“Thlaraulei Ah Mi Chambau” Na Si Ti Kha Philh Hlah

1. Nunnak caah zei thil hna dah kan herh? (Matthai 5:3)

JEHOVAH nih kan herhmi kha ṭha tein a hngalh. Tahchunhnak ah, rawl, thilpuan le dornak hmun cu nunnak ca i kan herh hrimhrimmi an si. Chikkhat te lawng a si hmanh ah mah thil hna lakin pakhatkhat kan chambau ahcun nunnak cu a har tuk. Jehovah nih a kan ser ning in pumsalei chambaunak lawng si loin thlaraulei chambaunak zong kan ngei. (Matthai 5:3 le a tanglei fianternak rel.) Nuamhnak taktak hmuh khawh awkah thlaraulei kan chambaunak kha kan i cinken a hau i Jehovah kan i bochan peng a hau.

2. ‘Thlaraulei ah mi chambau ka si ti i hngalh’ cu zei sullam dah a si? Tahchunhnak pe.

² ‘Thlaraulei ah mi chambau ka si ti i hngalh’ cu zei sullam dah a si? A hrampi Greek biafang nih rawlhal in a vakmi, misifak pakhat kha a langhter. Mah hi na mittlam ah cuanter hmanh: A angki a chia tuk i a tlek dihmi, misifak pakhat cu lam pawng ah a ṭhu. Ei awk a ngeih lo caah a der tuk i a hmai zong a kuak dih. Chun ah ni nih a kangh i zan ah khuasik nih a dawh. Cucaah ahohmanh nih naih an duh lo. Mah misifak nih a sining thlen khawh awkah bawmhnak a herh ti kha ṭha tein a hngalh. Cu bantuk in thlaraulei ah mi chambau ka si ti aa hngalmi cu rawlhal in a vakmi pakhat he aa lo. Cutin aa hngalmi pakhat nih cun Jehovah aa bochan i a bawmhnak kha lungtho tein a cohlan.

3. Hi capar ah zei kong dah kan i ruah hna lai?

³ Hi capar ah bawmhnak ca i Jesuh a nawlmi Foinisia nu pakhat kong kan i ruah hmasa hna lai. Mah nu i zohchunh in Jehovah aa bochanmi hna nih an ngeih a herhmi sining pathum kong kan i ruah hna lai. Cun thlaraulei ah mi chambau ka si ti aa hngalmi lamkaltu Peter, Paul le Siangpahrang David kong zong kan i ruah hna lai.

Toidornak, Inkhawhnak Le Zumhnak Kan Herh

4. Foinisia nu cu zeicah Jesuh sinah a kal?

⁴ Nikhat cu Jesuh sinah Foinisia nu pakhat a ra i bawmhnak a hal. Zeicahtiah a fanu cu “khuachia nih a tuah i fakpi in a tuar” caah a si. (Matt. 15:21-28) Mah minu cu Jesuh kehram ah a khuk aa bil i a fanu damter ding in a nawl. Cutin a tuahmi nih sining ṭha tampi a ngei ti kha a langhter. Mah lak i cheukhat kha i ruah hna u sih.

5. Foinisia nu nih zei bantuk sining ṭha dah a langhter, Jesuh nih zeitindah a bawmh? (Hmanthlak zong zoh.)

⁵ Foinisia nu nih toidornak taktak a langhter. Zeicah cutin kan chim khawh? Jesuh nih Foinisia nu kha Jentail mi nih an zuat tawnmi, duh a nung tukmi uifa te he a tahchunh nain mah nu cu a thin a rak hung lo. Nang tah Jesuh nih cutin in tahchunh ve seh law zeitindah na um hnga? A bawmhnak hal duh ti lo tiang in na thin a hung lai maw? Foinisia nu cu toidornak a ngeih caah a thin a hung lo. Mah leng ah inkhawhnak a ngei i Jesuh kha lungdong loin bawmhnak a hal. Zeicah cutin a tuah? Jesuh a zumhnak nih a forh caah a si. A hmasa ah Jesuh nih “Israel mi chung i a tlaumi tuu hna sin lawng ah thlah ka si” tiah a ti ko nain Foinisia nu zumhnak a hmuh tikah a nawl ning in a fanu kha a damter colh.

6. Foinisia nu kong in zeidah kan cawn khawh?

⁶ Kannih zong thlaraulei ah mi chambau kan si caah toidornak, inkhawhnak le zumhnak kan ngeih a hau. Toidornak taktak kan ngeih lawng ah Pathian sin lungdong loin bawmhnak kan hal khawh lai. Jesuh Khrih kha fek tein kan zumh a hau i kanmah bawmh awkah a hmanmi hruaitu pawl zong kan zumh hna a hau. (Matt. 24:45-47) Jehovah le a Fapa nih cu bantuk sining ṭha a ngeimi hna kha lungtho tein an bawmh hna. (Jeim 1:5-7 he tahchunh.) Atu ah Jehovah nih thlaraulei rawl, thilpuan le dornak hmun a kan timhtuahpiak ning kong kan i ruah hna lai. Cun lamkaltu Peter, Paul le Siangpahrang David kong in Jehovah bawmhnak hmuh khawh awkah kan tuah a herhmi kong zong kan i ruah hna lai.

Peter Bantuk In Thlarau Rawl Hmaan Tein Ei Peng

7. Peter cu zei rian dah pek a si, mah rian ṭuan khawh awkah zeidah a tuah? Fianter. (Hebru 5:14–6:1)

⁷ Lamkaltu Peter kong hi ruat hmanh. Anih cu Jesuh kha Messiah in a cohlang hmasa bikmi Judah mi hna lakah aa tel ve. Jehovah nih Jesuh hmang in a mi pawl kha “zungzal nunnak a pemi” thlarau rawl a dangh hna. (Joh. 6:66-68) Jesuh a tho ṭhan i van a kai hlanah Peter kha hitin rian a pek: “Ka tuufa tete kha cawm hna.” (Joh. 21:17) Peter nih mah rian kha zumhawktlak tein a ṭuan i a hnuah thiang thlarau forhfialnak thawng in Baibal cauk pahnih hmanh a ṭial. Asinain Peter theng nih thlarau rawl kha a ei ve a hau. Cutin tuah awkah Lamkaltu Paul nih a rak ṭialmi cakuat pawl kha ṭha tein a hlathlai. Peter nih Paul ṭialmi bia cheukhat cu “hngalhthiam awkah a har” ti kha a cohlan. (2 Pet. 3:15, 16) Asinain Peter cu inkhawhnak a ngeih caah lungdong loin a hlathlai peng. Zeicahtiah “rawl hak” bantuk a simi Paul cakuat kha hngalhthiam khawh awk le mah ning in nun khawh awkah Jehovah nih a ka bawmh lai ti kha a zumh.—Hebru 5:14–6:1 rel.

8. Peter nih Jehovah sinin lamhruainak thar a hmuh tikah zeidah a tuah?

⁸ Peter nih Jehovah sinin lamhruainak thar a hmuh tikah mah ning in a zulh. Mah nih a zumhnak zeitluk in dah a feh ti kha a langhter. Tahchunhnak ah, Joppa khua a um lioah Peter nih langhnak a hmuh. Langhnak ah vancungmi nih Moses Nawlbia ning in ei a ngah lomi sa pawl ei awkah Peter kha a forh. Mah tikah Peter nih “Ka ei lai lo, Bawipa, a thurhnawmmi le a thiang lomi zeihmanh ka ei bal lo” tiah a ti. Vancungmi nih hitin a leh: “Pathian nih a thianter cangmi thil cu a thur tiah chim ti hlah.” (Lam. 10:9-15) Peter nih a ruah ning a thlen i lamhruainak kha a zulh. Zeitindah kan hngalh? Peter cu langhnak a hmuh hnu tlawmpal ah Jentail mi Kornelias inn ah rat ding in sawm a si. A hlanah Peter cu Jentail mi inn ah zeitik hmanh ah a kal bal lo. Zeicahtiah Judah mi nih Jentail mi pawl kha a thiang lomi in an hmuh hna. (Lam. 10:28, 29) Asinain Peter nih Jehovah sinin lamhruainak thar a hmuh tikah a zulh colh i Kornelias le a chungkharmi hna sinah phung a chim. (Ptb. 4:18) Cucaah an dihlak in biatak an cohlan, thiang thlarau an hmu i tipil an ing.—Lam. 10:44-48.

9. A hakmi thlarau rawl kan einak thawng in zeitindah ṭhatnak kan hmuh?

⁹ Peter i zohchunh in hnuk bantuk a simi a hrampi Baibal cawnpiaknak kha hmaan tein kan hlathlai a hau. Mah leng ah rawl hak bantuk a simi, a thuk deuhmi Baibal biatak zong hngalhthiam awkah kan i zuam a hau. Cutin tuah awkah a caan le thazaang pek a hau nain mah cu a phu ko. Zeicah? A ruang pahnih a um. Pakhatnak, Jehovah kong tam deuh kan hngalh ahcun amah kan dawtnak le kan upatnak zong a karh deuh ve lai. Pahnihnak, vancung kan Pa i khuaruahhar awk ngai a simi a sining ṭha hna kan hngalh ahcun mah kong midang sin chim awkah lungthawhnak kan ngei deuh lai. (Rom 11:33; Biat. 4:11) Peter kong in kan cawn khawhmi pakhat a um rih: Baibal kong he aa tlaiin hngalhthiamnak thar kan hmuh tikah a herhmi thlennak kha khulrang in tuah awkah kan i zuam a hau. Cutin kan tuah lawng ah thlarau rawl hmaan tein a eimi kan si lai i Jehovah caah hman awk a tlakmi kan si kho lai.

Paul Bantuk In Thlaraulei Thilpuan Kha Tling Tein I Hruk Peng

10. Thlaraulei thilpuan tling tein i hruk peng timi cu zei sullam dah a si? (Kolose 3:8-10)

¹⁰ Jehovah lung lawmhter awkah thlaraulei thilpuan kha tling tein kan i hruk peng a hau. Zeitindah cutin kan tuah khawh? “Nan mihlun kha a tuah tawnmi ziaza he khan i phoih u law . . . mithar kha i hruk u” tiah Lamkaltu Paul nih a kan forh. (Kolose 3:8-10 rel.) Mithar i hruk peng cu a har kho. Paul kong hi ruat hmanh. A no lio tein Pathian mithmai ṭha hmuh awkah fakpi in aa zuam. (Gal. 1:14; Fil. 3:4, 5) Asinain Pathian duhnak le Khrih cawnpiaknak kha fiang tein a hngalh lo caah thlaraulei in misifak pakhat bantuk a si. Mah leng ah aa porhlaw i “a puarhrangmi” zong a rak si. Cucaah Jehovah mithmai ṭha hmuh khawh awkah Paul nih a mihlun kha phoih in mithar tu kha aa hruk a hau.—1 Tim. 1:13.

11. Paul cu zei tuah awkah dah aa zuam? Fianter.

¹¹ Paul cu Khrihfa a si hlanah a thin a tawi tukmi a rak si. Jesuh zultu pawl kha a huat tuk hna caah anmah “tlerhkhonh awk le thah awkah a lung a tho tuk” tiah Baibal nih a ti. (Lam. 9:1) Khrihfa pakhat a hun si hnuah Paul nih a mihlun phoih awkah fakpi in aa zuam. (Efe. 4:22, 31) A hnuah Paul cu Barnabas he an lung aa khah lo caah “fakpi in bia an i al.” (Lam. 15:37-39) A rak hlawt cangmi ziaza ṭhalo a chuak ṭhan nain Paul cu zeitik hmanh ah a lung a dong bal lo. A tlinlonak doh khawh awk le Jehovah mithmai ṭha hmuh khawh awkah ‘a pum kha a hrem’ zungzal.—1 Kor. 9:27.

12. Paul kha a mihlun phoih awkah zeinihdah a bawmh?

¹² Paul cu toidornak ngeih ding in a cawn caah mihlun kha phoih in mithar kha tling tein aa hruk khawh. (Fil. 4:13) Peter bantuk in Paul zong nih “Pathian pekmi ṭhawnnak” kha aa bochan. (1 Pet. 4:11) Asinain palhnak a tuah caah a caan ah san ka tlai lo timi ruahnak a ngei. Cu bantuk caan ah Jehovah nih a rak tuahpiakmi thilṭha vialte kong a ruah ṭhan. Mah nih a lawmhnak kilven awkah a bawmh i a herhmi thlennak tuah awk zong ah thazaang a ngeihter.—Rom 7:21-25.

13. Zeitindah Paul kan i zohchunh khawh?

¹³ Jehovah kan biaknak cu kum tampi a si cang hmanh ah Paul i zohchunh in mihlun phoih awk le mithar hruk awkah kan i zuam peng a hau. Zeicahtiah mah cu a kan kilveng khomi thlaraulei thilpuan bantuk a si caah a si. Asinain thintawinak asiloah awhrawng in biachimnak ti bantuk kan rak hlawt cangmi ziaza ṭhalo a chuah ṭhan hmanh ah kan lung a dongh awk a si lo. Mah canah kan ruah ning le kan thil tuah ning thlen awkah nifatin kan i zuam a hau. (Rom 12:1, 2; Efe. 4:24) Mah hi ruat hmanh: Thilpuan taktak cu kan pum he aa tlak ning in remh ṭhan khawh a si. Asinain thlaraulei thilpuan cu cutin a si lo. Kan i hruk dingmi mithar cu kan mihlun he aa tlak lo ahcun thlaraulei thilpuan kha si loin kanmah tu kan i thlen a hau.

David Bantuk In Thlaraulei Dornak Hmun Ah Um Peng

14-15. Jehovah nih a mi pawl kha zeiti lam in dah thlaraulei dornak hmun a timhtuahpiak hna? (Salm 27:5) (Hmanthlak zong zoh.)

¹⁴ Lunglawmhnak taktak hmuh awkah thlarau rawl ei le thlaraulei thilpuan i hruk lawng in a za lo. Thlaraulei dornak hmun zong kan herh. Mah cu zeidah a si, mah hmun ah zeitindah kan i dor peng khawh?

¹⁵ Siangpahrang David nih Jehovah timhtuahpiakmi thlaraulei dornak hmun kong a rak chim. (Salm 27:5 rel.) Jehovah nih a mi pawl kha an zumhnak a hrawk khomi thil in a huhphenh zungzal hna. Tuchan ah tah zeitindah a kan huhphenh? Zei bantuk hriamnam hmanh nih a kan pemh nakhnga lo kaan ven hna lai tiah bia a kan kamh. (Salm 34:7; Isa. 54:17) Jehovah kan i bochan ahcun Satan le a khuachia pawl nih zeitluk an i zuam hmanh ah kan zumhnak an hrawk kho lai lo. An kan thah hmanh ah Jehovah nih a kan thawhter ṭhan lai. (1 Kor. 15:55-57; Biat. 21:3, 4) Thlaraulei in kan lung a vaivuanhter khomi lungretheihnak tawnghtham awkah Jehovah nih a kan bawmh. (Ptb. 12:25; Matt. 6:27-29) Kanmah bawmh awkah thlaraulei chungkhar a simi zumtukhat unau pawl a kan pek i lam kan pial sual nakhnga lo Khrihfa upa pawl zong a kan pek. (Isa. 32:1, 2) Cun Khrihfabu pumhnak i kan i pumh tikah Jehovah timhtuahpiakmi thlaraulei dornak hmun ah um peng khawh ning kong zong kan cawn.—Heb. 10:24, 25.

16. Jehovah nih David kha zeitindah a huhphenh?

¹⁶ David cu Jehovah phunglam a zulh i a ṭhami biakhiahnak a tuah caah sualnak nih a chuahtermi harnak tampi in huhphenh a si. (Phungthlukbia 5:1, 2 he tahchunh.) Asinain David nih Pathian nawl a buar tikah mah in a chuakmi buaibainak hna kha Jehovah nih a hlohpiak lo. (2 Sam. 12:9, 10) A caan ah David cu palhnak a tuah lo nain midang ruang ah harnak a tong ṭhiamṭhiam. Cu bantuk caan ah David nih a lung chung a ummi intuarnak vialte kha Jehovah sinah a phuan. Mah tikah David cu lungrethei in a um nakhnga lo Jehovah nih a fekmi a dawtnak kong kha a hngalhter ṭhan.—Salm 23:1-6.

17. Zeitindah David kan i zohchunh khawh?

¹⁷ David i zohchunh in biakhiahnak pakhatkhat kan tuah hlanah Jehovah lamhruainak kan kawl hmasa a hau. A caan ah harnak kan tonmi cu Jehovah nih a kan huhphenh lo caah si loin kan biakhiahnak a palh ca tu ah a si ti kha kan i cinken a hau. (Gal. 6:7, 8) Hi vawlei ṭhalo ah kan nun chung paoh cu palhnak kan tuah lo hmanh ah midang ruang ah harnak kan tong kho. Cu bantuk caan ah Jehovah nih lungdaihnak le inkhawhnak a kan pek lai timi zumhnak he a sinah lungtak tein thla kan cam a hau.—Fil. 4:6, 7.

Thlaraulei Na Chambaunak Kha Philh Hlah

18. Zei bantuk zuamcawhnak dah kan ton, Jehovah kan i bochan ti kha zeitindah kan langhter khawh? (Hmanthlak zong zoh.)

¹⁸ 2026 kumcaang Baibal nih hitin a ti: “Pathian i bochan ka herh ti aa hngalmi cu lunglawmmi an si.” Mah cu a hlan nakin atu ah a biapi chinchin. Zeicah? Kan pawngkammi, mi tampi nih thlaraulei an chambaunak kha philh in a hmaan lomi biaknak le minung fimthiamnak tu kha an i rinh. Cucaah zeitluk an i zuam hmanh ah lawmhnak taktak an hmu kho lo. Kannih zong vawlei lungput nih a kan iap nakhnga lo kan i ralrin a hau. Zeitindah? Jehovah nih a kan timhtuahpiakmi thlarau rawl kha hmaan tein kan ei a hau, thlaraulei thilpuan kha tling tein kan i hruk a hau i thlaraulei dornak hmun ah kan um peng a hau.