A Hmaan Le Hmaan Lo Kong Ah: Baibal Chimmi Kha Kan Zumh Khawh

Kan ruahnak asiloah midang ruahnak cung ah i hngat in i thimnak kan tuah ahcun ṭhathnemnak kan hmuh le hmuh lo kha kan i fiang lai lo. Baibal nih a ruang kha a fianter. Mah lawng si loin a hmaan le hmaan lo a kan hngalhter khomi lamhruainak zong a kan pek. Mah cu nuamhnak a kan hmuhter khomi lamhruainak a si.

Kan Herhmi Lamhruainak

Baibal ah minung nih a zulhmi a lam hi amah nih aa thim kho lo i lamhruainak hmuh awkah Jehovaha Pathian kha aa bochan a hau tiah a ti. (Jeremiah 10:23) Mah ruang ah a hmaan le hmaan lo kong he aa tlaiin Pathian nih lamhruainak a kan peknak a si. Pathian nih minung kha a kan dawt tuk i a ṭhalomi biakhiahnak ruang ah kan nunnak ah harnak kan ton dingmi kha a duh lo. (Deuteronomi 5:29; 1 Johan 4:8) Mah leng ah a kan Sertu a si caah fimnak le hngalhnak a ngei i a hmaan le hmaan lo kong ah a ṭha bikmi lamhruainak a kan pek khawh. (Salm 100:3; 104:24) Asinain Pathian nih a phunglam ning in nun awkah mi kha zeitik hmanh ah a hnek bal hna lo.

Jehovah nih hmasa bik minu le mipa, Adam le Evi kha nuamhnak taktak hmuh awkah an herhmi vialte kha a pek hna. (Genesis 1:28, 29; 2:8, 15) Cun a nawlngaih awkah a sawhsawhte a simi lamhruainak zong a pek hna. Asinain zulh le zulh lo kong ah anmah tein thimnak nawl a pek hna. (Genesis 2:9, 16, 17) Ngaihchiat awk simi cu Adam le Eve nih Pathian phunglam ning in si loin anmah phunglam ning in nun awkah an rak i thim. (Genesis 3:6) A phichuak cu zeidah a si? A hmaan tiah an ruahmi ning in an tuah caah an i nuam maw? An i nuam lo. Pathian phunglam zei rel loin umnak nih a dai i a nuammi nunnak a kan hmuhter kho lo ti kha tuanbia nih a langhter.—Phungchimtu 8:9.

Hnulei kan sining cu zei bantuk a si hmanh ah Baibal ah a ṭhami biakhiahnak tuah awkah a kan bawm khomi lamhruainak a um. (2 Timote 3:16, 17; “Mi Vialte Caah Cauk Pakhat” timi rinli kulh kha zoh.) Baibal nih zeitindah lamhruainak a kan pek ti kha zoh hmanh.

Baibal cu zeicah “Pathian Bia” tiah auh khawh a si timi kong kha tam deuh in hlathlai.—1 Thesalon 2:13. Baibal Ṭialtu Taktak cu Ahodah a Si? timi video kha jw.org ah zoh.

MI CHEUKHAT NIH BAIBAL KHA ZEICAH AN ZUMH LO?

Mi cheukhat nih a hmaan le hmaan lo kong he aa tlaiin Baibal lamhruainak cu zumh khawh a si lo tiah an ti. A ruang cheukhat kha zohhmanh hna u sih.

Mi Cheukhat Chimmi: “Baibal cu a hnu, hmai bia aa ralkah.”

A Hmaanmi: Baibal i cheukhat ṭhen hna cu a dang ṭhen hna he aa ralkahmi a lo kho men. Asinain zeitin le zeitik ah dah an ṭial timi kong kha na hlathlai ahcun aa ralkah lo ti kha na hngalh lai.

Tahchunhnak cheukhat kong hngalh awkah jw.org ah taarmi “Baibal Ah A Hnu, Hmai Aa Ralkahmi Kong A Um Maw?” [Myanmar] timi capar kha rel.

Mi Cheukhat Chimmi: “Baibal lamhruainak ka zulh aa timi hna nih thil ṭha lo an tuah caah Baibal cu a hmaan le hmaan lo kong ah zumh khawh a simi lamhruainak a si kho lo.”

A Hmaanmi: Baibal cawnpiaknak a zul lomi hna i a ṭha lomi an tuahsernak ruang ah Baibal cu sualphawt khawh a si lo. Baibal cawnpiaknak ka zulh tiah aa timi biaknaklei hruaitu pawl i telin mi tampi nih Baibal cawnpiaknak he aa ralkahmi thil hna kha an tuah lai tiah Baibal ah a chimchung. Mah ruang ah Baibal cawnpiaknak cu “thangchiat” a si lai ti zong in a ti.—2 Peter 2:1, 2.

Biaknaklei hruaitu tampi nih Baibal cawnpiaknak an zulh lo ning kong tahchunhnak pakhat in hngalh awkah jw.org ah taarmi “Biaknak In A Miak Kawl Awk A Si Maw?” [Myanmar] timi capar kha rel.

Mi Cheukhat Chimmi: “Baibal cawnpiaknak a zulhmi hna nih anmah he aa thleidangmi hna kha an upat hna lo.”

A Hmaanmi: Baibal nih midang kha upatnak he pehtlaih hna awkah tha a kan pek. A tanglei ziaza hna hi tha a pe lo. . .

Midang nakin ka ṭha deuh timi ruahnak.—Filipi 2:3.
Zumhnak le ruahnak aa khat lomi pawl upat lonak.—1 Peter 2:17.
Kan hmuhnak kha an cohlan nakhnga midang hneknak.—Matthai 10:14.

Pathian nih minung kha zaangfahnak le dinnak he a pehtlaih zungzal hna bantuk in kannih zong cutin tuah ve hna seh ti a kan duh kha Baibal ah a langhter.—Rom 9:14.

Tam deuh in hngalh awkah jw.org ah taarmi “Baibal Nih Inkhawhnak Ngeih Awkah A Kan Bawmh Khawh Ning” timi capar kha rel.

Pathian Lamhruainak Baibal Ah Langhter A Si Ning

Baibal ah Jehovah le minung an i pehtlaihnak kong kha a langhter. Mah nih zeidah a hmaan i zeidah a hmaan lo, zeidah a ṭhahnem i zeidah ṭih a nung timi kong he aa tlaiin Pathian hmuhnak kha hngalhthiam awkah a kan bawmh. (Salm 19:7, 11) Baibal in kan hngalhmi nih nifa kan nunnak ah a hmaan le hmaan lo kong he aa tlaiin a ṭhami biakhiahnak tuah awkah a kan bawmh.

Tahchunhnak ah, Phungthlukbia 13:20 ah a langhtermi mah ruahnak cheuhnak hi ruathmanh: “Mifim mi hna sinah i chawk ve lengmang law na fim lai, mihrut hna he i kom law a ping ah an in hruai lai.” Mah phunglam cu hlanlio ah a rak hmaan bantuk in tuchan zong ah a hmaan. Mah bantuk bawmtu a si i a sunglawi tukmi phunglam hna Baibal ah tampi a um.—“Zeitik Caan Paoh ah A Ṭhahnemmi Baibal Lamhruainak” timi rinli kulh kha zoh.

Asinain ‘Baibal ruahnak cheuhnak nih a ka bawmh khawh ti kha zeitindah ka zumh khawh lai?’ tiah na ruah men lai. A changtu capar ah a cang taktakmi hmuhtonnak cheukhat kong kha kan theih hna lai.

a Jehovah timi cu Pathian i pumpak a min a si.—Salm 83:18, NWT.

ZEITIK CAAN PAOH AH A ṬHAHNEMMI BAIBAL LAMHRUAINAK

Baibal ṭial dih a sinak cu kum 2,000 dengmang a si cang ko nain atu tiang man a ngei rih. Chan cu aa thleng ko nain a tlingmi le a nuammi nunnak ngeih awkah kan i zuam peng rih. (Phungchimtu 1:9) Mah hmuitinh phanh awkah zeitik caan paoh ah a ṭhahnemmi Baibal lamhruainak nih a kan bawmh khawh.

Dinfelnak

“A hmaanmi thil kha tuah duhmi kan si zungzal.”—Hebru 13:18.
“Fir a hmangmi kha fir ti hlah seh, amah ca i ding tein pawcawmnak caah le sifakmi bawmhnak caah rian ṭuan seh.”—Efesa 4:28.

Midang He Pehtlaihnak

“Ahohmanh nih kanmah ca ṭha ding lawng kha kan zoh awk a si lo, midang ca ṭha ding tu kha kan zoh awk deuh a si.”—1 Korin 10:24.
“Pakhat le pakhat lungsilonak nan i ngeih tikah pakhat le pakhat i ngaithiam u.”—Kolose 3:13.

Biakhiahnak Tuahnak

“Mi lungthin tlawm nih cun zei paoh kha a zumh, sihmanhsehlaw mifim nih cun a lamh ding kha ṭha tein a zoh.”—Phungthlukbia 14:15.
“Mifim nih cun harnak a rat kha a hmuh tikah hrial khawhnak aa zuam, sihmanhsehlaw mihrut nih cun a pahchih thluahmah ko i a hnuah aa ngaichih.”—Phungthlukbia 22:3.