Pathian sinin a Rami Thawngṭha!
timi brochure Hmanning Lennolh Tuahnak le Baibal Cawnpiaknak Thawk Khawhnak caah Chuahmi Brochure Thar
1. “Na Lung kha Ṭha tein Veng!” timi Pengkomh Civui ah lennolh tuahnak le Baibal cawnpiaknak thawk khawhnak caah zei brochure dah an chuah?
1 “Na Lung kha Ṭha tein Veng!” timi Pengkomh Civui ah lennolh tuahnak le Baibal cawnpiaknak thawk khawh-nak caah chuahmi brochure thar kan rak hmuh. “Pathian sinin a Rami Thawngṭha!” timi brochure cu Pathian Nih Zeidah A Kan Hal? timi brochure he aa lo, Hal timi brochure canah chuahmi a si i a kong cu tawi tein aa ṭial. Mah nih innka hram ah hmual ngei tein Baibal cawnpiaknak tuah khawh awkah a kan bawmh lai. Hal timi brochure ah Baibal a cawngkami caah cohlan a harmi, Pathian nih a kan halmi tete aa ṭial nain, hi brochure thar ahcun Baibal chungah a ummi thawngṭha kong aa ṭial.—Lam. 15:35, NW.
2. “Pathian sinin a Rami Thawngṭha!” timi brochure cu zeicah chuah a si?
2 Mah brochure cu zeicah chuah a si? Vawleicung hmunkip ah a ummi unau pawl nih biatak duh awk le Baibal Cawnpiakmi cauk cawnchap awkah tha a pemi, hngalh a fawimi cauk kan chuahpiak u tiah an hal hna caah a si. Cauk hmang in Baibal cawn a duh lomi hna nih brochure hmang in cawn an duh tawn. Mah lengah, brochure cu holh phun tampi in leh awk zongah a fawi deuh.
3. Mah brochure cu Baibal cawnnak caah chuahmi cauk dang he zeitindah aa dan?
3 Aa Ṭialning: Baibal cawnnak caah chuahmi kan cauk tamdeuh cu mi pakhat nih bawmh hau loin amahte in a rel khawh i biatak a hngalhthiam khawh nakhnga phun in ṭial a si. Asinain hi brochure tu cu cutin a si lo, Baibal a cawnpiaktu he cawnṭi awk in ṭialmi a si. Cucaah mah brochure hi mi pakhatkhat kan pek tikah catlangbu pakhat asiloah pahnih rel in i ruahṭi cu a ṭha bikmi a si. Catlangbu cu a tawi caah an innka hram asiloah rian an ṭuannak hmun hmanh ah cawnpiak khawh a si. Ṭhen 1nak in thawk cu a ṭha nain khoika paoh in thawk khawh a si ko.
4. Mah brochure nih mi kha Baibal in dairek cawnpiak awkah zeitindah a kan bawmh?
4 Kan cauk tampi ah, biahalnak i a phi kha catlangbu chung ah hmuh khawh a si. Asinain hi brochure ahcun a phi cu a bik in Baibal ah hmuh khawh a si. Mi tampi nih bupi cauk nakin Baibal in cawn kha an duh deuh. Cucaah hi brochure ah Baibal cang tamdeuh cu a bia aa ṭial lo i Baibal cauk chungah rel a hau. Mah nih Baibal a cawngmi hna kha an cawnmi cu Pathian sinin a rami a si kha a hngalhter hna lai.—Isa. 54:13.
5. Baibal a cawnpiaktu caah cawn lai fatinte ṭha tein i timhtuah cu zeicah a biapit?
5 Hi brochure nih Baibal cang kha a dihlak in a fianter lo. Zeicah? Baibal a cawngmi nih biahalnak a tuah nakhnga le a cawnpiaktu nih a phungchim thiamnak a hman nakhnga caah a si. Cucaah cawn lai fatinte ṭha tein i timhtuah cu a biapi tuk. Bia tam tuk in chim lo awkah i ralrin ding a si. Baibal cang a sullam fianter kha kan duh tuk ko nain, a cawngmi kha a hmuh-ning kan halmi hi man a ngei deuh tawn. Fimkhur te’n biahalnak tuahnak thawng in Baibal cang a sullam ruah awkah kan bawmh khawh.—Lam. 17:2, NW.
6. (a) Pathian le Baibal a zum lomi hna sin phungchim tikah, (b) Innkhat hnu innkhat phungchim tikah, (c) Baibal cawnpiaknak thawk khawh awkah, (d) Lennolh tuah tik-ah, mah brochure hi zeitindah hman khawh a si?
6 Baibal cawnnak caah chuahmi cauk dang bantukin mah brochure zong hi zeitik caan paoh ah, mah thla chung pek dingmi cu zei cauk a si hmanhah pek khawh a si. Unau tampi nih mah brochure hmang in innka hram ah Baibal cawnnak thawk an duh ko lai. Cun pengkomh civui ah kan rak theih bantukin, biatak hngalh a duhmi hna sin lennolh tuah tikah mah brochure kha kan hman ahcun “lennolh tuah cu a nuam tuk lai.”—Cahmai 5-7 rinli kulh zoh.
7. Mah brochure hmang in Baibal cawnpiaknak zeitindah na tuah khawh?
7 Baibal Cawnpiaknak Tuahning: Cafang nak deuh in aa ṭialmi, nambar aa khenhmi biahalnak kha rel in i ruahnak thawk khawh a si. Mah hnuah catlangbu le cafang nak deuhmi in aa ṭialmi Baibal cang kha rel. Inn-ngeitu nih Baibal cang a sullam a hngalhthiam nakhnga fimkhur tein biahalnak tuah. A kong dang nan cawn hlan ah, inn-ngeitu nih nan cawnmi a lung a fian le fian lo hngalh awkah cafang nak deuh in aa ṭialmi biahalnak kha hal. A thawkka ahcun cafang nak deuh in aa ṭialmi biahalnak pakhat kong lawng i ruah ah a ṭha. A hnuah a ṭhen ningpi in i ruah khawh a si te ko lai.
8. Baibal cang kha zeitin chim dah a ṭhat, zeicah?
8 Cafang nak deuh in aa ṭialmi biahalnak a phi cu “rel” timi Baibal cang chung ah a um. Baibal cang na chim tikah “Lamkaltu Paul nih hitin a ṭial” asiloah “Jeremiah nih a chimchungmi hi zohhmanh” tiah ti hlah. Cutin na ti ahcun inn-ngeitu nih kan relmi hi minung bia men a si tiah a ruah sual lai. Cucaah “Pathian nih hitin a ti” asiloah “Baibal nih a chimchungmi hi zohhmanh” tiah ti ah a ṭha deuh.
9. Baibal cawn lioah cherhchanmi Baibal cang a dihlak in rel awk a si maw?
9 Baibal cang a dihlak in rel awk a si maw asiloah “rel” timi lawng dah rel awk a si? Mah cu thil sining cungah aa hngat. Cherhchanmi Baibal cang pawl cu a ruang a um caah an telhmi a si. Mah Baibal cang chungah man a ngeimi a kongtete a um cio. Asinain, a cawngmi aa manh lo, a lung a thawh lo le carel aa harh ti bantuk caan ahcun “rel” timi Baibal cang lawng rel ding a si.
10. Zeitik ah dah Baibal Cawnpiakmi cauk in cawn khawh a si?
10 Baibal Cawnpiakmi cauk Cawn Caan: Voi tam nawn Baibal kong nan i ruah hnuah hmaan tein nan cawn khawh cang ahcun Baibal Cawnpiakmi cauk in thlen khawh a si asiloah mah brochure kha a dih tiang cawn khawh a si. Zeitik-ah dah cauk thlen ding ti kha thawngthanhtu nih amahte in bia a khiah awk a si. Baibal Cawnpiakmi cauk in thlen tikah a hramthawk in maw cawn awk a si? Mah kong ah phunglam a um lo. A cawngmi cu an i dang cio. Asinain, a cawngmi tamdeuh nih Thawngṭha cauk i an cawnmi kong he aa khatmi kong kha Baibal Cawnpiakmi cauk chung ah a dikthliar deuh in an cawn ṭhan ahcun ṭhatnak an hmu lai.
11. Zeicah mah brochure thar hi ṭha tein hman awk a si?
11 Thawngṭha a um set ti lomi hi vawlei ah, kannih cu a ṭha bikmi thawngṭha chim awk tinvo sung kan hmu. Mah cu Pathian Pennak kong le mah Pennak nih a rauhhlan ah dinnak a umnak vawlei thar a umter lai timi kong a si. (Matt. 24:14; 2 Pit. 3:13) Mah kong a theimi mi tampi cu hi Baibal cang bia hi an hna a tla lai tiah kan zumh khawh: “Daihnak thawngṭha i phorh in tlang cungin a rami lamkaltu ke cu zeitluk in dah aa dawh! Teinak kong kha amah nih cun a run thanh i Zion cu a thawh i, ‘Na Pathian cu siangpahrang a si,’ a ti.” (Isa. 52:7) Kan phungchimnak sang ah a ummi thawngṭha theih a duhmi hna kha mah brochure hmang in Pathian sinin a rami thawngṭha chim hna u sih.
[Cahmai 5 i rinli kulh]
Pathian le Baibal a Zum Lomi hna Sin Phungchim tikah:
● Hmun cheukhat ah, thawngthanhtu pawl nih “Pathian” le “Baibal” timi bia nih biaruahnak a cahter ti kha an hmuh. Cucaah a voikhatnak len lioah nan sang i a ummi hna nih an lungre an i theihpimi kong i ruah ah a ṭha bik men lai. Mah ah a ṭhami cozah a herhnak kong, chungkhar ca ruahnak cheuhnak ṭha hmuh khawh-ning le hmailei ca ruahchannak ti bantuk kong aa tel. Pathian a um kha zeitindah kan hngalh khawh ti le zeicah Baibal cu zumhawktlak a si timi kong voi tam nawn kan i ruah hnuah Thawngṭha timi brochure kha kan hmuhsak khawh hna.
[Cahmai 6 i rinli kulh]
Innkhat hnu Innkhat Phungchim tikah:
● “Pathian nih minung caah aa tinhmi kong hi fawi tein hngalh khawh a si timi kong chimh ah kan in leng hna. Kan inmi sifah harnak in Pathian nih a kan khamh lai tiah na ruat maw? [A bialehnak hngak.] A phi cu Baibal i khoika zawn ah dah a um ti kha mah brochure ah aa ṭial. [Brochure kha pe law ṭhen 1nak i a hmasa bik catlangbu le Jeremiah 29:11 kha relpiak.] Mah Baibal cang ningin Pathian nih minung hi nuam tein nunter a kan duh tiah ruah hi aa tlak tiah na ruat ko lo maw? [A bialehnak hngak.] Mah brochure hi rel na duh ahcun naa lak khawh. A hnu tan ah, ‘Pathian nih harnak a chuahtermi thil in mi kha zeitindah a khamh hna lai?’ timi biahalnak i Baibal a phi hngalh awkah a pahnihnak catlangbu kha kan i ruah te lai.” A voikhatnak na len lioah inn-ngeitu cu aa manhmi a lawh ahcun a pahnihnak ca-tlangbu le Baibal cang a pathum ning in rel in i ruah khawh a si. Biahalnak pahnihnak i ruah awkah lennolh tuah ding tim.
● “Mi tampi nih thlacam an duh, a hlei in harnak an ton tikah an duh khun. Nangtah thla na cam tawn ve ko lo maw? [A bia-lehnak hngak.] Pathian nih thlacamnak vialte a ngaih tiah na ruat maw asiloah cheukhat thlacamnak cu a ngai lo tiah dah na ruah? [A bialehnak hngak.] Mah biahalnak i Baibal a phi kha hi brochure ah aa ṭial. [Brochure kha pe law ṭhen 12nak a hmasa bik catlangbu le “rel” timi Baibal cang pawl kha i ruah u.] Pathian nih kan thlacamnak ngaih a duhmi hi khuaruahhar awk a si ko lo maw? Asinain thlacamnak in ṭhatnak tampi hmuh awkah Pathian kong ṭha tein hngalh a hau. [Ṭhen 2nak kha kau law biatlangte hna kha hmuhsak.] Mah brochure hi rel na duh ahcun kaan ṭhenh lai i voidang ah, hngalh duh awk a simi mah biahalnak hna i Baibal a phi kha kan i ruah te lai.”
● “Hmailei ah kan vawlei hi zeitindah a um te lai timi kongah mi tampi an lungre a thei. Nangtah vawlei thil sining hi a ṭhangcho lai tiah na ruat maw? [A bialeh-nak hngak.] Mi tampi cu Baibal ah ruahchannak a kan pemi thawngṭha a um ti an hngalh tikah an khuaruah a har. Mah hna hi Baibal ah a phi hmuh khawh a simi biahalnak cheukhat an si.” Brochure kha pe law, a hnulei phaw i a ummi biahalnak lakah a duh bikmi kha thimter. Cun aa thimmi ṭhen kha kau law cawn ningcang kha hmuhsak. Mah ṭhen chung i a changtu biahalnak i ruah ṭhan awkah lennolh tuah ding tim.
[Cahmai 7 i rinli kulh]
Dairek in Baibal Cawnpiaknak Thawk I Zuam:
● “Baibal cawn ning thar chimh ruah ah kan in leng. Mah brochure ah ṭhen 15 a um i mah nih a biapimi biahalnak a phi pawl kha Baibal i khoika ah dah hmuh khawh a si ti a langhter. [A hmailei phaw le a hnulei phaw kha hmuhsak.] Nangtah Baibal kong tam deuh in hngalh na duh maw? [A bialehnak hngak.] Baibal hlathlai zeitluk in dah a fawi ti kha kaan hmuhsak lai. [Ṭhen 3nak, a pathumnak biahalnak i a hmasa bik catlangbu kha i ruah u law Biathlam 21:4, 5 kha rel. A caan a um ahcun, a changtu catlangbu le “rel” timi Baibal cang kha i ruah u.] Mah brochure hi rel na duh ahcun kaan ṭhenh lai. Atu kan tuah bantuk-in hi hnu voikhat tuah ṭhan awkah kaan sawm. Na duh ahcun, pehzulh tein hlat-hlai khawh a si. A hnu tan ah, ṭhen 1nak kan i ruah te lai, mah ṭhen cu hmaikhat lawng a si.”
[Cahmai 7 i rinli kulh]
Lennolh Tuah tikah Brochure kha Hmuhsak:
● Lungthawhnak a ngeimi sin lennolh tuah tikah hitin chim khawh a si: “Kan i ton ṭhan caah kaa lawm. Mah brochure te hi kaan put, mah ah hngalh duh awk ngai a simi biahalnak tampi i Baibal a phi aa ṭial. [Brochure kha pe law a hnulei phaw kha zohter.] Mah lakah zei kong dah hngalh na duh bik? [A bia-lehnak hngak. Cun aa thimmi ṭhen kha kau.] Mah kong i Baibal a phi kha mah brochure ah zeitindah hmuh khawh a si ti kaan hmuhsak hmanh lai.” Catlangbu pakhat asiloah pahnih le “rel” timi Baibal cang kha ruah law Baibal cawn ning hmuhsak. Cutin Baibal cawnpiaknak thawk cu a fawite ko. Inn-ngeitu kha brochure pe law lennolh tuah ding tim. Mah ṭhen kha nan cawn dih tikah, inn-ngeitu nih aa thimmi a dang ṭhen kha i ruah khawh a si asiloah ṭhen 1nak in thawk khawh a si.