Jehovah Le Jesuh Lungsaunak I Zohchunh U

“Bawipa nih kan cungah lungsaunak a ngeih cu kannih kha khamh a kan duh caah a si.”—2 PIT. 3:15.

ZEITINDAH NA LEH LAI?

Jehovah nih zeitindah lungsaunak a langhter?

Jesuh cu zeicah caan saupi tiang lungsaunak a ngeih a herh?

Pathian lungsaunak i cawn awkah zeidah kan tuah khawh?

1. Zumhfekmi unau cheukhat nih zei biahalnak dah an tuah?

KUM tampi chung harnak tampi a tong nain zumhfek tein a ummi unaunu nih “ka thih hlan ah caan a dong hnga maw?” tiah biahalnak a tuah. Kum tampi chung Jehovah a biami unau dang zong nih cutin biahalnak an tuah ve. Pathian nih atu kan tonmi harnak vialte a hloh dih lai i thil vialte a thar in a ser lai caan kha kan i ngaih tuk. (Biat. 21:5) Satan chan donghnak a nai tuk cang ti zumh khawhnak a ruang tampi a um ko nain mah caan lungsau tein hngah cu a har ko lai.

2. Lungsaunak he aa tlaimi zei biahalnak kong dah kan i ruah lai?

² Lungsaunak kan ngeih a hau tiah Baibal nih a ti. Hlanlio Pathian salle bantukin kan zumhnak a feh le Pathian biakam a tlin lai caan kha lungsau tein kan hngah ahcun a biakam a tlin kha kan hmuh ve lai. (Hebru 6:11, 12 rel.) Amah Jehovah theng zong a lung a sau. Ṭhatlonak kha zeitik caan paoh ah a donghter khawh ko nain aa tlak bikmi caan kha a hngah. (Rom 9:20-24) Zeicah mah tluk in a lung a sau? Jesuh nih a Pa lungsaunak kha zeitindah aa cawn, kan caah zeitindah zohchunhawk ṭha a chiah? Jehovah bantukin lungsau tein hngah awk cawn cu kan caah zeicah a ṭhat? Mah biahalnak hna i a phi nih Jehovah cu a khul a nuar tiah kan ruah hmanh ah lungsau awk le zumhfeh awk a kan bawmh lai.

Jehovah cu Zeicah a Lung a Sau?

3, 4. (a) Jehovah nih zeicah lungsaunak a langhter? (b) Adam le Evi nawl an ngaih lo tikah Jehovah nih zeidah a tuah?

³ Van le vawlei ah Jehovah nakin nawl a ngei deuhmi ahohmanh an um lo i harnak vialte donghter awkah a hngah a hau lo ti cu a fiang ko. Asinain a ruang ṭha a um caah lungsaunak a langhter. Eden dum i ralchanhnak ruangah a biapimi biahalnak cheukhat a chuak i van le vawlei i a ummi vialte ṭhatnak caah mah biahalnak a phi kha hngalh a hau. A phi ṭha tein hngalh khawh awkah a caan pek a hau ti kha Jehovah nih a hngalh caah a lung a saumi a si. Van le vawlei i a ummi vialte nih an tuahmi le an ruahmi kha a hngalh dih caah kan caah a ṭha bikmi a tuah ti cu a fiang ko.—Heb. 4:13.

⁴ Jehovah nih aa tinhmi cu Adam le Evi tefa vawleicung ah khah dih ding kha a si. Satan nih Evi kha a hlen i a hnuah Adam kha nawlngaih lo awk a tuah tikah Pathian cu a lau lo, khulrang in biakhiahnak a tuah lo asiloah aa tinhmi kha a hlaw lo. Mah canah minung le vawlei ca i aa tinhmi tlinternak lam tu a rak ruat. (Isa. 55:11) Jehovah nih sumnak le lungsaunak a langhter caah aa tinhmi kha a tlinter khawh i kan caah uktu ṭha bik a si kha a langhter. Aa tinhmi cheukhat a ṭha bikmi lam in tlinter awkah kum thong tampi tiang a hngah.

5. Jehovah nih lungsau tein a hngah ruang ah zei thil ṭha dah a chuak?

⁵ Jehovah nih lungsau tein a hngahnak a ruang dang cu mi tam deuh nih zungzal nunnak an hmuh khawh nakhnga caah a si. Atu ah, “mibu nganpi” khamh awkah a herhmi thil a tuah. (Biat. 7:9, 14; 14:6) Jehovah nih phungchimnak rian hmang in a Pennak le a dingmi a phunglam cawn awkah mi kha a sawm hna. Pennak kong cu minung caah a ṭha bikmi “thawng ṭha” a si. (Matt. 24:14) Jehovah nih a hnuhmi hna cu vawlei pumpi bu ah an hun i tel ve, mah bu cu a hmaanmi thil a duh i hawikom ṭha a simi hna in dirhmi a si. (Johan 6:44-47) Dawtnak Pathian nih cu bantuk mi hna kha a mithmai ṭha hmuh awkah a bawmh hna. Mi cheukhat kha vancung Pennak i uktu ṭuan ve awkah a thim hna. Vancung an kai tikah vawleicung i toidornak a ngeimi hna kha mitling si awk le zungzal nunnak hmuh awkah an bawmh hna lai. Jehovah nih lungsau tein a hngah lioah a biakam tlinter awkah rian a ṭuan cuahmah. Cutin a tuah cu kanmah ṭhatnak caah a si.

6. (a) Noah chan ah Jehovah nih zeitindah lungsaunak a langhter? (b) Kan chan ah Jehovah nih zeitindah lungsaunak a langhter?

⁶ Buanchukcho hlan miṭhalo pawl a pehtlaih hna ning zoh tikah Jehovah cu mi nih a lung an fahter tuk hmanh ah a lung a sau ti kan hngalh khawh. Vawleicung ah nupa sualnak le zaangennak a khah ruang le mi nih thil ṭhalo lawng tuah an duh ruang ah Jehovah cu “a ngaih a chia.” (Gen. 6:2-8) Mah thil ṭhalo kha a zungzal in umnak nawl a rak awnh lo. Cucaah nawl a ngai lomi hna kha Buanchukcho in hrawh awkah bia a khiah. Cutin tuah awk a hngah lioah Noah le a chungkhar khamh awkah a herhmi thil a rak tuah. (1 Pit. 3:20) A caan a cut tikah Jehovah nih Noah kha Buanchukcho kong a chimh i lawng sak a fial. (Gen. 6:14-22) Cun a rauh hlan i a tlung hngami rawhnak kong zong midang kha ralrin pek awkah a fial. Baibal nih Noah cu “dinnak kong a chimtu” a si tiah a ti. (2 Pit. 2:5) Kan chan cu Noah chan he aa lo tiah Jesuh nih a ti. Jehovah nih hi chan ṭhalo hrawh ding caan a khiah cang, asinain “cu ni le cu caan” cu ahohmanh nih kan hngal lo. (Matt. 24:36) Tuchan ah, Pathian nih mi kha ralrin pek awk le zeitindah khamhnak hmuh khawh a si timi kong chim awk rian a kan pek.

7. Jehovah cu a biakam tlinter awkah a khul a nuar tuk maw? Fianter.

⁷ Jehovah cu a lung a sau ti tikah caan liam lai a hngah sawhsawh tinak a si lo ti cu a fiang ko. Pathian nih zei ah a kan rel lo, kan zawn a kan ruat lo tiah zeitikhmanh ah kan ruah awk a si lo. Asinain kum upat ruang asiloah hi chan ṭhalo i tonmi sifah harnak ruang ah cutin ruah a fawite. Cu tikah kan lung a dong men lai asiloah Pathian cu a biakam tlinter awkah a khul a nuar tuk tiah kan ruah men lai. (Heb. 10:36) Pathian a lung a sau cu a ruang ṭha a um caah a si ti le mah caan kha zumhfekmi a salle ṭhatnak caah a hman ti kha zeitikhmanh ah philh hlah. (2 Pit. 2:3; 3:9) Jesuh nih a Pa lungsaunak zeitindah aa cawn ti kha atu i ruah u sih.

Jesuh Lungsaunak

8. Zei bantuk thil sining ah dah Jesuh nih lungsaunak a langhter?

⁸ Jesuh nih kum thong tampi chung Pathian duhnak kha lungtho tein a tuah. Satan nih Jehovah a doh tikah Jehovah nih a fapa kha vawlei ah Messiah in thlah awkah bia a khiah. Vawlei i rat awkah kum thong tampi chung a rak hngah lio i Jesuh langhtermi lungsaunak khi ruat hmanh. (Galati 4:4 rel.) Mah lioah zeihmanh tuah loin a hngak sawhsawh lo. A Pa pekmi rian ṭuannak ah a rian a rak tam. Vawleicung a rat tikah chimchungbia bang in Satan kut in ka thi lai ti kha a rak hngalh. (Gen. 3:15; Matt. 16:21) Mi nih fakpi in an hrem tikah lungsau tein a in, zeicahtiah cutin thih ding kha Pathian nih a duh ti a hngalh caah a si. Jesuh cu amah zawn lawng a rak ruat lo. Pathian Fapa a si ko nain aa toidor i sifah harnak in kha a rak duh. Pathian cung zumhfehnak ah zohchunhawk ṭha bik a si caah kan i zohchunh awk a si.—Heb. 5:8, 9.

9, 10. (a) Jesuh nih Jehovah a hngah lioah zeidah a tuah? (b) Jesuh lungput zeitindah kan i cawn khawh?

⁹ Jesuh cu a thawhṭhan hnuah vancung le vawleicung i a ummi nawlngeihnak vialte pek a si. (Matt. 28:18) Jesuh nih a nawlngeihnak kha Jehovah nih aa tinhmi thil, a khiahmi caan i tlinter awkah a hman zungzal. A ral kha a ke tang ah Pathian nih a chiah hna caan, 1914 tiang Pathian orhlei kam ah lungsau tein a hngah. (Salm 110:1, 2; Heb. 10:12, 13) A rauh hlan ah Satan chan ṭhalo vialte hi a hrawh dih cang lai. A hrawh hlanah mi kha Pathian lungton awkah lungsau tein a bawmh hna i “nunnak tiput cerh kam” ah a hruai hna.—Biat. 7:17.

¹⁰ Jesuh lungput zeitindah i cawn khawh a si ti kha na hngal maw? Jehovah cu a khiahmi caan ning in rian a ṭuan ti kha Jesuh nih a hngalh. A Pa fialmi rian ṭuan kha aa ngaih, asinain Pathian khiahmi caan kha lungtho tein a hngak. Satan chan ṭhalo donghnak kan hngah lioah kan zapi in lungsau a hau. Kan hnabei a dongh tikah kan lung a dongh awk a si lo, Pathian tu kan hngah awk a si. Cutin kan lung a sau khawh nakhnga zeidah kan tuah khawh?

Pathian bantukin Lungsau Khawh Ning

11. (a) Lungsaunak le zumhnak cu zeitindah aa pehtlaih? (b) Zumhnak ṭhawnter awk zei a ruang ṭha dah a um?

¹¹ Jesuh vawlei a rat hlanah, profet pawl le a dang zumhfekmi Pathian salle nih a tling lomi minung hmanh nih lungsau khawh a si ko ti kha an nunning in an langhter. An lungsaunak cu an zumhnak he aa pehtlai. (Jeim 5:10, 11 rel.) Zumhnak an ngeih lo ahcun asiloah Jehovah nih a kamhmi hna an zumh taktak lo ahcun a tlin lai kha lungsau tein an hngak kho lai lo. Asinain Pathian nih a kan kamhmi a kan tuahpiak lai ti kha an zumh caah a har tukmi le ṭihnungmi thil kha an in khawh lengmang. (Heb. 11:13, 35-40) Tuchan ah Jesuh cu ‘zumhnak a Tlintertu’ in rian a ṭuan caah kan zumhnak ṭhawnter deuh awk a ruang tam deuh in a um. (Heb. 12:2, NW) Jesuh nih chimchungbia tampi a tlinter i Pathian tinhmi ṭha tein hngalhthiam awk a kan bawmh.

12. Kan zumhnak a ṭhawn nakhnga zeidah kan tuah khawh?

¹² Kan zumhnak ṭhawnter awk le lungsau deuh awkah zeidah kan tuah khawh? Pathian lamhruainak zulh hi a biapimi a si. Tahchunhnak ah, Pathian Pennak kha na nunnak ah zeicah hmasa bik ah chiah awk a si ti kha ruat hmanh. Matthai 6:33 i aa ṭialmi ruahnak cheuhnak kha zulh awkah naa zuam kho deuh lai maw? A sullam cu phungchimnak ah caan tam deuh in i tel asiloah nunning sawhsawh in nun awkah thlennak tuah kha a si. Jehovah nih a lamhruainak zulh awkah naa zuamnak kha thluachuah aan pek. Mah cu Baibal cawnpiaknak a thar aan pekmi asiloah “Pathian daihnak, minung hngalhnak a lonhtu” aan pekmi kha a si kho. (Filipi 4:7 rel.) Mah thluachuah ah na lung na chiah ahcun lungsau cu na caah a ṭhat kha na hngalh lai.—Salm 34:8.

13. Zumhnak nih kan lung a sauter khawh deuh ning kha zei he dah tahchunh khawh a si?

¹³ Zumhnak nih zeitindah kan lung a sauter khawh deuh ti hngalhthiam awkah tahchunhnak pakhat nih a kan bawmh khawh. Lothlopa nih thlaici a tuh, a thlawhpiak i a theipar a zun. A theipar tampi in a zun fatinte thlaici tuh ṭhan awkah a lung a tho chin lai. Thlaici kha tam deuh hmanh in a tuh ko lai. Rawl zun caan lungsau tein hngah a hau ti a hngalh ko nain thlaici kha a tuh. Rawl ka zun te lai ti kha a zumh. Cu bantukin Jehovah lamhruainak kan hngalh, kan zulh i ṭhatnak kan hmuh tikah Jehovah kan i bochannak le kan zumhnak a ṭhawng chin. Mah tikah kan hmuh laimi thluachuah kha lungsau tein hngah awk a fawi deuh lai.—Jeim 5:7, 8 rel.

14, 15. Minung tonmi sifah harnak kha zeitindah kan hmuh awk a si?

¹⁴ Lungsau deuh awk a kan bawm khomi a dang pakhat cu hi vawlei sining le kan sining, Jehovah nih a hmuh ning in hmuh i zuam kha a si. Tahchunhnak ah, Jehovah nih minung kan tonmi sifah harnak zeitindah a hmuh ti kha ruat hmanh. Hlanliopi in minung tonmi harnak kha Jehovah nih a hmuh i mah nih a lung a fahter. Asinain a lung a fah ruang ah thil ṭha tuah lo in a um lo. A fapa kha “Khuachia rianṭuannak hrawh awk” le Satan ruang i minung tonmi harnak vialte hloh awkah a thlah. (1 Johan 3:8) Pathian nih a rauh hlan ah sifah harnak vialte kha zungzal ca in a hrawh dih cang lai. Cucaah hi vawleicung i a ummi ṭhatlonak ruang ah kan zumhnak derter le Jehovah nih mah thil pawl a tuah lainak caan kong ah lungsau lo in um kha kan duh lo. Pathian nih a kan kamhmi kha zum u sih. Jehovah nih ṭhatlonak a donghter lainak caan kha a khiah cang i mah caan bak ah a donghter lai.—Isa. 46:13; Nah. 1:9.

¹⁵ Hi harnak caan chung ah, a faktukmi zumhnak hneksaknak kan tong kho. Kanmah le kan dawtmi hna zong zaangennak asiloah thil dang ruang ah harnak kan tong men lai. Mah thil ruang ah thinhun lo in Jehovah kha kan lungthin dihlak in i bochan awkah bia kan khiah a hau. A tling lomi minung kan si caah cutin tuah cu a fawi lai lo. Asinain Matthai 26:39 ah kan hmuhmi Jesuh tuahmi kha philh hlah u sih.—(Rel.)

16. Donghnak caan kan hngah lioah zeidah kan hrial awk a si?

¹⁶ Donghnak caan a nai rih lo tiah a ruatmi pakhat cu a hmaan lomi lungput a hun ngei kho. Mah tikah amah duhmi tuah awkah aa tim men lai. Hitin a ruah men lai, ‘Jehovah nih a biakam a tlinter le tlinter lo ka zoh tuah lai.’ Cu bantuk a hmaan lomi ruahnak nih mah pa kha a lung a sauter lai lo. Cu tikah vawlei ah minthangmi si awk, Pathian Pennak kha hmasa bik ah kawl ti loin tangka tu kawl awk asiloah nuam tein khuasak khawh awkah sianghleiruun kai aa tim men lai. Cutin a tuah ahcun zumhnak a ngeih lo a si lai. ‘Zumhnak le lungsaunak an ngeih’ ruang ah Jehovah nih a kamhmi hna thluachuah a hmumi pawl kha i zohchunh hna u tiah Paul nih a kan forh. (Heb. 6:12) Jehovah nih hi vawlei ṭhalo hrawh awkah bia a khiah cang i a tlai lai lo. (Hab. 2:3) Mah caan chung ah Jehovah rian kha a phung men in kan ṭuan awk a si lo. Mah canah, ni hmanung bik caan ah kan nung ti kha i cinken in phungchimnak ah kan si khawh chung in kan i tel awk a si. Mah rian nih atu hmanh ah lawmhnak tampi a kan hmuhter khawh.—Luka 21:36.

Lungsaunak nih a Chuahtermi Thluachuah

17, 18. (a) Lungsau tein kan hngah lioah zei tuah awk caanṭha dah kan hmuh? (b) Kan lung a sau ahcun zei thluachuah dah kan hmuh lai?

¹⁷ Pathian rian kha thla tlawmpal kan ṭuan ah siseh kum tampi kan ṭuan ah siseh a zungzal in ṭuan kan duh. Hi chan ṭhalo donghnak zei can hngah a hauh hmanh ah lungsaunak nih inkhawh awk a kan bawmh lai. Jehovah nih a biakam kan zumh le harnak kan ton bu in a cung ah zumhfek tein kan um lai ti langhternak caanṭha a kan pek. (1 Pit. 4:13, 14) Khamhnak hmuh awkah a dongh tiang lungsau tein kan inkhawh nakhnga Pathian nih a kan cawnpiak.—1 Pit. 5:10.

¹⁸ Jesuh cu van le vawlei i nawlngeihnak vialte pek a si cang, cucaah zumhfek tein na um ahcun aan kilven lai i zeihmanh nih mah kha a kham kho lai lo. (Johan 10:28, 29) Cucaah hmailei ca thinphan awk a si lo asiloah thihnak hmanh kan ṭih awk a si lo. A dongh tiang lungsau tein a ing khomi cu khamh an si lai. Cucaah hi vawlei ruahnak kan ngeih ve nakhnga lo le Jehovah aa bochan ti lomi kan si nakhnga lo i ralring hna u sih. Mah canah Pathian nih lungsaunak a langhter lioah kan zumhnak ṭhawnter awk le kan caan ṭha tein hman awkah bia khiak hna u sih.—Matt. 24:13, 2 Piter 3:17, 18 rel.

[Cahmai 21nak i hmanthlak]

Lungsaunak nih Pathian Pennak hmasa bik chiah awk le thluachuah hmuh awk aan bawmh lai