Aa Tlak tein I Ruahchan law I Nuam

“Ka Hlawh a tling hoi ṭhan lo!” Ṭuan ding naa timhmi tlam na tlinh khawh lo ruangah hi bantuk in voi zeizat dah na chim? Khrihfa nutung no pakhat cu nau no a zohkhenh zungzal caah a re a thei i thlarau lei ah a lungthin a pek khawh lo ruangah a cung bia bantuk a chim men lai. A dang Khrihfa pakhat nih a ngakchiat lio cawnpiak a rak si ning ruangah thiamnak ka ngei lo, Khrihfabu ah tlamtling in ka ṭuan kho bal lai lo tiah a ruah men lai. Hngaltu tar unau nu pakhat cu thazang a ngeih deuh i aa chawhvah khawh lio ah ṭuan a rak huammi Khrihfa rian ah tlamtling in aa tel khawh ti lo caah a lung a dong men lai. Christiane cu Jehovah rian kha a si khawh chung ṭuan a duh nain a innchungkhar sining nih a donh caah “hmaikal ṭuan awk tha a pemi phungchimnak nih a caancaan ah ka mitthli a tlakter” tiah a ti.

Cu bantukin tuar tikah zeidah kan tuah khawh? Khrihfa cheukhat nih an sining kha a si taktak ning in hmuh awkah zeitindah an rak tuah khawh? Aa tlak tein i ruahchan a ṭhatnak cu zeidah an si?

Aa Tlakmi Tinhnak Ngei

“Bawipa chung i nan nunnak ah khan i lawm zungzal ko u ti kan duh hna. I lawm ko u, tiah ka nolh ṭhan rih ko lai. Mi vialte sinah [‘aa tlak ningin,’ Nw] va um u” tiah lamkaltu Paul nih a chim tikah i lawmh zungzal khawhnak tawhfung a chimmi a si. (Fil. 4:4, 5) Pathian rian ṭuan tikah lawmhnak le lungtlinnak hmuh awkah kan thil ti khawhnak le kan sining he aa tlakmi tinhnak hna kha ṭhanter a herh. Aa tlak lomi tinhnak phanh awkah zei thil paoh hlawt ding kan i zuam ahcun kan lungre a thei lai. Khatlei ah kan i hngalhmi ri ngeihnak kha Khrihfa rian ah a herh leng in ṭhumhnak ca sonhtarhnak ah hmang in mah le mah aa zaangfahmi si lo ding kan i ralring lai.

Kan sining zeiti a si hmanh ah kan lungthin dihlak in a si khawh chung a rian ṭuan awkah Jehovah nih a kan hal. (Kol. 3:23, 24) Jehovah kha kan tuah khawhmi nak tlawm kan pek ahcun amah sin kan i pumpeknak bantukin kan nung lo tinak a si. (Rom 12:1) Cu lengah, lungthin dihlak rianṭuannak in hmuhmi lungtlinnak, lawmhnak taktak le a dang thluachuah kan sung lai.—Ptb. 10:22.

Baibal ah ‘aa tlak’ timi biafang an leh tikah khua tuaktan aa tel. A biafang ningin a sullam cu ‘nemnak’ a si. (Jeim 3:17) Mah biafang cu fel tuk hringhran lo tinak zong a si. Cucaah aa tlak ningin a ummi kan si ahcun kan sining kha a tlari tein kan hmuh khawh lai. Cu ti tuah cu a har maw? A cheukhat cu midang cungah zawnruah in hmuhnak an ngei kho nain mah le mah a tlari in i hmuh an i harh. Tahchunhnak ah, kan komh ngaimi hawi pakhat thil tam tuk a tuah caah a bat kan hmuh a si ahcun a nunnak ah thil cheukhat thlennak tuah cu fim a si ti a hngalhthiam nakhnga bawmh kan i zuam lai a si lo maw? Cu bantukin ri kan ngeihmi leng in rian kan ṭuan ti a langhtermi thil kha hngalh awkah kan cawn a hau.—Ptb. 11:17.

A hleihluat in hal a hmangmi nu le pa nih rak zohkhenhmi si ahcun ri ngeihnak kha aa tlak in hmuh awk a har deuh ko lai. A cheukhat cu an ngakchiat lio ah a tam deuh ṭuan zungzal ding asiloah nu le pa dawt i hlawh awkah a ṭha bik si a hau tiah an ruah. Cu ti kan si ahcun Jehovah nih a kan hmuh ning he aa tlai in kan ruahnak a palh kho. Kan lungthin dihlak in a rian kan ṭuan caah Jehovah nih a kan dawt. Jehovah nih “zei in dah ser kan si kha a hngalh i leidip men kan si kha a philh lo” tiah Baibal nih aamah a khan. (Salm 103:14) Asinain teima tein a rian kan ṭuan tikah ri kan ngeih kha a hngalh i a kan dawt. Kan Pathian cu a puarhrangmi bawi a si lo ti i cinkennak nih ri kan ngeih kha cohlan in kanmah le kanmah aa tlak tein ruahchan awk a kan bawmh lai.—Mik. 6:8.

Asinain mi cheukhat nih mah a tlarimi lungput ngeih an i harh. Cuti na si ahcun na kong ṭha tein a hngalmi hmuhtonnak tam a ngeimi Khrihfa pakhat sinah bawmhnak hal. (Ptb. 27:9) Tahchunhnak ah, caanhmaan hmaikal pakhat in Pathian rian ṭuan na duh maw? Mah cu a ṭha tukmi hmuitinh a si! Na hmuitinh phanh awkah harnak na tong maw? Na nunnak sawhsawhte siter awkah bawmh na herh men lai. Innchungkhar rian tampi a um lio caan ah caanhmaan hmaikal ṭuan cu aa tlakmi hmuitinh a si maw si lo ti kha na zumhmi Khrihfa hawikom nih an ruah men lai. Ṭuan chap na duhmi ṭuan khawh a si lai le si lai lo asiloah tam deuh ṭuan khawh awkah zei thlennak hna dah na tuah khawh ti hngalh awkah an bawmh khawh. Vale cu nupi nih a thil ti khawhnak le aa tlakmi zat a hngalh nakhnga a ṭha bik in a bawm khotu dirhmun ah a um. Tahchunhnak ah, tam deuh rian ṭuan ding thla thar aa thawk hlan ah a nupi kha tlawmpal i dinh awk ruahnak a cheuh khawh. Mah nih a thazang a ṭhawnter khawh i phungchimnak rian ah i nuamh zungzal awkah a bawmh lai.

Na Tuah Khawhmi Thil kha Kawl

Kum upat ruang asiloah dam lo ruangah Jehovah rian kan ṭuan khawhnak a zor men lai. Nu le pa na si ahcun na fale caah na caan le thazang tampi na hman caah pumpak hlathlainak le Khrihfa pumhnak in ṭhatnak tlawmte lawng ka hmu tiah na ruah men lai. Asinain ri na ngeihmi lawng ruahnak nih tuah khawh rihmi thil hmu lo in an kham caan a um maw?

A luancia kum thong tampi lioah Levi mi pakhat nih a si kho lomi a duhnak a rak phuan. Kum fate zarh hnih chung biakinn ah rian ṭuannak caan ṭha a rak hmu. Asinain biakṭheng pawng ah um zungzal ding thangṭhat awk tlak a duhnak kha a rak chim. (Salm 84:1-3) Hi zumh awk a tlakmi pa cu zeinihdah a lung a rak tlinter? Biakinn tual chungah ni khatte um hmanh tinvo sung tuk a si kha a rak hngalhthiam. (Salm 84:4, 5, 10) Cu bantukin ri kan ngeihmi lawng ruah canah thil sining hngalhthiam i zuam in kan tuah khawhmi rian kha sunsak awk a si.

Tahchunhnak ah, Canada ram Khrihfa unau nu Nerlande sining hi ruat hmanh. Kekual bunhmi ṭhutdan in a kalmi a si i phungchimnak rian ah kaa tel khawhmi a tlawm tuk tiah a ruat. Asinain thil a phunphun an zuarnak dawr nganpi kha phung a chimnak ding sang ah a hmuhnak in a ruahnak kha a thlen. Hitin a chim: “Dawr chung ṭhutdan saupi pawng ah kekual bunhmi ka ṭhutdan cungah ka ṭhu. Chikkhat dinh duh ah a rak ṭhumi kha phung ka chimh hna i kaa nuam.” Hi bantuk a biapimi phungchimnak phun khat ah aa telmi nih Nerlande a lung a siter tuk.

A Herh ahcun Thlennak Tuah

Puanzar in a kalmi tilawng cu thli a hrangmi in khan khulrang in a kal. Asinain tilawng mawngtu nih ṭihnungmi thlichia a ton tikah a herhmi thlennak a tuah lai. Thlichia kha a kham kho lo nain thlennak a tuahnak in tilawng kha a kilven khawh. Cu bantukin nunnak ah kan tonmi thlichia he aa lomi thil sining hna cu kan kham kho lengmang tawn lo. Asinain pumsa lei, thinlung le lung duhnak hna kan hman ning thlennak thawngin kan nunnak kha a si khawh chung kan kilven khawh. Kan sining thar kha ruah tikah Pathian rianṭuannak ah lungtlinnak le nuamhnak hmuh awk a kan bawmh lai.—Ptb. 11:2.

Tahchunhnak cheukhat hi ruat hmanh. Thazang tlawmpal lawng kan ngeih a si ahcun zing lei tuante ah tha a battermi tuah hrial aa tlak kha kan hmuh ko lai, cu tikah zanlei Khrihfa pumhnak ding thazang a kan ngeihter lai. Mah nih Khrihfa hawi pawl he i hawikomhnak caan ṭha tlingte in a kan hmuhter lai. Asiloah nu pakhat cu a fa a dam lo ruangah innkhat hnu innkhat phungchim a kal khawh lo ahcun a fa aa hngilh kar ah Baibal i ruahnak ah i tel ve dingin Khrihfa unau nu pakhat kha a cawnpiakmi he a inn ah sawm cu aa tlakmi a si a hmuh ko lai.

Khrihfabu pumhnak ah i ruah dingmi kong vialte hlathlai chung awkah na sining nih a pek lo ah tah zeitin? Zeitluk dah naa timh chung khawh ti biakhiak law a si khawh chungin tuah. Phanh khawh colhmi kan hmuitinh thlennak in thathawhnak le lawmhnak kan ngei kho.

Kan hmuitinh thlennak ah biakhiahnak tuah le thazang chuah a herh men lai. France ram i Serge le Agnes timi nuva nih an i timhmi ah thlennak nganpi an tuah. “Agnes fa a pawi ti kan hngalh tikah missionary ṭuan ding kan saduhthah a rawk,” tiah Serge nih a ti. Atu ah thekvak a ṭha i nuamte in a ummi fanu pahnih a ngeimi Serge nih hmuitinh thar zeitindah an chiah kha a fianter. Hitin a chim: “Ram dang ah kan ṭuan khawh ti lo caah kan ram ah ‘missionary’ ṭuan dingin bia kan khiak. Ram dang holh a hmangmi group ah kan i fon.” Hmuitinh thar an chiahmi in ṭhatnak an hmu maw? Serge nih hitin a chim: “Khrihfabu ah san kan tlai tuk ti ruahnak kan ngei.”

France ram i kum 70 leng a simi unau nu Odile cu hliahcang phin zawtnak a ngeih caah saupi a dir kho lo. A zawtnak nih innkhat hnu innkhat phungchimnak ah i tel ding a dawnh caah a lung a dong. Asinain phungchim rian kha a ngol lo. Telephone in phung a chimnak in a rian ṭuannak kha a mersan. Hitin a chim: “Mah hihi ka ruahnak leng in a fawi i a nuamh zong a nuam deuh!” Mah phungchim ningcang nih phungchimnak ah i tel awk a forh.

Aa Tlak In I Ruahchannak Nih Thluachuah A Hmuhter

Kan tuah khawhmi kha aa tlak in hmuh i zuamnak nih hnabeidonghnak tampi a kan hrialter khawh lai. Aa tlakmi hmuitinh ngeihnak thawngin ri kan ngei nain kan hlawh a tling lai. Tlawmte lawng kan lim hmanh ah kan lim khawhmi ah khan kan i lawm lai.—Gal. 6:4.

Mah le mah i ruahchannak ah a tlarimi si kan i zuam tlukin Khrihfa hawi cung zongah zawnruahnak kan ngei deuh lai. Ri an ngeih kha hngal in kan ca an tuahmi ah kan i lawm zungzal lai. Bawmhnak hmuhmi paoh ah lawmhnak langhternak thawngin ṭuanṭi duhnak lungthin le i hngalhthiamnak a kan ngeihter lai. (1 Pit. 3:8) Dawtnak a ngeimi Pa, Jehovah nih zeitikhmanh ah kan pek khawh leng a kan hal lo ti i cinken. Aa tlakmi i ruahchan in phanh khawhmi hmuitinh ngeih tikah thlarau lei kan ṭuanmi nih lungtlinnak le lawmhnak a kan ngeihter deuh lai.

[Cahmai 29nak i hmanthlak]

Pathian rian ṭuannak ah lungtlinnak le lawmhnak hmuh awkah kan thil ti khawhnak le kan sining zoh in aa tlakmi ruahchannak ngeih i zuam a hau.

[Cahmai 30nak i hmanthlak]

Nerlande cu a ṭuan khawh tawk in phungchimnak ah aa tel caah lawmhnak a hmu

[Cahmai 31nak i hmanthlak]

“Lawng mawngh tikah thlennak” tuah thiam i zuam

[Credit Line]

© Wave Royalty Free/age fotostock

[Cahmai 32nak i hmanthlak]

Serge and Agnes cu hmuitinh thar chiahnak in ṭhatnak an hmu