Unau Pawl He Naih Tein Um Cu Kan Caah A Ṭha!

1-2. Jehovah caah zeidah a biapi, zeidah tuahter a kan duh?

KAN minunghawi kan pehtlaih hna ning cu Jehovah caah a biapi. Kanmahle kanmah kan i dawt bantuk in kan minunghawi zong kan dawt hna awk a si tiah Jesuh nih a kan cawnpiak. (Matt. 22:37-39) Mah ah Jehovah a bia lomi hna cung ah zaangfahnak langhter zong aa tel. Cutin kan tuahmi cu ‘miṭha he, miṭhalo he an cung ah ni a tlanter i miding he, midinglo he an cung ah ruah a surtertu’ Jehovah kan i zohchunhmi a si.—Matt. 5:45.

² Jehovah nih mi vialte a kan dawt ko nain a hleiin a nawl a ngaimi kha a dawt hna. (Joh. 14:21) Rak ka zohchunh hna seh ti zong a kan duh. Cucaah ‘lungtak tein i dawt’ awk le “pakhat le pakhat i tlaihchan” awkah a kan forh. (1 Pet. 4:8; Rom 12:10) Mah cu chungkharmi le kan komh tukmi kan hawile cung ah kan ngeihmi dawtnak le tlaihchannak he aa lo.

3. Dawtnak kong he aa tlaiin zeidah kan i cinken a herh?

³ Dum ah cinmi thingkung bantuk in dawtnak cu a ṭhan nakhnga ṭha tein zohkhenh a hau. Lamkaltu Paul nih Khrihfa pawl kha “unau dawtnak in i daw zungzal u” tiah ruahnak a cheuh hna. (Heb. 13:1) Jehovah nih midang kan dawtnak kha ṭhanter peng hna seh ti a kan duh. Hi capar ah unau pawl kha zeicah kan naih chin hna awk a si i zeitindah cutin kan tuah khawh zungzal timi kong kan i ruah hna lai.

Unau Pawl Kha Zeicah Kan Naih Chin Hna Awk A Si?

4. Salm 133:1 ning in unau rual kha kan sunsak peng hna nakhnga zeidah kan tuah khawh? (Hmanthlak zong zoh.)

⁴ Salm 133:1 rel. Salm caṭialtu pa bantuk in Jehovah a dawmi hna he naih tein um cu ‘a ṭha’ i ‘a nuam’ tiah kan ruah ve ko lai. Aa dawh tukmi tlang pakhat kha nifatin kan hmuh tikah aa dawh tuk in kan hmu ti men lai lo. Cu bantuk in unau pawl kha atu le atu kan hmuh hna, zarhkhat ah voi tampi hmanh kan i tong men lai. Mah tikah unau pawl he lungrual tein kan ummi hi zeitluk in dah a ṭhat ti kha kan philh khawh. Cu a si ah unau pawl kha kan sunsak peng hna nakhnga zeidah kan tuah khawh? Khrihfabu le kan caah unau pakhat cio cu zeitluk in dah an sunlawi ti kha a caan pe in kan ruah ahcun kan dawtnak a fek chin lai.

5. Unau rual kan i dawtnak cu midang cung ah zeitindah huham a ngeih?

⁵ A voikhatnak a rak i pummi cheukhat cu kan langhtermi dawtnak nih an lung a suk tuk hna i biatak kan hmuh cang ti hmanh in an hun zumh. Jesuh nih hitin a ti: “Pakhat le pakhat nan i dawt ahcun ka zultu nan si kha mi vialte nih an in hngalh hna lai.” (Joh. 13:35) Chaithra kong hi ruat hmanh. Anih cu sianghleiruun a kai liomi a si i Jehovah Tehte Hna he Baibal a cawng. Pengkomh civui sawmnak kha a cohlan. A nikhatnak ni aa pumh hnuah Baibal a cawnpiaktu kha hitin a ti. “Ka nu le ka pa nih voikhat hmanh an ka kup bal lo. Asinain mah civui ah nikhat lawng ah voi 52 an ka kuh. Jehovah nih thlaraulei a chungkhar hmang in ka cung ah dawtnak a langhter. Kei zong mah chungkhar ah i tel ka duh ve.” Chaithra cu a ṭhangcho i 2024 ah tipil a ing. Mithar pawl nih pakhat le pakhat kan i dawtmi le thilṭha kan tuahmi kha an hmuh tikah Jehovah biak an hun duh ve.—Matt. 5:16.

6. Unau pawl he naih tein umnak nih zeitindah a kan huhphenh?

⁶ Unau pawl he naih tein umnak nih a kan huhphenh. Paul nih zumtukhat pawl kha hitin a forh hna: “Nifate pakhat le pakhat thazaang i pe zungzal u. Cutin nan tuah lo ahcun sualnak i a mihlen khawhnak ruang ah nan lung a khong sual lai.” (Heb. 3:13) A hmaanmi thil tuah awkah kan i harh i kan lung a dongh ahcun unau pawl hmang in Jehovah nih kan herhmi bawmhnak a kan pek khawh. (Salm 73:2, 17, 23) Mah cu kan caah thazaang petu taktak a si.

7. Dawtnak le lungrualnak cu zeitindah aa pehtlaih? (Kolose 3:13, 14)

⁷ Pakhat le pakhat cung ah dawtnak langhter aa zuammi hna lakah kan i tel ve caah thluachuah tampi kan hmu. (1 Joh. 4:11) Tahchunhnak ah, dawtnak nih ‘pakhat le pakhat i in’ awkah a kan forh i mah nih kan lungrualnak a karhter. (Kolose 3:13, 14 rel; Efe. 4:2-6) Cucaah vawleicung i zei bantuk phu hmanh ah kan hmuh lomi nuamhnak le daihnak kha pumhnak ah kan hmu.

Pakhat le Pakhat I Hmaizah U

8. Unau pawl he lungrual tein um awkah Jehovah nih zeitindah a kan bawmh?

⁸ Vawleicung pumpi kan lungrualnak cu khuaruahhar awk taktak a si. Mitlinglo kan si ko nain Jehovah nih kan lung a rualter. (1 Kor. 12:24, 25) Baibal ah “pakhat le pakhat i dawt awkah Pathian nih . . . aan cawnpiak cang hna” tiah a ti. (1 Thes. 4:9) Phundang in cun pakhat le pakhat naih tein kan um khawh nakhnga tuah a herhmi kha Jehovah nih Baibal ah fiang tein a langhter. Mah kha ṭha tein kan hlathlai i kan zulh ahcun ‘Pathian nih a cawnpiakmi’ kan si lai. (Heb. 4:12; Jeim 1:25) Jehovah Tehte Hna cu cutin tuah awkah fakpi in kan i zuam.

9. Rom 12:9-13 ah a langhtermi pakhat le pakhat i hmaizahnak kong in zeidah kan cawn khawh?

⁹ Pakhat le pakhat i naih chin awkah Baibal nih zeitindah a kan bawmh? Mah kong he aa tlaiin Rom 12:9-13 ah Paul nih a chimmi bia hi ruat hmanh. (Rel.) “Pakhat le pakhat i hmaizahnak kha nanmahlei in thawk u” timi bia kha a hleiin i cinken. Mah cu zei sullam dah a si? Ngaihthiamnak, khual dawtnak, siannak ti bantuk thilṭha tuahnak thawng in midang cung ah “tlaihchannak” langhter awkah caanṭha kan kawl awk a si. (Efe. 4:32) Unau pawl nih an in naih lai kha hngah a hau lo. ‘Nangmahlei in thawk’ hmasa. “Hmuhlei nakin peklei ah lunglawmhnak a um deuh” tiah Jesuh nih a ti.—Lam. 20:35.

10. “Pakhat le pakhat i hmaizahnak” ah zeitindah a teimami kan si khawh? (Hmanthlak zong zoh.)

¹⁰ Paul nih i hmaizahnak kha nanmahlei in thawk u tiah a chimle cangka in “teimami si u, nan thathu hlah u” tiah a kan forhmi cu hngalh duh awk ngai a si. A teimami pakhat cu a lung a thomi le rian aa zuammi a si. Rian pek a si tikah ṭha tein a ṭuan. Phungthlukbia 3:27, 28 ah hitin a ti: “Nangmah kut chung ah ṭhatnak tuah khawhnak kha a um tikah a hmu hnga ding a simi sinin ṭhatnak kha va kham hlah.” Cucaah mi pakhat nih bawmhnak a herh tikah kan si khawh chung in bawmh kan i zuam. Amah bawmh awkah kan hngak lo i midang nih an bawmh te ko lai ti zong in kan ruat lo.—1 Joh. 3:17, 18.

11. Pakhat le pakhat i naih chin awkah zeinihdah a kan bawmh khawh?

¹¹ Hmaizahnak kan langhter khawh ning a dang lamkhat cu kan thin a kan hunter tikah khulrang in kan ngaihthiam hnanak thawng in a si. Efesa 4:26 nih “Nan thin a hun buin ni tlakter hlah u” tiah a ti. Zeicah? Ni kan tlakter ahcun “Satan kha caanṭha” kan pekmi a si lai tiah caang 27 ah a ti. Pakhat le pakhat i ngaihthiam awkah Baibal ah Jehovah nih atu le atu a kan forh. Kolose 3:13 ah “Pakhat le pakhat . . . lungtak tein i ngaithiam peng u” tiah tha a kan pek. Midang an palhnak kan ngaihthiam hna tikah anmah he kan i naih chinchin. Cutin kan tuahmi cu ‘thiang thlarau thawng in kan hmuhmi lungrualnak kan kilvenmi’ a si. (Efe. 4:3) A tawinak in cun ngaihthiamnak nih kan lakah lungrualnak le daihnak a umter.

12. Jehovah nih pakhat le pakhat i ngaihthiam awkah zeitindah a kan bawmh?

¹² Kan lung a kan fahtertu kha ngaihthiam kan i harh khawh men. Asinain thiang thlarau bawmhnak thawng in kan ngaihthiam khawh. Baibal nih “pakhat le pakhat i tlaihchan u” law “teimami si u” tiah a kan forh hnuah “thiang thlarau forhfialnak in nan lungtho u” ti zong in tha a kan pek. (Rom 12:11) Pathian thiang thlarau nih pakhat le pakhat i tlaihchan awk le i ngaihthiam awkah a kan bawmh lai. Cucaah lungtak tein Jehovah sinah bawmhnak kan hal awk a si.—Luka 11:13.

“Nan Lakah Ṭhencheunak Umter Hlah U”

13. Kan lakah zeinihdah ṭhencheunak a chuahter khawh?

¹³ Khrihfabu cu hnulei sining aa lo lomi “mi phun vialte” in dirhmi a si. (1 Tim. 2:3, 4) Cucaah i hrukaih ning, i ṭamh ning, siithlop ning le nuamhsaihnak ti bantuk kong ah kan biakhiahnak cu aa lo cio lai lo. Kan i ralring lo ahcun mah nih ṭhencheunak a chuahter khawh. (Rom 14:4; 1 Kor. 1:10) Pathian nih pakhat le pakhat i dawt ding in a kan cawnpiak. Cucaah midang kha kanmah bantuk in biakhiahnak tuah awkah kan hnek hna awk a si lo.—Fil. 2:3.

14. Zeidah tuah kan i zuam awk a si, zeicah?

¹⁴ Pakhat le pakhat hrimhnak le thazaang kan i peknak thawng in ṭhencheunak a chuahtertu thil kha kan hrial khawh. (1 Thes. 5:11) Nai ah Khrihfabu chung in chuah a simi le a cawlcang ti lomi tampi cu Jehovah sinah an rak kir ṭhan. Lunglawm tein kan conglawmh hna! (2 Kor. 2:8) Kum hra chung a cawlcang ti lomi unaunu pakhat a rak i pumh ṭhan tikah zeidah a cang ti kha ruat hmanh. Mah unaunu nih “Unau dihlak nih hmaipanh tein ka kut an ka tlaih” tiah a ti. (Lam. 3:19) Unau pawl nih an langhtermi zaangfahnak cu a cung ah zeitindah huham a ngeih? Hitin a ti: “Jehovah nih nuamhnak a ka hmuhter ṭhanmi a si tiah ka ruah.” Mikip kha thazaang kan pek hna ahcun “a re a theimi le a thil a ritmi vialte” hrimhnak petu in Jesuh nih a kan hman khawh.—Matt. 11:28, 29.

15. Lungrualnak kan karhter khawh ning a dang lam pakhat cu zeidah a si? (Hmanthlak zong zoh.)

¹⁵ Lungrualnak kan karhter khawh ning a dang lam pakhat cu kan biachimnak in a si. Job 12:11 ah “Dang nih rawl cu a teh bantuk in hna nih bia cu a hneksak ve hna lo maw?” tiah a ti. Rawl chuan a thiammi pakhat nih a chuanmi kha midang a dangh hna hlanah a teh hmasa bantuk in bia kan chim hlanah zeidah kan chim lai ti kha ṭha tein kan ruah hmasa a hau. (Salm 141:3) A ngaitu caah thazaang, hrimhnak le “ṭhatnak a pemi” bia kha chim kan duh.—Efe. 4:29.

16. Ahote nih dah a hleiin thazaang a pemi bia kha an chim awk a si?

¹⁶ Vale le nulepa nih bia an chim tikah thazaang petu a si nakhnga a hleiin an i ralrin a hau. (Kol. 3:19, 21; Titas 2:4) Khrihfa upa pawl zong nih Jehovah tuu pawl kha hrimhnak le hnemhnak an pek hna awk a si. (Isa. 32:1, 2; Gal. 6:1) Baibal nih “a caan he a hmaanmi bia fangkhat cu zeitluk in dah a ṭhat” tiah a ti.—Ptb. 15:23.

“Tuahsernak Le Biatak” In I Daw U

17. Unau pawl lungtak tein kan dawt hna kha zeitindah kan langhter khawh?

¹⁷ Lamkaltu Johan nih “bia le kaa lawng si loin tuahsernak le biatak tu in” i dawt awkah a kan forh. (1 Joh. 3:18) Unau pawl kha lungtak tein kan dawt hna awk a si. Zeitindah cutin kan tuah khawh? Unau pawl he caan tam deuh kan hmanṭi ahcun pakhat le pakhat kan i naih deuh lai i kan i dawtnak zong a fek deuh lai. Cucaah pumhnak le phungchimnak ah midang he caan hmanṭi ding in caanṭha kawl. Midang va len awkah a caan pe. Cutin kan tuah tikah Pathian nih “pakhat le pakhat i dawt awkah” a kan cawnpiakmi ning in kan zulhmi a si. (1 Thes. 4:9) Cun “Unau rual i rem tein khuasakṭi hi zeitluk in dah a ṭhat i a nuamh!” ti kha kanmah theng nih kan hmuh lai.—Salm 133:1.