A Biapi Ti Lungput Ngei Peng!
1 A Pa rian liim awkah vawlei cung i a um caan cu ri a ngei ti kha Jesuh nih a hngalh. (Johan 9:4) Cucaah, a phungchim rianṭuannak kha a biapi ti lungput in a ṭuan i cu bantuk in ṭuan awkah a zultu hna kha a cawnpiak hna. (Luka 4:42-44; 8:1; 10:2-4) Thilri chaw-hlawn cu a caah a biapi mi an si lo. (Matt. 8:20) Cucaah, Jehovah nih a pekmi rian kha a rak liim khawh.—Johan 17:4.
2 Ri A Ngeimi Caan: “Minung umnak vawlei hmun vialte” ah thawng-ṭha bia chim caan zong hi ri a ngei. (Matt. 24:14, Nw) Donghnak caan i a dongnak bik a parpahlek te ah kan nun kha Baibal chimchung bia nih a langhter. A rauhhlan ah “Pathian a hngal lomi hna le Bawipa Jesuh kong Thawng Ṭha a ngai duh lomi hna . . . cu zungzal rawhralnak dantatnak kha an huah lai.” (2 Thes. 1:6-9) Mah biaceihnak cu ruahlopi in a ra lai. (Luka 21:34, 35; 1 Thes. 5:2, 3) Mi hna nih ṭihnung asimi an sining kha an hngalh a hau. A caan um lioah Jehovah mithmai ṭha an hmuh nakhnga annih va bawmh kha kan rian asi.—Zef. 2:2, 3.
3 Asi Khawh Chung In Ṭuannak: “Caan hi tampi a taang ti lo” ti kha Pathian salle hna nih an theihhngalh i phungchimnak rian kha hmasa ah an chiah. (1 Kor. 7:29-31; Matt. 6:33) A cheukhat cu phungchimnak rianṭuan chungah tam deuh in i tel awkah sipuazi lei caan ṭha hna asiloah adang pumpak an duhmi tuahsernak hna kha an hlawt. (Mar. 10:29, 30) Adang pawl hna cu hneksaknak hna an in buin “Bawipa rian ah ṭuan awk rian tampi” an ngei peng. (1 Kor. 15:58, Nw) Mi tampi cu tlukrilh loin kum hra bu chung thawngṭha bia kha zapi hngalh tein an thanh. (Heb. 10:23) Pennak ṭhathnemnak ca bawmhnak ah hi bantuk mah zawn ruat loin ṭuanmi vialte kha Jehovah nih man sungtuk ah a chiah.—Heb. 6:10.
4 Kan nunnak kha phungchimnak rian tel in Jehovah biaknak caah biapi siter nak nih Jehovah ni kha kan lungchung ah a camter. Cu nih cun Satan vawlei ruangah lungvaihter lo awk a kan huhphenh i a thiangmi ziaza zohkhenh awk timi kan biakhiahnak kha a fehter. (2 Pit. 3:11-14) A hmaan ko, kan phungchim rian kha a biapi ti lung put in ṭuannak nih kanmah thengte le kan bia a ngaimi hna kan pahnih caah nunnak a khamh khawh.—1 Tim. 4:16.