“Hihi Zeitikah Dah A Si Lai?”

1. Zultu hna bantukin zeidah hngalh kan duh ve?

JESUH i vawleicung a rianṭuannak a dih laiah a zultu hna nih hmailei i a cang dingmi thil kha hngalh an duh. Cucaah a thih hlan, ni tlawmpal ah a zultu pali nih hitin an hal: “Hihi zeitikah dah a si lai? Cun na ratnak ding hmelchunhnak le atu chan donghnak ding hmelchunhnak ah zei thil dah a um hna lai?” (Matt. 24:3; Mar. 13:3) Mah tikah Jesuh nih a cang laimi thil tampi kha a rak chimh hna. Mah chimchungbia cu Matthai dal 24 le 25 ah kan hmuh khawh. Jesuh nih a chimmi cu kan caah a biapi tuk ve. Zeicahtiah kannih zong hmailei ah a cang dingmi thil kha hngalh kan duh ve caah a si.

2. (a) Kum tampi chung, Pathian salle nih zeidah fiang tein hngalhthiam an i zuam? (b) Hi capar ah zei biahalnak pathum dah kan i ruah lai?

² Jehovah salle nih kum tampi chung, donghnak caan he aa tlaimi Jesuh chimchungbia kha an hlathlai i mah kha hngalhthiam awkah Pathian sinah bawmhnak an hal. Annih nih zeitikah dah Jesuh chimchungbia a tlin lai ti kha fiang tein hngalhthiam an duh. Hi capar ah mah biahalnak pathum hi kan i ruah lai: ‘Harnak nganpi’ cu zeitikah dah aa thawk lai? Jesuh nih “tuu” le “meheh” kha zeitikah dah bia a ceih hna lai? Jesuh cu zeitikah dah “a rat”?—Matt. 24:21; 25:31-33.

Harnak Nganpi cu Zeitikah dah aa Thawk?

3. Hlanah, harnak nganpi he aa tlaiin zeitindah kan rak ruah?

³ Hlanah, harnak nganpi cu Vawlei Ralpi Inak aa thawk caan, 1914 ah aa thawk tiah kan rak ruah. Vawlei ah a taang rihmi chiti thuhmi hna nih khuazakip ah phung an chim khawh nakhnga Jehovah nih raltuknak kha 1918 ah a dihternak thawng in mah caan kha “a tawiter” tiah kan rak ruah. (Matt. 24:21, 22) Phungchim rian kan liim tikah Satan vawlei cu hrawh a si lai tiah kan rak ruah. Cucaah harnak nganpi cu ṭhen thum in ṭhen a si lai, mah cu 1914 ah aa thawk lai, 1918 ah chikkhat aa ngol ta lai i Armageddon ah a dih lai tiah kan rak ruah.

4. Jesuh chimchungbia he aa tlaiin zeidah kan hun hngalh?

⁴ Donghnak caan he aa tlaimi Jesuh chimchungbia pakhat cu voihnih tiang a tling lai ti kha a hnuah kan hun hngalh. (Matt. 24:4-22) A voikhatnak cu kumzabu pakhatnak ah Judea peng ah a rak tling i a voihnihnak cu kan chan ah vawleicung pumpi ah a tling lai. Cucaah a dang chimchungbia kan hngalhthiam ning zong thlen a herh.a

5. (a) 1914 ah zeidah aa thawk? (b) Mah nganfahnak he aa lomi harnak cu kumzabu pakhatnak i zeitik kum ah dah a tlun?

⁵ Tahchunhnak ah, harnak nganpi cu 1914 ah aa thawk lo ti kha kan hun hngalh. Zeicah? Baibal chimchungbia nih harnak nganpi cu ram khat le ram khat an i dohnak in si loin a hmaan lomi biaknak hrawhnak in aa thawk lai tiah a ti caah a si. Cucaah 1914 ah aa thawkmi raltuknak cu harnak nganpi a hramthawknak si loin “nau chuah lai nganfah” bantuk a simi harnak aa thawknak tu a si. (Matt. 24:8) Mah harnak cu Jerusalem le Judea peng ah AD 33 in 66 ah a rak tlungmi harnak he aa lo.

6. Harnak nganpi aa thawk caan kha zeitindah kan hngalh khawh lai?

⁶ Harnak nganpi aa thawk caan kha zeitindah kan hngalh khawh lai? Jesuh nih hitin a chimchung: “Profet Daniel nih, ‘Ṭhiotu Fihnung,’ a timi kha hmun thiang i a dir cu nan hmuh lai. (A reltu hna, hi a sullam hi i hngalh u). Cun Judea ram i a ummi kha tlang cungah zam hna seh.” (Matt. 24:15, 16) AD 66 ah Rom ralkap nih Jerusalem le biakinn an doh tikah mah chimchungbia cu a voikhatnak a rak tling. Rom ralkap pawl cu “ṭhiotu fihnung” an si i Judah mi nih a thiang tiah an ruahmi “hmun thiang” ah an dir. Mah chimchungbia cu a voihnihnak ah ngandeuh in a tling lai. UN cu “ṭhiotu fihnung” a si i Khrihfaram cu a bu chungmi nih “hmun thiang” in an hmuh. Biathlam 17:16-18 zong nih a chimchung bantukin UN nih Khrihfaram le a Liannganmi Babilon chung in a taangmi hna kha a doh hna lai. Mah cu harnak nganpi a hramthawknak a si lai.

7. (a) Kumzabu pakhatnak ah chiti thuhmi hna cu zeitindah an rak luat? (b) Hmailei ah tah zeidah a cang lai?

⁷ Jesuh nih “cu caan cu Pathian nih a tawiter” lai ti zong in a chimchung. A voikhatnak tlinnak ah, Rom ralkap nih Jerusalem an dohmi kha AD 66 ah an ngolnak thawng in cu caan cu “tawiter” a si. Mah ruangah Jerusalem le Judea peng ah a ummi chiti thuhmi hna cu, khua in khan an zam i an rak “nung.” (Matthai 24:22 rel; Mal. 3:17) A voihnihnak a tlin tikah tah zeidah a cang lai? A hmaan lomi biaknak hrawh a si tikah a hmaanmi biaknak hrawh chih an si ve nakhnga lo UN nih biaknak a dohmi kha Jehovah nih “a tawiter” lai. Cuticun a miphun cu khamh an si lai.

8. (a) Harnak nganpi tawiter a si hnuah zeidah a cang lai? (b) 144,000 chung in a taangmi hna cu zeitikah dah van ah an kai khawh men? (A donghnak i fianternak kha zoh.)

⁸ Harnak nganpi tawiter a si hnuah zeidah a cang lai? Armageddon aa thawk hlanah thil tampi a cang lai tiah Jesuh nih a chim. Mah kong kha Ezekiel 38:14-16 le Matthai 24:29-31 (rel) ah hmuh khawh a si.b Mah hnuah harnak nganpi a donghnak a simi Armageddon a ra lai, mah cu AD 70 i Jerusalem hrawh a rak si bantuk kha a si lai. (Mal. 4:1) “Vawlei hramthawk in” Armageddon raltuknak bantuk hi a um bal lo. (Matt. 24:21) Mah raltuknak a dih hnuah Khrih cu kum 1,000 chung Siangpahrang a si lai.

9. Harnak nganpi he aa tlaimi Jesuh chimchungbia nih zeitindah a kan umter?

⁹ Harnak nganpi he aa tlaimi chimchungbia nih thazaang a kan pek. Zeicah? Harnak nganpi chungah zei thil a can hmanhah Jehovah miphun cu an phu ningin an luat lai tiah bia a kan kamh caah a si. (Biat. 7:9, 14) Mah lengah Armageddon ah Jehovah nih uknak nawl a ngeih le Uktu ṭha bik a si kha a langhter lai i a min kha a thianter lai.—Salm 83:18; Ezek. 38:23.

Jesuh nih Tuu le Meheh kha Zeitikah dah Bia a Ceih hna lai?

10. Hlanah, Jesuh nih tuu le meheh kha zeitikah dah bia a ceih hna tiah kan rak ruah?

¹⁰ Jesuh chimchungmi a dang pakhat cu tuu le meheh bianabia kha a si. Jesuh nih tuu le meheh kha zeitikah dah bia a ceih hna lai? (Matt. 25:31-46) Hlanah, Jesuh nih tuu le meheh kha 1914 thawk in bia a ceih hna tiah kan rak ruah. Pennak thawngṭha a cohlang lomi hna le harnak nganpi aa thawk hlanah a thimi hna cu meheh tiin biaceih an si i thawhṭhannak ruahchannak an ngei lo tiah kan rak ruah.

11. Tuu le meheh biaceihnak cu 1914 ah zeicah a si khawh lo?

¹¹ 1995, Vennak Innsang ah Matthai 25:31 fianternak thar kha kan hmuh. Mah cacang ah hitin aa ṭial: “Mi Fapa cu Siangpahrang bantukin vancungmi vialte hna he a rat tikah a bawiṭhutdan cungah cun a ṭhu lai.” Mah Vennak Innsang nih Jesuh cu 1914 ah Pathian Pennak Siangpahrang a si cang nain “vawleicung mi vialte” Biaceihtu cu a si rih lo tiah a ti. (Matt. 25:32; Daniel 7:13 he tahchunh.) Tuu le meheh bianabia nih Jesuh, Biaceihtu a sinak kha a bik in a langhter ti kha philh hlah. (Matthai 25:31-34, 41, 46 rel.) 1914 ah Jesuh cu Biaceihtu a si rih lo caah tuu le meheh biaceihnak cu 1914 ah a si kho lo.c Cu a si ah Jesuh biaceihnak cu zeitikah dah aa thawk lai?

12. (a) Jesuh nih vawleicung mi vialte kha zeitikah dah bia a ceih hna lai? (b) Matthai 24:30, 31 le Matthai 25:31-33, 46 ah zei kong dah aa ṭial?

¹² Donghnak caan he aa tlaimi Jesuh chimchungbia nih a hmaan lomi biaknak hrawh an si hnu lawngah vawleicung mi vialte biaceihnak cu aa thawk lai ti a langhter. Catlangbu 8 ah kan hmuh cang bantukin mah caan chungah a cang dingmi thil cheukhat kong kha Matthai 24:30, 31 ah aa ṭial. Mahka i Jesuh chimmi thil hna cu tuu le meheh bianabia chung i a chimmi he aa lo. Tahchunhnak ah, Mi Fapa cu Siangpahrang bantukin vancungmi hna he an ra lai i vawleicung mi vialte cu pumh an si lai, tuu cu “zungzal nunnak” an hmuh lai caah ‘cunglei kha an zoh.’d Meheh cu ‘zungzal in hrem,’ phun dang cun hrawh an si lai kha an hngalh caah “an ṭap.”—Matt. 25:31-33, 46.

13. (a) Jesuh nih mi kha tuu le meheh in zeitikah dah a ṭhen hna lai? (b) Mah nih phungchimnak rian kha zeitindah a kan hmuhter awk a si?

¹³ Harnak nganpi chungah Jesuh a rat tikah miphun vialte kha tuu le meheh in a ṭhen hna lai. Cun Armageddon ah meheh bantuk a simi cu ‘zungzal in hrem,’ phun dang cun hrawh an si lai. Mah nih phungchimnak rian hi zeitlukin dah a biapit ti a langhter. Harnak nganpi a rat hlan tiang mi cu an lungput i thlen awk le “nunnak a phanmi” lam i kal awkah caan an ngei rih. (Matt. 7:13, 14) Atu ah mi nih tuu bantuk asiloah meheh bantuk lungput an ngeih kha an langhter ko lai. Asinain Jesuh nih tuu le meheh kha harnak nganpi chung lawngah a ṭhen hna lai ti kha kan philh lo awk a si. Cucaah mi tam khawh chung tam nih Pennak kong thawngṭha an cohlan khawh ve nakhnga kan chim zungzal awk a si.

Jesuh cu Zeitikah dah a Rat?

14, 15. Zei Baibal cang pali nih dah Biaceihtu in Khrih a rat lainak caan kong kha an chim?

¹⁴ Jesuh chimchungbia kong tamdeuh in kan hlathlai tikah a dang a biapimi thil hna a tlin lai caan kan hngalhthiam ning tah thlen a hau lai maw? Mah chimchungbia i a hnuhmai bia nih a phi a kan hngalhter lai. Zeitin in dah?

¹⁵ Matthai 24:29–25:46 ah aa ṭialmi chimchungbia ah Jesuh nih donghnak caan chung le harnak nganpi chungah a cang dingmi thil kong kha a bik in a chim. Mah ah a ratnak kong kha voiriat tiang a chim. Harnak nganpi he aa tlaiin hitin a chim: ‘Mi Fapa cu vancung in a rat kha an hmuh lai.’ ‘Nan Bawipa a rat lai ni kha nan hngal lo.’ “Mi Fapa cu nan i rin lo caanpi ah a ra ko lai.” Cun tuu le meheh bianabia ah Jesuh nih ‘Mi Fapa cu Siangpahrang bantukin a ra’ tiah a ti. (Matt. 24:30, 42, 44; 25:31) Mah Baibal cang pali nih Biaceihtu in Khrih a rat lainak caan kong kha an chimmi a si. Jesuh nih a ‘ratnak’ kong a chimmi a dang pali kha tah khoika ah dah kan hmuh khawh?

16. Zei Baibal cang hna zong nih dah Jesuh a ratnak kong an chim?

¹⁶ Zumhawk a tlakmi le a fimmi sal he aa tlaiin Jesuh nih hitin a chim: “A bawipa nih a tlun tikah, a rian a rak ṭuan liote ah a run tanhmi sal caah cun lunglawmh awk a va si dah!” Ngaknu bianabia ah Jesuh nih hitin a chim: “Zinan cawk awkah khan chawdawr ahcun an va kal i cu karah nupi ṭhi tlangvalpa cu a rak phan.” Sal pathum bianabia ah Jesuh nih “caan saupi hnuah khin an bawipa cu a ra tlung” tiah a ti. Mah bianabia ṭhiamṭhiam ah an bawipa nih “ka ra kir tikah hin ka tangka he a karh he ka hmu hnga lo maw?” tiah a ti. (Matt. 24:46; 25:10, 19, 27) Mah Baibal cang ah aa ṭial bantukin Jesuh cu zeitikah dah a tlun, a phanh asiloah a kir?

17. Hlanah, Matthai 24:46 ah aa ṭialmi Jesuh tlunnak kong he aa tlaiin zeitindah kan rak ruah?

¹⁷ Hlanah, mah Baibal cang pali cu 1918 i Jesuh a ratnak he aa pehtlai tiah kan cauk chungah kan rak fianter. Tahchunhnak ah, Jesuh nih “zumhawk a tlakmi le a fimmi sal” kong a chimmi kha ruathmanh. (Matthai 24:45-47 rel.) Cang 46nak ah a hmanmi “tlun” timi biafang cu 1918 ah chiti thuhmi pawl check awkah Jesuh a ratmi kha a si i 1919 ah a ngeihmi thil vialte zohkhenh awkah mah sal kha rian a pek tiah kan rak ruah. (Mal. 3:1) Asinain Jesuh chimmi thil cheukhat a tlin lai caan kan hngalhthiam ning kha thlen a hau. Zeicah?

18. Jesuh chimchungbia i a hnuhmai bia nih a rat lainak kong kha zeidah a kan hngalhter?

¹⁸ Matthai 24:46 hlan i cacang pawl ah “rat” timi biafang a hman fate harnak nganpi chungah mi vialte biaceih awkah Jesuh a rat lai caan kha a chimduhmi a si. (Matt. 24:30, 42, 44) Mah lengah catlangbu 12 ah kan rak i ruah cang bantukin Matthai 25:31 zong nih mah caan kong kha a chimduhmi a si ve. Cucaah Matthai 24:46, 47 ah aa ṭialmi, Jesuh nih zumhawk a tlakmi sal kha a ngeihmi thil zohkhenh ding rianpek awkah a rat cu hmailei, harnak nganpi chungah a si lai tiah ti cu aa tlakmi a si.e Jesuh chimchungbia i a hnuhmai bia nih mah Baibal cang pariat ah aa ṭialmi a rat lainak cu harnak nganpi chung i biaceihnak caan ah a si lai ti a langhter.

19. Hi capar ah zei fianternak thar kong dah kan i ruah? A hnu capar ah zei kong dah kan i ruah lai?

¹⁹ Mah capar ah zei kong hna dah kan rak i ruah? Thil cheukhat a can lainak caan he aa tlaimi biahalnak pathum kha kan rak i ruah. Pakhatnak ah, harnak nganpi cu 1914 ah aa thawk lo i UN nih a Liannganmi Babilon a doh tikah aa thawk te lai. Pahnihnak ah, 1914 ah Jesuh nih tuu le meheh kha bia a ceih hna lo, harnak nganpi chungah bia a ceih hna lai. Pathumnak ah, 1919 ah Jesuh nih a ngeihmi thil vialte zohkhenh awkah zumhawk a tlakmi sal kha rian a pe lo, harnak nganpi chungah a pek te lai. Cucaah hi capar a thawknak ah aa ṭialmi biahalnak pathum cu harnak nganpi chungah a cang lai. Mah nih zumhawk a tlakmi sal bianabia kong kan hngalhthiam ning kha a thleng maw? Cun donghnak caan chungah a tlingmi Jesuh bianabia dang kan hngalhthiam ning tah a thleng maw? A biapimi mah kong cu a hnu capar ah kan i ruah te lai.