A Ṭhangchomi Baibal Cawnpiaknak
Ṭhen 2: Cawnpiaknak Caah i Timhchungnak
1 Baibal cawnpiaknak pakhat kha hmual ngei ngaiin cawnpiaknak ah a kong lam hna i ruahṭi men, cherhchanmi Baibal cang hna vun kau mennak nakin tam deuh aa tel. Kan cawnpiakmi a lung a tongh nakhnga a kong tete langhter a hau. Cu tin tuah awkah Baibal a cawngmi kha kan lungthin ah chiah in felfai tein i timh a hau.—Ptb. 15:28.
2 I Timhning: Baibal a cawngmi le a herhmi thil hna caah Jehovah sin thlacamnak in thawk. Baibal a cawngmi lungthin a tongh nakhnga Jehovah sinah bawmhnak hal. (Kol. 1:9, 10) A biapimi a kong kha fiang tein a lung a pian nakhnga a ṭhen asiloah cawnmi a bia-tlangpi, a biatlangte hna le hmuhnak bawmtu (visual aids) pakhat khat kha i ruah awkah a caan tlawmpal in la. Nangmah le nangmah hitin i hal: ‘A konglam i a biapi bikmi tinhnak cu zeidah asi?’ Cu nih cun Baibal na cawnpiak lioah a biapi bik a kong hna kha lungtak in zoh awkah an bawmh lai.
3 A konglam kha catlangbu pakhat cio in ṭhate in zoh hna. A biapi bikmi cafang hna le holhfang hna lawng catlang rin in cauk chung i nammi ca biahalnak a phi hna kha langhter. Cherhchanmi Baibal cang hna hi catlangbu i a biapi bik kong he zeitindah aa pehtlaih kha ṭhencheu hna law, cawn tikah zei Baibal cang dah rel ding tikha na lung i thlek. Cauk kam a lawnnak ah philhlo awk ca i i ṭial hi bawmtu asi kha na hmuh lai. A cawnmi a konglam hna hi Pathian Bia in asi ti kha ṭha tein a hngalh thiam awk asi.—1 Thes. 2:13.
4 Cawnmi Kha Pumpak Pakhat Cio he Aa Tlakin i Tim: Cu hnuah, cawnpiakmi pakhat cio kha lungthin chungah chiah in cawnmi kha ruat. Hngalhthiam awk asilole cohlan awk aa harh laimi bia halnak hna le a konglam hna kha a hlan kan in ruah chung i zuam. ‘Thlaraulei ṭhancho awk a hngalhthiam nakhnga asilole tuah awkah zeihidah a herh hnga? A lungthin ka tongh khawh nakhnga zeitindah ka tuah hnga?’ tiah nangmah le nangmah i hal. Cun na cawnpiaknak kha a herh ning paoh in thleng. Khua ma caan ah, a kong pakhat asiloah Baibal cang pakhat i a sullam kha a hngalhthiam nakhnga tahchunhnak pakhat, fianternak pakhat asiloah biahalnak hna i timh a herh kha na hmuh ko lai. (Neh. 8:8) Asinain a biapimi a kong caah a herhtuk lomi a kong tete hna chapchih cu hrial. Nan cawn dih hnuah a tawinak in zoh ṭhannak nih amah kha a biapimi kong a hun hngalhter ṭhan lai.
5 Mithar hna nih Jehovah thang-ṭhat awk i dinnak thei an tlai tikah kan i lawmtuk hringhran! (Fil. 1:11) Cu kawltung i an phanh nakhnga Baibal cawnpiaknak na tuah fate ṭha tein timhchungnak tuah.