Hmual A Ngeimi Tehtekhaannak A Si Lai
1. Ruahnolhnak ah aa pummi kha phungchimmi lawng si loin zei zong nih dah an lung a suk khawh hna? Fianter.
1 Zeitikah? Ruahnolhnak tuah zan ah. Ruahnolhnak ah rak i pumh ve awk mi sawmnak ah fakpi in kan i zuam. Aa pummi hna cu an theihmi lawng nih an lung a su hna lo. Minu pakhat nih Ruahnolhnak aa pumh dih hnuah unau pawl hawikomh an thiamnak le unau pawl nih ṭha te’n an zohkhenh ruangah aa dawh i a thiangmi biakinn a hmuhmi kha a thangṭhat. Cucaah phungchimtu lawng si loin kan zapi in kumkhat chung i a biapi bikmi mah caan ah tehtekhaannak ṭha a si nakhnga kan i zuam cio.—Efe. 4:16.
2. Pakhat cio nih a rak i pummi hna kha zeitindah tehtekhaan khawh a si?
2 Aa Pummi Kha Conglawm Hna: Aa pummi hna hmaipanh tein kan cong-lawmhmi hna cu tehtekhaannak ṭha a si lai. (Johan 13:35) A rak rami kip na chawh khawh hna lo hmanh ah na pawng ah a ummi hna kha aho na si na chimh khawh hna. (Heb. 13:1, 2) A rak i pummi lakah aho he hmanh i theih dawh a si lomi kha kawl hna. Annih cu campaign lioah sawmnak ca a hmumi an si kho men. “Atu hi a voikhatnak naa pumh maw a si?” tiah na hal khawh. Na pawng ah ṭhut awk sawm law bia an halmi paoh phi. Biakinn kha a dang Khrihfabu nih hman ṭhan ding a si ahcun pumh dih in ṭin a hauh lai caah hitin na hal khawh: “Mah pumhnak hi zeitindah na hmuh ti theih ka duh caah na umnak na ka chim kho hnga maw?”
3. Khrihfabu he aa kom tuk lomi kha zeitindah conglawmh khawh a si?
3 Khrihfabu he Aa Kom tuk lomi kha Conglawm hna: Khrihfabu he aa kom tuk lomi hna zong an rak i pum ko lai, annih cu kum fatin Ruahnolhnak ah a rak i pummi an si men lai. Annih kha conglawm hna law an rat khawh caah naa lawmh kha chim hna. (Rom 15:7) Khrihfa upa pawl nih a hnu ah an inn ah kal in Khrihfabu he i komh ṭhan awkah an forh khawh hna. Aa pummi hna cu an theihmi ruang lawng ah si loin ‘nuncan ṭha in kan nun an hmuhmi’ ruang ah Pathian an thangṭhat khawh nakhnga thla kan cam.—1 Pit. 2:12.