“Pathian Nih An Pekmi Hna Tuurun A Khaltu Kha Si U”
“Pathian nih an pekmi hna tuurun a khaltu kha si u law . . . lungtho lo si lo in lungtho tein zohkhenh hna u.”—1 PET. 5:2.
1. Piter nih a cakuat pakhatnak ah Khrihfa pawl kha zeicah thazaang a pek hna?
LAMKALTU Piter nih zumtu khat pawl thazaang pek awkah a cakuat pakhatnak kha a ṭial. Satan cu Khrihfa pawl seh awkah “a vak cuahmah ko.” Annih cu Satan tei awkah “fim hring tein um” le ‘a ṭhawngmi Pathian kut toi ah toidorte in khua an sak’ a hau. (1 Pit. 5:6, 8) Lungrual tein an um zong a hau. ‘Pakhat le pakhat an i sehnak’ thawngin ‘pakhat le pakhat an i hloh’ awk caan a si ti lo. (Gal. 5:15) Piter nih ca a kuat hna hnu caan khatkhat ah Nero nih Rom Khrihfa pawl hrem ding nawl a chuah, cucaah Piter cakuat cu a caan he aa tlakmi a si. o: Why did Peter want to strengthen his fellow believers when he wrote his first letter?
2, 3. Ahodah kan doh awk a si, atu le a hnu capar ah zei kong dah kan i ruah lai?
2 Tuchan ah, cu bantuk thil kan tong ve. Satan cu kanmah seh awkah caanṭha a kawl cuahmah. (Biat. 12:12) Cun hmailei ah ‘vawlei hramthawk in a ummi harnak a zeihmanh nakin a let tampi in a fak deuhmi harnak’ zong kan ton rih lai. (Matt. 24:21) Kumzabu pakhatnak Khrihfa hna cu i sik lo awk an i ralrin a herh bantuk in kannih zong kan i ralrin a hau ve. Cuti um khawh awkah a caan ah upa bawmhnak kan herh.
3 Khrihfa upa nih ‘Pathian pekmi tuurun’ zohkhenh ding an tinvo an sunsak chin nakhnga zeidah tuah khawh a si kha i ruah u sih. (1 Pit. 5:2) Mah hnu ah, tuukhalhnak rian ṭha tein ṭuan khawhning kong kan i ruah lai. A hnu capar ah, Khrihfabu nih tuurun ‘hruaitu ding le cawnpiaktu ding ah thimmi, rian a ṭuanmi hna’ cung ah zeitindah upatnak langhter khawh a si kha kan i ruah lai. (1 Thes. 5:12) Mah kong kan i ruahmi nih kan dohmi kan ral ngan bik, Satan doh khawh awk a kan bawmh lai.—Efe. 6:12.
Pathian Tuurun kha Zohkhenh
4, 5. Khrihfa upa nih tuurun kha zeitindah hmuh awk a si? Tahchunhnak pe.
4 Piter nih kumzabu pakhatnak Khrihfa upa pawl kha zohkhenh ding fial an simi tuurun kha Pathian hmuhning in hmuh awkah a forh hna. (1 Piter 5:1, 2 rel.) Piter cu Khrihfabu hruaitu asiloah a dirkamhtu a si nain upa pawl kha namnenh in a chawn hna lo. Rian ṭuan hawi bantuk in a forhfial hna. (Gal. 2:9) Piter bantuk in tuchan Uktu Bu nih Khrihfa upa pawl kha Pathian tuurun zohkhenhnak rian ngan ṭha tein ṭuan awkah tha an pek hna.
5 Piter nih upa pawl cu ‘Pathian tuurun a khaltu an si’ tiah a ṭial. Tuurun cu Jehovah le Jesuh Khrih ta an si ti i cinken cu an caah a biapi tuk. Tuurun an zohkhenh ning kong ah Pathian nih bia a ceih hna lai. Na dawtmi na hawi nih khual a tlawn karah a fale zohkhenh an fial hei ti u sih. Ngakchia cu ṭha tein na zohkhenh hna lai i rawl na pek hna lai a si lo maw? Pakhat a zawt ahcun a herhmi siiai in na thlop lai a si lo maw? Cu bantuk in, Khrihfa upa cu “Pathian nih amah Fapa thihnak thawngin amah ta ah aa sermi khrihfabu tuukhal” an si. (Lam. 20:28) Tuu pakhat cio cu a sungmi Khrih Jesuh thisen in cawkmi an si kha an i cinken zungzal. Pathian nih bia a kan ceih lai ti hngal in tuurun kha an cawm, an zohkhenh i an huhphenh.
6. Hlanlio tuukhal pawl rian cu zeidah a si?
6 Baibal chan lio tuukhal pawl rian khi ruathmanh. Tuurun zohkhenh awkah chun nilin le zan khuasik an in. (Gen. 31:40) An tuu caah an nunnak hmanh pek an ngamh. Tuukhal pate David nih a tuu kha chiandeih le vom tel in sahrang kaa chung in a khamh hna. Mah kong he aa tlaiin David nih sahrang kha “a hmurhmul in ka tlaih i ka tuk i ka thah” tiah a ti. (1 Sam. 17:34, 35) Zei tluk in dah a ral a ṭhat! Sahrang kaa he zeitluk in dah aa naih lai khi ruathmanh! A tuu himnak caah zei paoh a tuah.
7. Khrihfa upa nih Satan kaa chung in tuu kha zeitindah an chanh khawh?
7 Tuchan zongah, Khrihfa upa nih chiandeih bantuk a simi Satan dohnak kha an doh ve a hau. Mah ah ralṭha ngai in Satan kaa chung in tuu va chanh aa tel men lai. Satan rap nih a foihmi asiloah a daithlangmi unau pawl kha an bawmh hna lai. (Judas 22, 23 rel.) Khrihfa upa nih an rian kha Jehovah bawmhnak lo cun an ṭuan kho lai lo. Hma a pumi tuu kha nem tein an thlop, a hma kha Pathian Bia sii kha an thuh i an menpiak.
8. Khrihfa upa nih tuurun kha khoika ah dah an hruai hna, zeitindah?
8 Tuukhal taktak nih a tuurun kha ram a ṭhatnak le ti a tamnak hmun zong ah a hruai hna. Cu bantuk in Khrihfa upa nih tuurun kha hmaan tein i pumh awk tha an pek hnanak thawngin tuu nih “a caan hmaan tein an rawl” an hmuh khawh lai. (Matt. 24:45) Thlaraulei a dermi kha Baibal lamhruainak zulh awk bawmhnak ah a caan an pek. Lam a pialmi tuu cu tuurun sin kir ṭhan awk aa zuam kho men. Khrihfa upa nih unau kha tlerhkhonh lo in, Baibal phunglam tu nem tein an chimh lai i a nunnak ah zeitin hman khawh a si an chimh lai.
9, 10. Khrihfa upa nih thlaraulei a zawmi kha zeitindah an zohkhenh awk a si?
9 Na zawt tikah zei bantuk siibawi sinah dah piah na duh? Mizaw dang zoh duh ah na chimmi tlawmpal lawng a ngai i a rannak in sii an pemi siibawi maw? Asiloah na chimmi ṭha tein an ngaihpiak i na zawtnak le thlop ning kong an chimmi siibawi dah?
10 Cu bantuk in, Khrihfa upa nih thlaraulei a zawmi chimmi bia ngaihpiak in a dam nakhnga an bawmh khawh, mah kha Baibal nih ‘Bawipa min in chiti an thuh’ a si tiah a ti. (Jeim 5:14, 15 rel.) Gilead i a ummi damnak sii-ai bantuk in Pathian Bia nih a zawmi kha a damter khawh. (Jer. 8:22; Ezek. 34:16) Thlaraulei a zawmi nih Baibal phunglam a zulh ahcun Jehovah biak ṭhan awk bia a khiak kho lai. Khrihfa upa nih a zawmi a lungretheihnak an ngaihpiak i thla an campiakmi hi bawmtu ṭha taktak a si.
Lungtho lo si loin Lungtho tein
11. Khrihfa upa cu lungtho tein Pathian tuurun zohkhenh awkah zeinihdah a forh hna?
11 Piter nih upa pawl kha tuukhal rian zeitin ṭuan awk a si le zeitin ṭuan awk a si lo zong a chimh hna. Khrihfa upa nih Pathian tuurun kha “lungtho lo si loin lungtho tein” an zohkhenh hna awk a si. Lungtho tein zohkhenh awkah zeinihdah a forh hna? Piter cu Jesuh tuu zohkhenh awkah zeinihdah a forh? A bik in Bawipa a dawt le a tlaihchan caah a si. (Johan 21:15-17) Khrihfa upa zong Jesuh an dawt caah ‘anmah ruang i thihnak a ing i a tho ṭhanmi pa caah an nung.’ (2 Kor. 5:14, 15) Jesuh le Pathian le unau an dawt caah an thazaang, an ngeihmi thil le an caan hmang in tuurun an zohkhenh. (Matt. 22:37-39) Annih cu lungtho lo si loin lungtho tein an i pe.
12. Lamkaltu Paul cu zeitluk tiang in dah aa pek?
12 Khrihfa upa cu zeitluk tiang in dah an i pek awk a si? Tuu an zohkhenh tikah Jesuh nawl aa cawnmi lamkaltu Paul nawl an i cawn. (1 Kor. 11:1) Paul le a hawile nih Thesalonika khua unau pawl an dawt hna caah ‘Pathian sin in a rami thawng ṭha lawng hmanh kha si lo in an nunnak tiang hmanh hrawm an duh hna.’ Cucaah “nu nih a fale a zohkhenh hna bantuk” in nem tein an zohkhenh hna. (1 Thes. 2:7, 8) Nu nih a fale a zohkhenh hna ning kha Paul nih a hngalh. Nu nih a fa caah zei paoh a tuah lai i zanṭim hnuk dinh awk zongah a tho ko lai.
13. Khrihfa upa nih zeidah a tlari in an ṭuan awk a si?
13 Khrihfa upa nih tuu zohkhenhnak le chungkhar zohkhenhnak rian kha a tlari tein an ṭuan awk a si. (1 Tim. 5:8) Khrihfabu zohkhenhnak ah an hmanmi caan hi an innchungkhar ca hman khawhmi a si caah a sunglawimi caan a si. Mah rian pahnih a tlari tein ṭuan khawhnak lam khat cu khuacaan ah zanlei Chungkhar Pumhnak ah midang sawm kha a si. Japan ram i Khrihfa upa Masanao nih kum tampi chung an innchungkhar pumhnak ah nungak, tlangval le pale zumtu a si lomi chungkhar kha a sawm tawn hna. A hnu ah a bawmhmi hna cheukhat cu Khrihfa upa an hung si i Masanao nawl kha an i cawn ve.
Ṭuan Man Hmuh Duh ah si loin Ṭuan Duh Taktak Ruangah Ṭuan U
14, 15. Khrihfa upa nih “ṭuan man hmuh ding men” in ṭuan kha zeicah an i ralrin awk a si, Paul kha zeitindah an i zohchunh khawh?
14 Piter nih Khrihfa upa pawl kha “ṭuan man hmuh ding men ah si lo in ṭuan nan duh taktak ruang tu ah . . . ṭuan u” tiah a forh hna. Khrihfa upa nih an rian ah caan tam nawn an pek ko nain ṭuan man hmuh ding an i ruahchan lo. “Babilon Khualipi” i biaknak lamhruaitu pawl cu midang kha sifak ngai in khua an sakter hna lio ah anmah vial nuam ngai in khua a sa. (Biat. 18:2, 3) Cucaah Piter nih Khrihfa upa pawl kha “ṭuan man hmuh ding men ah” tuurun zohkhenh ding a si lonak kong ralrin pek a herh tiah a ruah. Tuchan Khrihfa upa pawl zong biaknak lamhruaitu pawl ziaza ngeih lo awk an i ralrin a hau.
15 Paul cu Khrihfa upa pawl caah zohchunhawk ṭha a si. Anih cu lamkaltu a si caah Thesalonika Khrihfa pawl cungah “thilrit” khinh khawh a si ko nain ‘aho sin hmanh ah a lak in’ rawl a ei lo. ‘Chun zan in rian a ṭuan.’ (2 Thes. 3:8) Tuchan Khrihfa upa le khualtlawng rianṭuantu hna cu mah kong ah zohchunhawk ṭha an si ve. Zumtu khat khual dawtnak kha an cohlan nain an cung ah “thilrit” an khinh hna lo.—1 Thes. 2:9.
16. Tuurun kha ‘ṭuan duh taktak ruang ah’ zohkhenh timi cu zeidah a si?
16 Khrihfa upa nih tuurun kha ‘ṭuan duh taktak ruang ah’ an zohkhenh hna. Mah kha mahzawn ruat lo in tuurun an zohkhenhnak ah kan hmuh. Jehovah biak awkah an hnek chih hna lo bantuk in Pathian rian kha pakhat le pakhat i zuam in ṭuan awk zong an forh hna lo. (Gal. 5:26) Khrihfa upa nih tuu pakhat cio an i lawh lo kha an hngalh. Lunglawm tein Jehovah biak awkah unau pawl kha an bawmh hna.
A Uk in Uk loin Zohchunhawk Ṭha tu si
17, 18. (a) Jesuh cawnpiakmi toidornak kha zultu hna nih a caan ah zeicah zulh an i harh? (b) Lamkaltu hna sining in zeidah kan hngalh khawh?
17 Kan i ruah cang bantuk in Khrihfa upa nih an zohkhenhmi tuurun cu anmah ta si lo in Pathian ta a si kha an i cinken zungzal awk a si. Pathian ta a simi kha “a uk in uk” lo awk an i ralring. (1 Piter 5:3 rel.) Jesuh zultu pawl cu a caan ah a hmaanlomi lungput an rak ngei. Minung uktu hna bantuk in nawlngeih an rak duh.—Marka 10:42-45 rel.
18 ‘Khrihfabu hruaitu si a duhmi’ tuchan unaupa pawl nih zeiruang ah dah ṭuan an duh kha an i check awk a si. (1 Tim. 3:1) Khrihfa upa a simi zong nih lamkaltu cheukhat bantuk in nawlngeih asiloah minthan ka duh maw, duh lo ti kha ṭha tein i check an duh ko lai. Lamkaltu hna hmanh nih cu bantuk lungput ngeih lo awk an i harh ahcun Khrihfa upa zong nih vawlei lungput a simi mi cung ah nawlngeih duhnak hrial i zuam a herh kha an hngalh ko lai.
19. Khrihfa upa nih tuurun an huhphenh tikah zeidah an i cinken awk a si?
19 Tuurun chung ah “ṭih a nungmi cenghngia” luh lo awk huhphenh tikah Khrihfa upa nih an nawlngeihnak kha hman a hau lai. (Lam. 20:28-30) Paul nih Titas kha “thazaang na pek hna le na chimhhrin hna tikah na nawlngeihnak kha fakpi in hmang” tiah a ti. (Titas 2:15) Fakpi in chimhhrin tik le biaceih tikah Khrihfa upa nih sualnak a tuahmi kha upatnak he an pehtlaih hna lai. Sualphawt len nakin nem tein leem a ṭhat deuh le lam hmaan zulh awkah an lung a thawhter deuh kha an hngalh.
20. Zohchunhawk ṭha chiahnak ah Khrihfa upa nih Jesuh kha zeitindah an i cawn khawh?
20 Khrih zohchunhawk ṭha nih Khrihfa upa kha tuurun dawt awkah a forh hna. (Johan 13:12-15) Phungchimnak le zultu siternak rian he aa tlaiin a zultu pawl a cawnpiak hna ning kan rel tikah kan lung a kan suk. Jesuh aa toidornak nih a zultu pawl lungthin kha a suk i ‘toidornak lungthin he midang nakin ka ṭha deuh tiah zeitikhmanh ah i ruah’ lo awk a forh hna. (Fil. 2:3) Tuchan Khrihfa upa zong Jesuh nunning i zohchunh awk a forh hna bantuk in anmah zong tuurun ‘zohchunh ding si’ an i zuam.
21. Khrihfa upa nih zei laksawng dah an hmuh lai?
21 Piter nih Khrihfa upa sin thazaang peknak a bia kha hmailei hmuh laimi biakamnak in a donghter. (1 Piter 5:4 rel.) Chiti thuhmi bu zohkhenhtu pawl cu van ah Khrih he “a ziam kho lomi sunparnak bawiluchin” an hmu lai. “Tuudang” a simi bu zohkhenhtu hna cu “tuukhal bawi bik” uknak tang vawlei ah Pathian tuurun zohkhenhnak rian an hmu te lai. (Johan 10:16) A hnu capar ah unau pawl nih Khrihfa upa pawl zeitindah bawmh khawh a si timi kong kan i ruah lai.
I Ruah Ṭhannak
• Piter nih Pathian tuurun a zohkhenhtu upa pawl kha zeicah ralrin a pek hna?
• Khrihfa upa nih thlaraulei a zawmi kha zeitindah zohkhenh awk a si?
• Khrihfa upa cu Pathian tuurun zohkhenh awkah zeinihdah a forh hna?
[Cahmai 21nak i hmanthlak]
Hlanlio tuukhal bantuk in tuchan Khrihfa upa nih an zohkhenhmi “tuu” kha an huhphenh hna