Phungchimnak ah jw.org Web site kha Hmang

Kan Web site nih “vawleicung khuazakip ah” thawngṭha a karh nakhnga a kan bawmh khawh. (Lam. 1:8) Inn-ngeitu tam deuh cu anmah tein jw.org Web site kha an kawl kho lo. Thawngthanhtu hna nih mah Web site kha an chimh hna hnu lawngah an hngalh.

Peng zohkhenhtu pakhat nih Zeicah Baibal kan Cawn? timi video kha a phone in download a tuah i mah kha caanṭha a hmuh fatinte a piahpiak tawn hna. Tahchunhnak ah, innkhat hnu innkhat phungchim a kal tikah hitin a chim: “A biapimi biahalnak pathum i a phi kha mi pawl nih an hngalh nakhnga ka chimh hna: Zeicah vawlei ah buaibainak hi mah tluk in a tam? Pathian nih zeitindah a tonghtham lai? Atu ah buaibainak hna kha zeitindah kan tonghtham khawh lai? Mah biahalnak pathum i a phi kha tawi tein piahmi mah video ah a um.” Mah hnuah video kha a piahpiak hna i inn-ngeitu i an sining kha a ngiat hna. Video nih an lung a lak tuk hna caah inn-ngeitu tam deuh nih a dih tiang an zoh. Video a dih in peng zohkhenhtu nih hitin a ti hna: “Baibal cawn nan duh ahcun online in hal khawh a si ti kha mah video ah nan hmuh ko lai. Zeitindah Baibal kan cawnpiak hna ti kha hmuhsak kaan duh hna.” Inn-ngeitu nih cawn an duh ahcun Thawngṭha timi brochure in Baibal cawn ning kha a hmuhsak hna. Inn-ngeitu nih caan ka ngei lo a ti ahcun a hnu len ṭhan awkah aa tim. Lakphak dawr i a ṭhut tik zongah a pawng i a ṭhumi kha bia a ruah hna i mah hnuah video kha a piahpiak tawn hna. Nangtah phungchimnak ah jw.org Web site kha na hmang ve maw?