Zeicah Jehovah Sinah Naa Pumpek?

“A ta ka simi Pathian vancungmi kha zahan ah ka sinah a ra.”—LAM. 27:23.

1. Tipil a ingmi hna nih zei kehlan dah an hlan cang, zei biahalnak dah a chuak?

‘JESUH Khrih raithawinak ah hrambunh in na sualnak i ngaichih in Jehovah duhnak tuah awkah a sinah naa pumpe maw?’ Mah hi tipil innak kong phungchim a donghnak i tipil ing ding pawl phit ding biahalnak pahnih ah pakhat a si. Khrihfa hna cu zeicah Jehovah sinah an i pumpek a herh? Pathian sin pumpeknak nih zeitindah a kan ṭhathnem? Pathian sin pumpeknak tuah loin biak cu zeicah cohlan khawh lomi a si? A phi hngalh awkah pumpeknak cu zeidah a si hngalh hmasa a hau.

2. Jehovah sinah i pumpek ti cu zei sullam dah a ngeih?

² Pathian sin pumpeknak timi cu zei sullam dah a ngeih? Lamkaltu Paul nih Pathian he an i pehtlaihnak zeitindah a chim kha zoh hmanh. Tilawng cung i harnak a tongmi hna hmai ah Jehovah kha “a ta ka simi Pathian” tiah a auh. (Lamkaltu 27:22-24 rel.) A hmaanmi Khrihfa vialte Jehovah ta an si dih. Mah he ralchanh in vawlei hi “a pumpi in miṭhalopa kuttangah a um.” (1 Johan 5:19) Khrihfa hna nih thlacamnak in Jehovah cohlan khawhmi pumpeknak an tuah tikah Pathian ta an hung si. Mah pumpeknak cu pumpak biakamnak a si. Cu hnu ah tipil in a si.

3. Jesuh tipil innak nih zeidah a langhter i a zultu pawl nih a keneh zeitindah an i zohchunh khawh?

³ Jesuh nih Pathian duhnak tuah aa thim i kan caah zohchunhawk ṭha a chiah. Pathian sin aa pumpemi Israel miphun chung in a chuah caah Pathian sinah aa pumpe cangmi a si. Asinain tipil a in tikah Nawlbia halmi lengin a tuahmi a um. “Pathian, nangmah nih tuah seh ti na ka duhmi tuah awkah ka ra” tiah a timi kha Baibal ah kan hmuh. (Heb. 10:7; Luka 3:21) Cucaah Jesuh tipil innak nih a Pa duhnak tuah awkah Pathian sin aa pumpek kha a langhter. A zultu pawl tipil in awk an i pek tikah a keneh an i zohchunh a si. Asinain tichung tipil in cu thlacamnak in Pathian sin an i pumpeknak zapi sin langhter a si.

Pumpeknak Nih A Kan Ṭhathnem Ning

4. David le Jonathan hawikomhnak nih Biakamnak tuahnak kongah zeidah a kan chimh?

⁴ Khrihfa pumpeknak cu biapi tuk ah chiah dingmi a si. Mah cu biakamnak tuah men a si lo. Cu a si ah pumpeknak nih zeitindah a kan ṭhathnem? Pakhat le pakhat i pehtlaih tikah biakamnak tuahmi nih a chuahtermi ṭhathnemnak he tahchunh u sih. Tahchunhnak ah, hawikom ngeihnak in ṭhatnak hmuh na duh ahcun hawikom sinak rian zong na cohlan a hau. Cu ah na hawikom zohkhenhnak rian zong aa tel. Baibal ah ṭialmi a lang bikmi hawikom hna lakah pakhat cu David le Jonathan hawikomhnak a si. An i hawikomhnak kha hram bunh in biakamnak an tuah. (1 Samuel 17:57; 18:1, 3 rel.) Cu bantuk biakamnak a tuahmi hawikomhnak phun cu a tlawm nain biakamnak kan tuah ti hngalhnak nih an i hawikomhnak a fehter.—Ptb. 17:17; 18:24.

5. Sal pakhat cu bawi ṭha pakhat sal sinak in a hmunmi zei ṭhatnak dah a hmuh khawh?

⁵ Israel miphun Pathian pekmi Nawlbia nih biakamnak in a ṭhahnemmi pehtlaihnak dang phun khat a langhter. Sal pakhat nih a bawi ṭha sal si zungzal nak in himnak hmuh a duh ahcun a bawipa he a hmunmi biakamnak an tuah khawh. Nawlbia nih hitin a chim: “Salpa nih khan, ‘Ka bawipa cu ka dawt, ka nupi le ka fale zong ka dawt hna, luat ka duh lo,’ a ti ahcun a bawipa nih khan Pathian sinah a chuahpi lai; innka ah maw innka tung ah khan maw a chuahpi lai i a hna an vih lai. A thih tiang a sal a si lai.”—Ex. 21:5, 6.

6, 7. (a) Biakamnak nih mi kha zeitindah a ṭhathnem hna? (b) Mahnih Jehovah he kan i pehtlaihnak ah zeidah a langhter?

⁶ Ṭhitumnak cu lungtak in biakamnak tuah a herhmi pehtlaihnak pakhat a si. Mah cu catlap cung lawngah bia i kam si loin minung pakhat cungah bia i kam a si. Ṭhitumnak tuah lo in a ummi hna cu anmah zong an fale zong zeitikhmanh ah himnak taktak an hmu kho lai lo. Asinain pakhat le pakhat biakamnak tuah in aa ṭhiummi hna cu harnak a chuah tikah dawtnak in tonghtham an i zuam, zeicahtiah Baibal nih cuticun tuah u a ti.—Matt. 19:5, 6; 1 Kor. 13:7, 8; Heb. 13:4.

⁷ Baibal chan ah mi nih chawlehnak le rianṭuannak ah ca in ṭialmi hnatlaknak an tuahnak thawngin ṭhatnak an hmu. (Matt. 20:1, 2, 8) Tuchan zong cuticun a si ve. Tahchunhnak ah, chawlehnak tuah hlan le copany i rian ṭuan hlan ah hnatlaknak ca ṭialnak in ṭhatnak kan hmu. Cucaah biakamnak tuahnak nih hawikom, chungkhar le rianṭuannak ah pehtlaihnak a fehter a si ahcun lungthin dihlak in i pumpeknak nih Jehovah he nan i pehtlaihnak cu zeitluk in dah a ṭhatter chinchin lai. Hlanlio mi nih Jehovah Pathian sin pumpeknak in zeitindah ṭhatnak an hmuh le mah pumpeknak cu bia i kam men a si lo kha atu kan i ruah lai.

Pathian Sin Pumpeknak Nih Israel Mi A Ṭhathnem Hna Ning

8. Israel mi hna caah Pathian sin pumpeknak timi cu zei sullam dah a ngeih?

⁸ Israel miphun cu an miphun ningin Pathian sin bia an i kam tikah Jehovah sin aa pumpe cangmi miphun an si. Jehovah nih Sinai Tlang pawngah a pumhter hna i hitin a ti hna: “Ka nawlbia kha nan ngaih i ka biakamnak kha nan zulh ahcun, ka mi hrimhrim nan si lai. . . . ka thimmi miphun cu nanmah hi nan si lai.” Annih nih lungthin khat tein “[Jehovah] nih a chimmi paoh cu kan tuah dih lai” tiah an ti. (Ex. 19:4-8) Israel mi hna caah Pathian sin pumpeknak timi cu thil zeimaw tuah awk bia i kam men a si lo. Annih cu Jehovah ta an si cang i Jehovah nih “a thimmi miphun” in a hmuh hna tinak a si.

9. Israel mi cu Pathian sin an i pumpekmi in zei ṭhatnak dah an hmuh?

⁹ Israel miphun cu Jehovah ta sinak in ṭhatnak an hmu. Dawtnak a ngeimi pa nih a fa a zohkhenh bantukin zumhawktlak in a zohkhenh hna. Pathian nih Israel mi kha hitin a ti hna: “Nu nih a fa cu a philh kho hnga maw? A chungchuak cu daw loin a um kho hnga maw? Nu nih hin cun a philh hmanh a philh kho hnga, sihmanhsehlaw kei nih cun kan philh bal hna lai lo.” (Isa. 49:15) Jehovah nih Nawlbia in lam a hruai hna, profet hmang in thazang a pek hna, vancungmi in a huhphenh hna. Salm caṭialtu nih hitin a ṭial: “Jakob cu a bia kha a chimh, Israel cu a nawlbia le a phunglam kha a pek. Miphun dang hna caah cun mah hihi a tuah hna lo.” (Salm 147:19, 20; Salm 34:7, 19; 48:14 rel.) Jehovah nih hlan ah a ta a simi a miphun a zohkhenh hna bantuk in tuchan zongah a sin aa pumpemi hna kha a zohkhenh hna lai.

Zeicah Pathian Sin Pumpek Awk A Si?

10, 11. Pathian chungkhar ah hrin kan si maw? Fianter.

¹⁰ Mi a cheu nih Khrihfa pumpeknak le tipil innak kong ruah tikah ‘zeicah pumpeknak tuah lo in Pathian biak khawh a si lo?’ tiah an ti men lai. Atu Pathian hmai kan sining taktak ruah tikah zeiruang ah a si kha a fiang. Adam sualnak ruangah kan zapi in Pathian chungkhar ah hrin kan si lo kha philh hlah. (Rom 3:23; 5:12) Pathian chungkhar mi si awkah Pathian sin i pumpek cu a herh tukmi a si. Zei ruangah a si zoh u sih.

¹¹ Ahohmanh zungzal nunnak a kan pe khomi minung Pa kan ngei lo. (1 Tim. 6:19) Hmasa bik minung nuva hna nih sualnak an tuah ruangah dawtnak Pa, Sertu he kan i hlat i Pathian fale in hrin kan si lo. (Deuteronomi 32:5 tahchunh.) Mah thawk in vawlei minung cu Jehovah chungkhar a si lomi ah an nung i Pathian he an i hlat.

12. (a) A tlinglomi minung hi zeitindah Pathian chungkhar mi kan si khawh? (b) Tipil in awkah zei kehlan dah hlan awk a si?

¹² Asinain, pakhat cio nih duhnungmi sal in Pathian chungkhar i cohlanmi si awkah kan nawl khawh.a Cucu misual a simi kan caah zeitindah a si khawh? Lamkaltu Paul nih hitin a ṭial: “Kannih cu Pathian ral kan rak si, sihmanhsehlaw a Fapa thihnak thawngin a hawi ah a kan ser cang.” (Rom 5:10) Tipil kan in tikah Pathian cohlanmi si awkah chiaṭha thleidannak lungthin thiang kha kan hal. (1 Pit. 3:21) Asinain tipil in hlan ah tuah hngami kehlan a um. Pathian hngalh a hau, amah bochan cawn le i ngaihchih le nunning thlen a hau. (Johan 17:3; Lam. 3:19; Heb. 11:6) Cun Pathian chungkhar mi si khawh awkah tuah ding a um rih. Zeidah a si?

13. Pathian chungkhar mi si awkah Pathian sin pumpek biakamnak tuah cu zeicah aa tlak?

¹³ Pathian he aa hlatmi mi pakhat cu duhnungmi sal in dirhmi Pathian chungkhar mi si hlan ah Jehovah sinah lungtak in bia aa kam hmasa a hau. Mah kha hngalhthiam awkah ngakṭah pakhat kha a zaangfak i an innchungkhar mi pakhat in cawm a duhmi upat awktlak pa kong khi ruat hmanh. Mah pa cu miṭha a si kha mi nih an hngalh. Asinain mah ngakchia kha a fa in a cohlan hlan ah bia i kam seh ti a duh. Cucaah “ka fa in kan cohlan hlan ah theih ka duhmi a um, na pa bantuk in na ka dawt lai i na ka upat lai maw” tiah a hal. Ngakchia nih lungtak in bia aa kam lawngah mah pa nih a chungkhar mi ah a cohlan lai. Mah cu aa tlakmi thil a si kho lo maw? Cu bantuk cun Jehovah nih a sinah lungtho tein pumpeknak a tuah i bia aa kammi lawng a chungkhar ah a cohlan hna. Baibal nih hitin a chim: “Pathian sinah a nung in pekchanhmi raithawinak bantukin i pe tuah u; a rian ah aa pumpemi le cohlan awk tlakmi si tuah u.”—Rom 12:1.

Dawtnak le Zumhnak A Langmi Tuahsernak

14. Pumpeknak tuah cu zeitindah dawtnak langhter a si?

¹⁴ Pathian sin pumpek biakamnak tuah cu lungtak in Jehovah kan dawt langhter a si. Ṭhitum biakamnak tuah he aa lo ngaite. Nupi ṭhi ding Khrihfa nih a nupi ding sinah zei thil a chuah hmanh ah na cungah zumhawktlak ka si lai tiah bia aa kammi in a dawtnak a langhter. Mah cu thil pakhat tuah ding biakam men si lo in mipakhat sinah lungtak in biakamnak tuah a si. Nupi ṭhi ding Khrihfa nih ṭhitum biakamnak tuah lo in a nupi ding a simi he umṭinak nawl a ngeih lo kha a hngalh. Cu bantuk cun pumpek biakamnak tuah loin Jehovah chungkhar mi sinak in ṭhatnak tling tein kan hmu kho lai lo. Cucaah, mitlinglo kan si nain amah ta si kan duh i zei thil a chuah hmanh ah a cungah zumhawktlak si kan duh caah Pathian sinah kan i pumpe.—Matt. 22:37.

15. Pumpeknak cu zeitindah zumhnak a langhtermi tuahsernak a si?

¹⁵ Pathian sin pumpeknak tuah cu zumhnak langhter a si. Zeiruangah? Jehovah kan zumhnak nih Pathian pawng um a nuamh kha a kan zumhter. (Salm 73:28) “Hrokhrolnak le ṭhatlonak in a khatmi chan” ah kan nun caah Pathian he kalṭi a fawi zungzal lai lo kan hngalh, asinain kan i zuamnak ah kan bawmh hna lai timi Pathian biakam kha kan zumh. (Fil. 2:15; 4:13) Mitlinglo kan si kha kan hngalh, asinain sualnak kan tuah sual tikhmanh ah Jehovah nih zaangfahnak he a kan pehtlaih lai kha kan zumh. (Salm 103:13, 14; Rom 7:21-25 rel.) Kan zumhfehnak hmunhter ding kan biakhiahnak ah Jehovah nih thluachuah a kan pek lai kha kan zumh.—Job 27:5.

Pathian Sin Pumpeknak Nih Lawmhnak A Chuahter

16, 17. Jehovah sin pumpeknak nih zeicah lawmhnak a chuahter?

¹⁶ Jehovah sin pumpeknak ah mah le mah i pek aa tel caah lawmhnak kan hmu. Jesuh nih a biapimi phunglam kha hitin a chim: “Pek leiah hin hmuh lei nakin lunglawmhnak a um deuh.” (Lam. 20:35) Jesuh cu vawlei cung ah phung a chim lioah peknak in lawmhnak tling tein a hmu. Midang nunnak lam hmuh awk a bawmh hna tikah a herh ahcun i din lo le rawl ei lo tiang in a um. (Johan 4:34) Jesuh cu a Pa lung a lawmhtermi thil tuahnak ah aa nuam. “A duhmi kha ka tuah zungzal” tiah Jesuh nih a ti.—Johan 8:29; Ptb. 27:11.

¹⁷ Cucaah Jesuh nih a zultu pawl sinah lungtlinnak a pemi nunnak lam kha hitin a chim: “Ahohmanh nih zulh nan ka duh ahcun, nanmah le nanmah nan i philh . . . a herh.” (Matt. 16:24) Mah tuahnak nih Jehovah he a kan naihter deuh. Mi zeihmanh nakin dawtnak in a kan zohkhenh khomi kut ah kan i pe kho lai maw?

18. Jehovah sin pumpeknak ning in nunnak nih thil dang asiloah midang sin i pumpek nakin zeicah lawmhnak a chuahter deuh?

¹⁸ Jehovah sin pumpek in a duhnak tuahnak thawngin kan i pumpek ning in kan nunmi nih thil dang asiloah midang sin kan i pumpekmi nakin lawmhnak a chuahter deuh. Tahchunhnak ah, mi tampi cu lawmhnak le lungsinak taktak a pe kho lomi thilri chawva kawlnak ah an caan vialte an pek. Asinain Jehovah sinah aa pumpemi cu zungzal lawmhnak an hmu. (Matt. 6:24) ‘Pathian rianṭuanṭi hawi’ sinak nawl an hmuhmi nih a lawmhter hna, zeicahtiah rian pakhat ah si loin kan ṭuanmi man sungah a chiami Pathian sinah an i pumpek caah a si. (1 Kor. 3:9) Mah ca ṭhatnak an hlawtmi ah amah tluk in man sungah a chiami an um kho lo. A cung i zumhawk a tlakmi hna kha an no lio siningah a kirter ṭhan hna lai, cuticun amah zohkhenhnak kha zungzal in an hmu lai.—Job 33:25; Hebru 6:10 rel.

19. Jehovah sin aa pumpemi hna nih zei tinvo sung dah an hmuh?

¹⁹ Jehovah sin na nunnak naa pekmi nih amah he an naihter deuh lai. Baibal nih “Pathian cu naih u law an naih ve hna lai” tiah a ti. (Jeim 4:8; Salm 25:14) A hnu capar ah Jehovah ta si i thim a hmaannak kong kan i ruah lai.

[A Tanglei Fianternak]

Zeitindah Na Leh Lai?

• Pathian sin pumpeknak timi cu a sullam zeidah a si?

• Pathian sin pumpeknak nih zeitindah a kan ṭhathnem?

• Khrihfa hna cu Jehovah sinah zeicah pumpeknak tuah a herh?

[Cahmai 6 hmanthlak]

Kan i pumpek ningin nunnak in zungzal lawmhnak kan hmu