“Vawlei nih rawl kha a chuahter cang, Pathian kan Pathian nih thluachuah a kan pek cang.”—SALM 67:6
A Kan Sertu Nih Zungzal In A Hmunmi Thluachuah A Kan Pek Lai
Pathian nih profet Abraham kha na tefa pakhat nih “vawleicung miphun vialte” kha thluachuah a hmuhter hna lai tiah bia a kamh. (Genesis 22:18) Mah tefa cu ahodah a si lai?
A luancia 2,000 dengmang lioah Pathian nih Abraham tefa a simi Jesuh kha khuaruahhar thil tuah khawhnak ṭhawnnak a rak pek. Mah khuaruahhar thil hna nih Abraham sinah sermi biakam cu Jesuh thawngin miphun ah an cang lai ti kha a langhter.—Galati 3:14.
Jesuh tuahmi khuaruahhar thil hna nih amah cu Pathian nih minung thluachuah pek awkah a thimmi a si ti le minung zungzal in thluachuah pek awkah Pathian nih zeitindah a hman lai ti kha fiang tein hngalh awkah a kan bawmh. Jesuh tuahmi khuaruahhar thil nih a lang bikmi a sining cheukhat a langhter ning kha i cinken.
Nemnak—Jesuh nih a zawmi kha a damter hna.
Voikhat cu, thinghmui zawtnak a ngeimi pa nih a dam nakhnga Jesuh kha a nawl. Mah tikah Jesuh nih a tawngh i “ka duh” tiah a ti. Thinghmui zawtnak a ngeimi pa cu a dam colh.—Marka 1:40-42.
Siannak—Jesuh nih a paw a ṭammi kha rawl a dangh hna.
Jesuh nih mi pawl rawlṭam in an ummi kha a duh lo. Cucaah khuaruahhar lam in changreu le nga tlawmpal kha a karhter i mi thong tampi kha a rak dangh hna. (Matthai 14:17-21; 15:32-38) An dih lakin khim tein an ei dih hnuah tampi a hlei rih.
Zaangfahnak—Jesuh nih mithi a thawhter hna.
Amah a zohkhenhtu, a fapa ngeihchunhte nih a thi takmi nuhmeinu kha “a zaang a fak ngaingai” caah Jesuh nih a fapa kha a rak thawhter.—Luka 7:12-15.