Zanlei Sang Phungchimnak ah Naa Tel kho lai Maw?
1. Cauk pakhat ah lamkaltu Paul cu zeitik ah dah innkhat hnu innkhat ah phung a chim tiah aa ṭial?
1 Lamkaltu Paul cu “zanlei suimilam 4 in zan ṭim tiang” innkhat hnu innkhat phung a chim lengmang tiah Daily Life in Bible Times timi cauk ah aa ṭial. Cutin Paul nih a tuah taktak le tuah taktak lo cu kan hngal lo nain “thawngṭha ruangah” zei thil paoh lungtho tein tuah a duh ti tu cu kan hngalh. (1 Kor. 9:19-23) Mah ah mi tam deuh ton khawhnak caan ah innkhat hnu innkhat kal awkah a rianṭuan ning mersan aa tel ko lai.
2. Phungchimnak caah zanlei sang cu zeicah a ṭhat?
2 Hmun tampi ah thawngthanhtu pawl cu zinglei ah innkhat hnu innkhat phungchim ah an kal tawn. Cutin tuah cu nan umnak hmun caah aa tlak bikmi a si rih maw? Hmaikal pakhat nih an sang kong kha hitin a chim: “Chun ahcun inn ah mi hmuh a har ngaite. Asinain zanlei ahcun mi tam deuh cu inn ah an um.” Zanlei sang phungchimnak nih pa pawl ton khawhnak caanṭha a kan pek tawn. Mah caan ah inn-ngeitu pawl cu an i dinh tawn caah biaruah an huam deuh. Zanlei sang phungchimnak cu man a ngeih ahcun Khrihfa upa pawl nih zanlei sang phungchimnak caah an timhtuah awk a si.
3. Zanlei sang phungchim tikah zeitindah thleidan thiamnak kan langhter khawh?
3 Thleidan Thiamnak Ngei: Zanlei sang phungchim kal tikah thleidan thiamnak ngeih a biapi. Tahchunhnak ah, inn-ngeitu rawl a ei lio ti bantuk aa manh lo caan a si ahcun a hnu ah ka ra ṭhan te lai tiah ti ah a ṭha. Khua a muih ahcun inn-ngeitu hmuh khawhnak hmun ah dir law aho na si le zeicah na rat kha chim colh. Pahnih in asiloah phu in ṭuanṭi le lam mei a ceunak hmun le midang zong an umnak hmun ah um cu a ṭha. Inn-ngeitu ih an i timh caan hnahnawh lo awkah a tlai tuk hnu ahcun kal ding a si lo. (2 Kor. 6:3) Sang pakhat cu khua a muih hnu i phungchim awkah ṭih a nun ahcun nitlak hlan ah chim ding a si.—Ptb. 22:3.
4. Zanlei sang phungchimnak in zei caanṭha dah kan hmuh?
4 Thluachuah: Phungchim kan kal tikah mi kan ton hna le phung kan chimh khawh hna ahcun kan i nuam deuh. Cun phung kan chim deuhdeuh ah ‘khamhnak hmuh awk le biatak hngalh awkah’ midang kan bawmh khawh deuhdeuh ve hna. (1 Tim. 2:3, 4) Nangtah zanlei sang phungchimnak ah i tel ve awkah na caan suaimi na remh kho lai maw?