Biaknak Keimah Thimmi maw, Nulepa Thimmi dah?

POLAND ram ah mi tampi nih Jehovah Tehte pawl kha “Ka chuahka in hi biaknak ka si, ka thih tiang hi biaknak ah ka um lai” tiah an ti hna. An hmuhnak ah biaknak cu chankhat hnu chankhat biaknak i roh chinmi phun a si. Biaknak he aa tlai in nan umnak ah cu bantuk lungput a ngeimi na hmu hna maw? Cu bantuk lungput ngeihnak in zei a phichuak dah a um tawn? Biaknak cu a phungcang in tuahmi le chungkhar zulh phung men ah a hung cang. Nulepa asiloah pilepu sinin biatak a hngalmi Jehovah Tehte pawl tah cuticun an si kho maw?

Timote cu cuticun a si lo, biaknak ah aa zuammi a nu le a pi cawnpiaknak thawngin a hmaanmi Pathian a zum i a dawmi a si. Timote cu a “ngakchiat lio tein” cathiang a hngal. A nu le a pi cawnpiakmi ah ‘dir in fekte in a zumh’ kha hngal. (2 Tim. 1:5; 3:14, 15) A caan a cut tikah Khrihfa biaknak hi a hmaanmi a si kha Timote thengte nih a zumh. A nu le a pi sinin a hmuhmi Baibal hngalhnak kha mansung ah a chiah i a nunnak ah a hman. Cucaah tuchan Khrihfa nulepa hna nih fale kha Jehovah sal si awkah an si khawh chung in an bawmh hna lai nain Pathian rianṭuan duhnak cu fale theng nih ngeih a herh.—Mar. 8:34.

Zeithil a chuah hmanh ah mi pakhat nih Jehovah a dawt i zumhfehnak he a rian a ṭuan khawh nakhnga zumhtlakmi a konglam a lunglut lak in chimh a hau. Cu hnu ah a zumhnak a fek lai i thukpi in hram a tla lai.—Efe. 3:17; Kol. 2:6, 7.

Fale Rian

Jehovah Tehte chungkhar ah a ṭhangmi Alberta nih hitin a chim: “Jehovah Tehte pawl biaknak cu a hmaanmi a si tiah ka zumh zungzal ko, asinain ka nuncan he aa tlai in zeitindah nun awk a si ti an chimmi cohlan a har.” Mino na si ahcun a chimmi kha na cohlan men lai. Pathian nih nung hna seh ti a kan duhmi lam ah zeidah aa tel ti hngalh i zuam law a rianṭuannak ah i nuam. (Salm 40:8) Albert nih hitin a chim: “Thla ka cam, a hmasa ah cun a har ko. Kaa hne chih. Asinain a rau lo, a hmaanmi tuah i zuam ahcun Pathian hmai ah man ngei ka si khawh kha ka hun hngalh. Mahnih a herhmi thlennak tuah awkah tha a ka pek.” Jehovah he pehtlaihnak ṭha ngeih i zuamnak thawngin a kan halmi tuah duhnak na ngei kho.—Salm 25:14; Jeim. 4:8.

Khing i celh asiloah a dang lentecelhnak pakhatkhat kha ruat hmanh. I celh ningcang na hngalh lo asiloah ṭha tein naa celhthiam lo ahcun celh na huam lai lo. Asinain celh ningcang na hngalh i ṭha tein naa celhthiam ahcun celh naa ngaih lai a si lo maw, celhnak caan ṭha hmanh na kawl lai a si lo maw? Khrihfa rian zong cu bantukin a si. Cucaah pumhnak caah timhtuahnak thawk. Aa tel taktakmi si. Kum zeizat na si hmanh ah zohchunhawk ṭha na simi in midang tha na pek khawh hna.—Heb. 10:24, 25.

Na zumhnak kong mi sin chimnak zong cutin a si ve. Hnekchom si loin dawtnak ruangah tuah ding a si. Hitin i hal: ‘Midang kha Jehovah kong zeicah chimh ka duh hna? Zeiruang ah dah Jehovah cu ka dawt?’ Jehovah kha dawtnak a ngeimi Pa in na hngalh a herh. Jeremiah hmang in hitin a chim: “Nannih nih nan lung dihlak in nan ka kawl tikah keimah cu nan ka hmuh lai.” (Jer. 29:13, 14) Zeidah na tuah awk a si? Jakub nih hitin a chim: “Ka ruahnak thlen a hau. Ka ngakchiat lio tein kaa pum i phungchim ka vak, asinain mah cucu tuah tawn phung men a si. Jehovah kha ṭha deuh in ka hun hngalh i pehtlaihnak ṭha ka hun ngeih tik lawngah biaknak ah biatak tein kaa tel.”

Phungchim rianṭuannak zeitluk in dah naa nuamh timi cu a ṭhami le thazang a pemi hawikomnak ah tampi aa hngat. Thawchuah hnawhmi phungthlukbia nih hitin a chim: “Mifim mi hna sinah i chawk ve lengmang law na fim lai.” (Ptb. 13:20) Cucaah thlaraulei hmuitinh a ngeimi le Jehovah rian ṭuannak ah aa nuammi hna he komh i zuam. Jola nih hitin a chim: “Thlarau lungthin a ngeimi mino tampi he kaa komh caah thazang tampi ka ngei. Phungchimnak rian ah hmaante in kaa tel tikah lawmhnak tampi ka ngei.”

Nulepa Rian

“Ka nu le ka pa nih Jehovah kong an ka cawnpiak caah kaa lawm tuk hringhran” tiah Jola nih a ti. A si, fale nih an i thimmi ah nulepa cu huham an ngei ngaingai. Lamkaltu Paul nih hitin a ṭial: ‘Nu le pa hna, nan fale kha . . . Jehovah cawnpiak ning le duhning in ṭhanter hna u.’ (Efe. 6:4, NW) Nulepa rian cu fale kha mah duhning in si loin Jehovah duhning in cawnpiak a si kha hi thawchuah hnawhmi ruahnak cheuhnak nih fiangte in a langhter. Hlawhtlinter na duhmi kha fale lungchung rawn canah Jehovah tinhmi he aa tlak in nun kha an i tinhmi a si nakhnga na bawmh khawh hna ahcun a ṭha tuk lai.

Na fale kha Jehovah bia an lung lut lakin na cawnpiak khawh hna nakhnga “inn chung i na ṭhut ah siseh, lam i na kal ah siseh, na ih ah siseh, na thawh ah siseh, na chim lengmang hna lai.” (Deut. 6:6, 7) Fapa pathum a ngeimi Ewa le Ryszard nih “Pathian rian kong a phunphun kha tampi in kan chim” tiah an ti. A phichuak zeidah a si? “An ngakchiat lio tein Theocratic Rianṭuannak Sianginn ah an min khumh an duh, thawngthanhtu si an duh, a donghnak ah tipil in awkah anmah tein bia an khiak. A hnuah Bethel asiloah hmaikal rian an ṭuan.”

Nulepa zohchunhawk ṭha cu a biapi. Ryszard nih hitin a chim: “Inn ah phun dang, Khrihfabu ah phun dang in nunning phun hnih in nun lo awk biakhiahnak kan tuah.” Cucaah hitin i hal: ‘Ka nuncan ah ka fale nih zeidah an hmuh? Jehovah ka dawt taktak kha an hmu maw? Mah kha ka thlacamnak le Baibal hlathlainak ka tuahmi ah an hmu maw? Lohmun rianṭuannak, nuamsaihnak, thilri he aa tlaimi le Khrihfabu chungmi kong ka chimmi ah tah mah dawtnak kha an hmu maw?’ (Luka 6:40) Fale nih nifate na nunning kha an ngiat lai i na chimmi le na tuahmi aa khah le khah lo kha an hmuh lai.

Fale zohkhenhnak ah cawnpiaknak cu a biapi ngaimi a si. Thawchuah hnawhmi Pathian Bia nih “a zulh awk a simi lam kha ngakchia cu cawnpiak” tiah a kan ti. (Ptb. 22:6) Ewa le Ryszard nih “kan fale kha a dang cio in Baibal cawnpiak awkah a caan kan pek” tiah an ti. A si ko, fale kha a dang cio in cawnpiak a herh le herh lo cu nulepa nawl a si. Zeiti a si hmanh ah, fale kha pakhat cio in pehtlaih a herh. Mersannak tuah le a tlarimi si a hau. Tahchunhnak ah, na fale kha vawlei music a ṭha lo ti chimh lawng si loin a ṭhami biakhiahnak tuah ningcang le Baibal phunglam he zeitin aa pehtlaih kha na chimh hna awk a si lo maw?

Na fale cu an sinin naa ruahchanmi fiang tein a hngalmi le na duhning in a nungmi an lo men lai. Asinain an lungthin na hngalh a herh. “Minung nih a lung chung i a ngeihmi ruahnak cu a thukmi tikhor ti bantuk a si, sihmanhsehlaw thuk piin a hmu khomi nih cun a than khawh lai” ti kha philhhlah. (Ptb. 20:5) Thil a thei khomi si, na fale lungchung ah a um kho menmi harnak a langhtermi kha kawl law a rannak in tuah colh. Sualphawt loin na lungretheihnak langhter law aa dawhtlakmi biahalnak tuah. Asinain biahalnak tam tuk tuah lo awk i ralring. Lungtak in an ca na thinphannak nih an lung a suk lai i na bawmh khawh hna lai.

Khrihfabu Rian

Pathian sal pakhat in nan Khrihfabu i mino pawl kha an hmuhmi thlarau rothil sunsak awkah na bawm kho hna maw? Fale cawnpiaknak rian cu nulepa rian a si ko nain khrihfabu chung unau dang, a hlei in khrihfa upa nih nulepa kha an bawmh khawh hna. Biaknak aa khat lomi chungkhar ah a ummi hna kha a hlei in bawmh a biapi.

Mino kha Jehovah dawt awk le a herhmi le man ngeimi an si hngalhter awkah khrihfa upa nih zeidah tuah khawh a si? Poland ram ah khrihfabu zohkhenhtu rian a ṭuanmi Mariusz nih hitin a chim: “Khrihfa upa pawl cu mino he bia tampi an i ruah a hau. Buainak a chuah caan lawng ah si loin phungchimnak le pumh dih hnu le lakphak din caan ti bantuk caan dangdang zongah bia i ruah awk a si.” Khrihfabu ah an i nuamh le nuamh zong hal hna. Cu bantuk zalong tein i chawhbiaknak nih mino kha Khrihfabu he a naihter hna i bu chungmi kan si tiah a ruahter hna.

Khrihfa upa na si ahcun nan Khrihfabu i mino pawl he theihhngalh naa zuam maw? A hmasa i a kong chimmi Albert cu atu khrihfa upa pakhat a si nain a rak tlanvalka ah harnak a phunphun a tong. Hitin a chim: “Mino pakhat in tuukhal pawl lennak ka herh.” Khrihfa upa nih mino pawl thlaraulei ca thlacampiaknak zongin pumpak siaherhnak an langhter khawh.—2 Tim. 1:3.

Mino pawl kha khrihfabu rian ah telter zong a ṭha. Cuti a si lo ahcun vawlei rian ah an lung a um sual lai. Phungchimnak rian ah anmah he ṭuanṭi in na kom kho hna lai maw? Naa manhcaan kha mino he hmang ṭi in zumhnak le hawikomhnak umter. Jola nih hitin a chim: “Hmaikal unau nu nih ka cungah siaherhnak a langhter. Cucaah lungtho tein hmasa bik phungchim ka vah cu amah he kan si.”

Nangmah Thimmi

Mino pawl hitin i hal u: ‘Kaa tinhmi zeidah a si? Tipil a ing rih lomi ka si ahcun tipil in awkah kaa tim maw?’ Tipil in ding biakhiahnak cu chungkhar zulhphung a si caah tuahmi si loin Jehovah kha lungthin dihlak in dawt ruangah tuahmi a si awk a si.

Jehovah cu na hawikom taktak si sehlaw biatak cu na ro siseh. Jehovah nih profet Isaiah hmang in hitin a thanh: “Keimah cu na Pathian ka si, zeihmanh ṭih hlah.” Jehovah he hawikom nan si chung vialte na sinah a um lai. An ṭhawnter taktak lai i ‘an huhphenh lai i an khamh lai.’—Isa. 41:10.

[A Tanglei Fianternak]

[Cahmai 4nak i hmanthlak]

Na fale lungthin ah zeidah a um kha hngalh i zuam

[Cahmai 6nak i hmanthlak]

Tipil in ding biakhiahnak cu Jehovah kha lungthin dihlak in dawt ruangah tuahmi a si awk a si