Careltu Hna Sinin Biahalnak
Genesis 6:3 ah “minung hi zungzal in nun cu ka sianh hna lai lo, zeicahtiah titsa an si. Atu thawk in kum za le kum kul nak tam an nung ti lai lo” tiah kan hmuh. Jehovah nih minung hi kum 120 lawng nun ding ri a khiahmi a si maw? Asiloah Noah nih Buanchukcho tlun lainak kong kha kum 120 chung maw a chim?
Mah biahalnak hna a phi cu an si lo.
Buanchukcho hlan minung cu kum a zaza in an nung. Buanchukcho a tlun ah Noah cu kum 600 a si i kum 950 a nung. (Gen. 7:6; 9:29) Buanchukcho hnu a chuakmi zong kum 120 leng an nung, Arpakshad cu kum 438, Shelah cu kum 433 an nung. (Gen. 11:10-15) Asinain Moses chan in cun minung chan cu kum 70, 80 hrawng lawng a si cang. (Salm 90:10) Cucaah Genesis 6:3 nih minung chan cu 120 a si lai a ti duhnak a si lo.
Cu a si ahcun hi hnu kum 120 ah Buanchukcho a tlung lai tiah mi ralrin pek awkah Pathian nih Noah sin a chimmi a si maw? A si lo. Pathian nih Noah sinah voi tam nawn bia a chim. Mah bia a chim hnu a hme hlei thum ah hitin ka hmuh: “Pathian nih Noah cu a thawh i, ‘minung hi an dihlak in hrawh awkah ka ruah cang. . . . Zeicahtiah vawlei hi sualnak an tuahmi in a khat.’” Kum tam nawn a rauh hnu Noah nih rian nganpi a simi lawng saknak a lim tikah “BAWIPA nih Noah cu a thawh i, ‘na innchungkhar dihlak he lawng chungah cun lut tuah’” tiah a ti. (Gen. 6:13; 7:1) Cun Jehovah nih Noah a chawnh kha Baibal cang dang zongah a um rih.—Gen. 8:15; 9:1, 8, 17.
Asinain Genesis 6:3 hi rel tikah aa phundang ngai, Noah timi min le Pathian nih a chawnh timi a um lo. Pathian nih aa tinhmi asiloah a biakhiahmi a chimmi a si. (Genesis 8:21 he tahchunh.) Adam chan hlanpi thil a cangmi pawl ṭial tikah “Pathian nih cun . . . ” ti bantuk bia hi kan hmuh tawn. (Gen. 1:6, 9, 14, 20, 24) Jehovah nih vawleicung ah minung a ser rih hna lo caah minung a chawn rih hna lo ti cu a fiang ko.
Cucaah Genesis 6:3 cu Pathian nih hi vawlei ṭhalo hrawh awk bia a khiahmi a si tiah ti khawh a si. Jehovah nih kum 120 hlan in bia a rak chah cang, mah kha Noah nih a thei lo. Asinain zeicah caan cu ri a khiah? Zeicah mah can cu a hngah?
Lamkaltu Piter nih a ruang kha hitin a chim: “Noah nih tilawng a ser lio i lungsau in Pathian nih a ngan hna lio ah khan. . . Lawng chungah a lutmi mi tlawmte, minung an dihlak ah pariat hna kha, ti chung cun khamh an si.” (1 Pit. 3:20) Pathian nih kum 120 tiah ri a khiah hnuah a tuah awk thil a tang rih. Kum 20 hrawng a rauh hnuah Noah le a nupi cu fa an hung ngei. (Gen. 5:32; 7:6) An fale pathum cu an hung ṭang i nupi an ṭhit dih tikah an chungkhar cu “pariat” an hung si. Cu hnuah Noah chungkhar tlawmte nih kum tampi sak a haumi tilawng nganpi sak ding a si. Pathian cu kum 120 chung a lungsau caah mah vialte kha lim a si i zumhfekmi minung pariat cu “ti chung cun khamh an si” i an nung kho.
Jehovah nih Noah sinah Buanchukcho a tlun lai a chimh lio kum kha Baibal nih a chim lo. Asinain, Noah fa a ngeih, a fale an upat i nupi an ngeih cio hnu ah lawng ser a fial caah Buanchukcho a tlun hlan kum 40, 50 hrawng ah a si kho. Mah lioah Jehovah nih Noah kha “minung hi an dihlak in hrawh awkah ka ruah cang” tiah a chimh. Cun Noah kha tilawng nganpi sak awk le a chung i luh zong a fial. (Gen. 6:13-18) Mah lengah, Noah nih a nunning in dinnak lei ah zohchunhawkṭha a si a langhter lengah Pathian phunglam ningin a nung lomi hrawh an si cang lai timi Pathian biaceihnak kong a thanhtu, ‘dinnak kong chimtu’ zong a si. Noah nih Buanchukcho zeitikah a tlun lai a hngal lo nain a tlung hrimhrim lai ti kha cu a hngalh. A rak tlun taktak kha nang zong nih na hngalh ko.—2 Pit. 2:5.