‘Pathian Ṭih in Thiannak’ Zulh Khawh I Zuam U

Jehovah Pathian cu a thian tuk caah Baibal nih, “A thiang, a thiang, a thiang, Lian Ngan Bik Bawipa cu” tiah a ti. (Isa. 6:3; Biat. 4:8) “Thiannak” caah Hebru le Grik biafang cu thurhhnawmhnak he aa ṭhenmi thianhlimh-nak asiloah biaknak lei thiannak ti sullam a ngei. Pathian thiannak cu ziaza lei tling khikkhet in thiannak a si i mah kha a herh tuk hringhranmi in Pathian nih a hmuh.

A thiangmi Pathian Jehovah nih amah a biami hna kha pumsa lei lawng si loin ziaza le thlarau lei ah thian dingin aa ruahchan lai a si lo maw? Jehovah nih a mi hna thiang hna seh ti a duh kha Baibal nih fiangte in a langhter. 1 Piter 1:16 ah hitin kan rel: “Keimah ka thian caah nannih zong nan thian ve awk a si.” A tling lomi minung nih Jehovah thiannak cu kan i cawn kho taktak lai maw? Cawn khawh a si ko, asinain Jehovah thiannak kha tlingte in cun kan i cawn kho lai lo. A thiangmi thlarau lei umtuning ah Pathian kan biak i amah he pehtlaihnak ṭha kan ngeih ahcun a thiangmi in Pathian nih a kan hmuh lai.

A thiang lomi ziaza in a khatmi hi vawlei ah zeitindah thiannak kan ngeih peng khawh? Zei ziaza hna dah kan hrial awk a si? Kan biachim le tuahsernak ah zei thlennak hna dah tuah a herh? Hi kong he aa tlai in B.C. 537 kum ah Babilon in an ram ah a kir ṭhanmi Judah mi Pathian nih a halmi hna in zeidah kan i cawn khawh kha zoh u sih.

‘Thiannak Lam Pakhat A Um Lai’

Babilon ah sal a tangmi a miphun kha Jehovah nih an ram remh ṭhan a si lai kha a rak chimchung. Remh ṭhannak chimchung bia ah hi biakamnak aa tel, “cuka ah cun lam nganpi pa-khat a um lai i a min ah ‘Thiannak Lam’ ti a si lai.” (Isa. 35:8a) Hi bia nih Judah mi hna an ram kir ṭhannak lam Jehovah nih a awnpiak hna lawng si loin lam thluangthluan ah a huhphenh hna lai ti zong a zumhter hna kha a langhter.

Jehovah nih tuchan a salle caah vawlei cung a hmaan lomi biaknak nawlngeitu Babilon Khua-lipi chungin chuahnak ding “Thiannak Lam” kha a awnpiak hna. 1919 kum ah thlarau chiti thuhmi Khrihfa hna kha a hmaan lomi biaknak sal sinak in a rak luatter hna i an biaknak ah a ummi cawnpiaknak hmaan lo vialte kha a thianh chin lengmang. Nihin ah Jehovah a biami in kan thiang i a daimi thlarau lei pawngkam ah kan i nuam. Mah ah khan Jehovah kan biak khawh i Pathian le minung hawi he daihnak in a khatmi pehtlaihnak kan ngei.

Thlarau chiti thuhmi hna in dirhmi “tuurun hmete” chungmi le “tuu dang” in a karh chin lengmangmi “mibu nganpi” nih thiannak lam zulh awk an i thim i midang kha an sinah rat ve awk an sawm hna. (Luka 12:32; Biat. 7:9; Johan 10:16) ‘Thiannak, cohlan awk tlakmi sinak in an pum kha a nung in pekchanhmi raithawinak bantukin pek’ duhnak a ngeimi vialte caah “Thiannak Lam” cu awn a si.—Rom 12:1, Nw.

“Hi Lam Cu Misual Mi nih An Zul Lai Lo”

B.C. 537 kum ah an ram ah a kir ṭhanmi Judah mi hna cu a biapimi halnak pakhat kha an tlinh a hau. “Thiannak Lam” zulh awkah sining a tlinhmi hna he aa tlai in Isaiah 35:8b ah hitin a chim: “Misual mi nih an zul lai lo i hi lam a zulmi cu mihrut nih an pialter kho hna lai lo.” Judah mi hna Jerusalem ah an kir ṭhan tikah an i tinhmi cu a thiangmi biaknak dirh ṭhan awk a si caah mah zawn lawng aa ruatmi, a thiangmi thil a upat lomi asiloah thlarau lei ah a thurhnawm-mi hna caah hmun a um lo. An ram ah a kir ṭhanmi hna nih Jehovah i a sangmi ziaza phunglam hna kha an zulh peng a herh. Nihin Pathian mithmai ṭha hmuh a duhmi nih mah he aa lomi halnak kha an tlinh a hau. ‘Pathian ṭih in thiannak’ kha zulh khawh an i zuam a hau. (2 Kor. 7:1) Cu ti a si ah a thiang lomi zei tuahsernak hna dah hrial awk a si?

“Minung sining nih a tuah tawnmi cu a fiang ko: nu le pa sualnak te hna, a thurhnawm mi thil te hna, [“ziaza rawhralnak,” Nw] te hna” an si tiah lamkaltu Paul nih a rak ṭial. (Gal. 5:19) Nu le pa sualnak cu mah nupi, mah va a si lomi he nu/pa chiaṭha hmannak tel in zei bantuk nupa ih ṭinak paoh he aa pehtlai. Ziaza rawhralnak ah “horduh cuainak, ziaza ṭhatlonak, zah hngal loin nunnak, fihnungmi tuahsernak” hna aa tel. Nu le pa sualnak le ziaza rawhralnak cu Jehovah thiannak he aa ralchanh ti a fiang ko. Cucaah mah bantuk ziaza a tuah pengmi cu Khrihfa bu chungmi sinak nawl an hmu lai lo asiloah bu chungin chuah an si lai. “I sum loin [“a thiang,” Nw] lomi thil phun zakip” a tuah i a ziaza a thurhnawm tukmi zong cuticun an si ve lai.—Efe. 4:19.

“A thiang lomi” timi biafang ah sualnak phun tampi aa tel. Mah kha Grik biafang nih tuahsernak, biachim le thlarau lei pehtlaihnak he aa tlaimi thian lonak asiloah thurhnawhnak zei bantuk phun paoh kha a sawh. Cu ah biaceih ding tlak a si lomi a thiang lomi ziaza zong zeimaw zat tiang aa tel.a Asinain cu bantuk a thiang lomi ziaza a tuahmi hna cu thiannak lam a zulmi an si maw?

Khrihfa pakhat cu a thlithup in hornak hmanthlak a hun zoh tiah hei ti u sih. A thiang lomi duhnak duhsah in a hung chuak i Jehovah hmai ah thiangte in um ding a biakhiahnak kha a rawhter. A tuahsernak cu a thiang lo tukmi a si rih lo nain “a hmaanmi thil, aa dawhmi thil le upat awk a tlakmi thil” lawng a ruat zungzalmi a si ti lo. (Fil. 4:8) Hornak hmanthlak cu a thurmi a si i mi pakhat Pathian he an i pehtlaihnak kha a hrawh khawh taktak. Zei bantuk a thiang lomi paoh kha kan kaa hmanh in kan chim awk a si lo.—Efe. 5:3.

A dang tahchunhnak pakhat hi ruat hmanh. Khrihfa pakhat cu hornak hmanthlak a zohnak in siseh, a zoh lo zong ah siseh lung i thawhter in nu/pa thil kha kut in tawngh in mah le mah duhnak i riamhter a hmang tiah ruat hmanh. “Mah le mah duhnak i riamhter” timi biafang cu Baibal ah a um lo nain lungthin le ruahnak lei ah a thurhnawmmi a si cu a fiang tuk ko. Mi pakhat nih hi bantuk a thiang lomi kha ngol loin a tuahnak nih Jehovah he an i pehtlaihnak kha fakpi in a hrawh khawh i Pathian hmuhnak ah a thiang lomi a siter lai a si lo maw? Lamkaltu Paul i mah cawnpiaknak hi kan lung chungah i cinken zungzal u sih, “pum siseh, thlarau siseh, a thurhnomh tertu paohpaoh kha i thianh u sih” cun “vawlei pum duhnak: nu le pa sualnak te hna, dawhcah lo in um tu khuasak te hna, hornak te hna, thin ṭhatlo te hna le hakkauhnak te hna hi nan thah hrimhrim awk an si.”—2 Kor. 7:1; Kol. 3:5.

Satan ukmi hi vawlei nih a thiang lomi ziaza kha a cohlan leng ah tha hmanh a pek. A thiang lomi tuah ve dingin tukforhnak kha tei awk a har ngai. A hmaanmi Khrihfa hna cu ‘an ruahnak pakpalawng a simi lawkih mi bantukin an um’ awk a si lo. (Efe. 4:17) A thiang lomi ziaza kha a thlithup tuah asiloah mi zapi hmuhnak ah tuah kha kan hrial lawng ah Jehovah nih “Thiannak Lam” ah ngol loin kalnak nawl a kan pek lai.

“Chiandeih Zeihmanh An Um Lai Lo”

Mi cheukhat cu a thiangmi Pathian Jehovah mithmai ṭha hmuh awkah an ziaza le biachim ah thlennak nganpi an tuah a herh men lai. Isaiah 35:9 ah hitin a chim: “Thiannak Lam” a simi hi lam ah “chiandeih zeihmanh an um lai lo, saram ṭihnung zeihmanh an i chawk lai lo.” Langhternak in chim ah cun a tuahsernak le a biachim ah a puarhrang i mi doh a duhmi cu saram he tahchunh khawh a si. Annih cu a dingmi Pathian vawlei thar ah hmun an ngei lai lo. (Isa. 11:6; 65:25) Cucaah Pathian mithmai ṭha hmuh a duhmi hna nih mah bantuk saram ziaza kha hlaw in thiannak lam zulh khawh i zuam a hau.

Baibal nih hitin a kan forh, “lungthli in i uamnak le thinhunnak le ingpuannak kha hlaw hna u. I hua ti hlah u, i vawlpam ti hlah u.” (Efe. 4:31) Kolose 3:8 ah hitin kan rel, “thinhunnak te hna, ing chiat te hna, huatnak lungthin te hna, cu nan hlonh hrimhrim hna lai. Mi va [“volhpamhnak,” Nw] bia siseh, holh thur-hnawm siseh, nan kaa chungin nan chuahter hrimhrim lai lo.” Hi Baibal cang pahnih ah a hmanmi ‘volhpamhnak bia’ timi biafang i a hrampi sullam cu lung a fahtermi, man ngei lo a sitermi asiloah chiatserhnak biachim a si.

Nihin ah lung a fahtermi le a thurhnawmmi bia cu theih lengmang a si i mahle inn hmanh ah theih a si. Nu le va nih pakhat le pakhat, cun an fale kha lung a fahtermi, a puarhrangmi le zohchuknak bia in an ti hna. Hi bantuk bia ṭhalo cu Khrihfa inn ah a um awk hrimhrim a si lo.—1 Kor. 5:11.

‘Pathian Ṭih in Thiannak’ Zulh Khawh I Zuam Cu Thluachuah A Si!

A thiangmi Pathian Jehovah rian ṭuan cu zeitluk tinvo sung dah a si! (Josh. 24:19) Jehovah nih a kan umternak thlarau paradis cu a sung-lawi tuk. Jehovah hmuhnak ah kan ziaza thianter peng cu nunnak ah a ṭha bikmi lam a si.

A rauh hlan ah Pathian kamhmi vawlei Paradis a phan taktak cang lai. (Isa. 35:1, 2, 5-7) Mah kha hngahhlang in Pathian lam zulh khawh aa zuammi nih cuka hmun ah umnak nawl pek an sinak in thluachuah an hmuh lai. (Isa. 65:17, 21) Cuti a si caah a thiangmi thlarau lei umtuning ah ngol loin Pathian kha bia in a ṭhami kan i pehtlaihnak kha hmunhter peng u sih.

[A Tanglei Fianternak]

[Cahmai 26nak i hmanthlak]

“Thiannak Lam” zulh awkah Judah mi hna cu zeidah rak hal an si?

[Cahmai 27nak i hmanthlak]

Hornak hmanthlak nih mi pakhat Jehovah he an i pehtlaihnak kha a hrawh

[Cahmai 28nak i hmanthlak]

“I hua ti hlah u, i vawlpam ti hlah u”