Jehovah Nih “Lungkuai Mi Kha A Damter Hna”

1. Jehovah nih a salle pawl kha zeitindah a hmuh hna?

VAWLEICUNG i a salle pawl a zoh hna tikah Jehovah nih zeidah a hmuh? Kan i nuamhmi le kan ngaihchiatmi kha a hmuh. (Salm 37:18) Kan lung a kuai hmanh ah kan si khawh chung in a rian kan ṭuanmi kha a hmuh tikah Jehovah cu aa lawm tuk! Mah leng ah lungtho tein bawmh le hnemh a kan duh.

2. Jehovah nih lungkuai mi hna caah zeidah a tuah, a kan zohkhenhnak in zeitindah ṭhathnemhnak kan hmuh khawh?

² Salm 147:3 ah Jehovah nih lungkuai mi hna “an hma kha a menpiak hna” tiah a ti. Mah nih Jehovah cu lungthinlei hma a pumi hna nem tein a zohkhenhtu a si ti kha a langhter. Jehovah zohkhenhnak in ṭhathnemhnak hmuh awkah zeidah kan tuah a hau? Tahchunhnak pakhat hi ruathmanh. Hma a pumi pakhat damter awkah a thiammi siibawi nih thil tampi a tuah khawh. Asinain hma a pumi nih ṭhathnemhnak a hmuh khawh nakhnga siibawi lamhruainak kha ṭha tein a zulh a hau. Hi capar ah Baibal i lungkuai mi hna sinah Jehovah nih a chimmi le dawtnak aa telmi mah ruahnak cheuhnak kha zeitindah kan zulh khawh timi kong kan i ruah hna lai.

Jehovah Nih A Caah Man A Ngeimi Kan Si Ti Kha A Kan Hngalhter

3. Zeicah mi cheukhat nih man ka ngei lo tiah an ruah?

³ Ngaihchiat awk ngai a simi cu dawtnak a um lomi vawlei ah kan nun caah mi cheukhat nih man ka ngei lo tiah an ruah. Helena timi unaunu nih hitin a ti: “Dawtnak a ngei lomi chungkhar ah ka ṭhang. Ka pa cu zaangen a hmangmi a si i man ngei lomi na si tiah nifatin a ka ti.” Helen bantuk in mi pakhatkhat sinin a ding loin le man a ngei lomi bantuk in pehtlaihnak asiloah atu le atu soiselnak na tong kho men. Cutin a si ahcun mi pakhatkhat nih ka zawn a ka ruah taktak ko timi kha zumh awkah naa harh men lai.

4. Salm 34:18 ning in Jehovah nih zeidah a kan kamh?

⁴ Midang nih a ding loin an in pehtlaih hmanh ah Jehovah nih aan dawt i aan sunsak ti kha na zumh khawh. “Lung a dongmi kha BAWIPA nih a umpi hna.” (Salm 34:18 rel.) “Ruahchannak a ngei lomi” ka si tiah na ruah ahcun Jehovah nih na ṭhatnak a hmuh i a sinah aan hnuh ti kha i cinken. (Joh. 6:44) A caah a sunglawi tukmi na si caah nangmah bawmh awkah timhcia tein a um peng.

5. Midang nih an nautatmi hna Jesuh nih a chawnhbiak hna ning in zeidah kan cawn khawh?

⁵ Jesuh kong ruahnak in Jehovah hmuh ning kha kan hngalh khawh. Jesuh vawleicung a um lioah midang nih an nautatmi hna kha a hmuh hna i anmah kha zaangfahnak he a chawnhbiak hna. (Matt. 9:9-12) A zual tukmi zawtnak a ngeimi nu pakhat nih dam ṭhan a duh caah Jesuh puan a rak tawngh tikah Jesuh nih a hnemh i a ngeihmi a zumhnak kha a thangṭhat. (Mar. 5:25-34) Jesuh nih a Pa sining kha tling tein a langhter. (Joh. 14:9) Cucaah Jehovah nih amah na dawtnak le na zumhnak i tel in a ṭhami na sining kha a hmuh i a sunsak ti kha na zumh khawh.

6. Man ka ngei lo timi ruahnak na ngeih ahcun zeidah na tuah khawh?

⁶ Man ka ngei lo timi ruahnak na ngeih ahcun zeidah na tuah khawh? Jehovah caah a sunglawimi na si ti aan zumhtermi Baibal caang pawl kha rel law mah kong kha ruat.b (Salm 94:19) Midang he i tahchunh hlah law na tuah khawh lomi thil cung ah lungthin pe hlah. Jehovah nih na tuah khawh lo leng in aa ruahchan lo. (Salm 103:13, 14) Pakhatkhat nih a ding loin aan pehtlaih ahcun mah cu nangmah palh a si lo. Jehovah nih midang a ding loin a pehtlaihtu pawl kha bia a ceih hna lai i a ding loin pehtlaihnak a tongmi pawl kha a bawmh hna lai ti kha i cinken. (1 Pet. 3:12) A ngakchiat lioah puarhrangpi in pehtlaihnak a tongmi Sandra nih hitin a ti: “A ka hmuh ning in keimah le keimah a tlari tein kaa hmuh khawh nakhnga Jehovah sinah bawmhnak ka hal peng.”

7. Jehovah rianṭuannak ah kan hmuhtonnak kha zeitindah kan hman khawh?

⁷ Midang bawmh awkah Jehovah nih aan hman khawh ti kha lunghrinnak ngei hlah. Phungchim rian ah amah he ṭuanṭi ding in aan sawmnak thawng in upatnak aan pek. (1 Kor. 3:9) Na hmuhtonnak nih midang zawnruah awk le an intuarnak kha hngalhthiam awkah aan bawmh khawh. Anmah bawmh awkah thil tampi na tuah khawh. A hmasa ah langhtermi Helen cu bawmhnak a rak hmuh caah atu ah amah theng zong nih midang kha ṭha tein a bawmh khawh hna. Hitin a ti: “A hlanah man ka ngei lo tiah ka rak ruah. Asinain Jehovah nih ka cung ah dawtnak a langhter i midang zong bawmh awkah a ka hman.” Helen cu nuam tein hmaanhmaan hmaikal a ṭuan.

Jehovah Nih A Ngaihthiamnak Kha Cohlang Hna Seh Ti A Kan Duh

8. Isaiah 1:18 ah Jehovah nih zeidah a chim?

⁸ Jehovah salle cheukhat cu tipil an in hlan asiloah an in hnu i an tuahmi sualnak ruang ah an lungre a thei peng. Asinain Jehovah nih a kan dawt tuk caah tlanhnak man a kan pek ti kha kan philh awk a si lo. Mah laksawng kha cohlang hna seh ti a kan duh ti cu a fiang ko. Amah he ‘bia ṭha tein kan i ruahṭi’c hnuah a kan ngaihthiam cang ti kha Jehovah nih zum hna seh ti a kan duh. (Isaiah 1:18 rel.) A kan dawtu kan Pa Jehovah nih hlanah kan rak tuahmi sualnak aa cinken ti lo caah kan i lawm tuk! Mah leng ah ṭhatnak kan rak tuahmi kha a philh bal lo.—Salm 103:9, 12; Heb. 6:10.

9. A hlanah kan rak tuahmi sualnak kong kha zeicah kan ruah peng awk a si lo?

⁹ A hlan i na tuahmi sualnak ruang ah lungrethei in na um ahcun atu na tuah liomi le hmailei ah na tuah dingmi cung tu ah lungthin pek i zuam. Lamkaltu Paul kong kha ruathmanh. Khrihfa pawl kha puarhrangpi in a rak hrem hna caah aa ngaichih, asinain Jehovah nih a ka ngaihthiam ti zong a hngalh. (1 Tim. 1:12-15) A hlanah a tuahmi sualnak kong kha a ruat peng maw? Paul cu mi nih upatmi Farasi mi si awkah aa zuammi kong a ruah ti lo bantuk in a hlan i a rak tuahmi sualnak kong zong a ruat lai lo ti cu a fiang ko. (Fil. 3:4-8, 13-15) Mah canah Paul cu phungchim rian ah a si khawh chung in aa zuam i hmailei cung tu ah lungthin a pek. Paul bantuk in a liam ciami caan cu na thleng kho lai lo. Asinain atu ah Jehovah kha na thangṭhat khawh i a lung na ton khawh. Cun a ṭha tukmi hmailei a biakam kong kha na ruah khawh.

10. A hlanah kan rak tuahmi thil ruang ah midang an lung a fah ahcun zeidah kan tuah khawh?

¹⁰ Midang fahnak a pemi hlanah na rak tuahmi thil cheukhat ruang ah lungrethei in na um kho men. Zeinihdah aan bawmh khawh? An lungfahnak a dam ṭhan nakhnga na tuah khawhmi thil kha tuah law lungtak tein ngaihthiamnak zong hal hna. (2 Kor. 7:11) An lung na fahtermi hna caah Jehovah sinah bawmhnak hal. Nangmah le an lung na fahtermi hna kha a rianṭuan peng awk le lungdaihnak hmuh awkah aan bawmh khawh hna.

11. Profet Jonah kong in zeidah kan cawn khawh? (A hmanthlak zong zoh.)

¹¹ A hlanah na rak tuahmi palhnak in cawng law Jehovah nih tuah seh ti aan duhmi kha lungtho tein tuah. Profet Jonah kong in cawng. Jonah cu Pathian nih a fialmi ning in Nineveh khua ah kal canah hmun dang tu ah a rak kal. Jehovah nih Jonah kha a chimhhrinh i a palhnak in a cawn. (Jonah 1:1-4, 15-17; 2:7-10) Jehovah cu Jonah cung ah a lung a dong lo. Pathian nih Nineveh ah kal ding in caanṭha a pek ṭhan tikah Jonah nih Jehovah nawl kha a ngaih colh. Palhnak a rak tuahmi ruang ah aa ngaichih ko nain Jehovah nih a fialmi kha a rak tuah.—Jonah 3:1-3.

Thiang Thlarau Hmang In Jehovah Nih A Kan Hnemh

12. Thil ṭihnung kan ton tikah Jehovah nih zeitindah daihnak a kan pek? (Filipi 4:6, 7)

¹² Thil ṭihnung kan ton tikah Jehovah nih a thiang thlarau hmang in a kan hnemh. Ron le Carol kong hi ruathmanh. Ngaihchiat awk ngai a simi cu an fapa cu amah le amah aa that. Hitin an ti: “A hlanah harnak kan rak tong bal ko nain mah cu kan caah a har bikmi a si. Kan i hngilh khawh lo caan paoh ah thla kan cam caah Filipi 4:6, 7 ah a langhtermi daihnak kha kan hmuh taktak. (Rel.) Thil ṭihnung na ton ruang ah na lungre a theih tuk ahcun na intuarnak kha Jehovah sinah a dikthliar in chim. Atu le atu a sinah thla na cam khawh i na duh caan tiang na cam khawh. (Salm 86:3; 88:1) Jehovah sinah a thiang thlarau kha atu le atu hal. Na halmi kha zei rel loin zeitik hmanh ah a um lai lo.—Luka 11:9-13.

13. Jehovah kha zumhfek tein biak peng awkah thiang thlarau nih zeitindah a kan bawmh khawh? (Efesa 3:16)

¹³ Na tonmi lungretheihnak ruang ah na thazaang a der maw? Jehovah kha zumhfek tein biak peng awkah thiang thlarau nih a herhmi thazaang aan pek khawh. (Efesa 3:16 rel.) Unaunu Flora kong hi ruathmanh. A vapa he missionary rian an ṭuan lioah a vapa cu a zuanzam caah an i ṭhen. Hitin a ti: “Ka vapa cu ka cung ah zumhawktlak loin a um caah ka ngaih a chia tuk i thil dang zeihmanh ka ruat kho lo. Inkhawhnak ka ngeih nakhnga Jehovah sinah a thiang thlarau hmuh ding in thla ka cam. Jehovah nih a ka hnemh. A hmasa ah cun a si kho lomi a lo nain Pathian bawmhnak thawng in ka hun ṭhawng i ka inkhawh.” A zumhnak a feh chin nakhnga le harnak a inkhawh nakhnga Pathian nih a ka bawmh lai ti kha Flora nih a hngalh. Hitin a ti chap: “Salm 119:32 ah a chimmi cu ka caah aa tlak tuk: ‘Nangmah nih hngalhthiamnak tam chinchin in na ka pek lai caah na nawlbia cu lunglawm tein ka zulh hna lai.’”

14. Pathian thiang thlarau zeitindah kan i bawmhter khawh?

¹⁴ Jehovah sinah thiang thlarau na hal hnuah zeidah na tuah awk a si? Pathian thiang thlarau tam deuh in hmuh awkah aan bawm dingmi thil pawl kha tuah. Mah ah i pumhnak le midang sinah phungchimnak aa tel. Nifatin Baibal na relnak thawng in na lung chung ah Jehovah ruahnak kha khahter. (Fil. 4:8, 9) Baibal na rel tikah harnak a rak tongmi hna kong le Jehovah nih inkhawhnak ngeih awkah a rak bawmh hna ning kong kha ruat. A hmasa ah langhtermi Sandra nih a har tukmi buaibainak tampi a rak ton. Hitin a ti: “Josef kong nih ka lung a ka suk tuk. Harnak le a ding loin pehtlaihnak a tong ko nain Jehovah he an i pehtlaihnak a derter lo.”—Gen. 39:21-23.

Unau Pawl Hmang In Jehovah Nih A Kan Hnemh

15. Ahote sinin dah hnemhnak kan hmuh khawh? Zeitindah an kan bawmh khawh? (Hmanthlak zong zoh.)

¹⁵ Harnak kan ton caan ah unau pawl cu “bawmtu ṭhahnem ngaingai” an si. (Kol. 4:11) Kan cung ah a dawtnak langhter awkah Jehovah nih unau pawl kha a hman hna. Unau pawl nih kan chimmi bia kha lungtak tein an kan ngaihpiaknak le an kan umpinak thawng in an kan hnemh khawh. Baibal caang an kan relpiaknak le kanmah he thla an camnak thawng in thazaang an kan pek men lai.d (Rom 15:4) A caan ah unau pakhat nih Jehovah ruahnak kong a kan chimh men lai, mah nih inkhawhnak ngeih awkah a kan bawmh khawh. Harnak kan ton caan ah rawl ti bantuk an kan peknak thawng in unau pawl nih aa tlakmi bawmhnak zong an kan pek khawh.

16. Midang sinin bawmhnak hmuh kan duh ahcun zeidah kan tuah a hau men lai?

¹⁶ Midang sinin bawmhnak hmuh kan duh ahcun bawmhnak kan hal hna a hau men lai. Kan unau hna nih an kan dawt i bawmh zong an kan duh. (Ptb. 17:17) Asinain kan intuarnak le kan herhmi kha an hngal men lai lo. (Ptb. 14:10) Na lungre a theih ahcun na hawikom ṭha kha biaruah hna law na intuarnak kha chim hna. Zeinihdah aan bawmh khawh timi kha chim hna. Na komhmi Khrihfa upa pakhat asiloah pahnih sin zong ah na chim khawh. Unaunu cheukhat cu thlaraulei in nutling a simi unaunu he bia an i ruahṭinak thawng in hnemhnak an hmu.

17. Thazaang peknak hmuh awkah dawnkhantu a simi zuamcawhnak cheukhat cu zeidah a si? Mah kha zeitindah kan tei khawh?

¹⁷ Nangmah te lawng in um kha hrial. Na lungfahnak ruang ah midang he caan hmanṭi kha na duh men lai lo. A caan ah unau hna nih na intuarnak kha an hngalthiam men lai lo asiloah na lung a fahtermi bia kha an chim men lai. (Jeim 3:2) Asinain unau pawl sinin a dang tein um hlah. Nangmah thazaang pek awkah Jehovah nih a hman khawh hna. Lungdongh zawtnak a ngeimi Khrihfa upa a simi Gavin nih hitin a ti: “Ka hawile he chawnhbiak ka duh lo caan tampi a um.” Asinain Gavin nih a intuarnak kha aa teiter lo i midang he an i hawikomhnak thawng in ṭhathnemhnak a hmu. Unaunu Amy nih hitin a ti: “A hlan i ka hmuhtonnak ruang ah midang zumh kha kaa harh. Asinain Jehovah bantuk in ka unau hna kha dawt awkah kaa zuam. Mah nih Jehovah lung a lawmhter ti kha ka hngalh i mah nih keimah zong a ka lawmhter ve.”

Hmailei Kong Jehovah Biakam Nih A Kan Hnemh Khawh

18. Hmailei ah zeidah kan i ruahchan khawh? Atu ah zeidah kan tuah khawh?

¹⁸ Hmailei ah Jehovah nih pumsalei he lungthinlei he fahnak kan inmi vialte in a kan damter ṭhan lai ti kha kan zumh khawh. (Biat. 21:3, 4) Mah tik ah cun harnak kan tonmi cu “a philh in philh an si cang lai.” (Isa. 65:17) Atu hmanh ah Jehovah nih lungthinlei in kan ‘hma a kan menpiak.’ Nangmah hnemh awk le bawmh awkah dawtnak in Jehovah nih aan timhpiakmi hna kha cohlang. “An zohkhenh” ti kha zeitik hmanh ah na lunghring hlah.—1 Pet. 5:7.