Ruahnolhnak Aa Pummi kha Zeitindah Kan Bawmh Khawh hna?
1. 2008, March 22 ah zei hmual ngei ngaimi tehte khannak dah a um lai?
1 2008, March 22 ah vawlei cung pumpi mi nuai tampi cu hmual ngei ngaimi tehte khannak pakhat an hmu lai. Ruahnolhnak aa pummi nih minung ca tlanhnak man a timhtuahnak in a langhtermi Jehovah dawtnak ngan kong an theih lai. (Johan 3:16) Annih nih Pennak kong le Jehovah nih Pennak hmangin vawlei ah a duhnak zeitindah a tlinter lai timi kong an theih lai. (Matt. 6:9, 10) Cun Pathian miphun an i dawtnak, lungngetnak le khual an dawtnak kha anmah theng nih an hmuh lai.—Salm 133:1.
2. Ruahnolhnak ah aa pummi Baibal a cawngmi hna kha zeitindah kan bawmh khawh hna?
2 Baibal Cawnpiakmi hna: Aa pummi cheukhat cu kanmah he Baibal an cawn kate lawng a si men lai. Unau pa, unau nu hna he theihhngalhnak tuah hna. Zarhfate tuahmi pumhnak kong chim hna law Kingdom Hall kha chikkhat zohpi hna. Phungchim lio ah a chimtu nih Jehovah he pehtlaihnak ṭhanchoter awkah tha a pek hna lai. Na cawnpiakmi kha tha na pek tikah a chimmi kha bia hrampi caah na hman khawh.
3. Ruahnolhnak ah aa pummi a cawlcang lomi thawngthanhtu kha zeitindah kan bawmh khawh hna?
3 A Cawlcang lomi Thawngthanhtu: Aa pummi cheukhat cu a cawlcang lomi thawngthanhtu an si men lai. Annih kha lunglawm thatho tein biakchawnh ding i zuam. An pumpak konglam hal le an lungthin hna a hnawhmi kong chim kha hrial. Khrihfa upa nih Ruahnolhnak a dih in ni tlawmpal asiloah zarh tlawmpal hnu ah mah ni ah aa pummi a cawlcang lomi thawngthanhtu pawl sinah len in pumh an i zuamnak kha thangṭhat in ahnu khrihfabu pumhnak zong i pumh awkah lungtho ngai in sawm awk a si.
4. Pakhat cio nih khual kha zeitindah kan bawmh khawh hna?
4 Khual: Pumh a rami cheukhat cu kan sawmmi hawikom pawl le chungkhar chungmi an si men lai. A cheu cu special campaign chungah sawmnak ca a hmumi an si men lai. Pakhat cio kha na hngalhmi an si lo ahcun nangmah tein i theihhngalhter law chawnbia hna. Annih cu kan pumhnak ah voi khat hmanh aa pum bal lomi an si kho men. Bia nan i ruah lio ah zeitindah pehtlaihnak tuah khawh an si kha na hngalh lai. Ruahnolhnak a dih hnu ni tlawmpal ah mah thengte an sin va lennak asiloah telephone in chawnh in tam deuh hngalh awk tha pek in Baibal cawn awk na sawm khawh hna.
5. Baibal cawnpiaknak thawk awkah zeitindah kan chim khawh?
5 Ruahnolhnak phungchimmi a konglam hna kha a hrampi ah la in lennolh ah Baibal Cawnpiakmi cauk kha kan hngalhter khawh hna. Tahchunhnak ah, Ruahnolhnak phungchimtu nih Isaiah 65:21-23 kha a rel lai. Lennolh tikah phungchimmi kong chim law hitin chim, “Tlanhnak man nih a chuahter khawhmi thluachuahnak dang kong chimh kan duh.” Cun Baibal Cawnpiakmi cauk cahmai 4-5 kha ruah. Asiloah hitin na chim khawh, “Isaiah chimchung bia a tlinmi kan hmuh lainak kong kha mi tampi nih hngalh an duh.” Cun ṭhen 9 nak catlang bu 1-3 kha ruah. A fawimi chim ning dang pakhat cu Ruahnolhnak phungchimtu chimmi hmang in Baibal Cawnpiakmi cauk kha hngalhter law cawn ningcang kha hmuhsaknak.
6. Jesuh nawlpekmi ngai in a thih ruahnolhnak kan tuah lio ah zei caan ṭha dah kan ngeih?
6 Kan dihlak in Ruahnolhnak ah aa pummi Baibal a cawngmi, a cawlcang lomi thawngthanhtu le khual pawl kha bawmh khawh awk caan ṭha kawl u sih. (Luka 22:19) Pennak rian tam deuh in kan ṭuanmi kip kha Jehovah nih thluachuah a pek hrimhrim lai.