah Tlangbawi Ngan le Siangpahrang in rian a ṭuan lai.—Kolose 1:13; Hebru 7:26; Biathlam 11:15.
16 Vawlei a rat hlanpi in Jesuh cu minung sinah a lungthin a um i a rak duhdawt tuk hna. (Phungthlukbia 8:31) Minung pakhat in a nunnak thawngin Pathian rian a ṭuanmi hna kan tonmi hneksaknak hna kha tling tein a hun hngalhthiam. Lamkaltu Paul nih hitin a rak ṭial: “[Jesuh cu] zeizong kip ah a ‘unau’ hna bantuk kha a si awk hrim a si i cu bantukin a si cu . . . zumh awk a tlakmi le zaangfah a thiammi an tlangbawi ngan a si nakhnga caah a si. Amah hrimhrim nih khan tukforhnak le temhinnak kha a rak in cang caah tukforhnak a ingmi kha a bawmh khawh hna.” Jesuh cu “kan santlaihlonak ah kan cung i zaangfahnak a ngei kho” mi a si. Zeicahtiah “kanmah bantuk tein tukforhnak a ing vemi a si, sihmanhsehlaw sualnak bel zeihmanh a tuah lomi a si.”—Hebru 2:17, 18; 4:15, 16.
17, 18. (a) Asia peng chung i Khrihfabu pasarih sin cakuat nih Jesuh ngeihmi sunsaknak he aa tlaiin zeidah a langhter? (b) Chiti thuhmi Khrihfa hna cu zeicaah dah timhlamh an rak si?
17 Jesuh nih a zultu pawl an inmi tukforhnak biapi tuk in a chiah kha thihnak in a thawhṭhan hnu ah a fiang chinchin. Lamkaltu Johan sinin Asia peng chung i a ummi Khrihfabu pasarih sin i a ṭialmi a cakuat kha ruat hmanh. Smarna khua Khrihfabu kha Jesuh nih hitihin a rak ti: “Na harnak kha ka hngalh ko hna; sifak na si kha ka hngalh.” A ngaite in Jesuh nih hitihin a chim a si, ‘Na harnak kha ṭha tein ka hngalhthiam; Zeidah na in ti kha hmaan tein ka hngalh.’ Jesuh nih thih tiang hmanh in harnak a rak in caah zaangfahnak ngei in hitin fekṭhup in zumhnak a rak ngeihter: “Thihnak a si hmanh ah ka cungah zumhawktlak tein um ko u: cun nunnak sui luchin kha kan pek hna lai.”—Biathlam 2:8-10.
18 Khrihfa bu pasarih sin a ṭialmi a cakuat ah Jesuh nih a zultu pawl an tonmi harnak ṭha tein a hngalh ti le zumhfek tein an nunnak kha a sunsak ti a langhtermi tampi a um. (Biathlam 2:1–3:22) Jesuh nih ca a kuatmi hna hi van ah amah he uk ṭi ding ruahchannak a ngeimi chiti thuhmi Khrihfa an si ti kha i cinken. An Bawipa keneh a zulmi mah hna cu an ṭuan dingmi rian caah timhlamh an si i an ṭuan dingmi rian cu harnak ruangah tha a dermi hna kha Khrih tlanhnak man raithawinak in ṭhatnak hmuh awkah zaangfahnak nganpi he bawmh ding kha a si.—Biathlam 5:9, 10; 22:1-5.
19, 20. “Mibu nganpi” in dirhmi hna nih Jehovah le a Fapa an sunsak hna kha zeitindah an langhter?
19 Jesuh nih chiti thuhmi pawl kha a dawt hna bantukin zumhfekmi “tuu dang” zong a dawt ve hna. Cu hna lak in nuai tampi cu atu “mibu nganpi . . . phun kip, ram kip, holh kip le hrin kip chungin” dirh an si i annih cu ‘harnak nganpi’ khan an luat lai. (Johan 10:16; Biathlam 7:9, 14, NW) Annih nih Jesuh i tlanhnak man raithawinak le zungzal nunnak ruahchannak kha an sunsak caah Jesuh sin lei ah an i pum. An sunsaknak kha zeitindah an langhter? ‘Chun zan in Pathian rian an ṭuannak’ thawngin a si.—Biathlam 7:15-17.
20 Cahmai 12 in 15 i langhtermi 2006 rianṭuannak kum i vawlei pumpi rianṭunnak report nih mah zumhawktlak in phungchimtu hna nih Jehovah i a thiangmi rian kha “chun zan” in an ṭuan ti kha fiang tein a langhter. Hi kum chungah a tang rihmi chiti thuhmi Khrihfa tlawmpal hna he phungchimnak rian ah suimilam 1,333,966,199 an hman i cucu kum 152,283 he aa tluk!
Sunsaknak kha Langhter Peng!
21, 22. (a) Sunsaknak langhternak he aa tlai in tuchan Khrihfa hna nih a hlei khun in zeidah an i ralrin awk a si? (b) A hun changtu capar ah zei kong dah kan i ruah lai?
21 Jehovah le a Fapa nih a tling lomi minung he an i pehtlaihnak ah a thuk hringhran i a ngan taktakmi sunsaknak an langhter. Asinain, ngaihchiat awk a simi cu mi tampi nih Pathian kha biapi ah chia loin anmah duhnak tu kha biapi in an chiah. “Ni hmanung bik” caan ah a nung mi hna kong kha langhter in Paul nih hitin a rak ṭial: “Mi cu anmah zawn lawng aa ruatmi, a hak a kaumi, . . . lawmh [sunsak] a hngal lomi . . . an si lai.” (2 Timote 3:1-5) Cu bantuk mi hna cu a hmaanmi Khrihfa pawl he an i thleidang tuk, a hmaanmi Khrihfa hna cu lungtak tein thlacamnak, lungtho tein nawlngaihnak, thinlung dihlak in a rianṭuannak thawngin an caah Pathian tuahmi vialte an sunsak kha an langhter!—Salm 62:8; Marka 12:30; 1 Johan 5:3.
22 Jehovah nih dawtnak in a kan pekmi thlarau lei timhtuahpiakmi hna lak i a cheukhat kha a hun changtu capar ah kan i ruah lai. Mah “laksawng ṭha” kong kan i ruah lio ah sunsaknak kan ngeihmi cu a ngan chinchin lai.—Jeim 1:17.
Zeitindah Na Leh Lai?
• Jehovah nih sunsak a hmangmi Pathian a si kha zeitindah a langhter?
• Kanmah lawngte kan um lioah zeitindah Jehovah lung kan lawmhter khawh?
• Jesuh nih sunsaknak kha zeiti lam hna in dah a rak langhter?
• Jesuh minung in a nunnak nih zaangfah hmangmi le sunsak hmangmi uktu si dingin zeitindah a rak bawmh?