Na Fale kha Carel le Hlathlainak Tuah Duh awkah Bawm hna

NA FALE an hmailei ṭhatnak ca na tuah khawhmi a ṭha bikmi lamkhat cu carel le hlathlainak tuah an duh nakhnga cawnpiak a si. Cuti tuahnak nih lunglawmhnak a chuahter. A cheukhat nih an hngakchia lio ah an nu le an pa nih ca an relpiakmi hna kha an i cinken peng. Carel cu a nuam i ṭhatnak zong a chuak. Mah cu Pathian salle caah a hmaan khun, zeicahtiah Baibal kan rel le hlathlainak kan tuah tikah thlarau lei ah kan ṭhangcho. Fa a ngeimi unaupa pakhat nih “mansung bik ah kan chiahmi cu carel le hlathlainak tuah hi a si” tiah a ti.

Hlathlainak ṭha tein tuah lengmang awkah na fale na bawmh hna ahcun Pathian he an i naih deuh lai. (Salm 1:1-3, 6) Zeitindah carel ding a si hngalh cu khamhnak caah a herhmi cu a si lo nain carelnak in thluachuah tampi hmuh khawh a si tiah Baibal nih a ti. Tahchunhnak ah, Biathlam 1:3 nih ‘hi cauk a relmi le profet bia a ngaimi cu lunglawmmi an si’ tiah a ti. Cun hlathlainak tuah tikah a biapi ngaimi lungthin peknak he aa tlai in lamkaltu Paul nih Timote sinah fiang tein hitin a ṭial: Hi thil hna hi ṭha tein ruat ko hna, “na ṭhannak kha mi vialte nih an hmuh nakhnga cu thil cu teimak tein tuah lengmang ko hna.”—1 Tim. 4:15.

Zeitindah rel ding le hlathlai ding a si hngalh men in ṭhatnak a chuak lai tinak a si lo. Mi tampi nih mah cu an hngalh ko nain an hmang lo, a biapi lomi thil ah an caan cu an hman. Cucaah nulepa hna nan fale nih mansungmi fimnak ngeih an duh nakhnga zeitindah nan bawmh hna lai?

Dawtnak le Zohchunhawk ṭha In

Dawtnak he tuahmi hlathlainak cu fale nih an duh. Owen le Claudia nih an fale pahnih kong kha hitin an chim: “Hlathlainak tuah lai caan kha an i ngaih. Zeicahtiah mah caan ah an hna a ngam i an i nuam. Hlathlainak tuah caan ah thanuam tein an i tel.” Fale cu hneksaknak tam bik an ton caan kum hra fai an si lio hmanh ah dawtnak he tuahmi chungkhar Baibal hlathlainak nih hlathlainak tuah a duhter peng hna. Owen le Claudia an fale cu atu hmaikal an si cang i an rak cawnmi carel le hlathlainak tuahnak in ṭhatnak an hmu peng.

Bawmtu pakhat cu nulepa zohchunhawk ṭha a si. Nulepa nih ca an rel le hlathlainak an tuah a hmumi fale nih mah kha an nunnak ah a biapimi thil in an hmuh lai. Asinain carel a huam lomi nulepa nih zeitindah zohchunhawk ṭha an langhter khawh lai? Cuti na si ahcun biapi ah na chiahmi le carelnak kong na hmuhning kha thlen a hau lai. (Rom 2:21) Nifate na tuahmi thil ah carel kha biapi ah na chiah ahcun na fale caah tampi a ṭhahnem lai. A hlei in Baibal relnak, pumhnak ca i timhnak le chungkhar Baibal cawnnak teima tein na tuah tikah cu thil hna tuah a biapit kha na fale nih fiang tein an hngalh lai.

Cucaah na fale carel duhnak ngeih awk na bawmh hna tikah dawtnak le zohchunhawk ṭha cu a biapi. Na fale carel duhnak ngeih awk na bawmh hna tikah zeidah na tuah khawh?

Carel Duhnak Ngeih awk Bawmhnak

Fale carel duhnak ngeih awk bawmh tikah a biapimi cheukhat cu zeidah an si? An ngakchiat tein cauk tonghter hna. A nu le a pa nih carel duhnak ngeih awk an rak bawmhmi Khrihfa upa pakhat nih hitin a chim: “Na fale kha cauk pe hna law ṭha tein tongh awkah cawnpiak hna. Cu tikah cauk cu an hawikom le an caah a biapimi a si lai.” A Liannganmi Saya Sinin Cawng, Ka Baibal Tuanbia cauk ti bantuk Baibal hrambunhmi cauk pawl kha na fale nih carel an thiam hlan in an theih cang lai. Mah cauk kha na fale na relpiak hna tikah holh na chimh hna lawng si loin “thlarau lei biatak” le “thlarau cawnpiakmi bia” na cawnpiak hna zong a si.—1 Kor. 2:13.

Aw chuah in rel lengmang. Na fale he nifate carel ṭinak caan khiak. Cuti tuah cu aw chuah hmaan na chimh hna a si i carel an duh nakhnga na bawmh hna a si. Na rel ning zong a biapi. Lungtho tein na rel ahcun annih zong an lung a tho ve lai. Tuanbia pakhat kha atu le atu relpiak an in hauh men lai. An in hauh ning in relpiak hna. A hnu ah a kong lam thar kha ngaih an duh lai. Asinain na rel lio ah aw chuah in rel ve awkah hnek chih hlah. Jesuh nih a bia a ngaimi hna kha “an hngalh khawh tawk in” a cawnpiak hnanak thawng in zohchunhawk ṭha a chiah. (Mar. 4:33) Na fale kha na hnek hna lo ahcun carelnak caan ah lungtho tein an i tel lai i carel duh ding na chimhmi hna zong hlawh a tling lai.

Na relmi ngaih awk le i ruah awkah forh hna. A rauh hlan ah na fale nih biafang kha an i cinken, aw chuah an thiam le a sullam an hngalh tikah naa lawm tuk lai. Na relmi i ruah ṭhannak nih ṭhancho awkah tampi a bawmh hna lai. Bia i ruahnak nih “a hnu carel an thiam tikah hngalhthiam a herhmi le cinken a herhmi biafang cawn awkah” a bawmh hna tiah ngakchia pawl ṭha tein carel thiam awk bawmh ning kong ṭialmi cauk nih a ti. Cun hiti zong in aa ṭial: “A ṭhang liomi ngakchia thluak cu ca cawn ding ah timhcia a si i man a ngeimi bia tam deuh chimh ahcun ṭhatnak tam deuh a um ve.”

Na fale kha ca ka relpiak u ti hna law biahalnak tuah awkah forh hna. Biahalnak tuah law a phi hmaan a pek khawh nakhnga a si khomi a phi pahnih, thum in chim. Cuti tuahnak nih cauk chung ah i cawn awk a um le an relmi cu sullam a ngeih kha an hngalh lai. Na relmi cauk cu sullam a ngei bikmi Baibal ah hram aa bunhmi cauk a si ahcun cuti tuah cu man a ngei khun lai.—Heb. 4:12.

Asinain carel cu a fawimi rian a si lo kha na hngalh ko lai. Caan pek le ṭha tein relthiam i zuam a hau.a Cucaah ngakchia nih carel an duh nakhnga lungtho tein thangṭhat hna. Thangṭhatnak nih carel duh awkah a forh hna lai.

Tuah a Phu i Lung a lawmhter

Hlathlainak zeitindah tuah ding a si chimhnak ah carel chimh lawng in a za lo. Hlathlainak tuahnak ah a konglam hna cawn le pakhat le pakhat zeitindah aa pehtlaih hngalhthiam zong aa tel. Cun a konglam hna ningcang tein chiah, cinken le hman khawhnak zong aa tel. Ngakchia pakhat nih zeitindah hlathlainak tuah awk a si a cawn i a ṭhathnem kha a hngalh tikah hlathlainak tuah a phu lai i a nuam lai.—Pct. 10:10.

Hlathlainak tuah tikah zeidah a herh kha cawnpiak hna. Zanlei Chungkhar Pumhnak le ni cang Baibal rel ṭinak caan ah na fale kha hlathlainak tuah ningcang na cawnpiak khawh hna. Chikkhat dai tein ṭhutter in a kong pakhat kha ṭha tein ngaihter cu lungtak in ngaih awk cawnpiak a si. Cun na fa kha atu a cawnmi le hlan ah a hngalhmi zeitindah pehtlaihnak a ngeih kha chimter. Mah cu tahchunh thiam awk cawnpiak a si. A relmi kha amah bia tein a tawinak in chimter ṭhan. Mah nih a sullam hngalh awk le cinken awkah a bawmh lai. Capar pakhat rel dih hnu ah a biapi bik a kong chimter ṭhan cu i ruahṭi ṭhannak a si i mahnih na fale kha i cinken awkah a bawmh hna lai. Ngakchiate an si hmanh ah hlathlainak tuah lio asiloah pumhnak ah a tawinak in i ṭial ding kha cawnpiak hna. Mahnih lungtak in ngaih awkah a bawmh hna. Cuti cawnpiak tikah cawnnak tuah kha an duh lai i nangmah le na fale nih ṭhatnak nan hmuh lai.

Hlathlainak ṭha tein tuah khawhnak pawngkam ser. Thli luh chuah a ṭhatnak, a ceunak, a daihnak le siaremnak hmun nih lungtak in ngaih awkah a fawiter. Hlathlainak tuahnak cung nulepa hmuhning cu a biapi tuk. Fa a ngeimi nu pakhat nih hitin a chim: “Carelnak le hlathlainak caah a caan khiah le mah ning in tuah lengmang a biapi. Mahnih na fale kha ningcang tein thil tuah a thiamter hna lai. Thil pakhat kha a caan khiahmi chung ah tuah dih a herh kha an hngalh lai.” Nulepa tampi cu hlathlainak tuah lio ah thil dang tuah kha an duh lo. Mifim pakhat chim ning ah cuti tuahnak cu fale kha ṭha tein hlathlainak tuah lengmang awk cawnpiaknak ah hmual a ngei.

Hlathlainak tuah a ṭhatnak kha chim. A donghnak ah na fale kha an cawnmi zeitindah an hman khawh kha chim hna. Hlathlainak tuah hnawhchanmi cu hlathlaimi hman hi a si. Mino unaupa pakhat nih hitin a chim: “Hlathlainak in ṭhatnak ka hmuh lo ahcun hlathlainak tuah ka duh lo. Asinain ka caah manngei a si ahcun tuah ka duh.” Mino nih hlathlainak tuah a ṭhatnak kha an hmuh tikah lungtak in tuah an duh lai. Carel an rak i ngaih bantuk in hlathlainak tuah an i ngaih lai.

A Sungbikmi Laksawng

Fale carel duh awk bawmhnak in hmuhmi ṭhatnak cu chim cawk lo a si. Carelnak in hmuhmi ṭhatnak cheukhat cu lungsinak lawng si loin sianginn, rianṭuannak le mi he i pehtlaihnak ah hlawhtlinnak an hmu lai, cun hi vawlei thil sining kha an hngalh lai i nulepa he an i pehtlaihnak zong a fek lai.

A biapi bik cu hlathlai duhnak nih fale kha Pathian a ṭihmi si awkah a bawmh khawh hna hi a si. Hlathlainak tuah duhnak hi fale lungchung ah Pathian bia “a kauh ning le a sau ning le a san ning le a thuh ning” hngalhternak ah a biapi bikmi a si. (Efe. 3:18) Cucaah nulepa cu fale cawnpiak awk thil tampi an ngei. Nulepa nih fale kha an ngakchiat lio in caan pek, zohkhenh le an si khawh chung in an bawmh hna ahcun a donghnak ah fale nih Jehovah biak ding an i thim lai tiah an i ruahchan khawh. Fale kha hlathlainak ṭha tein tuah lengmang ding cawnpiaknak nih Pathian he pehtlaihnak ṭha ngeih awk le hmunhter awkah a bawmh hna lai. Cucaah na fale kha carel le hlathlainak tuah an duh nakhnga na bawmh hna tikah Jehovah thluachuah hmuh awkah thlacam.—Ptb. 22:6.

[A Tanglei Fianternak]

[Cahmai 26 Rinli Kulh/Hmanthlak]

Relnak . . .

• Cauk tonghter hna

• Aw chuah in rel

• I tel ding forh hna

• Nan relmi kha i ruah u

• Ca ka relpiak u ti hna

• Biahalnak tuah awkah forh hna

Hlathlainak . . .

• Zohchunhawk ṭha langhter

• Ngakchia kha . . .

○ lungtak in ngaihter

○ tahchunhter

○ a tawinak in chimter

○ i ruahṭi ṭhan u

○ a tawinak in ṭialter

• Hlathlainak ṭha tein tuah khawhnak pawngkam ser

• Hlathlainak tuah a ṭhatnak kha chim