“Nannih Cu Ka Hawile Nan Si”

“Kan fialmi hna nan tuah ahcun nannih cu ka hawile nan si.” —JOHAN 15:14.

1, 2. (a) Jesuh hawile cu zei bantuk minung dah an si? (b) Jesuh hawi si cu zeicah a biapit tuk?

JESUH he inncung dot ah a ṭhumi hna cu an hnulei konglam aa khat lomi an si. Unau a simi Piter le Andru cu ngatlai an si. Matthai cu hlan ah Judah mi nih an nautatmi hna ngunkhuai khawltu a si. Jeim le Johan cu an ngakchiat lio in Jesuh a hngalmi an si. Nathanael cu Jesuh a hngalhnak a sau rih lo. (Johan 1:43-50) Asinain Jerusalem ah a biapimi Lanhtak puai zan ah a ummi dihlak cu Jesuh kha a nungmi Pathian Fapa, biakammi Massiah a si a zummi an si. (Johan 6:68, 69) “Ka Pa sinin ka theihmi vialte kha kan chimh dih hna caah, ka hawile, ti tu ah kan ti cang hna” tiah a timi an theih tikah an i lawmh lai ning a fiang.—Johan 15:15.

² Jesuh nih zumhawktlak lamkaltu hna sin a chimmi bia cu tuchan chiti thuhmi dihlak le an hawile a simi tuu dang hna he zong phung ning in pehtlaihnak a ngei. (Johan 10:16) Kan sining zei bantuk a si hmanh ah Jesuh hawi kan si kho. Jesuh hawi si cu a biapi tuk. Zeicahtiah amah thawng in Jehovah hawi kan si khawh caah a si. A taktak ti ahcun Khrih naih hmasa lo in Jehovah naih khawh a si lo. (Johan 14:6, 21 rel.) Cucaah Jesuh hawi si awk le a hawi si peng awkah zeidah kan tuah lai? Hi a biapimi kong i ruah hlan ah hawikom ṭha sinak ah Jesuh zohchunhawk le a zultu pawl nih an leh ning in zeidah kan cawn khawh kha zoh u sih.

Hawikom Ṭha Sinak ah Jesuh Zohchunhawk

3. Jesuh cu zei bantuk minung in dah mi tam nih an hngalh?

³ “Mirum cu hawikom tampi a ngei” tiah mifim Siangpahrang Solomon nih a ṭial. (Ptb. 14:20) Mah nih mitlinglo minung cu peklei si loin hmuhlei zoh in hawikom ser an hmang ti a langhter. Jesuh cu mah bantuk lungput a ngei lo. Mipakhat a tangka asiloah a nunning a sannak ah a lung a um lo. Jesuh nih bawi mirum tlangvapa kha dawtnak lungthin he a hnu zulh ding a sawm cu a hmaan ko. Asinain Jesuh nih na ngeihmi thil vialte va zuar law sifakmi kha va ṭhen hna tiah a fial. (Mar. 10:17-22; Luka 18:18, 23) Jesuh cu mirum le minthang hna he si lo in sifak le minauta he aa kommi in mi tam nih an hngalh.—Matt. 11:19.

4. Jesuh hawile cu chambaunak an ngei tiah zeicah kan ti khawh?

⁴ Jesuh hawile cu chambaunak a ngeimi an si. Piter cu a caancaan ah thil sining kha thlarau lei mit in a zoh tawn lo. (Matt. 16:21-23) Jeim le Johan nih Pennak ah a langhnak bik hmun ṭhut ding Jesuh an hal tikah an tum a sang ti a lang. Mah nih lamkaltu dang kha an thin a hunter i minthan duh ruangah an lakah bia alnak a chuak lengmang. Asinain Jesuh nih a hawile ruahnak kha lungsau tein a remh i an cungah a lung a dong colh lo.—Matt. 20:20-28.

5, 6. (a) Jesuh cu zeicah a zultu tam deuh he hawikom an si rih? (b) Jesuh nih zeicah Judah kha a komh ti lo?

⁵ Jesuh nih mitlinglo a zultu hna kha an duhnak zulh tuk asiloah an chambaunak a hmuh lo ruangah a komh hna a si lo. An lungthin tak le an ziaza ṭha tu kha a zoh. Tahchunhnak ah, Jesuh caah in awk a har bik caan ah Piter, Jeim le Johan nih thazang pek lo in an hngilh tak. Jesuh cu a lung a dongh hmanhah dongh phu a si. Asinain an lungthin a ṭhat kha a hmuh i “thlarau nih cun a huam ko, sihmanhsehlaw titsa cu a der ko hi ta” tiah a ti hna.—Matt. 26:41.

⁶ Asinian Jesuh nih Judah Iskariot tu cu a kom ti lo. Judah cu a lenglei in cun hawiṭha aa lawhter, asinain Jesuh nih hlan ah a hawikom taktak a simi Judah a lungthin a ṭhat ti lo kha a hmuh. Judah cu vawlei he aa kom i Pathian ral ah aa ser. (Jeim 4:4) Cucaah Jesuh nih a tangmi zumhawktlak lamkaltu 11 he hawikom an sinak a chim hlan ah Judah cu a chuahter cang.—Matt. 26:20-25.

7, 8. Jesuh nih a hawile a dawt hna kha zeitindah a langhter?

⁷ Jesuh nih zumhtlak a hawile palhnak ah lungthin chia lo in an caah a ṭha bik kha a tuah. Tahchunhnak ah, hneksaknak an ton caan ah huppheng ko hna tiah a Pa sin ah thla a cam. (Johan 17:11 rel.) Jesuh nih an pumsa ri-ngeihnak kha a ruahpiak chih hna. (Mar. 6:30-32) Cun amah ruahnak lawng chim lo in an ruahnak le an lungchung ummi kha a ngaihpiak hna i a theihthiampiak hna.—Matt. 16:13-16; 17:24-26.

⁸ Jesuh cu a hawile caah a nung i an caah a thi. A Pa i a dingmi phunglam tlinter awkah phung ning halmi in a nunnak a pek lai kha a hngalh. (Matt. 26:27, 28; Heb. 9:22, 28) Asinain Jesuh nih a dawtnak langhter awkah a nunnak a pek. “Mi nih a hawile caah dawtnak ngan bik a ngeih khawhmi cu an ca i a nunnak pek hi a si” tiah Jesuh nih a ti.—Johan 15:13.

Jesuh Hawikomhnak kha Lamkaltu hna nih Zeitindah an leh?

9, 10. Jesuh siannak kha mi nih zeitindah an leh?

⁹ Jesuh nih a caan, hawikomhnak le thilri kha siang ngai in a pek. Cu ruangah mi lungthin a la i lungtho tein an pek ṭhan ve. (Luka 8:1-3) Jesuh nih a hmuhtonnak in hitin a chim khawh: “Midang kha thil va ṭhen hna u, nannih zong Pathian nih an ṭhenh ve hna lai: liam thluahmah in, nan i chap khawh chungin, nan zawi khawh le khawh loin nan kut chungah an thlet hna lai. Midang ca i nan hmanmi tahnak rel kha Pathian nih nanmah ca zongah a hman ve lai.”—Luka 6:38.

¹⁰ A cheu nih Jesuh an komh cu a sin in thil hmuh an duh caah a si. Mah hawikom deu nih Jesuh chimmi kha an theihthiam lo tikah an kaltak. An theihthiam lomi ah Jesuh tu bochan lo in a ping in bia an chah i an kaltak. Asinain lamkaltu pawl cu zumhawktlak in an um. Khrih he an i hawikomhnak ah tu le tu hneksak an si tikah caan aa rem zong, aa rem lo zongah an si khawh chung in an bawmh. (Johan 6:26, 56, 60, 66-68 rel.) Jesuh nih vawleicung a nunnak a dih lai zan ah a hawile zei tluk in dah a dawt hna kha hitin a chim: “Harnak ka in caan a dihlak in a ka umpitu cu nanmah nan si.”—Luka 22:28.

11, 12. Jesuh nih a zultu pawl sinah hawikom sinak kha zeitindah a langhter, annih nih zeitindah an leh?

¹¹ Jesuh nih a zultu pawl zumhawktlak an sinak a thangṭhat hna hnu tlawmpal ah an zamtak dih. Khrih an dawtnak nakin minung an ṭih hnanak nih caan tawite a tei hna caah a si. Atu zong Jesuh nih a ngaihthiam ṭhan hna. A thih i a thawhṭhan hnuah an sin a langhmi in hawikom sinak a langhter. Cun “miphun vialte” zultu siter awk le “vawleicung khuazakip” ah a tehte si awk a sunglawimi rian a pek hna. (Matt. 28:19; Lam. 1:8) A zultu pawl nih zeitindah an leh?

¹² A zultu pawl nih Pennak kong thawngṭha kha an si khawh chung in an chim. Jehovah thiang thlarau bawmhnak thawng in a rauh hlan ah Jerusalem khua cu an cawnpiaknak in a khat. (Lam. 5:27-29) An nunnak ca ṭihnung an ton hmanh ah zultu siter hna u timi Jesuh bia kha an ngaih. Jesuh nih a fialmi hna rian kha kum hra bu tlawmpal an ṭuan hnu ah lamkaltu Paul nih thawngṭha kha “vanrang tang khuazakip ah sermi thil vialte sinah chim” a si cang tiah a ṭial khawh. (Kol. 1:23) A zultu pawl nih Jesuh he hawikom an sinak an sunsak taktak ti kha an langhter.

13. Jesuh cawnpiaknak kha a zultu pawl nih zeitindah an hman?

¹³ Zultu a hung simi hna zong nih Jesuh cawnpiaknak kha an nunnak ah an hman. Mi tampi nih an nuncan an ziaza ah thlennak nganpi an tuah kha a chim duhmi a si. Zultu thar cheukhat cu hlan ah nu le nu, pa le pa sualnak a tuahmi, vacung pa duhmi, zu a rimi le mifir an rak si. (1 Kor. 6:9-11) A cheu cu miphung dang cung an lungput kha an thlen. (Lam. 10:25-28) Jesuh bia kha an ngaih i an mihring hlun kha an hlawt i mihring thar kha an i hruk. (Efe. 4:20-24) “Khrih lungthin” kha ṭha tein an hun hngalh i a ruahnak le a tuahmi kha an hngalhthiam i an i cawn.—1 Kor. 2:16.

Tuchan ah Khrih he i Hawikomhnak

14. “Atu chan donghnak” caan ah Jesuh nih zei tuah awk dah bia aa kam?

¹⁴ Kum zabu pakhatnak Khrihfa tampi cu Jesuh he aa theihngalmi an si asiloah thihnak in a thawh hnu ah a hmumi an si. Kannih cu mah bantuk caan ṭha kan hmu lo. Cu a si ah Khrih hawikom zeitindah kan si khawh lai? Lamkhat cu vawleicung ah a nung rihmi chiti thuhmi Khrih naule in dirhmi zumhawktlak le a fimmi sal lamhrualnak zulh kha a si. Jesuh nih mah sal kha “atu chan donghnak” caan ah “a ngeihmi thil vialte” zohkhenh awkah bia a kamh. (Matt. 24:3, 45-47) Tuchan ah Khrih hawikom si aa zuammi a tam deuh cu salbu chungah aa telmi an si lo. Zumhawktlak le a fimmi sal lamhruainak an leh ning nih Khrih he an i hawikomhnak ah zeidah a chuahter?

15. Mi pakhat cu tuu asiloah meheh a si zeinihdah bia a chah lai?

¹⁵ Matthai 25:31-40 rel. Jesuh nih zumhawktlak le a fimmi sal in dirhmi hna kha ka naule tiah a auh hna. Tuu le meheh ṭhennak kong ah Jesuh nih a naule cung kan tuahmi kha amah cung tuah bantuk in a ruah kha fiang tein a langhter. Tuu le meheh ṭhen tikah Jesuh nih ‘ka unau pakhatkhat sifak le nauta’ cung nan tuahmi zoh in bia ka chah lai tiah a ti. Cucaah vawlei ruahchannak a ngeimi hna nih Khrih he hawikom si an duh an langhter khawh biknak lam cu zumhawktlak sal bu bawmh kha a si.

16, 17. Khrih naule he zeitindah hawikom kan si khawh?

¹⁶ Pathian Pennak ah nun ding naa ruahchan ahcun Khrih naule he zeitindah hawikom nan si khawh? Hawikom si khawhnak lam pathum zoh u sih. Lamkhat cu lungthin dihlak in phungchimnak ah i tel a si. Khrih nih a naule kha vawleicung pumpi ah thawngṭha chim u tiah a fial hna. (Matt. 24:14) Asinain tuchan vawlei ah a tang rihmi Khrih naule cu an hawile tuu dang bawmhnak tel lo in an rian an lim kho lai lo. Tuu dang nih phungchimnak rian an ṭuan fa tin te a sunglawimi rian lim awkah Khrih naule an bawmh hna a si. Khrih bantuk in zumhawktlak le a fimmi sal nih hawikom sinak a langhtermi mah rian kha mansung ah an chiah.

¹⁷ Tuu dang nih Khrih naule bawmh khawhnak lam hnihnak cu phungchimnak rian kha tangka in bawmh a si. Jesuh nih a zultu hna kha “vawleicung chawva” in hawikom i ser u tiah a forh hna. (Luka 16:9) Jesuh le Jehovah he i hawikomhnak kha cawk khawh a si lo. Asinain Pennak rian karhternak bawmh awkah kan chawva kan hmannak thawngin hawikom sinak le dawtnak kha kaa lawng si lo in “thil tinak” in kan langhter. (1 Johan 3:16-18) Phungchim ah kan i tel tikah le biakinn saknak, remhnak le vawlei pumpi phungchimnak rian caah thawhlawm kan pek tikah kan bawmh hna a si. Kan pekmi thawhlawm cu a tlawm ah siseh, a tam ah siseh lunglawm tein kan thawhmi kha Jehovah le Jesuh nih an sunsak tuk.—2 Kor. 9:7.

18. Khrihfa upa nih Baibal hrambunh in lam a kan hruaimi kha zeicah zulh awk a si?

¹⁸ Khrih hawile kan si langhternak lam thumnak cu Khrihfa upa lamhruainak zulh a si. Annih cu Khrih lamhruainak tangah thiang thlarau in rian pekmi an si. (Efe. 5:23) “Nan hruaitu pawl kha an bia ngai hna u law an nawl zul hna u” tiah lamkaltu Paul nih a ṭial. (Heb. 13:17) Kan umnak hmun Khrihfa upa nih Baibal hrambunh in lam a kan hruaimi kha zulh a har caan a um men lai. An chambaunak kan hngalh men lai caah ruahnak a kan cheuhmi a palh tiah kan ruah khawh. Asinain Khrihfabu Lu a simi Khrih nih mah chambaunak a ngeimi pa pawl kha a hman hna. Cucaah an nawlngeihnak kan leh ning cu Khrih he kan i hawikomhnak he aa pehtlai. Khrihfa upa pawl an palhnak kha zoh loin an lamhruainak lunglawm in kan zulh tikah Khrih kan dawt a si.

Hawikom Ṭha Hmuh Khawhnak Hmun

19, 20. Khrihfabu ah zeidah hmuh khawh a si, a hnu capar ah zei kong dah kan i ruah lai?

¹⁹ Jesuh nih dawtnak a ngeimi tuukhal pawl hmang in a kan zohkhenh lengah Khrihfabu ah thlaraulei nu le pa le unau zong in a kan zohkhenh. (Marka 10:29, 30 rel.) Jehovah bu he naa komhka ah na chungkhat nih zeitindah an in ti? Pathian le Khrih naih ding naa zuamnak kha an in bawmh lai tiah kan i ruahchan. Asinain a caancaan ah cun “nan ral ṭhalo bik hna cu nanmah innchungkhar chung mi lila an si lai” tiah Jesuh nih ralrin a kan pek. (Matt. 10:36) Khrihfabu ah unau nakin a fek deuhmi hawikom hmuh khawh a si ti hngalh cu thazang petu taktak a si.—Ptb. 18:24.

²⁰ Paul nih Rom Khrihfa hna sin a cakuat a donghnak lei biakchawnhnak a ṭialmi zoh ah hawikom ṭha tampi a ngei ti a lang. (Rom 16:8-16) Lamkaltu Johan nih a cakuat pathumnak ah “kan hawile vialte kha pumpak cio in an kut rak kan tlaihpiak hna” tiah a bia a donghter. (3 Johan 14) Anih zong hawikom taktak tampi a ngei ti a lang. Khrihfa unau hna he a ṭhami i hawikomhnak ser le fehternak ah Jesuh le hmasa zultu pawl zohchunhawk kha zeitindah i cawn khawh a si? Mah kong cu a hnu capar ah kan i ruah lai?

Zeitindah Na Leh Lai?

• Hawikom ṭha sinak ah Jesuh nih zei zohchunhawk dah a chiah?

• Jesuh hawikomhnak kha a zultu nih zeitindah an leh?

• Khrih hawikom kan si kha zeitindah kan langhter khawh?

[Cahmai 14 hmanthlak]

Jesuh nih a hawile ruahmi le lungchung ummi kha hngalh a duh

[Cahmai 16 hmanthlak]

Khrih he hawikom si kan duh kha zeitindah langhter khawh a si?