A Hrampi Baibal Cawnpiaknak In Cawng Zungzal

1. Biatak na cawnka ah Baibal cawnpiaknak nih zeitindah aan rak bawmh?

A HRAMPI Baibal cawnpiaknak hna nih kan nunnak kha a thlen. Tahchunhnak ah, Pathian min cu Jehovah a si timi kong kan hngalh tikah a hawi kan hung si. (Isa. 42:8) Mithi kong biatak kan hngalh tikah a thi cangmi kan dawtmi hna nih harnak an ing hnga maw timi thinphannak le mithi ṭihnak kan ngei ti lo. (Pct. 9:10) Pathian kamhmi vawlei paradis kong kan hngalh tikah hmailei kong ah kan lungre a thei ti lo. Kum 70, 80 lawng si loin zungzal in kan nung kho cang lai ti zong kan zumh.—Salm 37:29; 90:10.

2. Kuathnihnak Peter 1:12, 13 ning in Khrihfa nutling patling hmanh nih a hrampi Baibal cawnpiaknak in zeitindah ṭhatnak an hmuh?

² A hrampi Baibal cawnpiaknak hna cu a biapi tuk ti kha zeitik hmanh ah kan philh awk a si lo. Lamkaltu Peter nih a pahnihnak cakuat cu ‘biatak ah fek tein a ummi’ Khrihfa hna sinah a ṭialmi a si. (2 Peter 1:12, 13 rel.) Mah lio caan ah a hmaan lomi cawnpiaktu le Pathian zei a rel lomi miṭhalo pawl cu Khrihfabu chung ah an um. (2 Pet. 2:1-3) Peter nih cu bantuk miṭhalo pawl hrial awkah unau pawl kha thapek a duh hna. Cucaah an hngalh cangmi a hrampi Baibal cawnpiaknak kong kha a hngalhter ṭhan hna. Mah nih zumhfek tein um awkah a bawmh khawh hna.

3. Khrihfa dihlak nih a hrampi Baibal cawnpiaknak kong kha zeicah ṭha tein kan ruah peng awk a si? Tahchunhnak pe.

³ Khrihfa nutling patling kan si cang hmanh ah a hrampi Baibal cawnpiaknak in ṭhatnak kan hmuh khawh rih. Tahchunhnak ah, rawlchuan a thiammi pakhat le a cawngkami pakhat nih meh an chuan hei ti u sih. An hmanmi thilri cu aa lo ko men lai nain rawlchuan a thiammi nih cun a thaw tukmi meh kha a phunphun in a chuan khawh. Cu bantuk in caan saupi Jehovah a bia cangmi cu Baibal a cawngkami nakin Baibal caang pakhat kha lam a phunphun in a hman khawh. Zeicah? Tipil kan in hnuah kan sining le Jehovah rian ah kan hmuhmi tinvo sung cu aa thleng kho. A hlan i kan hngalh cangmi cawnpiaknak kong kha kan ruah ṭhan tikah atu zong ah lam thar in zulh khawh a si ti kha kan hun hngalh. Atu Khrihfa nutling patling hna nih a hrampi Baibal cawnpiaknak in zeidah an cawn khawh ti kha i ruah hna u sih.

Jehovah Cu Sertu A Si

4. Jehovah cu Sertu a si timi biatak hngalhnak cu zeitindah kan cung ah huham a ngeih?

⁴ “Zeizong vialte a satu cu Pathian a si.” (Heb. 3:4) Vawlei le thilnung vialte cu fimnak le ṭhawnnak in a khatmi Pathian sermi a si. Jehovah cu Sertu a si caah kan kong kha a dikthliar in a hngalh. Mah leng ah kan zawn a kan ruah i kan caah a ṭha bikmi kha a hngalh. Jehovah cu Sertu a si timi biatak hngalhnak nih kan nunnak a thlen khawh i sullam a ngeihter khawh.

5. Zeinihdah toidornak a kan ngeihter khawh? (Isaiah 45:9-12)

⁵ Jehovah cu Sertu a si timi biatak hngalhnak nih toidornak a kan ngeihter khawh. Job nih amahle amah cung ah siseh, midang cung ah siseh lungthin a pek tuk caah Jehovah nih Lianngan Bik Sertu a si kha a hngalhter ṭhan. (Job 38:1-4) Mah nih Job kha Pathian thil ti ning cu minung thil ti ning nakin a sang deuh ti kha a hngalhter ṭhan. A hnuah profet Isaiah nih hitin a ṭial: “Um nih khan a sertu kha a ser na ka thiam lo tiah a zai hnawh bal maw?”—Isaiah 45:9-12 rel.

6. Sertu Jehovah fimnak le ṭhawnnak kong ruah cu zeitik ah dah a hleiin a biapit? (Hmanthlak zong zoh.)

⁶ Kum tampi Jehovah a bia cangmi pakhat nih lamhruainak caah Jehovah le Baibal si loin amah ruahnak tu kha aa hun i bochan khawh. (Job 37:23, 24) Asinain Sertu i tahchunh khawh a si lomi a fimnak le a ṭhawnnak kong ruahnak in zei ṭhatnak dah a hmuh khawh? (Isa. 40:22; 55:8, 9) Toidornak a ngeihter lai i amah ruahnak nakin Jehovah ruahnak cu a biapi deuh ti kha a hngalhter lai.

7. Bupi thlennak cohlan awkah Rahela nih zeidah a tuah?

⁷ Slovenia ram ah a ummi Rahela cu bupi nih thlennak an tuahmi pakhat kha cohlan awkah aa harh. Asinain Sertu Jehovah kong ruahnak nih a bawmh. Hitin a ti: “A caan ah hruaitu unaupa hna nih biakhiahnak an tuahmi kha cohlan kaa harh. Tahchunhnak ah, 2023 Uktu Bu Thawngpang #8 ka zoh hnu hmanh ah a voikhatnak khahmul aa zuahmi unaupa pakhat nih phung a chimmi kha ka hmuh tikah ka lau tuk. Cucaah mah thlennak kha i ziak awkah ka bawm tiah Jehovah sinah thla ka cam.” Jehovah cu Sertu a si caah a bupi kha a ṭha bikmi lam in a hruai zungzal ti kha Rahela nih a hun hngalhthiam. Nang zong hngalthiamnak thar asiloah bupi nih an tuahmi thlennak pakhatkhat cohlan naa harh ahcun Sertu Jehovah fimnak le ṭhawnnak kong kha a caan pe in ruat.—Rom 11:33-36.

Zeicah Pathian Nih Sifah Harnak Umnak Nawl A Awnh?

8. Pathian nih sifah harnak umnak nawl a awnhnak a ruang kan hngalhmi nih zeitindah a kan ṭhathnemh?

⁸ Zeicah Pathian nih sifah harnak kha umnak nawl a awnh? Mah biahalnak a phi a hngal lomi hna cu Pathian cung ah an thin a hung asiloah Pathian a um lo ti hmanh in an ti! (Ptb. 19:3) Asinain sifah harnak cu Jehovah ruang ah si loin kan comi sualnak le tlinlonak ruang ah a chuakmi a si ti kha na hngalh. Jehovah nih lungsaunak a langhter caah mi nuai tampi nih a kong le zeitindah sifah harnak a donghter lai timi kong cawnnak caanṭha an hmuhmi a si ti zong na hngalh. (2 Pet. 3:9, 15) Cu bantuk biatak kong na hngalhmi nih thazaang aan pek i Jehovah he aan naihter chin.

9. Jehovah nih sifah harnak umnak nawl a awnhnak a ruang kha zeitik ah dah kan ruah awk a si?

⁹ Jehovah nih sifah harnak a donghter lai caan kan hngah lioah lungsaunak ngeih a herh ti kha kan hngalh. Asinain kanmah le kan dawtmi hna nih ngaihchiatnak, dinlonak le sunghralhnak kan ton tikah zeicah Jehovah nih a tawnghtham colh lo tiah kan ruah men lai. (Hab. 1:2, 3) Cu bantuk caan ah zeicah Jehovah nih miding mi kha harnak in ding in nawl a awnh hna timi kong kan ruah a hau.a (Salm 34:19) Sifah harnak kha zungzal ca in ka donghter lai timi Jehovah biakam kong zong kan ruah khawh.

10. A nu nih a thihtak tikah Anne kha zeinihdah inkhawhnak a ngeihter?

¹⁰ Sifah harnak kong biatak nih inkhawhnak a kan ngeihter. India Rili i Mayotte tikulh ah a ummi Anne nih hitin a ti: “A luancia kum tlawmpal lioah ka nu nih a ka thihtak i ka ngaih a chia tuk. Asinain ka tonmi kong ah Jehovah mawhchiat khawh a si lo ti kha philh lo awkah kaa zuam. Harnak vialte a hloh lai caan le kan dawtmi a thi cangmi pawl a thawhter hna lai caan kha Jehovah nih aa ngaih tuk. Cu bantuk biatak kong ka ruah ṭhan tikah khuaruahhar lam in lungdaihnak ka hmu.”

11. Jehovah nih sifah harnak umnak nawl a awnhnak a ruang cheukhat cu zeidah a si, mah nih phungchim peng awkah zeitindah a kan forh?

¹¹ Pathian nih sifah harnak umnak nawl a awnhnak a ruang kan hngalhmi nih phungchim peng awkah a kan forh. Jehovah nih donghnak a ratter rih lomi cu mi vialte kha i ngaihchih hna seh law khamhnak hmu hna seh ti a duh caah a si tiah a fianter. Cun Peter nih kanmahlei in kan tuah awk a simi kong zong a kan chimh. Hitin a ti: “Zei bantuk mi dah kan si awk a si ti kha ruat u. A thiangmi tuahsernak kha tuah u law Pathian lei ah i pechan u.” (2 Pet. 3:11) Pathian lei i pekchanhnak ah phung kan chimmi zong aa tel. Vancung kan Pa bantuk in mi vialte cung ah dawtnak kan ngei i Pathian dinnak a umnak hmun vawlei thar ah nung hna seh ti kan duh. Jehovah nih amah biak ding in caanṭha an hmuh nakhnga lungsau tein a hngah hna. Pathian rianṭuanṭi hawi sinak le donghnak a rat hlanah mi tam khawh chung tam kha Jehovah kong hngalhternak tinvo sung na hmu!—1 Kor. 3:9.

“Ni Hmanung Bik Caan” Ah Kan Nung

12. “Ni hmanung bik caan” ah kan nung ti hngalhnak nih zeitindah a kan ṭhathnemh?

¹² Baibal nih “ni hmanung bik caan” ah mi pawl an ziaza cu zeidah a lawh lai ti kha hmaan tein a langhter. (2 Tim. 3:1-5) Kan pawngkam ah a ummi pawl an thil ti ning le an biachim ning kan zoh tikah Baibal chimchungbia cu a tling taktak ti kha kan hngalh. Mi pawl an ziaza a ṭhat lo chinmi kan hmuh tikah Baibal cu a hmaanmi Pathian bia a si ti kha kan zumh chin.—2 Tim. 3:13-15.

13. Luka 12:15-21 i Jesuh bianabia ning in kanmah le kanmah zeitindah kan i hal khawh?

¹³ Luka 12:15-21 rel. Ni hmanung bik caan ah kan nung timi hngalhnak nih a biapi bikmi thil cung ah lungthin pek awkah a kan bawmh. Cutin tuah cu zeicah a biapit ti kha Jesuh bianabia in kan cawn khawh. Mirum pa cu “khuaruahnak a ngei lomi pa” tiah zeicah auh a si? A rum caah si loin biapi bik ah a chiahmi thil a palh caah a si. A caah ‘thilri aa khon nain Pathian hmaiah cun a si a fak.’ Mah cu zeicah ṭih a nun? Pathian nih mah pa kha hitin a ti: “Tuzan hrimhrim ah na nunnak cu lakpiak na si lai.” Donghnak caan a naih chin cang caah hitin kan i hal kho: ‘Ka hmuitinh nih biapi bik ah ka chiahmi he aa tlaiin zeidah a langhter? Ka fale tah zei bantuk hmuitinh dah chiahter ka duh hna? Ka caan, ka thazaang le ka tangka kha Pathian lung a lawmhtermi thil tuahnak caah maw ka hman, ka duhmi thil tuahnak caah dah?’

14. Ni hmanung bik caan ah kan nung timi kong ruah cu a biapi ti kha Miki hmuhtonnak nih zeitindah a langhter?

¹⁴ Ni hmanung bik ah kan nung ti a langhtermi thil kong kan ruah tikah biapi bik ah kan chiahmi thil cu aa thleng kho. Unaunu Miki kong hi ruat hmanh. Hitin a ti: “Sianginn ka dih tikah saram kong hlathlainak he aa pehtlaimi rian ṭuan ka duh. Asinain hmaanhmaan hmaikal ṭuan ka duh i a herh deuhnak hmun zong ah i ṭhial ka duh. Nutling patling a simi ka hawile nih ka duhmi vawlei rian ṭuan buin thlaraulei ka hmuitinh ka phan kho lai maw ti kha ṭha tein ruah awkah an ka forh. Hi chan ṭhalo donghnak cu a nai chin cang ti kha an ka hngalhter ṭhan. Vawlei thar ah cun a zungzal in saram kong na hlathlai khawh lai ti zong in an ka ti. Cucaah pawcawmnak caah aa tlakmi thiamnak cawn awkah chikkhat chung tinṭan ka kai. Mah nih hmaanhmaan hmaikal ṭuan awk le a hnuah a herh deuhnak hmun, Ecuador lei ah i ṭhial khawh awkah a ka bawmh.” Atu Miki cu a vapa he Ecuador ram ah peng zohkhenhtu rian an ṭuan.

15. Thawngṭha a cohlang rih lomi hna cung ah kan lung a dongh awk a si lo ti kha Jeim kong nih zeitindah a langhter? (Hmanthlak zong zoh.)

¹⁵ Mi nih thawngṭha an cohlan colh lo tikah kan lung a dongh awk a si lo. Zeicahtiah an lungput aa thleng kho. Jesuh a nau Jeim kong hi ruat hmanh. Jesuh a ṭhan ning, Messiah a hung simi le midang he i lo loin a cawnpiakmi hna kha a hmuh. Asinain kum tampi chung Jesuh zultu a si lo. Jesuh a thawhṭhan hnu lawng ah Jeim cu a lung a tho tukmi zultu a hung si!b (Joh. 7:5; Gal. 2:9) Cucaah Pennak kong thawngṭha a cohlang rih lomi hna le hngalh duhnak a langhter rih lomi na rualchan pawl cung ah na lung dong hlah. Ni hmanung bik caan ah kan nun cang caah phungchim rian cu a hlan nakin a biapi chin ti kha i cinken. Nihin i phung na chimmi nih harnak nganpi aa thawk hnu hmanh ah ṭhatnak a chuahter khawh.c

A Hrampi Baibal Biatak Cung Ah I Lawm Peng

16. A hrampi Baibal biatak in zeitindah ṭhathnemhnak na hmuh? (“Midang Bawmh Awkah Baibal Biatak Hmang” timi rinli kulh zong zoh.)

¹⁶ Kan hmuhmi thlarau rawl cheukhat cu a hrampi Baibal biatak a hngal rih lomi hna caah a si. Tahchunhnak ah, zarh fatin zapi ca phungchimnak, jw.org i capar le video cheukhat, zapi ca mekazin cu Jehovah Tehte a si lomi hna caah timhtuah an si. Zeitin a si hmanh ah kannih zong mah timhtuahnak hna in ṭhatnak kan hmu kho ve. Jehovah kan dawtnak le Baibal kan zumhnak a fehter leng ah a hrampi biatak kong hmualngei tein midang sin chim khawh awk zong ah a kan bawmh.—Salm 19:7.

17. Zeitik ah dah a hrampi Baibal cawnpiaknak kong ruah cu a ṭhat?

¹⁷ Kum tampi chung Jehovah a bia cangmi kan si hmanh ah Baibal hngalhthiamnak thar kan theih tikah kan lung a cawlcang tuk. Asinain kan hngalh cangmi a hrampi Baibal cawnpiaknak caah kan i lawm ṭhiamṭhiam. Bupi lamhruainak cung i kan lung a tlin lo tikah bupi lam a hruaitu cu fimnak le ṭhawnnak in a khatmi Sertu a si kha kan i cinken a hau. Kanmah asiloah kan dawtmi pakhatkhat nih harnak a ton tikah lungsaunak kan ngeih a hau i Jehovah nih sifah harnak umnak nawl a awnhnak a ruang kha kan ruah a hau. A caan le thazaang zeitindah ka hman lai timi bia kan khiah tikah ni hmanung bik caan ah kan nung cang ti kha kan philh awk a si lo. Jehovah nih a kan hngalhter ṭhanmi a hrampi Baibal biatak nih a fimmi si awk le zumhawktlak tein um awkah rak kan forh ko seh.