Jehovah Kan Dawtnak kha Zeitindah Kan Langhter khawh?

1, 2. Jehovah nih amah kan dawt nakhnga zeitindah a kan cawnpiak?

NULEPA nih fale cawnpiaknak ah a ṭha bikmi lam cu tuahsernak a si. An fale an dawt hnanak kha an langhter tikah dawtnak ngeih dingin an cawnpiakmi hna a si. Kan Pa, Jehovah nih a kan dawt tlukin a kan dawmi ahohmanh an um lo. Jehovah nih “a kan dawt hmasa caah” kannih zong dawtnak kan ngeih vemi a si.—1 Johan 4:19.

² Jehovah nih “a kan dawt hmasa” kha zeiti lam in dah a langhter? “Kannih cu misual kan si ko rih lioah hin Khrih cu kan caah a thi” tiah Baibal nih a ti. (Rom 5:8) Dawtnak a ngeimi ka Pa, Jehovah nih sualnak le thihnak in kanmah khamh awkah a Fapa kha tlanhnak man caah a pek. Mah a sunglawi tukmi laksawng nih Jehovah he pehtlaihnak ṭha ngeih awk le Jehovah kan dawtnak langhter khawh awkah a kan bawmh. Mah a sunglawi tukmi raithawinak a kan timhpiaknak thawngin Jehovah nih zohchunh awk a chiah. Kannih zong mahzawn ruahlonak le siannak in dawtnak langhter ve awkah a kan cawnpiak.—1 Johan 4:10.

3, 4. Pathian kan dawt kha zeitindah kan langhter khawh?

³ Dawtnak cu Jehovah i a lang bikmi ziaza a si. Cucaah “Bawipa nan Pathian cu nan lungthin dihlak le nan nunnak dihlak le nan ruahnak dihlak le nan thazaang dihlak in nan dawt lai” timi nawlbia hi a biapi bikmi nawlbia a si tiah Jesuh nih a timi cu khuaruahhar awk a si lo. (Mar. 12:30) Jehovah nih “lungthin dihlak” in ka daw hna seh ti a kan duh. Jehovah nakin mi pakhatkhat asiloah thil pakhatkhat kha kan dawt deuh ahcun Jehovah a lung a fak lai. Asinain Jehovah kan dawtnak cu intuarnak sawhsawh lawng a si awk a si lo. Jehovah nih kan “ruahnak dihlak” le kan “thazaang dihlak” in dawt awk zongah aa ruahchan. Mah nih Jehovah kan dawtnak ah kan ruahnak le kan tuahsernak zong aa tel ti kha a langhter.—Mikah 6:8 rel.

⁴ Cucaah Jehovah kha kan nunnak dihlak le kan ngeihmi dihlak in kan dawt awk a si. Kan nunnak ah Jehovah kha pakhatnak i kan chiahnak thawngin kan dawt taktak kha kan langhter awk a si. A hmasa capar ah Jehovah nih a kan dawt a langhternak lam pali kong kan i ruah cang hna. Hi capar ah Jehovah kan dawtnak zeitindah kan ṭhanter khawh ti le kan dawtnak zetindah kan langhter khawh ti kha kan i ruah hna lai.

Jehovah cung Naa Lawmhnak kha Langhter

5. Jehovah nih a kan tuahpiakmi vialte kan ruah tikah zeidah tuah kan duh?

⁵ Mi pakhatkhat nih laksawng an in pek tikah naa lawmhnak kha na langhter ko lai. Mah laksawng kha sunsak ngaiin na hman ko lai. Jeim nih hitin a ṭial: “Laksawng ṭha le laksawng tlamtling paohpaoh hi vancung in a rami an si; vancung i a ceumi thil a sertu Pathian sinin a rami an si. Amah cu aa thleng lo, vancung thil ceu hna le cu thil ceu hna thladem cu an i thleng lengmang nain anih cu aa thleng bal lo.” (Jeim 1:17) Jehovah nih kan nun nakhnga le kan i nuamh nakhnga a herhmi zei paoh a kan pek caah kan i lawm tuk. Pathian nih zeitluk in dah a kan dawt ti kha kan hngalh caah kan dawtnak kha langhter kan duh ve. Nangtah cutin na si ve maw?

6. Israel mi nih Jehovah sinin thluachuah hmuh peng an duh ahcun zeidah an tuah a herh?

⁶ Israel mi nih Jehovah sinin thilṭha tampi an hmuh. Jehovah nih a nawlbia in kum tampi chung lam a hruai hna i an nunnak ah a herhmi thil vialte a pek hna. (Deut. 4:7, 8) Israel mi nih mah nawlbia pawl an zulhnak thawngin Jehovah cung an i lawmhnak kha an langhter khawh. Tahchunhnak ah, Jehovah sin rai an thawi tikah ‘rawl an ṭuan hmasa bikmi chung i a ṭha bikbik’ kha an pek lai. (Ex. 23:19) Jehovah nawl kan ngaih i a ṭha bikmi kan pek ahcun Jehovah thluachuah kan hmu zungzal lai ti kha Israel mi nih an hngalh.—Deuteronomi 8:7-11 rel.

7. Jehovah kan dawt langhter awkah kan “chawva” kha zeitindah kan hman khawh?

⁷ Jehovah kha kan “chawva” kan peknak thawngin kan dawtnak kan langhter khawh. (Ptb. 3:9) Kan ngeihmi thil kha amah thangṭhatnak caah kan hmannak thawngin cutin kan langhter khawh. Tahchunhnak ah, kan Khrihfabu le vawleicung pumpi ah ṭuanmi Pennak rian bawmhnak caah thawhlawm kan pek khawh. Cuticun kan dihlak in kan rum ah siseh, kan si a fah ah siseh Jehovah kan dawtnak kha kan langhter khawh. (2 Kor. 8:12) Jehovah kan dawt langhter khawhnak a dang lam tampi a um rih.

8, 9. Jehovah kan dawtnak langhter khawhnak lamkhat cu zeidah a si? Mike le a chungkhar nih zeidah an tuah?

⁸ Pennak kha hmasa bik ah chiah awk le khuasak tintuknak ca lungretheih lo awkah Jesuh nih a kan cawnpiak. Kan herhmi kha kaan pek hna lai tiah vancung kan Pa nih bia aa kam. (Matt. 6:31-33) Jehovah kha kan zumh i a biakam ningin a tuah lai ti kha kan hngalh. Mi pakhat kha na dawt taktak ahcun amah cu na zumh ko lai. Cu bantukin Jehovah kha kan zumh deuhdeuh tikah kan dawtnak kan langhter deuhdeuh vemi a si. (Salm 143:8) Cucaah hitin kan i hal awk a si: ‘Kaa timhtuahmi thil le ka caan le ka thazaang ka hmanning nih Jehovah ka dawt taktak kha a langhter maw? Ka herhmi hmuh awkah Jehovah kha nifate kaa bochan maw?’

⁹ Unaupa Mike cu Jehovah kha aa bochan. A ngakchiat lio tein ramdang ah Pathian rian ṭuan kha a duh. Nupi a ngei i fa pahnih a ngeih hnu zongah mah duhnak kha a ngei rih. A herh deuhnak hmun ah Pathian rian a ṭuanmi unau pawl kong an rel tikah Mike le a chungkhar cu nunning sawhsawh tein nun awkah bia an khiak. An inn kha an zuar i ṭaihkhaan hmete ah an i ṭhial. Mike nih inn zohkhenhnak a simi a rian kha a ṭhumh i mah rian kha Internet hmangin ramdang in zeitindah tlangtlak khawh a si ti kha a cawn. Cucaah Mike le a chungkhar cu ramdang ah i ṭhial in Pathian rian an ṭuan kho i phungchimnak rian ah an i nuam tuk. “Matthai 6:33 i Jesuh bia a hmaan kha kanmah theng nih kan hmuh” tiah Mike nih a chim.

Jehovah nih Aan Cawnpiakmi Biatak kong kha Ruat

10. Siangpahrang David bantukin Jehovah kong kan cawnmi kha zeicah ṭha tein kan ruah awk a si?

¹⁰ Siangpahrang David nih hitin a rak ṭial: “Van nih khin Pathian sunparnak fiang tein a langhter i a tuahmi thil kha fiang tein a kan hmuhsak.” Hitin a ṭial chap: “BAWIPA phung cu a ṭhat a tling, nunnak thar petu a si. BAWIPA nawlbia cu bochan awk a tlak, fimnak a baumi fimnak petu a si.” David nih Jehovah i a ṭha tukmi nawlbia hna le aa dawh tukmi sermi thil kong a ruah tikah Jehovah he an i naih deuh i Jehovah a dawtnak kha langhter a duh. David nih hitin a ti: “Ka kaa chung bia hna le ka lungchung ruahnak hna cu nangmah cohlan awk tlak si ko hna seh, maw BAWIPA, ka Lungpi le ka Tlantu.”—Salm 19:1, 7, 14.

11. Jehovah kan dawtnak langhter awkah a kan pekmi hngalhnak kha zeitindah kan hman khawh? (A hramthawknak hmanthlak zoh.)

¹¹ Tuchan ah Jehovah nih a kong, aa tinhnak, a thil sermi le a Bia Baibal kong tampi a kan cawnpiak. Hi vawlei nih a sangmi fimcawnnak hna kha a hlorh. Asinain mah nih Jehovah an dawtnak le an zumhnak kha a tlauter tawn. Jehovah nih hngalhnak lawng si loin fimnak le hngalhthiamnak zong ngei hna seh ti a kan duh. Kan cawnmi kha kanmah le midang ṭhatnak caah hmanter a kan duh. (Ptb. 4:5-7) Tahchunhnak ah, midang kha “biatak” chim hna sehlaw khamhnak an hmuh nakhnga bawm hna seh ti a kan duh. (1 Tim. 2:4) Pathian Pennak kong le minung caah Pennak nih a kan tuahpiak hngami kong hna kha mikip sinah kan si khawh chungin kan chimnak thawngin Jehovah le minung kan dawt hnanak kha kan langhter khawh.—Salm 66:16, 17 rel.

12. Mino unaunu pakhat nih Jehovah pekmi laksawng he aa tlaiin zeidah a chim?

¹² Mino pawl zong nih Jehovah pekmi thil hna caah an i lawmh an langhternak thawngin Jehovah an dawtnak kha an langhter khawh. Shannon nih kum 11 a si lio i a tonmi thil kha aa cinken rih. Amah le kum 10 a simi a naunu cu a nu le a pa he “Pathian Sin Pumpeknak” timi pengkomh civui kha an zawh. Civui program pakhat ah mino dihlak kha hmunkhatte ah an ṭhutter hna. A hmasa ah cun a thin a phang. Asinain mino dihlak kha Mino Biahalnak—Hmual Ngeimi Lehnak timi cauk pakhat cio an pek hna tikah a khuaruah a har tuk. Mah a ṭha tukmi laksawng nih Jehovah he aa tlaiin zeitindah a umter? Hitin a chim: “Jehovah cu a um taktakmi a si ti le keimah theng a ka dawt tuk ti kha ka hun hngalh. A liannganmi Pathian, Jehovah sinin a ṭha tukmi laksawng kan hmuh caah kan i lawm tuk.”

Jehovah Chimhhrinhnak kha Cohlang

13, 14. Jehovah chimhhrinhnak kha zeitindah kan lehrulh awk a si, zeicah?

¹³ Baibal nih hitin a ti: “Zeicahtiah pa nih a duhmi a fapa cu a mawhchiat bangin BAWIPA nih a dawtmi kha a mawhchiat ve hna.” (Ptb. 3:12) Jehovah chimhhrinhnak kha kan cohlan i cawnpiaknak nawl kan pek ahcun a hmaanmi thil kha kan tuah lai i lungdaihnak kan hmu lai. “Dantatnak kan in tikah kan in lioah cun kan lung a kan lawmhtertu si loin kan ngaih a kan chiattertu a si.” (Heb. 12:11) Asinain Jehovah nih a kan chimhhrinh tikah zeitindah kan lehrulh awk a si? Jehovah chimhhrinhnak kha zei rel loin asiloah kan duh lo caah thinhun in zeitikhmanh ah kan um awk a si lo. Jehovah kan dawt caah a bia ngaih in a herhmi thlennak kan tuah awk a si.

¹⁴ Malakhi chan ah Judah mi tampi cu Jehovah nawl an ngai lo. An raithawimi kha Jehovah nih a duh lo zongah an zei a poi lo. Cucaah Jehovah nih fakpi in a chimhhrinh hna. (Malakhi 1:12, 13 rel.) A tak ti ahcun Jehovah nih atu le atu a chimhhrinh cang hna, asinain an ngai lo. Cucaah hitin a ti hna: “Thluachuahnak nan hmuhmi cu chiatserhnak caah ka canter lai, chiatsernak ah ka canter taktak lai.” (Mal. 2:1, 2) Jehovah chimhhrinhnak kha kan ngaih lo asiloah zei i kan rel lo ahcun Jehovah he kan i pehtlaihnak a cat lai ti cu a fiang ko.

15. Zei bantuk lungput dah kan hrial awk a si?

¹⁵ Satan vawlei nih i porhlawt awk le mahzawn lawng i ruah awkah mi kha a forh hna. Mi tampi nih chimhhrinh le cawnpiak kha an duh lo. Cheukhat tu cu an duh lo buin an ngaih. Kannih cu cutin kan si awk a si lo. Baibal nih “hi vawlei kalning hin kal ve lengmang ti hlah u” tiah a kan ti. Jehovah nih kan sinin aa ruahchanmi hngalhthiam le a duhmi tuah a hau. (Rom 12:2) Jehovah nih aa tlakmi caante ah a bupi hmangin a kan cawnpiak. Tahchunhnak ah, kanmah he nupa sining aa dangmi hna kha zetindah pehtlaih ding, zeitindah hawikom i thim ding, nuamhsaihnak kongah zeitindah biakhiahnak tuah ding ti bantuk hna kha ralrin a kan pek. Jehovah chimhhrinhnak kha lungtho tein kan cohlan i a lungton awkah a herhmi thlennak kan tuah ahcun a lamhruainak kan sunsak i amah kan dawtnak kha kan langhter a si lai.—Johan 14:31; Rom 6:17.

Bawmhnak le Huhphenhnak Hmuh awkah Jehovah kha i Bochan

16, 17. (a) Biakhiahnak kan tuah hlanah Jehovah ruahnak hngalh awkah zeicah kan i zuam awk a si? (b) Israel mi nih Jehovah i bochan loin zeidah an tuah?

¹⁶ Ngakchia tete nih bawmhnak le huhphenhnak hmuh awkah an nu le an pa kha an i bochan hna. A cuza cang mi hmanh nih nulepa sinah bawmhnak an hal tawn hna. Anmah tein biakhiahnak an tuah khawh ko nain an nu le an pa nih a ṭhami ruahnak an kan cheuh khawh ti kha an hngalh. Kan Pa, Jehovah zong nih kanmah tein biakhiahnak nawl a kan pek. Asinain Jehovah kha kan i bochan i kan dawt caah biakhiahnak kan tuah hlanah Jehovah sinah bawmhnak kan hal i a ruahnak hngalh awkah kan i zuam. Jehovah kha kan i bochan ahcun a hmaanmi thil tuah khawh awkah thiang thlarau hmangin a kan bawmh lai.—Fil. 2:13.

¹⁷ Samuel chan ah Israel mi cu Filistin mi he ral an i do i an rak sung. Mah tikah zeidah kan tuah lai ti kha Jehovah sinah hal loin hitin an ti: “BAWIPA cu kan sinah a rat i kan ral hna ṭhawnnak chungin a kan khamh nakhnga BAWIPA biakamnak kuang kha Shiloh in hika ah hin ratpi u sih.” A phi chuak cu zeidah a si? “I tukthahnak fakpi a um, zeitintiah Israel mi ke ralkap sangthum an thi. Cun Pathian biakamnak kuang kha an tlaih.” (1 Sam. 4:2-4, 10, 11) Israel mi nih Biakamnak Kuang kan i put ahcun Jehovah nih a kan bawmh lai i a kan huhphenh lai tiah an ruah. Jehovah sinah bawmhnak an hal lo i a ruahnak hngalh awk zongah an i zuam lo. Mah canah anmah ruahnak in thil an tuah caah harnak nganpi an tong.—Phungthlukbia 14:12 rel.

18. Jehovah i bochannak he aa tlaiin Baibal nih zeidah aan cawnpiak?

¹⁸ Jehovah a daw i aa bochanmi Salm caṭialtu nih hitin a ṭial: “Pathian cu kaa bochan ṭhan lai i ka Khamhtu le ka Pathian cu ka thangṭhat ṭhan lai. Ka lungre a thei, cucaah cun amah cu ka hngalh ṭhan.” (Salm 42:5, 6) Nangtah Jehovah he aa tlaiin cutin na um maw? Jehovah he naih tein na um maw? Jehovah kha naa bochan maw? I bochan deuh awkah cawn na hau men ko lai. Baibal nih hitin a kan ti: “BAWIPA kha na lungchung dihlak in i bochan law nangmah fimnak kha i rinh hlah. Na kalnak lam kip ah amah kha hngal law Amah nih na lam kha a tluanter hna lai.”—Ptb. 3:5, 6.

19. Jehovah na dawtnak kha zeitindah na langhter lai?

¹⁹ Jehovah nih a kan dawt hmasanak thawngin dawtnak ngeih ve awkah a kan cawnpiak. Jehovah nih kan cung i a langhtermi dawtnak kha i cinken zungzal hna u sih. Cun kan lungthin, kan ruahnak, kan nunnak le kan thazaang dihlak in kan dawt kha langhter hna u sih.—Mar. 12:30.