Pathian Bia Ngai Law A Biakam In Ṭhatnak Hmu
‘Pathian nakin a ngan deuhmi an um lo caah chiatsernak ah cun amah min kha a hman.’—HEB. 6:13.
NA PHI KHO LAI MAW?
Pathian biakam cu a tling hrimhrim lai tiah zeicah kan zumh khawh?
Adam le Evi sualnak an tuah hnuah Pathian nih zei biakamnak dah a tuah?
Abraham sinah Pathian nih chiatser in bia aa kammi in zeitindah ṭhatnak kan hmuh?
1. Jehovah tuahmi biakam le minung tuahmi biakam cu zeitindah aa dan?
JEHOVAH cu “zumhawktlakmi Pathian a si.” (Salm 31:5) Minung cu a tlinglomi kan si caah a zungzal in zumhawk a tlakmi kan si kho lo, asinain ‘Pathian cu lih a chim kho lo.’ (Heb. 6:18; Nambar 23:19 rel.) Minung caah ka tuah lai tiah bia aa kammi kha a tuah zungzal. Tahchunhnak ah, Pathian nih vawleicung i a ummi thil vialte kha sernak ni tiah auhmi, caan ruk chung ah a rak ser. Sernak ni a dihlak in a thawkka ah zeidah a tuah lai kha a chim i a chim ning in a tuah taktak. Sernak ni, niruk a dihnak ni ah “Pathian nih a sermi thil vialte cu a zoh i a lung a si ngaingai.”—Gen. 1:6, 7, 30, 31.
2. Pathian dinh ni cu zeidah a si? Zeicah mah ni kha a dang tein a chiah?
2 Jehovah Pathian nih a sermi thil vialte kha a ṭha tuk a ti hnuah ni sarihnak ni aa thawk tiah a thanh. Mah ni cu Pathian dinh ni a si, suimilam 24 a ummi ni a si lo. Vawlei he aa tlaimi thil sernak rian in aa dinhnak caan saupi kha a si. (Gen. 2:2) Pathian dinh ni cu atu tiang a dih rih lo. (Heb. 4:9, 10) Zeitik set ah aa thawk ti cu Baibal nih a chim lo. Asinain Adam nupi Evi ser a si hnu caan khatkhat, a luancia kum 6,000 hrawng ah aa thawk ti cu kan hngalh. A rauhhlan ah Khrih kum thongkhat uknak aa thawk cang lai, mah chungah Pathian nih vawlei ca i aa tinhmi kha a tlinter lai. Pathian nih vawlei hi a tlingmi minung, zungzal in um khawhnak hmun paradis ah canter a duh. (Gen. 1:27, 28; Biat. 20:6) Cu bantuk a nuammi nunnak hmuh khawh a si lai maw? A si! Zeicahtiah Pathian nih “ni sarih ni cu thluachuah a pek i a dangte in a chiah” caah a si. Mah cu zei thil a chuah hmanhah Pathian nih aa dinh ni a dih tikah aa tinhmi a tlinter hrimhrim lai ti a kan zumhtertu aamahkhaan a si.—Gen. 2:3.
3. (a) Pathian dinh ni aa thawk hnuah zei thil dah a rak cang? (b) Jehovah nih mah dohnak a tawnghtham lai ning kha zeitindah a chim?
3 Pathian dinh ni aa thawk hnuah, Pathian kha a sermi cheukhat nih an doh. Vancungmi Satan nih Pathian can ah amah kha mi nih an biak nakhnga aa zuam. Satan nih a hmasa bik lih a chim i Evi kha a hlen, cucaah Evi nih Jehovah nawl a ngai ti lo. (1 Tim. 2:14) Mah hnuah, Evi nih a vapa kha Jehovah nawl ngaih lo awkah a tuah ve. (Gen. 3:1-6) Mah dohnak cu a um balmi thil lakah a ṭhalo bikmi a si. Satan nih Jehovah cu zumhawktlak a si lo tiah sual a puh nain Jehovah nih vawlei ca i aa tinhmi a tling hrimhrim lai ti langhternak caah chiatser in biakam a hau tiah a ruat lo. Mah canah, a khiahmi caan i hngalhthiam a si te laimi bia tu a rak chim. Mah dohnak zeitindah a tawnghtham lai timi kong lawng a chim, hitin a ti: “Nangmah [Satan] le nu cu nan i hua lai, mi le rul cu ral an si lai. Mi [biakammi Tefa] nih na lu kha rial an in zuam lai i nang nih an kedil kha cuk naa zuam ve lai.”—Gen. 3:15; Biat. 12:9.
Phungning a simi Chiatser in Biakamnak
4, 5. Abraham nih biakamnak caah phungning a simi zeidah a hman?
4 Mah caan tiangah, thil pakhatkhat kha a hmaan tinak caah chiatser in biakam a rak herh rih lomi a lo. Pathian a daw i a nawl aa cawnmi, a tlingmi thilnung pawl nih chiatser in bia an i kam a hau lo. Biatak kha an chim zungzal caah pakhat le pakhat tlingte in an i zum kho. Asinain, a hmasa bik nuva hna nih sualnak an tuah i mitlinglo an si hnu in cun mi nih lih an chim lengmang. Cucaah a biapimi thil pakhatkhat a hmaan hrimhrim ti langhternak caah chiatser in biakam hi a hung herh.
5 Abraham nih a tlawm bik ah voithum chiatser in bia a rak i kam. (Gen. 21:22-24; 24:2-4, 9) Tahchunhnak ah, Elam siangpahrang le amah he a ṭang ṭimi siangpahrang vialte a va tei hnanak in a rak kir tikah Abraham cu chiatser in bia a rak i kam. Salem le Sodom siangpahrang hna cu Abraham ton awkah an ra. Salem siangpahrang zong a simi, “Cungnung Bik Pathian tlangbawi” zong a simi Melkhizedek nih Abraham cu thluachuah a pek i a ral a teitertu Pathian kha a thangṭhat. (Gen. 14:17-20) Sodom siangpahrang nih a ralkap pawl kha an ral hna kut in Abraham nih a khamh hna caah laksawng pek a duh. Mah tikah Abraham cu chiatser in hitin bia aa kam: “Van le vawlei a sertu Cungnung Bik Pathian hmai ah chiatserte in bia kaa kam i, na thil a simi paohpaoh, la fang pakhat le phanah hri tiangin zeihmanh kaa lak lai lo, ka ti. Cucaah cun nang zong nih zeitikhmanh ah, “Abram cu keimah nih pei ka rumter ko cu,” na ti kho ve lai lo.”—Gen. 14:21-23.
Jehovah nih Abraham Sinah Chiatser in Bia aa Kam
6. (a) Abraham nih kan caah zei bantuk zohchunhawk ṭha dah a chiah? (b) Abraham tuahmi in zeitindah ṭhatnak kan hmuh lai?
6 A tlinglomi minung nih a biakam an zumh nakhnga Jehovah Pathian nih chiatser in biakamnak a tuah ve. “Ka nun bangin ka chim, tiah Bawipa PATHIAN nih a ti” ti bantuk bia a hmannak thawng in Jehovah nih chiatser in bia aa kam. (Ezek. 17:16) Jehovah nih chiatser in biakamnak voi 40 leng hrawng a tuahmi kha Baibal ah kan hmuh. Mi nih an hngalh bikmi cu Abraham sinah chiatser in bia aa kammi kha a si. Abraham nunchung ah Jehovah nih a sinah biakamnak voi tam nawn a tuah. Mah biakamnak in Abraham nih biakammi Tefa cu amah innchungkhar, a fapa Isak chung in a chuak lai ti kha a hngalh. (Gen. 12:1-3, 7; 13:14-17; 15:5, 18; 21:12) Cun Jehovah nih Abraham kha a har tukmi thil pakhat in a hneksak. Mah cu a dawt tukmi a fapa kha raithawi awkah a fialmi kha a si. Mah kha Abraham nih a rannak in a tuah colh. Asinain Isak kha rai a thawi deuh hlante ah vancungmi nih a kham. Cun Pathian nih hitin chiatser in biakamnak a tuah: ‘Keimah nih keimah min hrimhrim in biakamnak ka ser lai . . . fapa pakhat lawngte na ngeihmi kha pek sianlo in na ka um lo caah thluachuah tampi in kan pek lai. Van i arfi zat le rili kam i thetse zat khin tefa kan pek lai. Na tefa nih cun na ral kha an tei hna lai. Cun ka nawl na ngaih caah vawleicung miphun vialte cu na tefa thawng in thluachuah an hmu lai.’—Gen. 22:1-3, 9-12, 15-18, NW.
7, 8. (a) Pathian nih Abraham sinah zeicah chiatser in bia aa kam? (b) Pathian nih chiatser in bia aa kamnak thawng in “tuu dang” nih zeitindah thluachuah an hmuh lai?
7 Pathian nih ka biakam a tling hrimhrim lai tiin Abraham sinah zeicah chiatser in bia aa kam? Khrih he uktu a ṭuanṭi hngami, biakammi “tefa” i a pahnihnak a si hngami pawl an zumhnak fehter awk le thapek awkah a si. (Hebru 6:13-18 rel; Gal. 3:29) Lamkaltu Paul nih a chim bantuk in Jehovah nih “a biakamnak cu chiatsernak in a fehter. Hi thil pahnih, biakamnak le chiatsernak hna hi thlen khawh a si lomi thil an si i hi hna kong ah hin Pathian nih a lih a chim kho lo. Cucaah . . . kan hmai i a kan chiah piakmi ruahchannak kha ralṭha ngaingai in fek tein kan i tlaih.”
8 Abraham sinah Pathian nih chiatser in bia aa kammi in chiti thuhmi hna lawng hi ṭhatnak a hmumi an si lo. Pathian nih Abraham “tefa” thawng in “vawleicung miphun vialte” cu thluachuah an hmu lai tiah chiatser in bia aa kam. (Gen. 22:18) Mah thluachuah a hmumi hna lakah vawleicung Paradis ah zungzal nun ding aa ruahchanmi, nawl a ngaimi Khrih i “tuu dang” zong an i tel. (Johan 10:16) Naa ruahchanmi cu van a si ah vawlei a si ah Pathian nawl na ngaih zungzalnak thawngin naa ruahchanmi kha ‘fekte in i tlaih.’—Hebru 6:11, 12 rel.
Pathian Chiatserh Biakamnak dang
9. Izipt ram ah Abraham tefa pawl sal i an can lioah Pathian nih zeitindah chiatser in bia aa kam?
9 Abraham chan in kum tampi a rauh hnuah Jehovah nih Abraham sin i bia aa kammi tlinter awkah chiatser in bia aa kam ṭhan. Mah biakamnak cu Izipt ram ah sal i a cangmi Abraham tefa pawl sin biachim awkah Moses a thlah lioah a rak tuahmi a si. (Ex. 6:6-8) Mah lio caan he aa tlaiin Pathian nih hitin a chim: “Israel kha ka rak thim tikah . . . kut hler in chiat ka ser i Izipt ram in kaan chuahpi hna lai i nan caah ka thimmi, cawhnuk le khuaihliti in a luangmi ram . . . ah cun kan luhpi hna lai, ka ti.”—Ezek. 20:5, 6.
10. Jehovah nih Israel miphun kha Izipt ram in a chuahpi hna hnuah zeitindah bia a kamh hna?
10 Jehovah nih Izipt ram in Israel miphun a chuahpi hna hnuah an sinah a dang biakamnak hitin a tuah ṭhan: “Ka nawlbia kha nan ngaih i ka biakamnak kha nan zulh ahcun, ka mi hrimhrim nan si lai. Vawlei hi a dihlak in ka ta a si, asinain, ka thimmi miphun cu nanmah hi nan si lai. Nannih cu [“siangpahrang tlangbawi,” NW] bantuk in ka rian a ṭuanmi miphun nan si lai i keimah sin i pekchanh mi nan si lai.” (Ex. 19:5, 6) Israel miphun cu zeitluk a ṭhami tinvo sung dah an hmuh! A sullam cu Jehovah bia an ngaih ahcun miphun dang thluachuah a hmuhter hngami, siangpahrang tlangbawi phun an miphun chung in a chuak te lai tinak a si. A hnuah Jehovah nih mah biakamnak ka tuah lioah, hamnak kha ka fehter asiloah chiatser in bia kaa kam tiah a chim ṭhan.—Ezek. 16:8.
11. Pathian nih Israel miphun kha a thimmi miphun si awkah a chimh hna tikah zeitindah an leh?
11 Jehovah nih Israel miphun kha a nawl ngaih awkah hramhram in bia a kamter hna lo. A pekmi hna tinvo sung cohlan awk zong ah a hnek hna lo. Asinain annih nih na nawl kan ngaih lai ti in biakamnak tuah an duh. “BAWIPA nih a chimmi paoh cu kan tuah dih lai” tiah an ti. (Ex. 19:8) Nithum hnuah, Jehovah Pathian nih Israel miphun kha a thimmi miphun an si caah zeidah tuahter a duh hna kha a chimh hna. Hmasa bik ah, Nawlbia Pahra a pek hna, cun Exodus 20:22 in 23:33 chungah aa ṭialmi nawlbia dang zong Moses hmang in a chimh hna. Cu tikah Israel miphun nih zeitindah an leh? “Mi zapi nih khan, ‘BAWIPA nih a chimmi vialte cu kan tuah dih lai,’ an ti.” (Ex. 24:3) Cun Moses nih nawlbia hna kha “biakamnak cauk” ah a ṭial hna i an miphun dihlak in an theih ṭhan nakhnga thangpi in a relpiak hna. Mah hnuah, Israel miphun nih a voithumnak biakamnak kha hitin an tuah ṭhan: “BAWIPA nih nawl a kan pekmi vialte cu kan tuah dih lai; amah nawl cu kan zulh lai.”—Ex. 24:4, 7, 8.
12. Jehovah nih Israel miphun kha a miphun si awk bia a kamh hna hnuah zeidah a rak tuah? Pathian sin bia an i kam hnuah Israel miphun nih zeidah an tuah?
12 Jehovah nih Israel miphun sin a biakam ning in a tuah colh. Biaknak thlam ah tlangbawi rian a ṭuan hngami pawl kha a thim hna. Annih nih a tlinglomi minung kha Pathian he pehtlaihnak ṭha ngeih awkah an bawmh hna lai. Asinain Israel miphun nih Pathian sin aa pumpemi an sinak kha an philh colh i “Israel Mithiang kha a thin an hunter.” (Salm 78:41) Tahchunhnak ah, Jehovah nih Moses kha Sinai Tlang cungah lamhruainak a pek lioah Israel miphun cu an lung a sau lo i Pathian an zumhnak a rak tlau. Moses nih a kan kaltak cang tiah an ruah caah sui cawfa pakhat an ser i “hihi nan pathian cu a si, Izipt ram in an chuahtertu hna nan pathian cu a si” tiah mi kha an ti hna. (Ex. 32:1, 4) Cun an sermi siasal kha an biak i raithawinak an pek, asinain Jehovah kan biak tiah an ti. Jehovah nih siasal an biak kha a hmuh tikah Moses sinah hitin a chim: “Nan zulh lai tiah ka timi hna lam cu khulrang in an kaltak.” (Ex. 32:5, 6, 8) Mah hnu zong ah Israel miphun nih Pathian sinah biakamnak an tuah lengmang nain mah ning in an rak um lo.—Nam. 30:2.
Chiatser in Biakamnak dang Pahnih
13. Jehovah nih David sinah chiatser in zei biakamnak dah a tuah? Mah cu biakammi Tefa kong a si ti kha zeitindah kan hngalh khawh?
13 Siangpahrang David a bawi lioah Jehovah nih a nawl a ngaimi paoh thluachuah a hmuhter hngami biakamnak dang pahnih kha chiatser in a rak tuah. Pakhatnak ah, na bawiṭhutdan cu zungzal in a hmun lai tiah David kha chiatser in bia a kamh. (Salm 89:35, 36; 132:11, 12) Chimduhmi cu biakammi Tefa cu “David Fapa” tiah auh a si lai tinak a si. (Matt. 1:1; 21:9) David nih biakammi Tefa cu amah nakin a ngan deuh caah toidor tein ka “Bawipa” tiah a auh.—Matt. 22:42-44.
14. Jehovah nih biakammi Tefa he aa tlaiin zei biakamnak dah a tuah? Mah in zeitindah ṭhatnak kan hmuh?
14 Pahnihnak ah, Jehovah nih biakammi Tefa cu Siangpahrang lawng si lo in Tlangbawi Ngan zong a si lai tiah David kha a rak chimh. Cutin si cu a ṭha tukmi a si. Pathian nih Israel miphun a pekmi hna Nawlbia ning in, tlangbawi cu Levi phun in a si lai i, siangpahrang cu Judah phun in a si lai. Cucaah, mah lioah siangpahrang le tlangbawi rian kha ahohmanh nih an kemh kho lo. Asinain, David nih a ra laimi Siangpahrang kong kha hitin a chimchung: “BAWIPA nih siangpahrang ka Bawipa cu a thawh i, ‘Na ral cu na ke tangah ka chiah hna hlan tiang, ka orhlei kamah hin ṭhu tuah,’ tiah a ti. BAWIPA nih a fekmi biakamnak a tuah i a let ṭhan lai lo, ‘Nang cu zungzal in tlangbawi na si lai, Melkhizedek tlangbawi a sining in na si lai,’ a ti.” (Salm 110:1, 4) David nih a chimchung bantukin biakammi Tefa, Jesuh Khrih cu atu ah van ah Siangpahrang a si cang. An sualnak aa ngaichihmi pawl kha Pathian he pehtlaihnak ṭha an ngeih nakhnga a bawmh hnanak thawng in Tlangbawi Ngan zong a si cang.—Hebru 7:21, 25, 26 rel.
Pathian Israel Miphun Thar
15, 16. (a) Zei Israel phun hnih kong dah Baibal ah aa ṭial? Tuchan ah zei Israel miphun dah Pathian thluachuah a hmu? (b) Jesuh nih chiatser biakamnak kongah a zultu kha zeitindah a cawnpiak hna?
15 Israel miphun nih Jesuh Khrih an hlawt caah Jehovah nih a hlawt ve hna. Cucaah ‘siangpahrang tlangbawi’ phun si khawhnak tinvo kha an sung. Jesuh nih Judah biaknak hruaitu pawl kha hitin a ti hna: “Nannih cu Pathian Pennak kha chuh nan si lai i thei ṭha tein a tlai dingmi kha pek an si lai.” (Matt. 21:43) Jesuh chimmi miphun thar cu AD 33, Pentekos ni ah dirh a rak si. Mah ni ah Pathian nih Jerusalem ah aa pummi Jesuh zultu 120 hrawng kha a thlarau a toih hna. Annih cu ‘Pathian Israel’ tiah timi “miphun” thar an hung si. A rauhhlan ah, miphun dang chung in thong tam nawn zong Pathian Israel miphun ah an rak i tel ve.—Gal. 6:16.
16 Nawl a ngai lomi Israel miphun taktak he i lo loin Pathian Israel miphun thar cu Pathian nawl an ngai zungzal. Pathian Israel miphun pek an simi nawlbia pakhat cu chiatser in biakamnak kong a si. Jesuh vawleicung a um lioah mi cu a hmaan lomi thil le a biapi lomi thil kongah chiatser in bia an rak i kam tawn. (Matt. 23:16-22) Cucaah Jesuh nih a zultu kha hitin a cawnpiak hna: “Chiatser biahrennak zeihmanh tuah hlah u . . . ‘A si,’ ‘A si lo,’ ti lawng kha chim ko u, cu pin cu Mi Ṭhalopa sinin a rami thil an si.”—Matt. 5:34, 37.
17. Zei kong dah a hnu capar ah kan i ruah lai?
17 Cu a si ah chiatser in biakamnak tuah cu a palh zungzal tinak a si maw? A simi kha “a si” ti cu zei sullam dah a si? Mah kong kha a hnu capar ah kan i ruah lai. Pathian Bia kha ṭha tein kan ruah tikah Jehovah bia ngaih zungzal awk kan forh ko seh. Cuticun Pathian nih chiatser in bia aa kam bantukin thluachuah a kan pek zungzal lai.
[Cahmai 24nak i hmanthlak]
A rauhhlan ah Abraham nih Jehovah biakam a tlin kha a hmuh lai
[Cahmai 26nak i hmanthlak]
Jehovah biakam cu a tling zungzal