Kan Sunsaknak Langhter U Sih Ruahnolhnak cu April 17 ah Tuah a Si lai
1. Salm caṭialtu i zei bia dah Ruahnolhnak caan he aa tlak?
1 Jehovah zaangfahnak le khamhnak a sunsak caah salm caṭialtu nih “BAWIPA cu ka cung i a ṭhatnak vialte ruangah hin zeidah ka pek khawh lai?” tiah a ti. (Salm 116:12) Tuchan Pathian salle cu lunglawmh awk a ruang tam deuh kan ngei. A cunglei bia ṭial a si hnu kum tampi a rauh ah Jehovah nih minung kha a ngan bikmi laksawng, tlanhnak man a kan pek. April 17 ah Khrih thih philhlonak kan tuah lai caah kan i lawmhnak langhter awk a ruang kan ngei.—Kol. 3:15.
2. Tlanhnak man kan sunsaknak a ruang cheukhat cu zeidah an si?
2 Tlanhnak Man in Hmuhmi Thluachuah: Tlanhnak man thawng in “kan sualnak cu ngaihthiam kan si” kho. (Kol. 1:13, 14) Cucaah Jehovah kha chiaṭha thleidannak lungthin thiang in kan biak khawh. (Heb. 9:13, 14) Jehovah sin thla kan cam tikah zalong tein bia kan chim khawh. (Heb. 4:14-16) Tlanhnak an zumh a langhtermi hna cu zungzal nunnak ruahchannak an ngei.—Johan 3:16.
3. Tlanhnak man caah Jehovah cung kan i lawmhnak zeitindah kan langhter khawh?
3 Sunsaknak Langhter: Lungtak in kan sunsak langhternak lam khat cu Ruahnolhnak Baibal cang nifate rel le ṭha tein ruah a si. Cuti tuah khawh awk bawmtu ah 2011, February 1, Vennak Innsang, “Kum khat chung i a Biapi Bikmi Ni caah Naa Timchung Maw?” timi capar cu timh a si. Cun tlanhnak man zeitlukin dah kan sunsak kha Jehovah sin lungtak in thlacam in kan chim khawh. (1 Thes. 5:17, 18) Jesuh bia ngai in Ruahnolhnak kan i pumhnak in lunglawmhnak kan langhter. (1 Kor. 11:24, 25) Cu lengah Jehovah dawtnak ngan i zohchunh in mi tampi kha kan sin ah an i pumh ve nakhnga kan sawm khawh hna.—Isa. 55:1-3.
4. Zei bia dah kan khiah awk a si?
4 Jehovah cung aa lawmmi nih cun Ruahnolhnak kha a dang pumhnak men ah a ruat lai lo. Kum khat chung ah a biapi bikmi pumhnak a si. Ruahnolhnak a naih chin caah hitin a ṭialmi salm caṭialtu bantukin biakhiahnak tuah hna u sih: “Maw ka nunnak, BAWIPA cu thangṭhat. A tuahmi thil kha philh hna hlah.”—Salm 103:2, Judson.