Jehovah Nih Aan Dawt Ti Kha Zum

1. Jehovah sinah zeicah naa pumpek? (Hmanthlak zong zoh.)

JEHOVAH sin naa pumpek lio kha ruat ṭhan hmanh. Amah kha na hun hngalh i na dawt caah cutin na rak tuah. ‘Na duhnak kha pakhatnak ah ka chiah lai i ka nunnak dihlak, ka lungthin dihlak, ka ruahnak dihlak le ka thazaang dihlak in kaan dawt lai’ tiah bia na rak i kam. (Mar. 12:30) Mah caan thawk in amah na dawtnak cu a fek chin lengmang. Cu a si ah mi pakhat nih “Jehovah kha na daw taktak maw” tiah aan hal ahcun zeitindah na leh lai? “Aho nakhmanh in, zei dang nakhmanh in Jehovah kha ka dawt deuh” tiah i cungcang lo tein na leh ko lai.

2-3. Jehovah nih zeidah zumhter a kan duh, hi capar ah zei kong dah kan i ruah hna lai? (Jeremiah 31:3)

² “Jehovah nih aan dawt ti kha na zum maw” tiah an in hal ah tah zeitin? Jehovah dawtnak hmuh awkah kaa tlak lo tiah na ruah caah mah biahalnak kha leh awkah naa cungcang kho men. A ngakchiat lioah harnak a phunphun a tongmi unaunu pakhat nih hitin a ti: “Jehovah kha ka dawt tuk. Mah kong ah lunghrinnak zeihmanh ka ngei lo. Asinain Jehovah nih a ka daw maw timi cung tu ah cun lunghrinnak ka ngei.” Cu a si ah Jehovah nih zeitindah aan hmuh?

³ Jehovah nih aan dawt kha zum seh ti aan duh. (Jeremiah 31:3, NWT rel.)a A tak ti ahcun Jehovah nih a sinah aan hnuh. A sinah naa pumpe i tipil na in tikah a sunglawi tukmi laksawng na hmu. Mah cu Jehovah i a fekmi dawtnak a si. Cu bantuk dawtnak cu zungzal in a hmun. Cucaah Jehovah nih nangmah i telin zumhfekmi vialte kha ‘amah ta’ in aan hmuh hna. (Mal. 3:17) Lamkaltu Paul bantuk in Jehovah nih a dawtnak cung ah zumhnak ngei seh ti aan duh. Paul nih hitin a ti: “Thihnak siseh, nunnak siseh, vancungmi siseh, nawlngeihnak siseh, atu thil siseh, a ra laimi thil siseh, ṭhawnnak siseh, a sang siseh, a niam siseh, sermi thil siseh, zeihmanh nih . . . Pathian dawtnak he cun a kan ṭhen kho lai lo ti kha ka zumh.” (Rom 8:38, 39) Hi capar ah Jehovah nih a kan dawt ti kan zumhnak kha zeicah kan fehter awk a si i cutin tuah awkah zeinihdah a kan bawmh timi kong kan i ruah lai.

Jehovah Nih A Kan Dawt Ti Zumh Cu Zeicah A Biapit?

4. Satan hlenthawinak kha zeitindah kan doh khawh?

⁴ Jehovah nih a kan dawt ti kan zumh ahcun Satan “hlenthawinak” kha kan doh khawh lai. (Efe. 6:11) Jehovah kan biak ti nakhnga lo Satan cu lam a phunphun in aa zuam. Lamkhat cu Jehovah nih a kan daw lo timi lihbia a karhternak thawng in a si. Satan cu minung hlen awkah caanṭha a kawl zungzal ti kha zeitik hmanh ah philh hlah. A hleiin kan tha a der caan ah a kan doh tawn. Hlanlio i kan tonmi thil, atu i kan tonmi zuamcawhnak, hmailei kong lungretheihnak ti bantuk ruang ah kan lung a dongh caan ah a si kho men. (Ptb. 24:10) Satan cu hupphengtu a ngei lomi saram pawl seh awkah a vakmi chiandeih bantuk a si. Cucaah kan tha a der lio kha caanṭha i lak in kan lung donghter awkah fakpi in aa zuam. Asinain Jehovah nih a kan dawt ti kan zumhnak kan fehter peng ahcun Satan le a hlenthawinak hna kha kan doh khawh lai.—1 Pet. 5:8, 9; Jeim 4:7.

5. Jehovah nih a kan dawt i a kan sunsak ti zumh cu zeicah a biapit?

⁵ Jehovah nih a kan dawt ti kha kan zumh ahcun amah he kan i naih chin lai. Zeicah cutin kan chim khawh? Jehovah nih midang cung ah dawtnak langhter awk le dawtmi ka si ti hngalh awkah a kan ser. Cucaah mi pakhat nih kan cung ah dawtnak a langhter tikah amah kha kan hun dawt ve. Cu bantuk in Jehovah nih a kan dawt i a kan sunsak ti kan hngalh deuhdeuh ahcun amah kha kan dawt deuhdeuh ve lai. (1 Joh. 4:19) Amah kan dawtnak kan fehter tikah a kan dawtnak zong a fek chin. Baibal nih hitin a ti: “Pathian kha naih u law aan naih ve hna lai.” (Jeim 4:8) Asinain Jehovah nih a kan dawt ti kan zumhnak kha zeitindah kan fehter khawh?

Jehovah Nih A Kan Dawt Ti Zumh Awkah Zeinihdah A Kan Bawmh?

6. Jehovah nih a ka dawt ti hngalhthiam awkah zeitindah thla na cam khawh?

⁶ Jehovah dawtnak na hngalhthiam khawh nakhnga thlacam peng. (Luka 18:1; Rom 12:12) Nikhat ah voi tampi Jehovah sinah bawmhnak na hal khawh. Ka sual timi lungput na ngeih ahcun Jehovah nih a ka dawt ti cohlan awkah naa harh men lai. Asinain Jehovah cu na lungthin nakin a ngan deuh ti kha i cinken. (1 Joh. 3:19, 20) Nangmahle nangmah naa hngalhmi nakin aan hngalh deuh i naa hmuh khawh lomi na sining ṭha zong a hmuh. (1 Sam. 16:7; 2 Chan. 6:30) Cucaah na intuarnak vialte kha a sinah ‘phuan’ in bawmhnak hal awkah i cungcang hlah. (Salm 62:8) Thla na cam dih hnuah a tanglei i ruahnak cheuhnak hna zulh cu a biapi tukmi a si.

7-8. Jehovah nih a kan dawt ti kha Salm Baibal nih zeitindah a kan zumhter?

⁷ Jehovah chimmi kha zum. Jehovah nih Baibal ṭialtu hna kha a hmaan ning tein a kong a ṭialter hna. Salm caṭialtu David nih Jehovah kong kha hitin a langhter: “Lung a dongmi kha BAWIPA nih a umpi hna i ruahchannak a ngei lomi kha a khamh hna.” (Salm 34:18) Na lung a dongh tikah keimah lawng ka si timi ruahnak na ngei men lai. Asinain Jehovah nih cu bantuk caan ah amah na herh tuk ti kha a hngalh caah kaan umpi lai tiah bia aan kamh. Salm chung i hmun dang zong ah David nih hitin a ti: “Ka mitthli cu na thawl chung ah na rawn hna.” (Salm 56:8) Jehovah nih harnak na tonmi kha a hmuh i na cung ah zawnruahnak a ngei. Cucaah thetse ram ah khual a tlawngmi pakhat i a thawl chung ah a ummi ti bantuk in Jehovah nih na mitthli kha a sunsak i a khon. Salm 139:3 ah hitin a ti: “Ka tuahmi vialte kha [Jehovah,] na hngalh dih.” Jehovah nih kan tuahmi thil vialte kha a hmuh dih. Asinain kan ṭhatnak cung lawng ah lungthin a pek. (Heb. 6:10) Zeicah? A lunglawmhter awkah kan i zuamnak kha a sunsak tuk caah a si.b

⁸ Hnemhnak a pemi cu bantuk Baibal caang hna hmang in Jehovah nih hitin a kan timi bantuk a si: “Zeitluk in dah kaan dawt i kaan sunsak ti kha hngalhter kaan duh.” A cunglei ah a langhter bantuk in Jehovah nih a kan daw lo timi lihbia kha Satan nih a karhter. A caan ah Jehovah dawtnak cung ah lunghrinnak na ngeih ahcun hitin i hal: ‘Ahodah ka zumh lai? “Lih vialte pa” maw asiloah “zumhawktlakmi Pathian” dah?’—Joh. 8:44; Salm 31:5.

9. Jehovah nih amah a dawmi hna kha zeitindah bia a kamh hna? (Exodus 20:5, 6)

⁹ Jehovah nih kan dawtnak a lehrulh ning kong kha ruat. Moses le Israel mi pawl sinah Jehovah chimmi bia hi zoh hmanh. (Exodus 20:5, 6 rel.) Jehovah nih amah a dawmi hna cung ah a fekmi dawtnak ka langhter zungzal lai tiah bia aa kam. Pathian cu zumhawktlakmi a si caah amah a daw i a biami hna cung ah dawtnak langhter loin zeitik hmanh ah a um lai lo ti kha kan zumh khawh. (Neh. 1:5) A caan ah Jehovah nih a ka dawt ti zumh awkah naa harh ahcun hitin i hal: ‘Jehovah kha ka daw maw?’ Cun mah kong hi ruat: Jehovah kha na dawt i a lunglawmhter awkah na si khawh chung in naa zuam ahcun Jehovah nih aan dawt ti kha na zumh khawh. (Dan. 9:4; 1 Kor. 8:3) Phundang in cun Jehovah na dawt taktak ahcun a ka dawt ve timi cung ah lunghrinnak na ngeih a hau lo. Jehovah nih aan dawt zungzal lai i zeitik hmanh ah aan kaltak lai lo ti kha fek tein zum.

10-11. Jehovah nih tlanhnak man kha zeitindah hmuhter a kan duh? (Galati 2:20)

¹⁰ Tlanhnak man kong kha ṭha tein ruat. Jesuh tlanhnak man cu mi vialte caah Jehovah pekmi, a ngan bikmi laksawng a si. (Joh. 3:16) Asinain mah cu pumpak in aan pekmi laksawng zong a si. Lamkaltu Paul hmuhtonnak kong kha ruat hmanh. Khrihfa a si hlanah sualnak tampi a rak tuah i a hnu zong ah pumpak a tlinlonak a doh peng rih ti kha i cinken. (Rom 7:24, 25; 1 Tim. 1:12-14) Asinain tlanhnak man kha Jehovah pekmi pumpak laksawng in a hmuh. (Galati 2:20 rel.) Jehovah nih Paul sinin i cawn hna seh ti a duh caah mah kong kha a ṭialter. (Rom 15:4) Jehovah nih tlanhnak man kha pumpak laksawng in hmuhter a kan duh. Cutin kan hmuh ahcun Jehovah nih pakhat cio in a kan dawt ti kan zumhnak cu a fek chin lai.

¹¹ Jehovah nih kanmah tlanh awkah Jesuh kha a rak thlah caah kan i lawm tuk. Asinain vawleicung i a ratnak a dang a ruang pakhat cu Pathian kong biatak thanh awkah a si. (Joh. 18:37) Jehovah nih a fale zeitluk in dah a kan dawt ti kha Jesuh nih a kan cawnpiak.

Jehovah Nih A Kan Dawt Ti Zumh Awkah Jesuh Nih A Kan Bawmh Ning

12. Jesuh nih Jehovah kong a chimmi kha zeicah kan zumh khawh?

¹² Vawleicung a um lioah Jesuh nih Jehovah cu zei bantuk Pathian dah a si ti kha a langhter. (Luka 10:22) Jesuh chimmi bia zumh khawh a sinak a ruang tampi a um. Zeicahtiah Jesuh cu vawlei a rat hlanah vancung ah kum nuai tampi chung Jehovah pawng ah a rak um. (Kol. 1:15) Jehovah nih zumhfekmi a fale zeitluk in dah a dawt hna ti kha Jesuh nih ṭha tein a hngalh. Jehovah nih a kan dawt ti zumh awkah Jesuh nih zeitindah a kan bawmh?

13. Jesuh nih Jehovah kha zeitindah hmuhter a kan duh?

¹³ Jesuh nih Jehovah kha amah hmuh ning in hmu ve hna seh ti a kan duh. Thawngṭha cauk ah Jesuh nih Jehovah kha “Pa” tiah voi 160 a langhter. A zultu pawl sin bia a chim tikah “nan Pa” asiloah “vancung nan Pa” timi biafang kha a hman. (Matt. 5:16; 6:26) Jesuh vawleicung a rat hlan i zumhfekmi hna nih Jehovah kha ‘Lianngan Bik’, ‘Cung Nung Bik,’ ‘Sertu’ le a dang upatnak min in an rak auh. Asinain Jesuh nih Jehovah kha kan ‘Pa’ tiah atu le atu a langhter. Ngakchia pakhat nih dawtnak a ngeimi a pa a tlaihchan bantuk in Jehovah nih ka tlaihchan ve hna seh ti a duh kha mah biafang nih a langhter. Jesuh zong nih a fale cung ah dawtnak a ngeimi Pa bantuk in Jehovah kha hmuhter a kan duh. Jesuh nih “Pa” timi biafang a hmannak tahchunhnak pahnih zoh hna hmanh u sih.

14. Vancung kan Pa hmuhnak ah pakhat cio cu a sunglawimi kan si ti kha Jesuh nih zeitindah a langhter? (Matthai 10:29-31) (Hmanthlak zong zoh.)

¹⁴ Pakhatnak, Matthai 10:29-31 i Jesuh chimmi bia hi ruat hmanh. (Rel.) Pithlung cu zeitik hmanh ah Jehovah a bia kho lomi le a daw kho lomi va fate men a si. Asinain vancung kan Pa nih pithlung pakhat te hmanh kha a sunsak tuk i vawlei ah a tlakmi kha a hngalh. Dawtnak he zumhfek tein amah a biami cu zeitluk in dah a kan sunsak chinchin lai. “Nan lu cung nan sam hmanh kha a rel dih” ti zong in Jesuh nih a ti. Jehovah nih kan kong kha a dikthliar in a hngalh dih caah kan zawn a kan ruah tuk ti kha kan hngalh khawh. Vancung kan Pa hmuhnak ah pakhat cio cu a sunglawimi kan si ti kha Jesuh nih zumhter a kan duh.

15. Johan 6:44 ah Jesuh nih vancung kan Pa kong zeidah a kan cawnpiak?

¹⁵ Jesuh nih kan “Pa” Jehovah kong a kan cawnpiakmi a dang pakhat kha ruat hmanh. (Johan 6:44 rel.) Vancung kan Pa nih pakhat cio kha biatak ah a kan hnuh. Zeicah? Lungtak tein kan i zuamnak kha a hmuh caah a si. (Lam. 13:48) Johan 6:44 ah Jesuh nih a chimmi cu Jeremiah 31:3 i Jehovah bia a cherhchanmi a si men lai. Mah ah Jehovah nih a miphun kha hitin a ti hna: “Kaan dawt zungzal. Cucaah a fekmi dawtnak he kaan hnuh.” (Jer. 31:3, NWT; Hosea 11:4 he tahchunh.) Mah cu zei sullam dah a ngeih? Biatak kan rak cawnka bantuk in vancung kan Pa nih kanmah tein kan i hmuh khawh lomi kan sining ṭha hna kha atu zong ah a hmuh rih.

16. (a) Jesuh nih zeidah a chim i mah kha zeicah kan zumh awk a si? (b) Jehovah cu mi vialte caah a ṭha bikmi Pa a si ti na zumhnak kha zeitindah na fehter khawh? (“Mi Vialte Caah A Ṭha Bikmi Pa” timi rinli kulh zoh.)

¹⁶ Jesuh nih Jehovah kha dawtnak a ngeimi Pa in a langhtermi cu hitin a timi bantuk a si: “Jehovah cu ka Pa lawng si loin na Pa zong a si. Aan dawt tuk i na zawn aan ruah.” Cucaah Jehovah nih a ka daw maw ti naa fian lo ahcun hitin i hal: ‘Kan Pa kong a hngal bikmi le biatak a chim zungzalmi Jesuh bia hi ka zumh awk a si ko lo maw?’—1 Pet. 2:22.

Na Zumhnak Kha Fehter Peng

17. Jehovah nih a kan dawt ti kan zumhnak kha zeicah fehter peng a herh?

¹⁷ Jehovah nih a kan dawt ti kan zumhnak kha fehter peng a hau. A cunglei ah kan cawn cang bantuk in a fimzer ngaimi kan ral Satan nih Jehovah kha bia ti hna hlah seh law kan zumhnak der seh ti a duh. Cucaah Jehovah dawtnak cung ah lunghrinnak kan ngeih nakhnga aa zuam peng ko lai. Zeitik hmanh ah Satan kha kan i teiter awk a si lo!—Job 27:5.

18. Jehovah dawtnak cung i na zumhnak kha zeitindah na fehter khawh?

¹⁸ Jehovah dawtnak cung i na zumhnak fehter awkah amah nih aan hmuh ning in naa hmuh khawh ve nakhnga a sinah bawmhnak hal. Baibal ṭialtu hna nih a dawtnak kong an langhter ning le Jehovah nih kan dawtnak a lehrulh ning kha ruat. Jehovah cu amah a dawmi hna cung ah dawtnak langhter loin zeitik hmanh ah a um lai lo. Tlanhnak man kha pumpak laksawng in zeicah na hmuh awk a si timi kong zong ṭha tein ruat. Cun Jehovah cu vancung nan Pa a si tiah Jesuh nih a timi zong kha zum. Cutin na tuah ahcun mi pakhat nih “Jehovah nih aan dawt ti kha na zum maw?” tiah aan hal tikah hitin na leh khawh lai: “Ka zumh, cucaah amah ka dawtnak kha nifatin langhter ka duh!”