Jehovah nih a Kan Naihning

1. Minung nih zeidah kan herh, mah kha ahote nih dah an tlinter khawh?

AHOPAOH midang he naih tein um kan herh. A kan daw taktakmi, a kan sunsakmi le a kan hngalthiammi chungkhar le hawikom ngeihnak nih a kan nuamhter. Asinain Sertu Jehovah he naih tein um hi kan herh bikmi a si.—Pct. 12:1.

2. Jehovah nih zei bia dah a kan kamh, asinain mi tampi nih mah kha zeicah an zumh lo?

² Jehovah nih a hawi si awkah a kan sawm. Nan ka naih ahcun kaan naih ve hna lai tiah bia a kan kamh. (Jeim 4:8) Mah biakam kan hngalhmi nih a kan lawmhter. Asinain mi tampi nih Pathian nih naih a kan duh ti cu a si kho lo tiah an ruah. Annih nih Pathian he pehtlaihnak ngeih awkah kan i tlak lo asiloah Pathian cu kanmah he aa hlat tuk tiah an ruah. Jehovah naih cu a si kho taktak maw?

3. Jehovah he aa tlaiin zeidah kan zumh khawh?

³ Pathian cu amah a kawlmi “aho kan sin hmanhhin aa hlat lo” caah a kong hngalh khawh a si ko. (Lamkaltu 17:26, 27; Salm 145:18 rel.) Mitlinglo kan si nain Jehovah nih a hawi si awkah cohlan a kan duh. (Isa. 41:8; 55:6) Salm caṭialtu pa nih a hmuhtonnak in Jehovah kong kha hitin a ṭial: “Maw, thlacamnak a ngaitu, na sinah miphun vialte an ra lai. Na thimmi le na pawng i um awkah na auhmi hna cu an i lawm.” (Salm 65:2, 4, NW) Judah Siangpahrang Asa nih Pathian a naihning le Pathian zong nih Asa a naihning kong kha Baibal in i ruah hna u sih.a

Hlanlio Mi hna Sinin Cawng

4. Judah mi hna caah Siangpahrang Asa nih zei zohchunh awk dah a chiah?

⁴ Asa cu a hmaanmi biaknak caah a lung a thomi a si. Anih cu biakinn hlawhhlang le siasal a tam tuk lio caan ah siangpahrang a hung si i mah thil ṭhalo a hrawhnak thawngin Jehovah nawl kha a ngaih. (1 Si. 15:9-13) Asa nih Jehovah a naih i a nawlbia a zulh caah a mi hna kha “an pupa hna Pathian kha kawl awkah le phungbia le nawlbia kha zulh awkah nawl a pek” khawh hna. Asa nih uk hram a thawkin kum hra chung daihnak a umternak thawngin Jehovah nih thluachuah a pek. Mah daihnak cu Jehovah sinin a rami a si kha Asa nih a hngalh caah a mi pawl kha hitin a ti hna: “Kannih nih amah kha kan kawl i anih nih a kenkip ah daihnak a kan pek.” (2 Chan. 14:1-7) Mah hnuah zeidah a cang?

5. Asa nih Pathian aa bochan kha zei thil sining ah dah a langhter, a phichuak cu zeidah a si?

⁵ Siangpahrang Asa ka si tiah i ruathmanh. Ethiopia mi Zerah cu na ram doh awkah mi 1,000,000 le rangleng 300 he a ra lio. (2 Chan. 14:8, 9, NW, 10) A ralkap cu na ralkap i let hnih tluk an si. Mah tikah zeidah na tuah lai? Mah dohnak kha Pathian nih zeicah a kham lo tiah na ruat lai maw? Nangmah fimnak naa bochan lai maw? Asiloah Jehovah huhphenhnak dah naa bochan lai? Asa nih Jehovah he pehtlaihnak ṭha a ngeih le a lungthin dihlak in aa bochan kha a langhter. Jehovah kha hitin a ti: “Maw BAWIPA kan Pathian, kan bawm ko sawh, zeitintiah nangmah kha kan in bochan.” Pathian nih zeitindah a leh? ‘BAWIPA nih Ethiopia mi kha a tei hna.’ Pakhat hmanh an luat lo.—2 Chan. 14:11-13.

6. Asa kha zeitindah kan i zohchunh awk a si?

⁶ Pathian nih a ka huhphenh lai i lam a ka hruai lai tiah Asa nih zeicah a zumh khawh? “Asa nih BAWIPA mithmuh i a dikmi thil kha a tuah” i “BAWIPA leiah a lung dihlak in aa biatak” tiah Baibal nih a ti. (1 Si. 15:11, 14) Kannih zong Pathian he atu in hmailei tiang kan i naih khawh zungzal nakhnga lungthin dihlak in kan biak a hau. Jehovah nih amah he i naih awkah a tuah hmasa i amah he pehtlaihnak ṭha ngeih awkah a kan bawmh caah kan i lawm tuk. Cutin a tuahnak lam pahnih kha i ruah u sih.

Jehovah nih Kanmah he i Naih awkah Tlanhnak Man a Hman

7. (a) Jehovah nih amah naih awkah zeidah a kan tuahpiak? (b) Pathian nih amah he naih awkah a hmanmi zei lam dah a ngan bik?

⁷ Jehovah nih minung umnak caah aa dawh tukmi vawlei a sernak thawngin minung a dawt hna kha a langhter. Nifate a kan nunternak thawng zongin a dawtnak kha a langhter zungzal. (Lam. 17:28; Biat. 4:11) Thlaraulei kan herhmi a kan peknak thawngin a dawtnak kha a ngan deuhmi lam in a langhter. (Luka 12:42) Kan thlacamnak zong kha amah theng nih a ngaih. (1 Johan 5:14) Asinain Jehovah nih a kan naihnak le a kan dawtnak a langhternak a ngan bikmi lam cu tlanhnak man a si. (1 Johan 4:9, 10, 19 rel.) Jehovah nih a Fapa kha kan ca i a nunnak pek awkah a thlah. Mah tlanhnak man thawng lawngin a tlingmi minung in zungzal nun ding timi ruahchannak kan ngei kho.—Johan 3:16.

8, 9. Jehovah tinhnak ah Jesuh a rian cu zeidah a si?

⁸ Tlanhnak man pek hlan i a nungmi hna telin mikip nih tlanhnak man in ṭhatnak hmuh awkah Jehovah nih a timhtuah. Mah cu zeitindah a si khawh? Jehovah nih hmailei ah a ra dingmi Khamhtu kong a chimchung tikah mah tlanhnak man cu pek cangmi bantukin a hmuh, zeicatiah minung caah aa tinhmi cu a tling hrimhrim lai ti kha a hngalh caah a si. (Gen. 3:15) Kum tampi a rauh hnuah lamkaltu Paul nih “tlantu Jesuh Khrih thawngin” sual ngaihthiamnak hmuh khawh a si caah Jehovah kha a lawmh. Pathian nih ‘hlanlio i sualnak kha a ngaihthiam’ tiah Paul nih a ti. (Rom 3:21-24, 25, NW, 26) Cucaah Jesuh loin cun Pathian naih khawh a si lo.

⁹ Jehovah nih toidormi hna kha Jesuh thawng lawngin amah he pehtlaihnak ṭha ngeih awkah a awnh hna. Baibal nih hitin a ti: “Pathian nih cun zeitlukin dah a kan dawt kha hitihin a langhter: kannih cu misual kan si ko rih lioah hin Khrih cu kan caah a thi.” (Rom 5:6-8) Tlanhnak man cu hmuh awkah kan i tlak caah si loin Jehovah le Jesuh nih a kan dawt tuk caah a kan pekmi a si. Jesuh nih hitin a ti: “A ka thlahtu ka Pa nih ka sinah a hnuh hna dah ti lo ahcun ahohmanh ka sinah an ra kho lo.” Hitin a ti chap: “Keimah sinin ti dah lo cun ahohmanh Pa sin an phan kho lo.” (Johan 6:44; 14:6) Thiang thlarau thawngin Jehovah nih mi kha a sin i hnuh awkah Jesuh kha a hman i amah he pehtlaihnak ṭha ngeih awkah a bawmh hna. Mah lawngah zungzal nunnak an hmu kho lai. (Judas 20, 21 rel.) Jehovah nih kanmah he i naih awkah a hmanmi a pahnihnak lam kha atu i ruah hna u sih.

Jehovah nih Kanmah he i Naih awkah Baibal a Hman

10. Pathian he naih awkah Baibal nih zeitindah a kan bawmh?

¹⁰ Hi capar ah Baibal uk 14 in cacang pawl kan rel cang. Jehovah nih kanmah he i naih awkah a thiang thlarau kha hmangin Baibal a ṭialter hna. Baibal a um lo ahcun Sertu naih khawh a si ti kha zeitindah kan hngalh khawh lai? Baibal a um lo ahcun tlanhnak man kong le Jehovah he naih awkah Jesuh nih a kan bawmhning kha zeitindah kan hngalh khawh lai? Jehovah i duhnungmi a sining hna le minung ca i aa tinhmi kha Baibal in kan hngalh. Tahchunhnak ah, Exodus 34:6, 7 ah Jehovah kong kha hitin kan hmuh: “BAWIPA cu zaangfahnak le velngeihnak in a khatmi Pathian a si, amah cu fawite in a thin hunter khawh lomi, a fekmi dawtnak tampi mi cungah a langhter i mi cungah zumhawktlak ngaingai a simi Pathian cu a si. A biakamnak kha mi thong tampi cungah a hmunhter i palhnak le ṭhatlonak le sualnak kha a ngaihthiam hna.” Cu bantuk sining a ngeimi sinah naih a duh lomi ahodah a um lai? Jehovah nih a kong tam deuh in kan cawn tikah amah cu kan caah a um taktakmi a si lai i naih kan duh lai ti kha a hngalh.

11. Jehovah kong cawn cu zeicah a biapit? (A hramthawknak hmanthlak zoh.)

¹¹ Mi pakhat kong kan hngalh chin i a sining hna kha kan sunsak chin tikah amah he a ṭhami pehtlaihnak kan ngei lai. Cu bantukin Pathian he pehtlaihnak ṭha ngeih awkah Baibal ah a sining pawl kan hlathlainak thawngin zei bantuk Pathian dah a si kha kan cawn a hau. Baibal kha hngalh a fawimi lam in a ṭialter hna caah Jehovah cungah kan i lawm.

12. Jehovah nih Baibal ṭial awkah zeicah minung a hman hna?

¹² Jehovah nih Baibal ṭial awkah vancungmi kha a hman khawh ko hna. Annih nih kanmah kong le kan tuahmi kong kha hngalh an duh tuk. (1 Pit. 1:12) Cun Jehovah bia kha a ṭha bik in an ṭial khawh ko lai. Asinain vancungmi cu minung bantuk an si lo. Annih cu kanmah bantuk intuarnak, herhbaunak le derthawmnak an ngei lo. Jehovah nih vancungmi cu kanmah he an i dan tuk kha a hngalh caah Baibal ṭial awkah minung a hman hna. Baibal ṭialtu le midang i an lungfahnak, an lunghrinnak, an ṭihnak le an palhnak kong kan rel tikah anmah bantukin kan intuar ve. An i nuamhnak kong kan rel tikah anmah bantukin kan i nuam ve. Profet Elijah bantukin Baibal ṭialtu dihlak cu ‘kanmah bantuk minung an si ve.’—Jeim 5:17.

13. Jonah thlacamnak nih zeitindah aan umter?

¹³ Tahchunhnak ah, Pathian nih Jonah kha a biapimi rian a pek tikah Jonah cu a zaam. Mah kong kha vancungmi nih hei ṭial sehlaw Jonah intuarmi kha a dikthliar in a langhter kho lai lo. Jehovah nih Jonah kha rili tawne i a thlacamnak kong telin a tuanbia amah tein a ṭialtermi cu a ṭha deuh tuk. Jonah nih hitin a ti: “Ka nunnak kha a dih riahmah cang ti kha ka hngalh tikah, Maw BAWIPA, nangmah cu kaan hngalh ṭhan.”—Jonah 1:3, 10; 2:1-9.

14. Isaiah nih amah kong a ṭialmi kha zeicah kan hngalhthiam khawh?

¹⁴ Isaiah kong zong hi ruathmanh. Jehovah sunparnak kha langhnak in a hmuh tikah zeitlukin dah misual a si kha aa hngalh i hitin a ti: “E law, mah hi ka si ko cang! Ka lo ko cang. Ka kaa in a chuakmi bia hi bia sual lawngte an si i ka umnak mi zong hi bia sual le bia thur a hmangmi lawngte an si. Cun atu ah ka mit hrimhrim in Siangpahrang, Lianngan Bik BAWIPA cu ka hmuh.” (Isa. 6:5) Vancungmi nih amah kong kha cutin a chim kho lai lo, asinain Isaiah nih cun a chim khawh i a chim taktak. Kannih zong Isaiah bantukin mitlinglo kan si caah a intuarmi kha kan hngalhthiam khawh.

15, 16. (a) Midang intuarmi kha zeicah kan hngalhthiam khawh? Tahchunhnak pe. (b) Jehovah he i naih awkah zeinihdah a kan bawmh lai?

¹⁵ Vancungmi nih anmahle anmah kha Jakob bantukin “aa tlakmi ka si lo” asiloah Piter bantukin “misual ka si” tiah an i ti kho lai lo. (Gen. 32:10; Luka 5:8) Annih cu Jesuh zultu hna a caan ah ‘an thin a phan’ bantukin a phang lai lo. Cun Paul le midang bantukin hremnak ton caan i thawngṭha chim khawh awkah ralṭhatnak kan pe tiah an hal a hau lai lo. (Johan 6:19; 1 Thes. 2:2) Zeicatiah vancungmi hna cu a zeilei paoh in a tlingmi an si i minung nakin tampi an ṭhawn deuh caah a si. Baibal ṭial awkah Jehovah nih a hmanmi hna bantukin kannih zong mitlinglo kan si ve caah an intuarmi kha kan hngalhthiam khawh. An ṭialmi kan rel tikah ‘aa lawmmi sinah kan i lawm ve i a ṭapmi sinah kan ṭap ve.’—Rom 12:15.

¹⁶ Jehovah nih hlanlio i zumhfekmi a salle a pehtlaih hnaning kong kan ruah tikah Pathian kong tampi kan hngalh. A tlinglomi minung kha lungsaunak le dawtnak in a naihmi hna kha kan hmuh. Jehovah kong kha ṭha tein kan hngalh i lungtak in kan dawt tikah amah he kan i naih chin lai.—Salm 25:14 rel.

Pathian he a Rawk kho Lomi Hawikomhnak Ngei

17. (a) Azariah nih Asa kha zeitindah ruahnak a cheuh? (b) Azariah ruahnak cheuhnak kha Asa nih zeitindah a zulh lo, a phichuak cu zeidah a si?

¹⁷ Siangpahrang Asa kong in kan i cawn khawhmi a dang a um rih. Ethiopia mi pawl a tei hna hnuah profet Azariah nih hitin ruahnak a cheuh: “Amah sinah nan um chung cu BAWIPA cu nan sinah a um. Nan kawl ahcun amah cu nan hmuh lai, sihmanhsehlaw nan hlawt ahcun aan hlawt ve hna lai.” (2 Chan. 15:1, 2) Asinain a hnuah Asa nih mah ruahnak cheuhnak kha a zul lo. Chaklei Israel pennak nih Judah a doh tikah Asa cu a ṭih tuk. Jehovah kha bawmhnak hal loin siasal a biami Siria mi he tu hawikomhnak a tuah. Cucaah Jehovah nih hitin a ti: “Hi thil ah hin hrutpi in na tuah cang; zeitintiah atu cun ral na ngei cang lai.” Cutin a cang taktak. (2 Chan. 16:1-9) Mah in zei fimnak dah kan i lak khawh?

18, 19. (a) Hlan bantukin Jehovah he kan i naih lo ahcun zeidah kan tuah awk a si? (b) Jehovah kha zeitindah kan naih zungzal khawh?

¹⁸ Jehovah sinin zeitikhmanh ah kan i hlat awk a si lo. Hlan bantukin Jehovah he kan i naih lo ahcun Hosea 12:6 i mah bia hi zul colh hna u sih: “Pathian cu i bochan u law amah sinah khan kir tuah u. Amah sinah khan zumhawktlak in um u law ding tein um ko u, cun nan Pathian nih rian a ṭuan lai kha thinfual in hngak ko u.” Tlanhnak man kong kha kan ruah i Baibal kha ṭha tein kan hlathlai ahcun Jehovah he kan i naih chinchin lai.—Deuteronomi 13:4 rel.

¹⁹ Salm caṭialtu nih “Pathian pawng um cu a va nuam hringhran dah” tiah a ṭial. (Salm 73:28) Kan ca zongah cutin a si ve. Jehovah kong cawn zungzal awkah hmuitinh chia hna u sih. Cutin kan tuah ahcun kan dawt chinchin lai. Jehovah kha kan naih ahcun atu in zungzal tiang a kan naih ve lai.