Haumi Thingkung Cu A Corh Ṭhan Kho Maw?

LEBANON i aa dawh tukmi sidar thingkung kha a ngawi i aa ngerhmi olive kung he na tahchunh ahcun olive kung cu zeihmanh lo bantuk a si ko lai. Asinain olive kung cu a har bikmi sining hmanhah khuaruahhar lam in a nung kho. Olive kung cheukhat cu kum 1,000 hrawng tiang a nung. A hram cu vawlei chungpi tiang aa sih i a kungpi hau a si hmanhah a corh ṭhan kho. A hram a nun chung paoh cu a corh ṭhan kho.

Zumhfekmi Job nih ka thih tikah ka nung ṭhan lai tiah a zumh. (Job 14:13-15) Pathian nih mithi a thawhter ṭhan hna lai ti a zumh kha langhter awkah thingkung tahchunhnak a hman. Mah cu olive kung a si kho men. Job nih hitin a ti: “Thing caah cun ruahchannak a um, hau a si hmanhah a corh ṭhan lai.” Khuakhen caan a dih i ruah a sur tikah a romi olive thinghmui cu a nung ṭhan kho i “a nge an borh ṭhan” kho.—Job 14:7-9.

Haumi olive kung a nun ṭhanmi hmuh lai aa ngaihmi lothlopa bantukin Jehovah nih a salle le midang pawl thawhter ṭhan lai kha aa ngaih tuk. (Matt. 22:31, 32; Johan 5:28, 29; Lam. 24:15) Mithi pawl an thawh ṭhanmi le an nun ṭhanmi hmuh cu zeitlukin dah a nuamh lai khi na mitthlam ah cuanter hmanh.