Na Thlacammi Nih Na Kong Zeidah A Chim?
“Maw Pathian, nang cu kan thlacamnak a kan lettu na si.”—SALM 65:1.
1, 2. Jehovah sinah a salle nih zumhfehnak he zeicah thla kan cam khawh?
JEHOVAH nih zumhtlakmi a salle thlacamnak a ngaih zungzal kha kan zumh khawh. A nuai in a simi Jehovah Tehte nih caan khatte ah thla kan cam hmanh ah pakhat cio thlacamnak kha a kan theihpiak.
2 Salm caṭialtu David cu a thlacamnak Pathian nih a ngaih lai zum in hitin hla a sa: “Maw Pathian, nang cu kan thlacamnak a kan lettu na si.” (Salm 65:1) David cu zumhtlak in Jehovah a biami a si caah a thlacamnak leh a si. Kannih zong hitin i hal awk a si: ‘Ka thlacamnak nih Jehovah kaa bochan le a thiangmi biaknak biapi bik ah ka chiah a langhter maw? Ka thlacamnak nih ka kong zeidah a chim?’
Jehovah Sinah Toidor tein Thlacam
3, 4. (a) Zei lungput he dah Pathian sin thlacam awk a si? (b) Sualnak ngan ruangah kan lungre a theih ahcun zeidah tuah awk a si?
3 Kan thlacam kan let seh ti kan duh ahcun Pathian sinah toidor tein thlacam a hau. (Salm 138:6) “Maw Pathian, ka pur cikcek law ka lungthin hi hngal ko; ka hneksak law ka ruahnak hi hmu ko. Ka chungah hlenthawinak a um sual hnga maw? a um sual ahcun ka hmuhpiak law zungzal hmunmi lam ah khan ka hruai ko” tiah thla a cammi David bantuk in ka hneksak tiah Jehovah sinah kan hal ding a si. (Salm 139:23, 24) Cucaah thla lawng cam loin Pathian hneksaknak kha cohlang in Baibal ruahnak cheuhmi kha zul u sih. Jehovah nih “zungzal hmunmi lam” ah a kan hnuh i zungzal nunnak lam kal awk a kan bawmh khawh.
4 Sualnak ngan tuah ruangah kan lungre a theih ah tah zeitin? (Salm 32:1-5 rel) Ṭhal ni lin nih thing hnah a carter khawh bantuk in sual thuh i zuamnak nih tha a dihter khawh. David cu a sualnak ruangah aa lawm ti lo i a zawt hmanh a zaw kho men. Asinain Pathian sin a sualnak a phuan tikah a lung aa lawm ṭhan. David cu “a sualnak ngaihthiam a si” i Jehovah nih a ka ngaihthiam ti a theih tikah zeitluk in dah aa lawmh lai ruat hmanh. Pathian sin sualnak phuan ahcun lung a dam deuh, asinain Khrihfa upa bawmhnak nih Pathian he an i pehtlaihnak a ṭhatter ṭhan khawh.—Ptb. 28:13; Jeim 5:13-16.
Pathian kha Nawl Law Lawmhnak Bia Chim
5. Jehovah sin nawlnak timi cu zeidah a si?
5 Pakhatkhat ruang ah lungre theih tuk ahcun Paul ruahnak cheuhmi hi zulh awk a si: “Zeithil kong hmanh ah lungrethei in um hlah u. Thla nan camnak ah Bawipa cu nan herhmi kha hal u law nan hal tikah lunglawm tein hal zungzal u.” (Fil. 4:6) Nawl timi cu “toidor tein hal” kha a si. A hleiin thil ṭihnung le hremnak ton tikah Jehovah bawmhnak le lamhruainak hal awk a si.
6, 7. Zei ruangah dah thlacamnak ah lawmhnak bia chim chih ding a si?
6 Bawmh kan herh tik lawngah thla kan cam ahcun zei bantuk lungput kan ngeih dah a langh lai? Paul nih Pathian sinah “lunglawm tein” thlacam awk a si tiah a ti. Hi bia a ṭialmi David bantuk in lawmhnak bia chim awk a ruang kan ngeih lai cu a fiang ko: ‘Maw Jehovah, lianngannak le ṭhawnnak le sunparnak le teinak le upatnak cu nangmah ta an si ko; zeitintiah vancung le vawlei cung i a ummi thil vialte cu nangmah ta an si dih; maw Jehovah, pennak cu nangmah ta a si i nangmah cu zeizong vialte cungah cungnung bik na si. . . . kan Pathian nangmah cu kan in lawmh i a sunglawimi na min cu kan thangṭhat.’—1 Chan. 29:11-13.
7 Jesuh nih rawl le Bawipa zanriah i mitsurhang le changreu caah Pathian sinah lawmhnak bia a chim. (Matt. 15:36; Mark 14:22, 23) Kannih zong cu bantuk lawmhnak bia chim lengah “thilṭha a tuahmi” le ‘a biakhiahnak an din’ ruangah le Baibal chung a bia caah ‘Jehovah kha lawmh’ awk a si.—Salm 107:15; 119:62, 105.
Midang ca Thlacamnak
8, 9. Zumtu khat caah zeicah thlacam awk a si?
8 Kanmah caah thla kan cam lai bantuk in midang ca le an min hngalh lomi Khrihfa hna ca zongah thlacam awk a si. Lamkaltu Paul nih Kolose khua zumtu hna kha an dihlak in a hngal hna lai lo nain hitin ca a ṭial: “Nan ca i thla kan cam tikah, kan Bawipa Jesuh Khrih i a Pa kan Pathian sinah lawmhnak bia kan chim zungzal. Zeicahtiah Khrih Jesuh nan zumhnak le Pathian mi nan dawt hna kong kha kan rak theih.” (Kol. 1:3, 4) Paul cu Thesalon Khrihfa hna ca zongah thla a cam. (2 Thes. 1:11, 12) Cu bantuk thlacamnak nih kan kong le unau pawl cung kan lungput kha fiang tein a langhter.
9 Chiti thuhmi Khrihfa le an hawilei “tuu dang” ca thlacamnak nih Pathian bupi ca kan siaherhnak a langhter. (Johan 10:16) Paul nih zumtu khat sinah ‘ralṭha tein thawngṭha biathli ka chim khawh nakhnga’ thla ka campiak u tiah a ti hna. (Efe. 6:17-20) Cuticun Khrihfa unau dang caah thla kan cam maw?
10. Midang ca thlacamnak nih zeitindah a kan ṭhathnem?
10 Midang ca thlacampiaknak nih an cung kan ngeihmi kan lungput a thlen khawh. Kan rem lomi kha thla kan campiak ahcun a cung kan ngeihmi kan lungput aa thleng kho men. (1 Johan 4:20, 21) Mah bantuk thlacamnak nih thazang a pek i lungrualnak a umter deuh. Cun Khrih bantuk dawtnak kan ngeih zong a langhter. (Johan 13:34, 35) Dawtnak cu Pathian thlarau nih a chuahtermi theitlai pakhat a si. Pakhat cio nih dawtnak, lawmhnak, daihnak, lungsaunak, zaangfahnak, ṭhatnak, zumhawktlakmi sinak, toidornak le mah le mah i tei khawhnak langhter awkah Jehovah sinah thiang thlarau bawmhnak kan hal maw? (Luka 11:13; Gal. 5:22, 23) Cuti a si ahcun thlarau lamhruai ning in kan nun kha kan biachim le kan tuahsernak nih a langhter lai.—Galati 5:16, 25 rel.
11. Midang kha thla kan campiak u tiah nawl cu zeicah aa tlak?
11 Kan fale camipuai ah ca fir ding tukforhnak an tong ti kan hngalh ahcun fel tein um awk le palhnak an tuah nakhnga lo bawmh awkah an ca thlacampiak in Baibal cang hman ding a si. Paul nih Korin Khrihfa hna kha ‘a hmaanlomi thil kha nan tuah nakhnga lo Pathian sinah thla kan cam’ tiah a ti hna. (2 Kor. 13:7) Cu bantuk toidor tein thlacamnak nih Jehovah a lawmhter i mizei kan si ṭha tein a langhter. (Phungthlukbia 15:8 rel.) “Thla kan campiak lengmang ko u. A hmaanmi thil kha tuah kan duhmi a si zungzal caah kan chiaṭha thleidannak lungthin kha a thiang ko” tiah lamkaltu Paul nih ca a ṭial. Paul bantuk in midang kha thla kan campiak u tiah nawl khawh a si ve.—Heb. 13:18.
Kan Thlacammi nih thil tampi a Langhter
12. Kan thlacamnak ah zeidah biapi bik ah chiah awk a si?
12 Kan thlacammi nih aa lawmmi le lungthomi Jehovah Tehte kan si a langhter maw? Kan thlacamnak ah Pathian duhnak zulh, Pennak thawngṭha chim, Jehovah nawlngeihnak thianter le a min thiang upatnak kha biapi bik ah kan chia maw? Kan thlacamnak ah mah kha biapi bik ah chiah awk a si. Bawipa thlacamnak zong mah bia in aa thawk: “Vancung khua i a um kan Pa, Na min thiang cu upat si ko seh; Na Pennak cu rung tlung ko seh, Vancung khua ah na duhnak an tuah bangin Vawlei cungah hin tuah si ve ko seh.”—Matt. 6:9, 10.
13, 14. Kan thlacammi nih kan kong zeidah a chim?
13 Pathian sin thla kan cam tikah kan i tinhmi, kan lungput le kan duhmi kha a lang. Jehovah nih zei bantuk minung kan si a hngalh. Phungthlukbia 17:3 nih “sui le ngun cu mei in hneksak an si, minung lung cu BAWIPA nih a hneksak” tiah a ti. Pathian nih kan lungthin kha a hmuh. (1 Sam. 16:7) Pumhnak, phungchimnak le thlarau lei kan unau pawl cung kan lungput kha a hngalh. Khrih “unau” cung kan lungput zong ṭha tein a hngalh. (Matt. 25:40) Kan lung um taktakmi maw kan cam asiloah kan bia kan nolh sawhsawh men maw a si kha a hngalh. “Thla nan cam tikah, Pathian bia lomi nih sullam a ngei set lomi bia tampi an hman bantukin va hmang ve hlah u, annih nih cun kan thlacam a sau ruangah hin Pathian nih a kan theihpiak deuh lai, tiah an ruah” tiah Jesuh nih a ti.—Matt. 6:7.
14 Kan thlacammi nih zei tluk in dah Pathian kan i bochan zong a langhter. David nih “[Jehovah] himnak hmun ah ka kalpi tuah, nangmah cu keimah nakin a sang deuhmi lungpi na si, ka ral hna sinin a ka hupphengtu a fekmi innsang na si. Na thlam chungah a zungzal in ka umter tuah, na thla tangah him tein i dor ko ning” tiah a ti. (Salm 61:3, 4) Pathian nih ‘a kan umpi i a kan ven’ tikah himnak kan hmu lai. (Biat. 7:15) Zumhnak hneksaknak ton tikah Jehovah “ka sinah a um” ti zum in thlacamnak in amah naih cu hnangam a va si dah!—Salm 118:5-9 rel.
15, 16. Thlacamnak nih Khrihfabu rian tinvo hmuh duhnak he aa tlaiin zeidah a kan hngalhter?
15 Jehovah sinah lungtak in thlacamnak nih kan lungput taktak a kan hngalhter khawh. Tahchunhnak ah, Pathian miphun zohkhenhnak rian ṭuan kan duh tuk cu phungchimnak le Khrihfabu rian kha toidor tein kan si khawh chung ṭuan kan duh ruangah a si maw? Asiloah ‘hruaitu si duh’ caah maw asiloah midang “a lal in lalhnawh’ duh caah dah a si? Jehovah mi hna lakah cu bantuk lungput ngeih ding a si lo. (3 Johan 9, 10; Luka 22:24-27 rel.) Kan duhnak a palh ahcun Jehovah Pathian sinah lungtak in thlacamnak nih mah kha a kan hngalhter lai i a hram a feh hlan ah i remh awk a kan bawmh lai.
16 Khrihfa nupile nih an vale kha bu rian ṭuantu, mah hnu in bu zohkhenhtu asiloah Khrihfa upa si hna seh ti an duh tuk men lai. Mah unau nu hna cu zohchunhawk ṭha in nun an i zuamnak thawngin an thlacamnak he aa tlak in tuah an i zuam ko lai. Cucu a biapi, zeicahtiah Khrihfabu nih pa pakhat a zoh tikah mah pa a chungkhar biachim le tuahsernak kha a zoh chih.
Pumhnak Thlacam Tikah
17. Pumpak thlacam tikah a daihnak hmun i cam cu zeicah a ṭhat?
17 Jesuh nih amahte lawng a Pa sin thlacam duh ah mibu kha a kaltak tawn hna. (Matt. 14:13; Luka 5:16; 6:12) Kannih zong hmunking ah thlacam kan herh caan a um. Thawng a daihnak ah thla kan cam ahcun Jehovah duh ningin biakhiah awk le amah kan biaknak ah zumhnak ṭhawn awk a kan bawmh lai. Asinain Jesuh cu zapi hmai zongah thla a cam, kannih zong zoh dawh in mi hmai ah thlacam khawh ning kha ruah ah a ṭha.
18. Khrihfabu aiawh in unaupa pawl nih thla an cam tikah zeidah an i cinken awk a si?
18 Pumhnak ah zumhtlakmi pa pawl nih Khrihfabu aiawh in thla an cam. (1 Tim. 2:8) Unau pawl nih thlacam donghnak ah “cuticun si ko seh” tiah sullam a ngeimi “amen” tiah ti khawh a si. Cuti chim tikah thla an cammi hnatlak a hau. Bawipa thlacamnak ah mi a lautermi bia le bia bultan a um lo. (Luka 11:2-4) Cun pakhat cio an herhmi asiloah an tonmi harnak kha a dikthliar in a chim lo. Pumpak ca herhmi cu zapi hmai ah cam loin mahte lawng thlacamnak ah cam awk a si. Mi hmai thlacamnak ah biathli kha cam chih ding a si.
19. Pumhnak thlacam lioah zeitindah um awk a si?
19 Pumhnak thlacam lioah ‘Pathian kan ṭih’ langhter awk a si. (1 Pit. 2:17) Umtu cheukhat cu amah le a caan le a hmun ah tuah a ṭha nain Khrihfabu ah cun a ṭhalo. (Pct. 3:1) Tahchunhnak ah pumhnak i thlacam lioah pakhat le pakhat an kut an i tlaih kha mi pakhat nih a hmuh hei ti u sih. Mah cu zumtu a si lomi le zumtu cheukhat caah lung siarem lo a si kho men. Nu le va cheukhat cu thlacam lioah an kut an i tlai lai nain an i kuh kha ruah loin a hmumi hna caah tlukrilhnak a si kho. Mah nuva hna cu Jehovah upat loin an i duhnak lawng a ruatmi an si tiah a hmumi hna nih an ruah khawh men. Pathian kan upat tuk caah kan “tuahmi cu a dihlak in Pathian thangṭhatnak” caah siter in lungsia a remter lomi, mi a lautermi le a tlukrilhtermi tuahsernak kha hrial u sih.—1 Kor. 10:31, 32; 2 Kor. 6:3.
Zeidah Kan Cam Lai?
20. Rom 8:26, 27 kha zeitindah na fianter lai?
20 Khua caan ah pumpak thlacam tikah cam awk kan hngal men lai lo. Paul nih hitin a ṭial: “Zeiti hin dah thla kan cam awk a si ti hmanh kan hngalh lo caah bia in chim khawh lomi hram-ainak in thlarau nih Pathian cu a kan nawlpiak . . . minung lungchung a hmutu Pathian nih cun thlarau ruahnak cu zeidah a si ti kha a hngalh.” (Rom 8:26, 27) Jehovah nih thlacamnak tampi kha Baibal ah a ṭialter hna. Baibal chung thlacamnak kha kan thlacamnak in a cohlan i a kan leh. Pathian nih a kan hngalh lengah a thlarau lamhruainak in Baibal a ṭialmi hna an ṭialmi a sullam kha a hngalh. Thlarau nih kan caah a kan “nawlpiak” tikah Jehovah nih kan thlacamnak kha a kan leh. Baibal kha ṭha tein kan hngalh tlukin thlacam awk kha kan lungah a hung chuak lai.
21. A hnu capar ah zei kong dah kan cawn lai?
21 Kan cawn cang bantukin kan thlacammi nih kan kong tampi a chim. Tahchunhnak ah zeitluk in dah Pathian he kan i naih le a Bia kan hngalh kha a langhter. (Jeim 4:8) A hnu capar ah Baibal ah a ummi thlacamnak cheukhat kong kan cawn lai. Mah thlacamnak ṭha tein zohnak nih kan thlacamnak ah zei ṭhatnak dah a chuahter?
Zeitindah Na Leh Lai?
• Jehovah sin thlacam tikah zei lungput dah ngeih awk a si?
• Zeicah zumtu khat caah thlacam awk a si?
• Kan thlacammi nih kan kong le kan lungput zeitindah a langhter khawh?
• Pumhnak thlacam lioah zeitindah um awk a si?
[Cahmai 4 hmanthlak]
Jehovah kha na thangṭhat lengmang maw?
[Cahmai 6 hmanthlak]
Pumhnak thlacam lioah kan umtu nih a zungzal in Jehovah a upat awk a si