Pakhat Le Pakhat I Dawt Peng Khawh Ning

1-2. (a) Lamkaltu Paul nih dawtnak cu “a ngan bikmi” sining a si tiah zeicah a chim khawh? (b) Zei baihalnak dah kan i ruah hna lai?

LAMKALTU Paul nih zumhnak, ruahchannak le dawtnak kong a chim lioah “cu [ziaza] hna lak i a ngan bikmi cu dawtnak a si” tiah a ti. (1 Kor. 13:13) Paul nih zeicah cutin a chim khawh? Kan i ruahchanmi hmailei vawlei thar biakam a tlin dih tikah ruahchannak le zumhnak ngeih a hau ti lai lo. Asinain Jehovah le mi cung ah cun dawtnak kan ngeih peng a hau lai. Cucaah dawtnak cu zungzal in langhter peng dingmi a si.

² Kan i dawt zungzal khawh nakhnga biahalnak pathum i ruah hna u sih. Pakhatnak, zeicah pakhat le pakhat kan i dawt awk a si? Pahnihnak, pakhat le pakhat cung ah zeitindah dawtnak kan langhter khawh? Pathumnak, pakhat le pakhat cung ah zeitindah dawtnak kan fehter khawh?

Zeicah Pakhat Le Pakhat Kan I Dawt Awk A Si?

3. Pakhat le pakhat i dawt awkah zei a ruang dah kan ngeih?

³ Pakhat le pakhat i dawt cu zeicah a biapit tuk? Pakhat le pakhat kan i dawt tikah a hmaanmi Khrihfa kan si ti kan langhtermi a si. Jesuh nih a zultu pawl kha hitin a ti hna: “Pakhat le pakhat nan zawn nan i ruah ahcun mi vialte nih hi hna hi amah a zultu kha an si tiah an in hngalh hna lai.” (Johan 13:35) Mah leng ah pakhat le pakhat i dawtnak nih lungrualnak a umter. Paul nih dawtnak cu “zeizong vialte i rem ṭhipṭhep tein a funtomtu a si” tiah a ti. (Kol. 3:14) Asinain pakhat le pakhat kan i dawt awk a sinak a dang a biapimi a ruang zong a um rih. Lamkaltu Johan nih zumtukhat a unau pawl sinah hitin cakuat a ṭial: “Pathian a dawmi nih cun nan unau kha nan dawt hrimhrim hna lai.” (1 Johan 4:21) Cucaah pakhat le pakhat kan i dawtnak kan langhter tikah Pathian kan dawt kan langhtermi zong a si.

4-5. Pathian kan dawtnak le pakhat le pakhat kan i dawtnak zeitindah aa pehtlaih ti kha tahchunhnak pe.

⁴ Pathian le unau pawl kan dawtmi hna cu zei ti lam in dah aa pehtlaih? Tahchunhnak ah, kan lung le a dang kan pum cheubang aa pehtlaih ning kha ruathmanh. Siibawi pakhat nih kan kut hliah in kan thi tur a tahnak in kan lung tha a der le der lo kha a hngalh khawh. Mah in zeidah kan hngalh khawh?

⁵ Siibawi pakhat nih kan thi tur ning tah in kan lung tha a der le der lo a hngalh bantuk in midang zei tluk in dah kan dawt hna ti zoh in Pathian zeitluk in dah kan dawt ti kha hngalh khawh a si. Zumtukhat unau pawl kan dawt hnanak a zor ahcun Pathian kan dawtnak zong a zor tinak a si. Asinain zumtukhat unau pawl cung ah dawtnak kan langhter peng ahcun Pathian kan dawtnak cu a fek peng tinak a si.

6. Unau pawl kan dawt hnanak a zor ahcun mah cu zeicah ṭih a nun tuk? (1 Johan 4:7-9, 11)

⁶ Unau pawl kan dawt hnanak a zor ahcun mah cu ṭih a nung tukmi a si. Zeicah? Mah nih thlaraulei ah kan tha a der ti kha a langhter caah a si. Lamkaltu Johan nih hitin fiang tein ralrin a kan pek: “A hmuhmi a unau hmanh a dawt khawh lo ahcun a hmuh lomi Pathian cu a daw kho lai lo.” (1 Johan 4:20) Mah in zeidah kan cawn khawh? ‘Pakhat le pakhat kan i dawt’ lawng ah Jehovah lung kan lawmhter khawh lai.—1 Johan 4:7-9, 11 rel.

Pakhat Le Pakhat Cung Ah Zeitindah Dawtnak Kan Langhter Khawh?

7-8. Pakhat le pakhat kan i dawtnak kan langhter khawh ning lam cheukhat cu zei hna dah an si?

⁷ Baibal ah “pakhat le pakhat i daw u” timi nawlbia kha atu le atu kan hmuh. (Johan 15:12, 17; Rom 13:8; 1 Thes. 4:9; 1 Pet. 1:22; 1 Johan 4:11) Asinain dawtnak cu kan lungthin chung ah a ummi a si caah ahohmanh nih an hmu kho lo. Cucaah pakhat le pakhat kan i dawtnak kha zeitindah kan langhter khawh? Kan biachim le kan tuahsernak in kan langhter khawh.

⁸ Unau pawl kan dawt hnanak kan langhter khawh ning lam tampi a um. Tahchunhnak cheukhat in zohhmanh hna u sih: “Pakhat le pakhat biatak i chim u.” (Zek. 8:16) “Pakhat le pakhat kha i rem tein um u.” (Marka 9:50) “Pakhat le pakhat kha i hmaizah” peng u. (Rom 12:10) “Pakhat le pakhat i cohlang cio u.” (Rom 15:7) “Pakhat le pakhat nan i ngaithiam [peng] lai.” (Kol. 3:13) “Pakhat le pakhat nan thilrit kha i chawng u.” (Gal. 6:2) “Pakhat le pakhat i hnem peng u.” (1 Thes. 4:18, NWT) “Pakhat le pakhat . . . i bawm” peng u. (1 Thes. 5:11) “Pakhat le pakhat thla i campiak u.”—Jeim 5:16.

9. Midang hnemh cu dawtnak langhternak caah zeicah a biapimi lam a si? (Hmanthlak zong zoh.)

⁹ Pakhat le pakhat cung ah dawtnak kan langhter khawh ning lamkhat kha i ruah hna hmanh u sih. Paul nih hitin a ti: “Pakhat le pakhat i hnem peng u.” Midang hnemh cu dawtnak langhter awkah zeicah a biapimi lam a si? Baibal cherhchanhmi cauk pakhat ning in Paul hmanmi “hnemh” timi bia nih “harnak a tongmi pawng ah dir in hnemh” kha a chim duhmi a si. Cucaah harnak a tongmi unau pakhat kan hnemh tikah zumhfek tein Jehovah a biak peng khawh nakhnga kan bawmhmi a si. Cun unau pakhatkhat kan hnemh hna fatin kan dawt hna ti kan langhtermi zong a si.—2 Kor. 7:6, 7, 13.

10. Zaangfahnak le hnemhnak cu zeitindah aa pehtlaih?

¹⁰ Zaangfahnak le hnemhnak cu aa pehtlaimi a si. Zei ti lam in dah? Zaangfahnak a ngeimi pakhat nih midang kha hnemh a duh hna i anmah bawmh awkah thil cheukhat tuah a duh. Cucaah zaangfahnak kan ngeih hmasa lawng ah midang kha kan hnemh khawh hna lai. Midang cung ah Jehovah zaangfahnak a ngeihmi nih midang hnemh ding in a forh ning kong kha Paul nih a fianter. Paul nih Jehovah kha “zaangfahnak in a khatmi kan Pa, zeizong vialte ah a kan bawmtu” tiah a ti. (2 Kor. 1:3) Paul nih midang cung ah kan ngeihmi zaangfahnak kong langhter awkah “zaangfahnak in a khatmi” timi bia kha a hman. Cucaah Pathian cu mi cung ah zaangfahnak a ngei bikmi a si caah “kan Pa asiloah zei zong vialte Hrampi” tiah a auhnak a si. Zangfahnak nih Pathian kha “harnak kan innak kip ah” hnemh ding in a forh. (2 Kor. 1:4) Ti kik nih a ti a halmi pakhat kha hrimhnak a pek khawh bantuk in Jehovah nih harnak a tongmi hna kha hrimhnak a pek khawh hna i a hnemh khawh hna. Jehovah kha i zohchunh in midang kha zeitindah zaangfahnak kan langhter khawh i kan hnemh khawh hna? Lamkhat cu zaangfahnak le midang hnemh duhnak sining ngeih awkah kan i zuamnak thawng in a si. Mah sining cheukhat cu zei hna dah an si?

11. Kolose 3:12 le 1 Peter 3:8 ning in midang dawt awk le hnemh awkah a dang zei sining hna dah kan ngeih a hau?

¹¹ Ni fatin ‘pakhat le pakhat i bawmh peng’ awk le i dawt peng awkah zeinihdah a kan bawmh lai? Zawnruahnak, unau dawtnak le zaangfahnak ti bantuk sining hna kha kan ngeih a hau. (Kolose 3:12; 1 Peter 3:8 rel.) Mah sining hna nih zeitindah a kan bawmh lai? Midang cung ah zaangfahnak le zawnruahnak taktak kan ngeih ahcun harnak an ton tikah bawmh kan duh hna lai. Jesuh nih “kaa nih cun lung chung i a khatmi kha pei a chim cu. Miṭha nih cun thil ṭha aa khonmi chung khan thil ṭha a chuah hna” tiah a ti. (Matt. 12:34, 35) An herh lio caan te ah unau pawl hnemh cu kan dawt hna ti kan langhter khawhnak a biapi bikmi lam a si.

Pakhat Le Pakhat Cung Ah Zeitindah Dawtnak Kan Fehter Khawh?

12. (a) Zeicah ralring tein kan um peng a herh? (b) Zei biahalnak dah kan i ruah hna lai?

¹² Kan dihlak in ‘pakhat le pakhat i dawt peng’ kan duh. (1 Johan 4:7) Asinain Jesuh nih mi cu “an dawtnak kha a kik lai” tiah ralrin a kan pekmi i cinken cu a biapi tukmi a si. (Matt. 24:12) Jesuh nih a zultu tam deuh cu an dawtnak a kik lai tiah a ti lo. Asinain dawtnak a kikmi hi vawlei lungput nih a kan iap nakhnga lo kan i ralrin a hau. Kan unau pawl kan daw peng hna maw, daw peng hna lo ti hngalh awkah zeinihdah a kan bawmh lai?

13. Unau pawl kan dawt hnanak a feh le feh lo hngalh awkah zeinihdah a kan bawmh lai?

¹³ Lamkhat cu kan nunnak ah thil sining cheukhat zeitindah kan lehrulh ti i dothlat kha a si. (2 Kor. 8:8) Cu bantuk thil sining lak ah pakhat kong kha lamkaltu Peter nih hitin a langhter: “Zei dang vialte nakin pakhat le pakhat lungtak tein i daw u, zeicahtiah dawtnak nih cun sualnak tampi kha a khuh khawh.” (1 Pet. 4:8) Cucaah unau pawl nih kan lung a kan fahtermi thil an tuah asiloah an chim tikah an cung ah kan dawtnak a fek maw, fek lo ti kha kan lehrulh ning nih a langhter lai.

14. Kuatkhat Peter 4:8 ning in zei bantuk dawtnak phun dah kan herh? Tahchunhnak pe.

¹⁴ Peter chimmi bia kha ṭha tein ruathmanh hna u sih. Caang 8nak a hramthawklei ah ‘lungtak tein i dawt’ a herhnak kong kha a langhter. Peter chimmi “lungtak” timi biafang cu “samh” timi sullam a ngei. Cun a donghnaklei ah lungtak tein kan i dawt ahcun zeidah kan tuah lai timi kong zong a langhter. Lungtak tein i dawtnak nih unau pawl sualnak kha khuhpiak awkah a kan bawmh. Aa rinnak le a kawhnak tampi a ummi cabuai pakhat kha na mitthlam ah cuanter hmanh. Cabuai aa rinnak le a kawhnak pakhat, pahnih lawng kha si loin a dihlak in khuh khawh awkah a khuh kha samh khawh a si. Cu bantuk in unau pawl kha lungtak tein kan dawt hna ahcun an tlin lonak pakhat asiloah pahnih lawng si loin an “sualnak tampi” kha kan khuh khawh asiloah kan ngaihthiam khawh hna lai.

15. Unau pawl kan dawt hnanak a feh peng ahcun zeidah kan tuah khawh lai? (Kolose 3:13)

¹⁵ A har tuk hmanh ah kan unau pawl tlinlonak kan ngaihthiam khawh hna tiang kan dawtnak kha kan fehter a hau. (Kolose 3:13 rel.) Midang kan ngaihthiam hna tikah kan dawtnak a fek ti le Jehovah lunglawmhter kan duh ti kan langhtermi a si. Midang tuahmi ruang ah thinhun lo awk le ngaihthiam awkah zeinihdah a kan bawmh khawh rih?

16-17. Midang sualnak hmete biapi ah chiah lo awkah zeinihdah a kan bawmh khawh rih? Tahchunhnak pe. (Hmanthlak zong zoh.)

¹⁶ Unau pawl ṭhatlonak si loin an ṭhatnak cung tu ah lungthin pe. Mah tahchunhnak hi ruathmanh. Unau phu pakhat he hnianghrawmnak nan tuah tiah na mitthlam ah cuanter hmanh. Nan i nuam tuk i a donghnak ah hman nan i thla hna. A pakhatnak hmanthlak a ṭhat lo sual ah tiin a dang voihnih nan i thla ṭhan. Atu cu hmanthlak pathum a si cang. Asinain hmanthlak pakhat ah unaupa pakhat cu a ni lo. Mah tikah zeidah na tuah lai? Mah unaupa i telin a dang unau pawl an nih dihmi hmanthlak pahnih na ngeih rih caah mah hmanthlak cu na phiat ko lai.

¹⁷ Kan i fimmi hmanthlak cu kan lungthin chung ah a ummi he tahchunh khawh a si. Unau pawl he philh khawh lomi caanṭha hna kan ngei. Asinain cu bantuk caan hna ah unaupa asiloah unaunu pakhat nih zaangfahnak ngei loin bia a chim i thil a tuah caah kan lung a fah caan hna a um kho men. Mah tikah zeidah kan tuah awk a si? Hmanthlak pakhat kan phiat bantuk in mah kha philh awkah kan i zuam awk a si ko lo maw? (Ptb. 19:11; Efe. 4:32) Anmah he philh khawh lomi caanṭha tampi kan rak ngeih caah an sualnak hmete kha kan ngaihthiam khawh ko hna. A nuam tukmi philh khawh lomi caan hna kha kan sunsak i, i cinken peng kan duh.

Tuchan Ah Zeicah Dawtnak Langter A Herh Khun?

18. Hi capar ah dawtnak kong he aa tlaiin zei a biapimi kong dah kan i ruah hna?

¹⁸ Pakhat le pakhat cung ah zeicah a fekmi dawtnak langhter peng kan duh? Kan i ruah cang bantuk in unau pawl cung ah dawtnak kan langhtermi cu Jehovah cung ah dawtnak kan langhtermi a si. Zumtukhat unau pawl kan dawt hna kha zeitindah kan langhter khawh? Lamkhat cu kan hnemh hnanak thawng in a si. Cucaah midang cung ah zaangfahnak kan ngeih ahcun ‘pakhat le pakhat kan i hnem peng’ kho lai. Pakhat le pakhat cung ah zeitindah dawtnak kan fehter khawh? A har tik hmanh ah unau pawl palhnak kha kan ngaihthiam hnanak thawng in a si.

19. A hleiin tuchan ah pakhat le pakhat i dawt cu zeicah a biapit khun?

¹⁹ A hleiin tuchan ah pakhat le pakhat i dawt cu zeicah a biapit khun? Peter nih a ruang a chimmi kha i cinken. Hitin a ti: “Zeizong vialte donghnak caan hi a nai ko cang. Cucaah . . . pakhat le pakhat lungtak tein i daw u.” (1 Pet. 4:7, 8) Hi vawlei ṭha lo donghnak caan a naih chin bantuk in zeidah kan i ruahchan khawh? Jesuh nih a zultu pawl sinah hitin a chimchung: “Keimah ruang ah mi vialte nih an in huat hna lai.” (Matt. 24:9) Cu bantuk huatnak lak ah Jehovah cung ah zumhfek tein kan um khawh peng nakhnga lungrual tein kan um peng a hau. Kan unau pawl kha kan dawt hna ahcun dawtnak cu “zeizong vialte i rem ṭhipṭhep tein a funtomtu” a si caah Satan nih zeitikhmanh ah a kan ṭhencheu kho lai lo.—Kol. 3:14; Fil. 2:1, 2.