“Nan Biak Ding Cu I Thim U”

1. Nuamhnak taktak hmuh awkah zeidah tuah a hau, zeicah? (Isaiah 48:17, 18)

VANCUNG kan Pa nih a kan dawt tuk caah atu ah siseh, hmailei ah siseh i nuam hna seh ti a kan duh. (Pct. 3:12, 13) Jehovah nih thil ti khawhnak a phunphun he a kan ser ko nain pakhat le pakhat i uk khawhnak le a ṭha le a ṭhalo kong ah mah tein i thim khawhnak cu a kan pe lo. (Pct. 8:9; Jer. 10:23) Nuamhnak taktak hmuh awkah amah biak le a nawl ngaih a hau ti kha Jehovah nih a hngalh.—Isaiah 48:17, 18 rel.

2. Satan nih zeidah zumhter a kan duh, mah cu a hmaan lo ti kha Jehovah nih zeitindah a langhter?

² Pakhat le pakhat kan i uk kho i Jehovah tel loin kan i nuam kho tiah Satan nih zumhter a kan duh. (Gen. 3:4, 5) Mah cu a hmaan lo ti langhter awkah Jehovah nih minung kha caan caankhat chung anmah tein i uknak nawl a awnh hna. Minung uknak nih sifah harnak lawng a chuahter ti cu a fiang ko. Asinain Baibal ah Jehovah biaknak thawng in lungsi hnangamnak a hmumi hna kong tampi a langhter. An lak i pakhat cu Jesuh Khrih a si. Hi capar ah (1) Jesuh nih Jehovah biak awkah zeicah aa thim? (2) Vancung kan Pa cu kan biaknak hmuh awkah zeicah aa tlak? (3) Jehovah biak awkah zeicah kan i thim timi kong kan i ruah lai.

Jesuh Nih Jehovah Biak Awkah Zeicah Aa Thim?

3. Satan nih Jesuh kha zeitindah a lem, Jesuh nih zeidah aa thim?

³ Vawleicung a um lioah Jesuh nih ahodah ka biak lai ti kha aa thim a hau. Tipil a in hnu tlawmpal ah Satan nih voikhat te na ka biak ahcun vawleicung pennak vialte kaan pek lai tiah a ti. Jesuh nih “Satan, va kal cang! ‘Jehovah na Pathian lawng na biak lai, amah rian lawnglawng na ṭuan lai’ tiah Cathiang ah aa ṭial” tiin a leh. (Matt. 4:8-10) Jesuh nih Jehovah biak awkah zeicah aa thim? A ruang cheukhat kha i ruah hna u sih.

4-5. Jesuh nih Jehovah biak awkah aa thimnak a ruang cheukhat cu zeidah an si?

⁴ Jesuh nih Jehovah biak awkah a bik in aa thimnak a ruang cu a Pa cung ah a fek i dongh a thiam lomi dawtnak a ngeih caah a si. (Joh. 14:31) Mah leng ah Jehovah biak cu aa tlakmi a si caah Jesuh nih cutin tuah a duh. (Joh. 8:28, 29; Biat. 4:11) Jehovah cu nunnak Hrampi, zumhawk a tlak i a siangmi Pathian a si ti kha a hngalh. (Salm 33:4; 36:9; Jeim 1:17) Jehovah nih Jesuh sinah biatak a chim zungzal i a ngeihmi thil vialte zong amah nih a pekmi an si. (Joh. 1:14) Mah he i ralkah in Satan cu thihnak a chuahtertu a si. A hak a kau i mahca ṭhatnak lawng a kawlmi lihchimtu a si. (Joh. 8:44) Mah vialte kha Jesuh nih a hngalh caah Satan bantuk in Jehovah ralchanh ding kha zeitik hmanh ah a ruat lo.—Fil. 2:5-8.

⁵ Jesuh nih cutin aa thimnak a dang a ruang pakhat cu Jehovah a biaknak nih thilṭha tampi a chuahter lai ti a hngalh caah a si. (Heb. 12:2) Zumhawktlak tein a um peng ahcun Satan nih a chuahtermi sifah harnak vialte cu hloh a si lai i a Pa Jehovah min cu thianter a si lai.

Jehovah Cu Kan Biaknak Hmuh Awkah Zeicah Aa Tlak?

6-7. Tuchan ah mi tampi nih zeicah Jehovah an biak lo, asinain kan biaknak hmuh awkah zeicah aa tlak?

⁶ Tuchan ah mi tampi cu Jehovah an bia rih lo. Zeicahtiah duh a nung tukmi a sining le an caah a tuahmi thil kong kha an hngal lo. Lamkaltu Paul nih phung a chimhmi Athen khuami cu cutin an rak si.—Lam. 17:19, 20, 30, 34.

⁷ Paul nih Athen khuami hna sinah a hmaanmi Pathian cu “mi vialte kha nunnak le thaw le zeizong vialte a petu a si” tiah a ti. Hitin a ti chap: “Pathian thawng in kan hung um, kan nung i kan cawl, kan caang.” Pathian cu ‘mi pakhat in miphun vialte Sertu’ a si caah kan biaknak hmuh awkah aa tlak.—Lam. 17:25, 26, 28.

8. Jehovah nih zeidah a tuah bal lo? Fianter.

⁸ Sertu le Cung Nung Bik a si caah Jehovah nih amah biak awkah hramhram in a kan hnek khawh. Asinain zeitik hmanh ah cutin a tuah bal lo. Mah canah anih cu a kan daw i a um taktakmi Pathian a si ti kan zumh khawh nakhnga a kan bawmh. Mi tam khawh chung tam zungzal in a hawi siter a duh hna. (1 Tim. 2:3, 4) Cucaah Jehovah nih aa tinhnak kong le mi vialte caah a tuah dingmi thilṭha kong kha midang sinah ṭha tein chim khawh awkah a kan cawnpiak. (Matt. 10:11-13; 28:19, 20) Khrihfabu in a kan dirh i dawtnak he a kan zohkhenhtu Khrihfa upa pawl zong a kan pek.—Lam. 20:28.

9. Jehovah nih a dawtnak kha zeitindah a langhter?

⁹ Jehovah nih amah a bia lomi hna cung hmanh ah dawtnak a langhter. Mah kong hi ruat hmanh: Kum thong tampi chung mi nih Jehovah nawl ngaih canah a ṭha le a ṭhalo kong he aa tlaiin anmah tein thimnak an tuah. Zeitin a si hmanh ah Jehovah nih nunnak le nuamhnak caah a herhmi kha a pek ṭhiamṭhiam hna. (Matt. 5:44, 45; Lam. 14:16, 17) Jehovah thawng in dawtu chungkhar le hawikom an ngei kho, fa an hring kho, rian an ṭuan kho i nuamhnak an hmu kho. (Salm 127:3; Pct. 2:24) Vancung kan Pa nih minung vialte a kan dawt ti cu a fiang ko. (Ex. 34:6) Atu cu Jehovah biak awkah kan i thimnak a ruang cheukhat le thluachuah a kan pek ning kong i ruah hna u sih.

Jehovah Biak Awkah Zeicah Kan I Thim?

10. (a) A bik in Jehovah kan biaknak a ruang cu zeidah a si? (Matthai 22:37) (b) Jehovah lungsaunak in zei ṭhatnak dah na hmuh? (Salm 103:13, 14)

¹⁰ Jesuh bantuk in a bik in Jehovah kan biaknak a ruang cu amah kan dawt tuk caah a si. (Matthai 22:37 rel.) A sining kong kan hngalh tikah amah he i naih chin kan duh. Tahchunhnak ah, Jehovah lungsaunak kong hi ruat hmanh. Israel mi nih a nawl an buar tikah “Lam ṭhalo nan zulhmi kha nan dihlak in kirtak cio u” tiah a forh hna. (Jer. 18:11) Jehovah nih leidip men kan si ti kha aa cinken caah kan sualnak kha atu le atu a kan ngaihthiam. (Salm 103:13, 14 rel.) A lungsaunak le a dang a sining kong na ruah tikah zungzal in biak na duh, a si ko lo maw?

11. Vancung kan Pa biak awkah kan i thimnak a ruang dang cu zeidah an si?

¹¹ Jehovah cu kan biaknak hmuh awkah aa tlak caah amah kha biak kan duh. (Matt. 4:10) Mah leng ah Amah kan biaknak nih ṭhatnak tampi a chuahter lai ti kha kan hngalh. Zumhawktlak tein kan ummi nih Jehovah min a thianter, Satan lihchimtu a si kha a langhter i vancung kan Pa lung a lawmhter. Atu in Jehovah biak awkah kan i thim ahcun kan biak khawh zungzal lai!—Joh. 17:3.

12-13. Jane le Pam kong in zeidah kan cawn khawh?

¹² Kan ngakchiat lio tein Jehovah dawt awkah kan cawn khawh. Cutin kan tuah ahcun kan upat tikah Jehovah kan dawtnak cu a fek chin lai. Jane le a nau Pama kong kha ruat hmanh. Baibal an cawnka ah Jane cu kum 11 a si i Pam cu kum 10 a si. An nu le an pa nih anmah theng Baibal cawn kha an duh lo. Asinain church i kan i pumh tikah nan kan zulh ahcun Jehovah Tehte Hna he Baibal nan cawng kho tiah Jane le Pam kha an ti hna. Jane nih hitin a ti: “Jehovah Tehte Hna sinin Baibal kong ka cawnmi nih ritnak sii hmannak le ziaza rawhralnak ti bantuk ṭhirual hneknak kha al khawh awkah a ka bawmh.”

¹³ Kum tlawmpal a rauh hnuah Jane le Pam cu thawngthanhtu an hung si. A hnuah kum upami an nu le an pa zohkhenh buin hmaikal rian an ṭuan. Jehovah nih a bawmh hna ning kong he aa tlaiin Jane nih hitin a ti: “Jehovah nih a hawile kha a zohkhenh peng hna i 2 Timote 2:19 ah a chim bantuk in, ‘amah ta a simi kha a hngalh hna.’” Jehovah nih amah a dawmi le a biami kha a zohkhenh zungzal hna ti cu a fiang ko!

14. Jehovah min kha zeitindah kan thianter khawh? (Hmanthlak zong zoh.)

¹⁴ Jehovah a min thianter kan duh. Tahchunhnak pakhat hi ruat hmanh: Zaangfahnak a ngeimi, a siangmi le ngaihthiam a hmangmi hawikom pakhat na ngei hei ti u sih. Mi pakhat nih na hawi kha zaangfahnak a ngei lo i a dingfel lo tiah sual a phawt. Mah tikah zeitindah na lehrulh lai? Amah runvennak bia na chim ko lai. Cu bantuk in Satan le a lei ah a ṭangmi hna nih Jehovah kong lihbia an karhter i a min an thangchiat tikah biatak kan chimnak thawng in a min kha kan kilven. (Salm 34:1; Isa. 43:10) Lungthin dihlak in Jehovah biak kan duh kha kan biachim le kan tuahsernak in kan langhter.

15. Lamkaltu Paul nih thlennak a tuah caah zei ṭhatnak dah a hmuh? (Filipi 3:7, 8)

¹⁵ Jehovah lunglawmhter awk le a rian tam deuh ṭuan awkah lungtho tein thlennak kan tuah. Tahchunhnak ah, lamkaltu Paul nih Jesuh hnu zulh awk le Jehovah biak awkah Judah biaknak i a biapi tukmi a dirhmun kha a kaltak. (Gal. 1:14) Cucaah a nunnak ah thluachuah tampi a hmu i vancung ah Khrih he ukṭinak tinvo sung zong a hmu. Jehovah biak ding in a rak i thim caah Paul cu aa ngaichih bal lo i kannih zong kan i ngaichih bal lai lo.—Filipi 3:7, 8 rel.

16. Julia kong in zeidah kan cawn khawh? (Hmanthlak zong zoh.)

¹⁶ Jehovah biaknak kha hmasa bik ah kan chiah ahcun atu ah siseh, hmailei ah siseh thluachuah tampi kan hmu lai. Unaunu Julia kong hi ruat hmanh. Biatak a hngalh hlanah Julia cu a ngakchiat lio tein church hlasatu phu ah aa rak i tel. Hlasak a thiam tuk caah opera hlasak ding in cawnpiak a si. A rauhhlan ah Julia cu a hun laar tuk i a min a thangmi hmun hna ah hla a sa. Music sianginn a kai lioah a kaiṭi hawi pakhat nih Pathian kong kha a chimh i Pathian min cu Jehovah a si tiah a fianter. Julia cu zarhkhat ah voihnih Baibal a cawng. A hnuah opera hlasaknak si loin Jehovah biaknak kha hmasa bik ah chiah ding in bia a khiah. Mah cu a caah a fawi lo. Hitin a ti: “Mi tampi nih Jehovah biak awkah hlasak ti loin um cu hruh a si tiah an ka ti. Asinain ka nunnak kha Jehovah rianṭuannak ah tling tein hman ka duh.” A luancia kum 30 lioah a rak tuahmi biakhiahnak he aa tlaiin Julia cu aa ngaichih maw? Hitin a ti: “Ka lung a dai i hmailei ah Jehovah nih ka saduhthah vialte a tlinter lai ti kha ka zumh.”—Salm 145:16.

Jehovah Kha Bia Zungzal!

17. A biapi tukmi caan ah kan nunmi cu Jehovah a bia cangmi le a bia rih lomi hna caah zei sullam dah a ngeih?

¹⁷ A biapi tukmi caan ah kan nung. Lamkaltu Paul nih hitin a ti: “A rauhhlan te ah a ra dingmi cu a phan cang lai, a rau ti lai lo.” (Heb. 10:37) Mah cu zei sullam dah a si? Jehovah a bia rih lomi hna nih amah biak ding in i thim awkah a caan tampi an ngei ti lo tinak a si. Cucaah a rannak in thimnak an tuah a hau. (1 Kor. 7:29) Cun Jehovah a bia cangmi hna nih zuamcawhnak kan tong ko lai nain “a rauhhlan te ah” harnak vialte a dong cang lai ti kha kan hngalh.

18. Jehovah le Jesuh nih zeidah tuahter an kan duh?

¹⁸ Jesuh nih a zultu pawl kha chikkhat lawng si loin a hnu zulh peng awkah a forh hna. (Matt. 16:24) Cucaah kum saupi chung Jehovah kan biak cang hmanh ah biak zungzal awkah bia kan khiah a hau. Kan biakhiahnak ning in tuah peng awkah fakpi in kan i zuam a hau. Mah cu a fawi men lai lo. Asinain atu hmanh ah Jehovah a biami cu lungsi hnangamnak le a dang thluachuah tampi an hmu!—Salm 35:27.

19. Gene kong in zeidah kan cawn khawh?

¹⁹ Mi cheukhat nih Jehovah kan biak ahcun mahca ṭhatnak tampi hlawt a hau lai i kan i nuam kho lai lo tiah an ruah. Mino na si ahcun Jehovah biak cu a har tuk tiah na ruat maw? Mino unaupa Gene nih hitin a ti: “Jehovah Tehte ka si caah khenkham tuk ka si tiah ka rak ruah. Ka ṭhirual pawl cu party an tuah, nungak tlangval an ngei, zaangennak aa telmi video game an i celh i aa nuam tukmi an lo. Asinain kei cu pumhnak le phungchimnak lawng ah caan ka hman.” Cu bantuk ruahnak nih Gene kha zeitindah a hnorsuan? Hitin a ti: “Nunning pahnih in ka hun nung i chikkhat cu kaa nuam ko. Asinain nuamhnak taktak ka hmu lo. Cucaah Baibal biatak kong ka hun ruah ṭhan i Jehovah kha lungthin dihlak in biak ṭhan awkah bia ka khiah. Mah hnu cun Jehovah nih ka thlacamnak vialte a ka leh dih tiah ka ruah.”

20. Zei tuah awkah dah bia kan khiah awk a si?

²⁰ Salm caṭialtu pa nih Jehovah kha hla in hitin a thangṭhat: “Na thimmi hna cu an lung aa lawm, na hmunthiang ah na umtermi hna cu mi lunglawm an si.” (Salm 65:4) “Keimah le ka innchungkhar tu nih cun BAWIPA kha kan biak ko lai” tiah a timi Joshua bantuk in bia khiak ve hna u sih.—Josh. 24:15.