Fimnak Cu A Au

1. Tuchan ah fimnak a aumi kha mi tampi nih zeitindah an lehrulh? (Phungthlukbia 1:20, 21)

RAM tampi ah mi tampi an i chawhnak hmun hna ah unau pawl an dirmi kha kan hmuh tawn. Panh tein an um i mi kha ca rel awk an pek hna. Nang zong cutin na tuah ve men ko lai. Mi nih Pathian ruahnak cheuhnak an theih nakhnga fimnak cu mi tampi umnak hmun ah a au timi Phungthlukbia i Baibal chimmi kong kha na ruat men lai. (Phungthlukbia 1:20, 21 rel.) Baibal le kan cauk hna ah “fimnak” taktak a simi Jehovah fimnak aa tel. Mah cu mi nih zungzal nunnak an hmuh khawh nakhnga an herhmi a si. Cucaah mi pakhat nih kan cauk pakhatkhat a cohlan tikah kan i nuam tuk. Asinain mikip nih cun an cohlang lo. Mi cheukhat nih Baibal chimmi kha zei ah an rel lo. Cheukhat nih cun an kan nihsawh. Baibal cu chan nih a kaltak cangmi a si tiah an ruah. Cun cheukhat nih ziazalei he aa tlaimi Baibal cawnpiaknak kha an soisel i mah ningin a nungmi hna kha zaangfahnak a ngei lomi le mahle mah a ding tuk in aa ruatmi in an hmuh hna. Asinain Jehovah nih dawtnak he mikip kha fimnak a pek peng hna. Zeiti lam in dah?

2. Tuchan ah fimnak taktak kha khoika ah dah hmuh khawh a si, asinain mi tampi nih zeidah an i thim?

² Jehovah pekmi fimnak theih khawhnak lamkhat cu a Bia, Baibal thawngin a si. Mah Baibal cu mikip nih an ngei ti awk tluk a si. Baibal hrambunh in chuahmi cauk pawl tah zeitin? Holhphun 1,000 lengin hmuh khawh a si caah Jehovah cungah kan i lawm tuk. Mah kha a rel i mah ningin a nungmi hna nih ṭhathnemhnak an hmu lai. Asinain mah fimnak aw kha mi tampi nih zei ah an rel lo. Biakhiahnak an tuah tikah anmahle anmah i bochan asiloah an minunghawi bia ngaih kha an duh deuh. Baibal phunglam ningin kan nun caah kanmah tu hmanh kha an kan nautat men lai. Mi nih zeicah cutin an lehrulh ti kha hi capar ah kan i ruah lai. Asinain Jehovah sinin fimnak zeitindah kan hmuh khawh ti kha i ruah hmasa hna u sih.

Jehovah Hngalhnak Nih A Fimmi A Kan Siter

3. Fimnak taktak timi ah zeidah aa tel?

³ Fimnak cu a ṭhami biakhiahnak a kan tuahter khomi sining pakhat in langhter khawh a si. Asinain fimnak taktak cu mah lawng a si lo. Baibal nih hitin a ti: “BAWIPA ṭih cu fimnak hramthawknak a si, A Thiangmi hngalh cu a thukmi thil hmuh khawhnak a si.” (Ptb. 9:10) Cucaah a biapimi biakhiahnak tuah a herh tikah mah kong he aa tlaiin Jehovah hmuh ning kha hngalh i zuam a hau. Baibal le Baibal hrambunhmi cauk pawl kan hlathlainak thawngin cutin kan tuah khawh. Cutin kan tuah tikah fimnak taktak kha kan langhtermi a si.—Ptb. 2:5-7.

4. Fimnak taktak a kan pe khotu cu zeicah Jehovah lawng a si?

⁴ Fimnak taktak a kan pe khotu cu Jehovah lawnglawng a si. (Rom 16:27) Zeicah Jehovah cu fimnak Hrampi a si? Pakhatnak, Jehovah cu Sertu a si caah a sermi thil vialte kong kha a hngalh dih. (Salm 104:24) Pahnihnak, Jehovah tuahmi thil vialte nih a fimnak kha an langhter. (Rom 11:33) Pathumnak, fimnak aa telmi Jehovah ruahnak cheuhnak a zulmi hna nih a zungzal in ṭhathnemhnak an hmu. (Ptb. 2:10-12) Fimnak taktak ngeih kan duh ahcun a hrampi a simi biatak kha kan cohlan a hau, cun kan tuahsernak le kan biakhiahnak ah mah kha lam kan i hruaiter a hau.

5. Jehovah hngalhnak cu fimnak taktak Hrampi a si ti kha mi nih an cohlan duh lo caah a phichuak cu zeidah a si?

⁵ Phungchimnak ah kan tonmi hna nih kokek thil hna cu khuaruahhar design in an khat ti kha an cohlan ko. Asinain Sertu a um lo tiah an ti i thlennawnnak tu kha an zumh. Mi cheukhat nih cun Pathian kan zumh tiah an ti ko nain Baibal phunglam cu zulhawk a tlak ti lo tiah an hmuh i anmah duh ningin nun awkah an i thim. A phichuak cu zeidah a si? Mi nih Pathian canah anmah fimnak tu an i bochan caah vawlei cu a ṭha deuh maw? Nuamhnak taktak an hmu maw asiloah hmailei caah a fekmi ruahchannak an ngei maw? Kan pawngkam ah kan hmuhmi thil hna nih mah biatak hi a kan zumhter: “Fimnak siseh, hngalhnak siseh, chunglei thil purh khawhnak siseh, BAWIPA hmaiah cun zeihmanh an si lo.” (Ptb. 21:30) Mah nih Jehovah sinah fimnak taktak hal peng dingin a kan forh! Ngaihchiat awk ngai a simi cu mi tampi nih cutin an tuah lo. Zeicah?

Mi Nih Fimnak Taktak An Cohlan Lonak A Ruang

6. Phungthlukbia 1:22-25 ningin Jehovah fimnak ngaih a duh lomi cu ahote dah an si?

⁶ “Khuachung lam ah khan fimnak cu a au” tikah mi tampi cu an hna a chet. Baibal chimmi ningin fimnak a cohlang duh lomi phu pathum an um: “hmuhtonnak a ngei lomi, [NW]” “mi nihsawh hmangmi” le “mihrut” kha an si. (Phungthlukbia 1:22-25 rel.b) Cu bantuk mi hna nih Pathian fimnak an cohlan duh lonak a ruang kha fiang deuh in i ruah hna u sih. Cun mah kha zeitindah kan hrial khawh ti zong i ruah hna u sih.

7. Mi cheukhat nih “hmuhtonnak a ngei lomi” si awkah zeicah an i thim?

⁷ Mi lungthin tlawm, hmuhtonnak a ngei lomi cu an theihmi kip a zum i fawi tein hlen khawhmi kha an si. (Ptb. 14:15) Cu bantuk mi hna kha phungchimnak ah kan ton tawn hna. Tahchunhnak ah, biaknaklei asiloah ramkhel lei hruaitu hna nih an hlenmi mi nuai tampi kong kha ruathmanh. Mah hruaitu hna nih an hlenmi hna kha mi cheukhat nih an hun hngalh tikah an lau tuk. Asinain mah lam ningin nun kha an duh caah Phungthlukbia 1:22 ah a langhtermi hmuhtonnak a ngei lomi si tu kha an i thim. (Jer. 5:31) An duhmi kha an tuah i Baibal chimmi kha cawn an duh lo asiloah Baibal phunglam zulh kha an duh lo. Canada, Quebec ah a ummi biaknaklei ah aa zuammi nu pakhat nih Jehovah Tehte pakhat sinah hitin a chimmi bantukin mi tampi nih an ruah ve, “Kan siangbawi pa nih a kan hlenmi a si ahcun amah palh a si ko lai, kanmah palh a si lai lo!” Baibal chimmi hramhram in zei a rel lomi hna i zohchunh kha kan duh hrimhrim lo!—Ptb. 1:32; 27:12.

8. Fimnak a ngeimi si awkah zeinihdah a kan bawmh khawh?

⁸ Baibal nih a ruang ṭha a um caah hmuhtonnak a ngei lomi si loin “[kan] khuaruah ning ahcun nutling, patling si” awkah tha a kan pek. (1 Kor. 14:20) Baibal phunglam kan zulhnak thawngin fimnak a ngeimi kan si. Cutin kan tuah ahcun Baibal nih buaibainak hna hrial khawh awk le a ṭhami biakhiahnak tuah khawh awkah a kan bawmh ning kha kan hmuh lai. Mah kong he aa tlaiin kan ṭhanchonak i dothlat cu a ṭhami a si. Tahchunhnak ah, Baibal kha kan hlathlai i a caan ah kan i pum ko nain Jehovah sinah zeicah i pumpek in tipil kan in rih lo tiah kan i hal awk a si. Tipil a ing cangmi kan si ahcun thawngṭha chimnak le cawnpiaknak ah kan ṭhangcho maw? Kan biakhiahnak nih Baibal phunglam a zulmi kan si kha a langhter maw? Midang he kan i pehtlaihnak ah Khrihfa ziaza hna kan langhter maw? Ṭhancho kan herhnak a um ahcun ‘fimnak a baumi fimnak a petu’ Jehovah ralrin peknak kha lungthin pe hna u sih.—Salm 19:7.

9. “Mi nihsawh hmangmi” nih fimnak an cohlan duh lo kha zeitindah an langhter?

⁹ Pathian fimnak a cohlang duh lomi, a pahnihnak phu cu “mi nihsawh hmangmi” kha an si. A caan ah phungchim rian kan ṭuannak ah cu bantuk mi he kan i tong men lai. Annih nih midang kha an nihsawh hna. (Salm 123:4) Baibal nih donghnak caan ah mi nihsawh a hmangmi an um lai tiah ralrin a kan pek. (2 Pet. 3:3, 4) Miding Lot fanule a ṭhitu ding pawl bantukin tuchan mi cheukhat nih Pathian ralrin peknak kha zei ah an rel lo. (Gen. 19:14) Baibal phunglam ningin a nungmi hna kha mi tampi nih an nihsawh hna. Mi nihsawh a hmangmi hna cu “a ṭha lomi an pumsa duhnak” nih cutin tuah awkah a forh hna. (Judas 7, 17, 18) Baibal nih nihsawh a hmangmi a langhter hna ning cu zumhpialmi le Jehovah a cohlang duh lomi hna he aa lo!

10. Salm 1:1 ah langhtermi bantukin mi nihsawh a hmangmi kan si nakhnga lo zeitindah kan hrial khawh?

¹⁰ Mi nihsawh a hmangmi kan si nakhnga lo zeitindah kan tuah khawh? Lamkhat cu phunzai a hmangmi hna he i komh kha kan hrialnak thawngin a si. (Salm 1:1 rel.) Mah cu zumhpialmi hna sinin a rami zei bia paoh ngaih lo le rel lo kha a si. Kan i ralrin lo ahcun phunzai duhnak lungput kha fawi tein kan ngei kho i Jehovah le a bupi sinin a rami lamhruainak cung hmanhah lunghrinnak kan hun ngei kho. Cutin kan si nakhnga lo hitin kan i hal awk a si: ‘Lamhruainak thar asiloah fianternak thar ka hmuh tikah a chiatnaklei in ka chim zungzal maw? Hruaitu pawl sualnak kawl kha ka duh maw?’ Cu bantuk lungput kha kan i remh colh ahcun Jehovah cu kan cungah aa lawm lai.—Ptb. 3:34, 35.

11. “Mihrut” nih ziazalei he aa tlaimi Jehovah phunglam kha zeitindah an hmuh?

¹¹ Fimnak a cohlang duh lomi a pathumnak phu cu “mihrut” kha an si. Ziazalei he aa tlaimi Pathian phunglam ningin nun kha an duh lo caah annih cu mihrut an si. Anmah mithmuh ah a hmaanmi thil kha an tuah. (Ptb. 12:15) Fimnak Hrampi, Jehovah kha an cohlang duh lo. (Salm 53:1) Phungchimnak ah cu bantuk mi he kan i ton tikah Baibal phunglam kan upat caah an kan soisel tawn. Asinain annnih nih a ṭhami nunnak an kan pe kho lo. Baibal nih hihtin a ti: “Fimnak hi mihrut caah cun a sang tuk i a hngalh khawhmi a si lo, thil pipa ceih tikah zeihmanh chim awk a hngal lo.” (Ptb. 24:7) Mihrut nih cun midang sin chim awk fimnak bia zeihmanh an ngei lo. Cucaah Jehovah nih “mihrut cu hrial ko hna” u tiah ralrin a kan peknak a si!—Ptb. 14:7.

12. Mihrut bantukin thil tuah lo awkah zeinihdah a kan bawmh lai?

¹² Kannih cu Pathian ruahnak cheuhnak a huami hna bantuk kan si lo. Mah canah a nawlbia vialte i telin Pathian ruahnak kha sunsak awkah kan cawn. Nawlngaihnak le nawlngaih lonak i a phichuak kha tahchunhnak thawngin mah kan sunsaknak kha kan fehter khawh. Fimnak aa telmi Jehovah ruahnak cheuhnak kha hrut ngaiin a cohlang duh lomi hna nih an tonmi buaibainak hna kha ruathmanh. Cun Pathian nawl na ngaih ruangah na nunning zeiltuk in dah a ṭhat deuh ti kha ruat.—Salm 32:8, 10.

13. Jehovah nih ruahnak a kan cheuhmi kha zulh awkah a kan hnek maw?

¹³ Jehovah nih kan dihlak in fimnak pek a kan duh, asinain mah kha cohlan awkah hramhram in a kan hnek lo. Asinain fimnak a cohlang duh lomi hna nih an ton dingmi kong kha a langhter. (Ptb. 1:29-32) Jehovah nawl a ngai duh lomi hna nih “an ziaza theitlai” kha an ei lai. A hnuah an nunning ruangah fahnak le buaibainak tampi an tong lai i a donghnak ah Jehovah nih a hrawh hna lai. Phundang cun, Jehovah ruahnak cheuhnak a ngai i a zulmi hna cu hitin biakamh an si: “Ka bia a ngaimi cu him tein an um lai i vanchiatnak zeihmanh ṭih loin, zalong tein an um lai.”—Ptb. 1:33.

Ṭhatnak A Kan Pemi Fimnak Taktak

14-15. Phungthlukbia 4:23 in zeidah kan hngalh?

¹⁴ Pathian fimnak ningin kan nun tikah a zungzal in ṭhatnak kan hmu. Kan i ruah cang bantukin fimnak aa telmi Jehovah ruahnak cheuhnak kha fawi tein hmuh khawh a si. Tahchunhnak ah, Phungthlukbia cauk in Jehovah nih a zungzal in ṭhathnemhnak a kan pemi, zulhawk a tlakmi ruahnak cheuhnak a kan pek. Mah ruahnak cheuhnak i tahchunhnak pali kha i ruah hna u sih.

¹⁵ Langhternak na lungthin kha kilveng. Baibal nih hitin a ti: “Na lung kha ṭha tein veng tuah, Zeicahtiah cuka cun nunnak cerhti kha a put.” (Ptb. 4:23) Kan lungthin taktak kilven awkah tuah a herhmi kong kha ruathmanh. Ngan a damtermi rawl ei, exercise tuah le a ṭha lomi ziaza hna hrial a hau. Langhternak kan lungthin kilvennak zongah cutin tuah a hau ve. Nifatin Pathian Bia kan rel. Khrihfa pumhnak caah kan i timtuah, kan i pum i a phi zong kan pek. Phungchimnak ah hmaan tein i tel awkah kan i zuamnak thawngin hliphlau tein kan um. Ziazalei rawhralnak he aa tlaimi nuamhsaihnak le hawiṭhalo ti bantuk kan ruahnak a hrawk khomi zei thil paoh kha kan hrial.

16. Zeicah Phungthlukbia 23:4, 5 cu kan caah bawmtu taktak a si?

¹⁶ Na ngeihmi ah i lungsi. Baibal nih hitin ruahnak a kan cheuh: “Rumnak hmuh awkah i hre tuk hlah. . . . Na tangka cu mitṭhep ah an lo kho ko, Thla kha i serh duak in mupi bangin an zuang kho ko.” (Ptb. 23:4, 5) Thilri chawva cu a hmun lo. Asinain tuchan ah mirum he, misifak he tangka kawlnak kongah an lungre a thei tuk. Cucaah an min, midang he an i pehtlaihnak le an ngandamnak hmanh a hnorsuang khomi thil hna kha an tuah tawn. (Ptb. 28:20; 1 Tim. 6:9, 10) Asinain tangka kong he aa tlaiin a tlarimi hmuhnak ngeih awkah fimnak nih a kan bawmh khawh. Mah nih hakkauh lo awkah a kan bawmh lai i kan ngeihmi thil ah i lungsi awk le i lawmh awk zongah a kan bawmh lai.—Pct. 7:12.

17. Phungthlukbia 12:18 ningin “mifim mi bia” kha zeitindah kan chim khawh?

¹⁷ Na chim hlanah ruat. Kan i ralrin lo ahcun kan chimmi bia nih harnak a chuahter khawh. Baibal nih hitin a ti: “Ruah set loin chimmi bia nih cun nam chunh bangin mi a chunh, sihmanhsehlaw mifim mi bia nih cun hma kha a damter.” (Ptb. 12:18) Midang palhnak kong kan chim lonak thawngin daihnak um awkah kan bawmh. (Ptb. 20:19) Kan chimmi bia nih mi lung fahter loin hnemhnak pe hna seh ti kan duh ahcun Pathian Bia kha hmaan tein rel le ruah a hau. (Luka 6:45) Baibal chimmi kha ṭha tein kan ruah ahcun kan bia cu midang hrimhnak a pemi, “a luang lengmangmi tiva” bantuk a si lai.—Ptb. 18:4.

18. Phungchimnak ah hlawhtlinnak kan hmuh nakhnga Phungthlukbia 24:6 kha zeitindah kan zulh khawh?

¹⁸ Lamhruainak kha zul. Baibal nih hlawhtlinnak hmuh awkah hitin ruahnak a kan cheuh: “Ral cu a ṭhami lamhruainak thawngin tei a si i ruahnak cheutu an tam ahcun hlawhtlinnak hmuh a si.” (Ptb. 24:6, NW) Mah phunglam zulhnak nih phungchimnak le cawnpiaknak ah zeitindah hlawhtlinnak a hmuhter ti kha ruathmanh. Phungchimnak ah kanmah fimnak i bochan canah pek kan simi lamhruainak hna kha zulh awkah kan i zuam. Hmuhtonnak a ngeimi ruahnak cheutu hna nih Baibal hrambunh in phung an chimnak le kanmah cawnpiak awkah hmuhsaknak hna an tuahnak Khrihfabu pumhnak in fimnak aa telmi lamhruainak kan hmu. Mah lengah mi nih Baibal kong an hngalhthiam nakhnga a bawm khomi hriamnam—cauk le video pawl kha Jehovah bupi nih an kan chuahpiak. Mah hriamnam pawl hmualngei tein hmanthiam awkah na cawng maw?

19. Jehovah pekmi fimnak kha zeitindah na hmuh? (Phungthlukbia 3:13-18)

¹⁹ Phungthlukbia 3:13-18 rel. Baibal ah a ṭhami ruahnak cheuhnak kan hmuh caah kan i lawm tuk! Mah kha um hlah sehlaw kan nunnak cu zeidah a lawh lai? Hi capar ah Phungthlukbia cauk chung i a ṭhami ruahnak cheuhnak cheukhat kong kha kan i ruah cang. Baibal ah Jehovah sinin a rami a ṭhami ruahnak cheuhnak in a khat. Cucaah Jehovah ruahnak cheuhnak kha kan nunnak kip ah kan hman awk a si. Mi tampi nih Pathian fimnak kha an sunsak lo. Asinain kannih nih cun “amah [fimnak] kha fek tein aa tlaihmi cu him tein an um” ti kha kan zumh.