Laksawng Ah Na Mit Chia
“Kawltung lei ah cun laksawng hmuh awkah khan ka tli.”—Fil. 3:14.
1. Lamkaltu Paul nih zei laksawng dah aa tlaih?
Tarsas khuami Saul tiah mi tam theihmi lamkaltu Paul cu minthangmi chungkhar in a chuakmi a si. Pupa hna Phungbia cawnpiaktu minthang Gamaliel sinah ca a cawngmi a si. (Lam. 22:3) Paul cu hmailei ah pawcawmnak rianṭha a hmu laimi a si nain a biaknak kha a kaltak i Khrihfa a hung si. Cun zungzal nunnak laksawng a hmuh laimi ah a mit a chiah, cucu Pathian vancung Pennak ah a thikho lomi siangpahrang le tlangbawi sinak a si. Mah Pennak nih vawlei paradis kha a uk lai.—Matt. 6:10; Bial. 7:4; 20:6.
2, 3. Paul nih vancung nunnak laksawng kha zeitluk in dah mansung ah a chiah?
2 Paul nih laksawng kha sunglawi tuk in a chiah kha hitin a chim: “Hi thil vialte, a miak lei i rel awk hi Khrih ruangah sungh ah ka rel dih hna. Cu thil hna lawng cu an si lo, thil dang vialte hna zong hi, cu thil vialte hna nakin a sunglawi deuhmi ka Bawipa Jesuh ka hngalhnak ruangah cun, sungh cikcek ah ka rel hna. Amah ruangah cun zeizong vialte hi ka hlonh dih hna i cu thil vialte cu hmunthur men ah ka rel hna.” (Fil. 3:7, 8) Paul nih minung caah Jehovah timhmi kong biatak a cawn hnuah, mi tampi nih biapi tuk ah an chiahmi rumnak, rian sang, minthannak hna kha hmunthur men ah a rel hna.
3 Mah thawk in Paul caah a biapi bik cu Jehovah le Khrih hngalhnak a sungmi kha a si, mah kongah Jesuh cu Pathian sin ah hitin thla a cam: “Pathian taktak a simi nangmah hngalh le nangmah nih na thlahmi Jesuh Khrih hngalh hi zungzal nunnak cu a si.” (Johan 17:3) Paul nih zungzal nunnak ah lungtho tuk in a lung a chiah kha Filipi 3:14 ah a ṭialmi bia nih a langhter: “Kawl tung lei ah cun laksawng hmuh awkah khan ka tli i cu laksawng cu Pathian nih Khrih Jesuh thawngin cunglei nunnak i a kan kawh hi a si.” Asi, Pathian Pennak cozah ah aa telmi vancung khua ah hmuh laimi zungzal nunnak laksawng ah a mit a chiah.
Vawleicung Zungzal Nunnak
4, 5. Tuchan ah Pathian duhnak a tuahmi mi tampi cu zei laksawng dah pek timh an si?
4 Pathian duhnak tuah awk aa thimmi lakah a tam deuh caah ṭuan man hmuhmi laksawng cu Pathian vawlei thar ah zungzal nunnak kha a si. (Salm 37:11, 29) Mah ruahchannak cu a fiang taktakmi a si Jesuh nih a fehter. Hitin a chim: “Nun a nemmi cu lunglawmmi nan va si dah! Vawlei ro nan co lai.” (Matt. 5:5, Nw) Salm 2:8 chimmi ah vawlei rocotu ngan bik cu Jesuh thengte a si, 144,000 zong nih vancung ro an co ve lai. (Dan. 7:13, 14, 22, 27) Vawleicung ah a nung taktak hngami tuu bantuk minung hna nih ‘vawlei ser ri in an caah timh a simi’ Pennak vawlei ro cu an co lai. (Matt. 25:34, 46) An co taktak lai, zeicahtiah “lih a chim kho lomi Pathian” biakam a si. (Titas 1:2) Joshua nih Isreal mi kha “Nan Pathian nih nanmah kongah biakamnak a tuahmi thilṭha vialte lakah pakhat hmanh pakpalawng a can lo kha . . . nan hngalh; nannih caah a dihlak in a tlung dih, pakhat hmanh a bau lo” ti a chim lioah Pathian biakam a tlin a zumh bantuk in kan zumh khawh ve.—Josh. 23:14.
5 Pathian vawlei thar nunnak ah tuchan i lungrawhnak, lungsilonak hna a um ti lai lo. Aa thleidang tuk lai: raltuknak, zaang-ennak, sifahnak, dinlonak, zawtnak le thihnak a um ti lai lo. Mi cu a tlingmi ngandamnak le paradis ah aa thlengmi vawlei ah nun a si cang lai. Cuka chung i nun cu kan duh bikmi mang nakin a tling deuhmi nunnuam le duhdim a si lai. A si, nifatin a nuammi ni a si lai. A ṭha tukmi laksawng a va si dah!
6, 7. (a) Pathian vawlei thar ah a cang lai tiah kan i ruahchanmi thil kha Jesuh nih zeitindah a langhter? (b) A thimi hna hmanh nih zeitindah a thar in nunnak an thawk khawh lai?
6 Jesuh vawleicung a um lioah vawlei thar ah vawlei cung dihlak i a cang hngami khuaruahhar thil hna hmuhsak awkah Pathian nih thiang thlarau a pek. Tahchunhnak ah, kum 38 chung a zengmipa kha Jesuh nih kal tuah tiah a ti. Mahpa cu a kal tiah Baibal ah aa ṭial. (Johan 5:5-9 rel.) A dang pakhat cu “mitcaw cia in a chuakmi” he an i tong i a damter. A hnu ah mitcawpa cu ahonihdah an damter tiah bia an hal tikah anih nih: “Vawlei hramthawknak in mitcaw cia in a chuakmi kha aho tal nih an mit an auter hna ti cu kan theih bal lo hen cu aw. Hi pa hi Pathian sinin a rat dah ti lo ahcun cu bantuk thil cu zeihmanh a tuah kho hnga hlah i” tiah a leh hna. (Johan 9:1, 6, 7, 32, 33) Jesuh nih mah vialte kha a tuah khawh dih hna, zeicahtiah Pathian ṭhawnnak a hmu. Jesuh nih a kalnak kip ah “damnak a herhmi kha a damter hna.”—Luka 9:11.
7 Jesuh nih mizaw le a beimi a damter hna lawng si loin mithi zong a thawhter khawh. Tahchunhnak ah, kum 12 a simi ngakchianu a thi i, a nu le a pa cu an ngaih a chia tuk. Asinain Jesuh nih hitin a ti: “Ngakchianute, tho, kan ti.” Khitik ah a tho ṭhan! A nu le a pa le cuka ah a um mi hna zeitindah an um lai cu na mitthlam ah na cuanter kho maw? (Marka 5:38-42 rel.) Pathian vawlei thar ah mithi tampi an thawhṭhan tikah “an khuaruah a har tuk” lai, zeicahtiah ‘miṭha he miṭhalo he thihnak in an thoṭhan’ lai. (Lam. 24:15; Johan 5:28, 29) Annih cu cu caan thawk in an nun khawh nakhnga, zungzal nunnak tiang hmanh a si khomi in a thar in nunnak an thawk ṭhan lai.
8, 9. (a) Khrih Kum Thongkhat Uknak chungah Adam sinin rocomi sualnak cu zeitindah a si cang lai? (b) A thimi hna cu zei zoh in dah biaceih an si lai?
8 A thoṭhanmi hna cu thih ṭhan awkah an tho lai lo. A thoṭhanmi hna cu an thih hlan i an tuahmi sualnak zoh in biaceih an si lai lo. (Rom 6:7) Khrih Kum Thongkhat Uknak chungah, tlanhnak man raithawinak man kha hmang in Pennak tang i nawlngai mi hna cu duhsah tein mitling an hung si lai i a donghnak ah Adam sualnak in a chuakmi vialte in tling tein an luat lai. (Rom 8:21) Jehovah nih “thihnak cu zungzal ca in a hrawh lai. Mi vialte cu an mitthli a hnawh hna lai.” (Isa. 25:8) Pathian Bia nih “cauk kha an kau hna” lai tiah a ti, khi caan i a nungmi hna cu cawnpiaknak thar pek an si lai. (Biat. 20:12) Vawlei cu paradis ah thlen a si tikah “vawlei le a cung i a ummi [nih] . . . dinnak hi zeidah a si ti kha an hngalh lai.”—Isa. 26:9.
9 A thoṭhanmi hna cu Adam sualnak zoh in biaceih an si lai lo nain an i thimmi le an tuahmi zoh in biaceih an si lai. Biathlam 20:12 nih hitin a chim: “Mithi cu an rak tuahmi cauk chung i aa ṭial ning khan an bia an ceih hna.” Cucu an thawhṭhan hnu in an tuahmi kha a si. Jehovah dinnak, zaangfahnak le dawtnak zeitluk a ṭhami dah a si! Khitikah vawlei hlun i fahnak vialte cu “a philh in philh an si cang lai.” (Isa. 65:17) Lung a rualtermi cawnpiaknak thar le a ṭhami thil in a khatmi nunnak ah hlan ngaihchiatnak hna in an lungre a thei ti lai lo. Hlanlio thil cu an philh cang lai. (Biat. 21:4) Armageddon in a luatmi “mibu nganpi” ca zong ah cu bantuk cun a si lai.—Biat. 7:9, 10, 14.
10. (a) Pathian vawlei thar nunnak cu zei bantuk dah a si lai? (b) Laksawng ah na mit chiah awkah zeinihdah an bawmh khawh?
10 Pathian vawlei thar ah mi vialte cu zawtnak asiloah thihnak um lo in an nung kho cang lai. “Kan ram i a ummi cu ‘ka zaw’ tiah an zai ti lai lo.” (Isa. 33:24) A donghnak ah, vawlei thar ah a ummi cu zingfatin a tlingmi ngandamnak he an tho lai, a ṭha tukmi ni dang kha lungtho in an cuan lai. Lung a sitermi rian kha an i ruahchan lai i siaherhnak a ngeimi hawi he an i kom lai. Mah bantuk nunnak cu a ṭha tukmi laksawng a va si dah! Cucaah na Baibal chung Isaiah 33:24 le 35:5-7 chimchung bia kha rel na duh ko lai. Hmanthlak chungah ka um ve tiah na mitthlam ah cuanter hmanh. Mah nih laksawng ah na mit chiah awk an bawmh lai.
Laksawng ah a Mit a Chia lomi hna
11. Solomon uknak a ṭha ngaimi a hramthawk kong kha chim.
11 Laksawng kong kan cawnmi ah lungthin pek in teimak in ṭuan a hau, zeicahtiah kan sungh khawh caah a si. Tahchunhnak ah, hlanlio Isreal siangpahrang Solomon nih Pathian sinah toidornak he Na mi pawl ṭha tein ka uk khawh hna nakhnga hngalhthiamnak le thleidan khawhnak ka pe tiah thla a cam. (1 Siangpahrang 3:6-12 rel.) Aphi chuak cu Baibal nih hitin a chim, “Pathian nih Solomon cu fimnak le hngalhthiamnak tah cawk lo in” a pek. Cucaah “Solomon fimnak nih nichuahlei mi vialte fimnak le Izipt fimnak vialte kha a lonh dih hna.”—1 Si. 4:29-32.
12. Jehovah nih Israel siangpahrang a si hngami hna kha zei ralrinnak dah a pek hna?
12 Asinain a hmasa deuh ah Jehovah nih siangpahrang a si hngami ahopoah kha “amah caah rang kha a tamter chin hna lai lo” cun “amah caah nupi zong a tamter hna lai lo, a lung a pial sual hnga” tiah ralrin a pek hna. (Deut. 17:14-17) Siangpahrang nih rang a tamter ah cun miphun huhphenh awkah Huhphenhtu, Jehovah kha i bochan lo in a ralkapbu kha aa bochan a langhter a si lai. Nupi tampi ngeih zong ṭihnung a si, zeicahtiah nupile cheukhat cu a hmaanlomi biaknak ah a ummi an pawngkam mi an si kho i nupile nih siangpahrang cu a hmaanmi biaknak Jehovah lam in an pialter khawh.
13. Solomon cu a hmuhmi zeitindah a sungh?
13 Solomon nih mah ralrin peknak kha biapi ah a chia lo. Siangpahrang nih tuah lo ding tiah Jehovah nih fiang tein a chimmi kha a tuah. Rang le rangcung ralkap kha a thong in a karhter. (1 Si. 4:26) Nupi 700 le nuchun 300 a ngeih hna, a tam deuh cu an phawngkam ram mi hna an si. “A nupi hna nih cun a lung cu pathian dang hna lei ah an pialter i . . . a lung cu a dih umnak in a Pathian [Jehovah] sinah khan a hmun lo.” Solomon cu ram dangmi a nupile nih an biakmi a hmaanlomi fihnung biaknak ah aa tel. Aphichuak cu Jehovah nih hitin a chim “nangmah sin hin pennak hi ka thleh hrimhrim lai.”—1 Si. 11:1-6, 11.
14. Solomon le Israel mi nawlngaih lo ruangah aphichuak zeidah a si?
14 Solomon nih a hmaanmi Pathian aiawh in a hmuhmi tinvo sung ah a lungthin a chia lo. Siangpahrang cu a hmaanlomi biaknak ah aa tel cang. Tlawmpal ah an miphun ningpi in zumhpialmi an hung si i B.C. 607 ah hrawh an si. A hnu ah Judah mi nih a hmaanmi biaknak an dirh ṭhan ko nain kum zabu tampi a rauh hnu ah Jesuh nih hitin a thanh: “Nannih cu Pathian Pennak kha chuh nan si lai i thei ṭha tein a tlai dingmi kha pek an si lai.” Cuticun a hung si taktak. Jesuh nih hitin a thanh: “Atu cu na inn cu kin taktak in a king cang lai.” (Matt. 21:43; 23:37, 38) Zumhawktlak lo in an um caah a hmaanmi Pathian aiawh in an hmuhmi tinvo sung cu an miphun ningpi in an sung. A.D. 70 ah Rom ralkapbu nih Jerusalem le biakinn cu an hrawh cikcek i a tangmi Judah mi tampi cu sal ah an kalpi hna.
15. A biapi taktakmi thil ah lungthin a chia lomi pa pawl zohchunhawk kha chim.
15 Judas Iskariot cu Jesuh lamkaltu 12 lakah pakhat a si. Judas nih Jesuh cawnpiaknak a ṭha tukmi a theih i Pathian thiang thlarau bawmhnak in khuaruahhar thil a tuahmi kha a hmuh. Asinain Judas nih a lung a veng lo. Jesuh le lamkaltu 12 nih an ngeihmi tangka bawm kengtu a si. Asinain “mifir rak si kaw a kenmi tangka bawm chung khan a rak i lak lengmang tawn.” (Johan 12:6) A hak a kauh tuk caah a donghnak ah Jesuh kha tangka 30 in chungthu lengnal tlangbawi upa pawl sin ah a thli tein a rawi i a zuar. (Matt. 26:14-16) A lung a veng lomi a dang pakhat cu lamkaltu Paul he rianṭuan ṭi khat Demas a si. Demas nih a lung a veng lo. Paul nih hitin a chim: “Demas cu tuchan vawlei he an i duh i a ka zam tak ai.”—2 Tim. 4:10; Phungthlukbia 4:23 rel.
Pakhat Cio caah Fimnak i Laknak
16, 17. (a) Kan tonmi ralchanhnak cu zeitlukdah a ṭhawn? (b) Satan dohnak dihlak tei khawh awkah zeinihdah a kan bawmh khawh?
16 Pathian salle dihlak nih Baibal chung i zohchunhawk kha biatak tein ruah awk a si. Hitin a kan chimh: “Hi vialte an cung i a tlungmi hi mi dang nih i zohchunhawk caah a si i kan i ralrinnak ding caah ṭial an si. Zeicahtiah kannih kan caan hi donghnak a phak dengmang nak caan a si.” (1 Kor. 10:11) Hi chan ṭhalo ni hmanung bik caan chungah kan nung.—2 Tim. 3:1, 13.
17 Satan Khuachia [‘hi vawlei pathian,’ Nw] nih ‘caan tawite lawnglawng a ngeih’ kha a hngalh. (2 Kor. 4:4; Biat. 12:12) Jehovah salle Khrihfa zumhawktlak sinak kha hrawh awkah a si khawh cung in aa zuam. Satan nih hi vawlei le vawlei ruahning le zumhning thanhnak kha a uk. Asinain Jehovah miphun nih mah nakin a ṭhawng deuhmi—“thil ti khawhnak ṭhawnnak” kha an hmuh. (2 Kor. 4:7) Satan dohnak dihlak tei khawh awkah Pathian sin in a rami ṭhawnnak kha kan i bochan khawh. Cucaah thlacam zungzal awk thapek kan si, Jehovah nih “thiang thlarau a halmi” cu a pek hna lai kan zumh khawh.—Luka 11:13.
18. Hi vawlei he aa tlai in zei lungput dah ngeih awk a si?
18 Satan vawlei cu a rauh hlan ah hrawh a si cang lai, a hmaanmi Khrihfa hna cu khamh an si lai ti kan hngalhmi zong in thazang kan hmu. “Vawlei le a chung i a ummi thil minung nih an duhmi hna hi an lo cuahmah cang; sihmanhsehlaw Pathian duhnak a tuahmi cu zungzal in an nung.” (1 Johan 2:17) Mah kha zoh in, Pathian sal pakhat nih hi vawlei ah Jehovah he an i pehtlaihnak nakin a ṭha deuhmi pakhatkhat a um ti a ruah ah cun zeitluk in dah a hruh a si! Satan nih a ukmi hi vawlei cu tilawng ti chungah a pil cuahmahmi he an i lo. Satan ukmi hi vawlei cu a lo cang lai, asinain Jehovah nih zumhfekmi a salle huhphenhnak caah Khrihfa bu kha a kan pek. Annih cu vawlei thar lei an kal lioah hi biakam hi an zumh khawh: “[Jehovah] aa bochanmi cu him tein ram chungah hin an um ko lai; sihmanhselaw miṭhalo cu ṭhawl an si lai.” (Salm 37:9) Cucaah hi a ṭha tukmi laksawng ah na mit chia peng!
Naa Cinken Maw?
• Paul nih a hmuhmi laksawng kha zeitindah a hmuh?
• Vawleicung zungzal nunnak a hmumi hna cu zei zoh in dah biaceih an si lai?
• Atu na caah fimnak lam cu zeidah a si?
[Cahmai 13nak i hmanthlak]
Baibal ca na rel tikah laksawng ka hmu tiah naa ruat bal maw?