Jehovah Nih Vawlei Kha Paradis Ah Ka Canter Lai Tiah Bia Aa Kam

1. Profet Isaiah nih a phunhawi Israel mi hna sinah zei thawngpang dah a thanh?

PROFET Isaiah nih Jehovah kha “a hmaanmi Pathian” in a langhter. “A hmaan” tiah lehmi biafang cu “amen” timi sullam a ngei. (Isa. 65:16.) “Amen” timi sullam cu “cutin si ko seh” asiloah “si hram ko seh” tinak a si. Jehovah asiloah Jesuh kong he aa tlaiin Baibal ah “amen” tiah a hman ahcun mah cu a hmaan hrimhrim ti aamah khaannak a si. Cucaah Isaiah nih Israel mi hna sinah hitin a thanh: Jehovah nih a chimchungmi bia cu zumhawk a tlak zungzal. Jehovah nih a biakam vialte a tlinternak thawng in zumhawk a tlakmi a si kha a langhter.

2. Hmailei kong he aa tlaiin Jehovah biakam kha zeicah kan zumh khawh, zei biahalnak dah kan i ruah hna lai?

² Hmailei kong he aa tlaiin Jehovah biakam tah kan zum kho maw? Pathian biakam zumh khawh a sinak a ruang he aa tlaiin lamkaltu Paul nih Isaiah chan a dih hnu kum 800 dengmang ah hitin a fianter: “Pathian nih a lih a chim kho lo.” (Heb. 6:18) Tikhor pakhat in ti thlum he ti al he a chuah khawh lo bantuk in biatak hrampi a simi Jehovah zong lih a chim kho lo. Cucaah hmailei a biakam i telin Jehovah chimmi vialte cu tling tein zumh khawh a si. Hi capar ah mah biahalnak hi kan i ruah hna lai: Hmailei kong he aa tlaiin Jehovah nih zei bia dah a kan kamh? A biakam a tlinter lai timi kong he aa tlaiin Jehovah nih zeitindah aamah a khaan?

Jehovah Nih Zei Bia Dah Aa Kam?

3. (a) Pathian salle nih zei biakamnak dah an duh? (Biathlam 21:3, 4) (b) Mah biakam kong kan chimh hna tikah mi cheukhat nih zeitindah an lehrulh?

³ Kan i ruah dingmi biakam cu vawleicung ah a ummi Pathian salle dihlak nih an sunsak tukmi a si. (Biathlam 21:3, 4 rel.) Jehovah biakammi caan a phanh tikah “thihnak a um ti lai lo, ngaihchiatnak le ṭahnak le fahnak zong a um ti lai lo.” Kan lak i tampi nih midang sin i Paradis nunnak kong kan chim tikah mah hnemhnak taktak a simi Baibal caang kha kan hman hna. Mah biakam kong kan chimh hna tikah mi cheukhat nih zeitindah an lehrulh? “Mah cu a ṭha tuk ko nain a tling lai tiah ka zum lo” tiah an ti men lai.

4. (a) Jehovah nih kan chan kong he aa tlaiin zeidah a hngalh chung? (b) Baikamnak a ser leng ah zeidah a tuah rih?

⁴ Jehovah nih Johan kha Paradis kong he aa tlaimi mah biakam a ṭialter lioah tu chan i Pennak kong kan chim tikah mah ruahchannak kong midang sinah an chim lai ti kha a hngalh. Cun mi tampi nih “thil thar” he aa tlaimi mah biakam kha zumh awkah an i harh lai ti zong a hngalh. (Isa. 42:9; 60:2; 2 Kor. 4:3, 4) Biathlam 21:3, 4 ah a langhtermi thluachuah cu a tling lai ti kha kanmah he midang he zeitindah kan zumh khawh? Jehovah nih a ṭha tukmi mah biakam kha a kan chimh lawng si loin zumh khawh a sinak a ruang zong kha a kan chimh. Zei a ruang hna dah a kan chimh?

Jehovah Nih A Biakam He Aa Tlaiin Aamah A Khaan

5. Pathian biakam a si mi Paradis kong zumh awkah zei a ruang dah kan ngeih, mah biakam kong kha khoika dah kan hmuh khawh?

⁵ A changtu Baibal caang hna ah Paradis he aa tlaiin Jehovah biakam zumh khawh a sinak a ruang kha kan hmuh. Hitin a ti: “Bawiṭhutdan i a ṭhumi nih cun ‘Atu cu thil vialte kha a thar in ka ser dih cang hna’ a ti. A ka thawh i, ‘Hi bia hi ṭial hna zeicahtiah a hmaanmi le zumhawk tlak a simi bia an si’ a ti. Cun aa thawh i ‘Rian ka liim dih cang. Kei cu Alfa le Omega, hramthawknak le donghnak ka si.’”—Biat. 21:5; Biat. 21:6a.

6. Baithlam 21:5, 6 ah langhtermi aamahkhannak nih Pathian biakam cung ah zeicah kan zumhnak a fehter chin?

⁶ Mah Baibal caang nih Pathian biakam cung ah kan zumhnak kha zeicah a fehter chin? Mah Baibal caang he aa tlaiin Biathlam Cauk timi ah hitin a ti: “Jehovah theng nih zumhfekmi hna caah mah hmailei thluachuah hmuh khawhnak aamahkhaannak asiloah cabiahren ah a min a thut bantuk a si.”b Pathian biakam kong kha Biathlam 21:3, 4 ah a langhter. Asinain caang 5 le 6 cu Jehovah aamahkhaannak a si caah a biakam a tling lai ti kha kan zumh nakhnga Jehovah nih a min a thut. Mah kha kan zumh khawh nakhnga Jehovah nih zeitindah aamah a khaan ti kha zoh hna hmanh u sih.

7. Caang 5nak bia cu aho nih dah a thawkmi a si, mah cu zeicah aa thleidan?

⁷ Caang 5nak ah “bawiṭhutdan i a ṭhumi nih cun” tiin a thawk. (Biat. 21:5a) Mah bia cu Jehovah theng nih Biathlam cauk ah a chimmi bia pathum lak ah pakhat a si. Cucaah mah bia aamah a khaantu cu a ṭhawngmi vancungmi le a tho ṭhanmi Jesuh si loin amah Jehovah theng kha a si. Mah nih a dang a chim dingmi bia zong zumh khawh a si hrimhrim ti kha a langhter. Zeicah? Jehovah cu “lih a chim kho lomi” a si caah a si. (Titas 1:2) Cucaah Biathlam 21:5, 6 ah a langhtermi bia cu a tling hrimhrim lai ti kha kan zumh khawh.

“Atu Cu Thil Vialte Kha A Thar In Ka Ser Dih Cang Hna”

8. A biakam a tling hrimhrim lai ti langhter awkah Jehovah nih zeidah a chim? (Isaiah 46:10)

⁸ Cun Jehovah nih hitin a ti: “Atu cu thil vialte kha a thar in ka ser dih cang hna.” Mah cu hmailei ah a tuah dingmi kong kha a chimmi a si. Asinain a biakam cu a tling hrimhrim lai ti kha a fian tuk caah ka ser dih cang hna tiah a ti.—Isaiah 46:10 rel.

9. (a) “Thil vialte kha a thar in ka ser dih cang hna” timi Baibal caang nih Jehovah nih a tuah dingmi zei thil pahnih dah a langhter? (b) Atu i “van” le “vawlei” cu zei ah dah a can lai?

⁹ “Thil vialte kha a thar in ka ser dih cang hna” timi cu zei sullam dah a si? Mah Baibal caang nih Jehovah nih a tuah dingmi thil pahnih, airolh le hmasa sining ah siter ṭhan kha a chim duhmi a si. Pakhatnak, Jehovah nih zeidah a airolh lai? Biathlam 21:1 ah hitin a ti: “Van hmasa le vawlei hmasa kha an lo cang.” “Van hmasa” timi nih Satan le a khuachia kut tang ah a ummi cozah pawl kha a chim duhmi hna a si. (Matt. 4:8, 9; 1 Johan 5:19) Baibal ah “vawlei” tiah a hman tikah vawleicung minung pawl kha a chim duhmi an si tawn. (Gen. 11:1; Salm 96:1) Cucaah “vawlei hmasa” timi nih tuchan i miṭhalo pawl kha a chim duhmi hna a si. Jehovah nih atu i “van” le “vawlei” hi remh canah a hrawh dih lai. Atu hi van le vawlei kha “van thar le vawlei thar” in a airolh lai. Van thar le vawlei thar timi nih midang pawl a uk dingmi cozah thar kha a chim duhmi a si.

10. Jehovah nih zeidah a thar bantuk in a ser lai?

¹⁰ Jehovah nih a dang zei lam in dah thil kha a thar in a ser lai? (Biat. 21:5) Jehovah nih vawlei le minung a damter hnanak thawng in a thar bantuk in a siter hna lai. Isaiah nih a chimchung bantuk in vawleicung pumpi cu Eden dum bantuk a nuam tukmi hmun a si cang lai. Cun kan dihlak in a tlingmi ngandamnak a kan peknak thawng in a thar bantuk in a kan ser lai. A ke a beimi, a mit a cawmi, a hna a chetmi le a holh kholomi hna kha a damter hna lai i a thimi hmanh kha a nunter ṭhan hna lai.—Isa. 25:8; 35:1-7.

“A Hmaanmi Le Zumh Awk Tlak A Simi Bia An Si . . . Rian Ka Liim Dih Cang”

11. Jehovah nih Johan kha zei tuah dah a fial, zeicah?

¹¹ Pathian nih zeidah aamah a khaan rih? Jehovah nih Johan kha hitin a ti: “Hi bia hi ṭial hna, zeicahtiah a hmaanmi le zumhawk tlak a simi bia an si.” (Biat. 21:5) Jehovah nih “ṭial hna” ti lawng in a ti lo. A ruang zong kha a chimh. Hitin a ti: “Zeicahtiah a hmaanmi le zumh awk tlak a simi bia an si.” Mah cu Pathian bia cu a hmaan i zumh awkah a tlak tinak a si. Cucaah Johan nih Pathian nawlpekmi ning in a “ṭial” caah kan i lawm tuk. Cutin a ṭial caah Paradis he aa tlaiin Pathian biakam kong kha kan rel khawh i kan hngahmi a ṭha tukmi thluachuah kong zong kan ruah khawh.

12. Jehovah nih zeicah “rian ka liim dih cang” tiah a ti khawh?

¹² Pathian nih zeidah a chimh chap? “Rian ka liim dih cang.” (Biat. 21:6) Jehovah nih mah biakam cu a tling cang tiah zeicah a ti? A biakam tlinter lo awkah zei hmanh nih a kham khawh lo caah a si. Cun Jehovah nih a biakam cu a tling hrimhrim lai ti aamahkhaannak caah thil cheukhat kong zong a chim rih. Mah cu zeidah a si?

“Kei Cu Alfa Le Omega Ka Si”

13. Jehovah nih zeicah ‘Kei cu Alfa le Omega ka si’ tiah a ti?

¹³ A hmasa ah a langhter bantuk in amah Jehovah theng nih Johan sinah langhnak in voithum tiang bia a chim. (Biat. 1:8; 21:5, 6; 22:13) A voithum ning in Jehovah nih hitin a ti: “Kei cu Alfa le Omega ka si.” Greek biafang ah alfa timi cu hramthawknak tinak a si i omega timi cu donghnak tinak a si. Cucaah Jehovah nih “Alfa le Omega” ka si a timi nih pakhatkhat tuah ding in a thawk tikah a dongh tiang hlawhtling tein a tuah lai ti kha a chim duhmi a si.

14. (a) Jehovah nih langhternak in zei tikah dah “Alfa” ka si tiah a ti lai i “Omega” tiah zeitikah dah a chimte lai? (b) Genesis 2:1-3 ah zei aamahkhaannak bia dah kan hmuh?

¹⁴ Jehovah nih Adam le Evi kha minung ca le vawlei ca i aa tinhnak kong a chimh hna. Baibal ah hitin a ti: “Thluachuahnak a pek hna i ‘tefa tampi in ngei u law nan tefa cu vawleicung khuazakip ah khat hna seh.’” (Gen. 1:28) Mah cu Jehovah nih “Alfa” tiah a timi bantuk a si. A biakam he aa tlaiin hitin fiang tein a chim: Nawl a ngai i mitling a simi Adam le Evi tefa pawl vawleicung ah an khah lai caan le vawlei paradis an canter lai caan a ra lai. Mah tikah Jehovah nih “Omega” tiah a ti lai. Jehovah nih “vawlei le vancung i a ummi thil vialte” a ser hna hnuah Jehovah nih aamah a khaanmi a um. Mah cu Genesis 2:1-3. (Rel.) ah kan hmuh khawh. Jehovah nih ni sarihnak ni cu ni thiang a si tiah a ti. Mah cu zei sullam dah a si? Jehovah nih minung le vawlei caah aa tinhnak cu ni sarih a dongh tikah a tlinter lai tinak a si.

15. Satan nih minung ca i Pathian tinhnak kha zeicah a hrawh khawhmi bantuk a lawh?

¹⁵ Adam le Evi nih an ralchanh hnuah misual an hung si i an tefa pawl nih sualnak le thihnak ro an co. (Rom 5:12) Mah ruang ah a tlingmi minung in vawlei khah dih ding timi Jehovah biakam cu a tling kho lo dingmi a lo. Asinain Satan nih Jehovah kha a biakam tlinter lo awkah a kham kho maw? Satan nih Jehovah cu thim awk a ngei ti lo tiah a ruah khawh men. Aa thim khawhmi pakhat cu minung ca i a biakam tlinter awkah Adam le Evi kha thah in a dang mitling ser kha a si ti zong in a ruah khawh men. Asinain Pathian nih cutin a tuah ahcun Khuachia nih Pathian cu lih a chimmi a si tiah sual a puh lai. Zeicah? Genesis 1:28 ah a chim bantuk in Jehovah nih Adam le Evi sinah nan tefa cu vawleicung khuaza kip ah khat hna seh tiah a ti caah a si.

16. Satan nih Jehovah kha a hlawh a tling lomi in sual ka puh khawh tiah zeicah a ruah khawh men?

¹⁶ Pathian nih a dang zei thimnak dah a tuah lai tiah Satan nih a ruah khawh men? Jehovah nih Adam le Evi kha fa hrinnak nawl cu a pek ko hna lai nain an fale cu zeitikhmanh ah mitling an si kho lai lo tiah a ruah khawh men. (Pct. 7:20; Rom 3:23) Cutin a si ahcun Khuachia nih Jehovah kha a hlawh a tling lomi pakhat in sual a puh lai ti cu a fiang ko. Zeicah? A tling i nawl a ngaimi Adam le Evi tefa pawl vawleicung Paradis ah khah dih ding timi Pathian biakam a tlin khawh lai lo caah a si.

17. Jehovah nih Satan le hmasa bik nupa hna ralchanhnak kha zeitindah a tawnghtham, a phichuak cu zeidah a si lai? (hmanthlak zong zoh)

¹⁷ Jehovah nih Satan le hmasa bik nuva hna ralchanhnak a tawnghtham ning nih Satan cu a khuaruah a harter. (Salm 92:5) Jehovah nih Adam le Evi kha fahrinnak nawl a pek hna. Mah nih Jehovah cu lih a chimmi si loin a biakam ning in a tlintertu a si kha a langhter. Cun Jehovah nih thil cheukhat a tuah ahcun zei hmanh nih a kham kho lo ti zong a langhter. Nawl a ngaimi Adam le Evi tefa khamh awkah “tefa” a chuahternak thawng in a biakam a tlin nakhnga a tuah. (Gen. 3:15; 22:18) Jehovah nih tlanhnak man a timhtuah lai tiah Satan nih a ruat men lai lo. Zeicah? Mah timhtuahnak cu mahzawn ruat lo dawtnak cung ah hram aa bunhmi a si caah a si. (Matt. 20:28; Johan 3:16) Satan cu amah zawnlawng aa ruatmi a si caah mah ziaza kha a ngei lo. Cucaah tlanhnak man timhtuahnak ruang ah zeidah a cang lai? Kum thongkhat uknak a dih hnuah nawl a ngaimi Adam le Evi tefa cu Jehovah nih a hmasa bik aa tinhmi ning in vawleicung paradis ah an nung lai. Mah caan cu Jehovah nih “Omega” a ti caan a si lai.

Paradis Kong He Aa Tlaiin Jehovah Biakam Cung Ah Zumhnak Fehter Khawh Ning

18. Pathian nih zei aamahkhannak bia pathum dah a kan pek? (“Jehovah Biakam Kan Zumh Khawhnak A Ruang Pathum” timi rinli kulh zong zoh.)

¹⁸ Hi capar ah vawlei cu Paradis ah a cang lai ti kan zumh khawhnak a ruang kha kan i ruah cang hna. Midang nih mah cu a cang hrimhrim lai ti kha an zumh khawh nakhnga zeitindah kan chimh khawh hna? Pakhatnak, Jehovah theng nih a kan kamhmi biakamnak a si. Baithlam Baibal ah hitin a ti: “Bawiṭhutdan i a ṭhumi nih cun ‘Atu cu thil vialte kha a thar in ka ser dih cang hna.’” Jehovah cu a biakam tlinter awkah fimnak, ṭhawnnak le duhnak a ngei. Pahnihnak, mah cu a fiang tukmi a si caah Jehovah nih a biakam kha a tling cangmi bantuk in a hmuh. Cucaah hitin a ti: “Hi bia hi . . . a hmaanmi le zumhawk tlak a simi bia an si . . . Rian ka liim dih cang.” Pathumnak, Jehovah nih pakhatkhat tuah ding in a thawk tikah zei thil hmanh nih a kham kho lo. Cucaah hitin a ti: ‘Kei cu Alfa le Omega ka si.’ Jehovah nih Satan cu lih a chimmi le a hlawh a tling lomi a si kha a langhter lai.

19. Mi nih Pathian biakam a simi Paradis kong he aa tlaiin lunghrinnak an ngeih ahcun zeidah na tuah khawh?

¹⁹ Phungchim rianṭuannak i na tonmi hna sinah Pathian aamahkhaannak kong na chimmi cu Jehovah biakam cung ah na zumhnak na fehtermi a si. A dang caan ah Biathlam 21:4 ah a langhtermi Paradis biakam kong kha na relpiak hna tikah “mah cu a ṭha tuk ko nain a tling lai tiah ka zum lo” tiah pakhatkhat nih an in ti ahcun zeidah na tuah khawh? Caang 5 le caang 6 kha na relpiak khawh hna i na fianter khawh. Jehovah theng nih a biakam cung ah a min a thutmi bantuk in aamah a khaanmi bia kha hmuhsak.—Isa. 65:16.