A Liannganmi Sertu nih a Kan Zohkhenh!
1 Nawlngailomi Israel mi hna kha Jehovah nih ṭha tein khuatuaktan awkah hitin bia a hal hna: “Nan hngal lo maw? Nan thei lo maw? [Jehovah] cu zungzal hmunmi Pathian a si i Amah nih vawlei kha a ser dih.” (Isa. 40:28) A Liannganmi Sertu kha kan hngalh i dawtnak he a kan zohkhenh kha kan hmuh. Asinain nuai tampi nih Pathian a um lo tiah an ruah asiloah Baibal ah a kong aa ṭialmi ningin an zum lo. Annih cu zeitindah bawmh khawh an si?
2 Anmah bawmh awkah “Nangmah An Zohkhenhtu Sertu Pakhat A Um Maw? timi cauk thar hi chuah a si. Mah cauk nih ṭha tein khuatuaktan awkah a bawmh hna lai. Hngalh duh awk a konglam le cohlan awk tlak fianternak hna an rel tikah an lung a lak hna lai.
3 Sertu Cauk kha Ṭha tein Rel: A biapimi a kong hna kha i cinken. Ṭhen 2 in 5 tiang ah van le vawlei, nunnak le minung zeitindah an hun i thawk ti le zeinihdah a chuahter hna timi kong a fianter. Ṭhen 6 in 9 tiang ah Baibal le a Chuahtertu, a hlei in Genesis ah ṭialmi sernak kong zumh awk a tlak le tlak lo a fianter. Ṭhen 10nak ah “Sertu nih a kan zohkhenh ahcun zeicah sifah harnak hi tluk in a tam?” timi mi tampi an lung a tuaimi biahalnak kha fiang tein a leh.
4 A Lung a Hringmi kha a Zumh nakhnga Bawm: Pathian kong an hngalh khawh nakhnga bawmh tikah Sertu cauk, cahmai 78-79 ah a ummi kong kha hman khawh a si. Hitin biahal: “Van le vawlei hi thawknak a ngei maw?” Tam deuh nih a ngei an ti ko lai. Cuti an leh ahcun “amah tein maw aa thawk asiloah pakhatkhat nih dah a thawk?” tiah hal. A tam deuh nih pakhatkhat nih a thawk tiah an zumh. Cun “van le vawlei hi zungzal in a ummi thil ruangah maw a chuah asiloah zungzal in a Nungmi pakhat ruangah dah a chuah?” tiah hal ṭhan. Hitin biahalnak nih Sertu a um hngalh awkah a bawmh hna lai.
5 Sertu cauk hi mi tampi herhmi a si. Cucaah na chungkhar, na rianṭuan hawi, sianginn kai hawi le na theihhngalh dang zong pe hna. Pathian a um a lung a hringmi hna he nan i ton tik pek awkah mah cauk kha phungchimnak ah i ken. Mah cauk ṭha tein kan rel deuhdeuh ah Sertu kan dawtnak a ngan deuhdeuh ve lai i a phunglam ningin nun awkah a kan forh lai.—Efe. 5:1; Biat. 4:11.