Jesuh Tuah Piakmi I Zohchunh Awk Kha Tuah
“Nan caah i zohchunh awk kan tuah piak cang hna: nan ca i ka tuah bantuk khan nannih zong nih nan tuah ve awk a si.”—JOHAN 13:15.
1. Zeiruangah Jesuh cu Khrihfa hna caah i zohchunh awk ṭha bik a si?
MINUNG tuanbia dihlak ah, minung pakhat lawng nih a nunchung vialte ah sualnak ngei loin a rak nung. Amah cu Jesuh a si. Jesuh dah ti lo cu “a sual lomi minung an um lo.” (1 Siangpahrang 8:46; Rom 3:23) Cu ruang ahcun, Khrihfa taktak pawl nih Jesuh cu i zohchunh awk i a ṭha bikmi in an hmuh. Angaitein Jesuh nih a thih hlante C.E. 33 Nisan 14 ah khan ka nawl i cawn u tiah a zultu kha a rak ti hna. “Nan caah i zohchunh awk kan tuah piak cang hna: nan ca i ka tuah bantuk khan nannih zong nih nan tuah ve awk a si” tiah a rak ti hna. (Johan 13:15) Kha hmanung bik zan ahkhan, amah bantuk si awk i zuam ding lam phunphun kha a rak chim. Hi capar ahhin, mah lam cheukhat kha ruah a si lai.
Toidornak A Herh
2, 3. Zei lam hna in dah Jesuh nih toidornak i zohchunh awk ṭha bik kha a rak langhter?
2 Jesuh nih a zultu pawl kha ka nawl ka cawng u tiah a rak forh tik hna ah, toidornak kong kha a bik in a rak chim. A zultu pawl kha i toidor awkah voi khat nak tam in a rak cawnpiak hna lengah, Nisan 14 zanah, a zultu hna an ke a ṭawlpiak hna nak thawngin aa toidornak kha a rak hmuh sak hna. Cun “kei nan Saya le nan Bawipa a simi nih nan ke kha kan ṭawl hna ahcun nannih zong pakhat le pakhat nan ke nan i ṭawlpiak ve awk a si” tiah Jesuh nih a rak ti hna. (Johan 13:14) Cu tikah, a zultu pawl kha i zohchunh awk kan tuah piakmi hna hi zul u tiah a rak ti hna. Zohchunh awk ṭha taktak a si!
3 Vawlei a rat hlan ah, Jesuh nih “Pathian sinak kha a ngeih” tiah lamkaltu Paul nih a ti. Asinain, mah kha hlaw in toidormi minung in hrin a rak si. Cupin ah “mitoi ah aa dor i nawlngaihnak lam kha thih tiangin a zulh–vailam cung thihnak kha.” (Filipi 2:6-8) Ruat tuah hmanh. Vanraang i pahnihnak a ngan bik a simi Jesuh nih, vancungmi nak niamdeuh ah cang in zeihmanh a tuah kho lomi ngakchiate in hrin i, a tlinglomi nu le pa nawlngaih awk le a donghnak i nautatmi mi sual pakhat bantuk in thih awk kha a hna a rak tla. (Kolose 1:15, 16; Hebru 2:6, 7) Toidornak taktak a si! Kha “lungputning” kha i cawn in “toidornak lungthin” kha ṭhanchoter khawh a si lai maw? (Filipi 2:3-5) A si kho ko, asinain a fawi lo.
4. Zei thil hna nih dah minung kha a porhlawtter, asinain zeicahdah porhlawtnak cu ṭih a nun?
4 Toidornak he aa ralkahmi cu porhlawtnak a si. (Phungthlukbia 6:16-19) Porhlawtnak nih Satan kha a rak tlukter. (1 Timote 3:6) Khakha minung lungthin chungah hram sihter cu a fawite i, chuahṭhan awk bel a har ngai. Mi cu an ram, an miphun, an thilri ngeihmi, an fimcawnnak, an hlawhtlinnak, an sining, an muisam umtuning, lentecelhnak i an thiamnak le a dangdang hna ruangah an i porhlaw. Asinain, Jehovah caah cun cu thil pakhat hmanh kha an biapi lo. (1 Korin 4:7) Kha hna nih a kan porhlawtter a si ahcun, Pathian he kan i pehtlaihnak kha a hrawh lai. “Bawipa cu hi tluk hin a sang hringhran ko nain mi nauta kha an zawn a ruah hna i mi ruamkai kha a hmuh lo nak ah an i thup kho lo.”—Salm 138:6; Phungthlukbia 8:13.
Kan Unau Hna Lak Ah Toidornak
5. Zeiruangah Khrihfa upa cu toidormi si awk a biapit?
5 Jehovah rian kan ṭuannak, kan hlawhtlinnak le khrihfabu chung i rian hna ruang zongah porhlawt ding a si lo. (1 Chanrelnak 29:14; 1 Timote 6:17, 18) A taktak ahcun, kan rian a ngan deuhdeuh ah, i toidor kan hau deuhdeuh ve. Lamkaltu Piter nih khrihfa upa hna kha “nanmah zohkhenh awkah chiah mi hna kha a uk in uk hna hlah u, sihmanhsehlaw an i zohchunh ding tu si i zuam u” tiah a rak forh hna. (1 Piter 5:3) Khrihfa upa pawl cu bawi ṭuan ding si loin, zohchunh awk i rianṭuantu si ding tu ah rian pek an si.—Luka 22:24-26; 2 Korin 1:24.
6. Khrihfa nuncan ah zeibantuk hmun hna ah dah i toidor a hauh?
6 Khrihfa upa pawl lawng toidornak ngeih a herhmi an si lo. Upa pawl he tahchunh tikah an thluak rannak le an thazang ṭhawnnak ruang i aa porhlaw kho menmi mino deuh pawl caah Piter nih hitin a rak ṭial: “Nan dihlak in toidornak puan kha i aih u law pakhat le pakhat i bawm u, zeicahtiah Ca Thiang nih ‘Pathian nih mi lungpuam cu a doh hna i mi toidor mi cu a vel kha a pek hna.’ ” (1 Piter 5:5) A si, Khrih bantuk in kan zapi in i toidor awk a biapi. Thawng-ṭha kan chim tikah, a hleiin zei i an kan rel lo asiloah ralnak a chuah tikah toidornak ngeih a herh khun. Cawnpiaknak cohlan awk asilole phungchimnak ah tamdeuh in i tel khawhnak caah nuncan kha tluangtlamter awkah toidornak ngeih a herh. Cupin ah, zapi hngalh in serhsatnak, upadi in dohnak asilole a fak ngaimi hremnak hna kha ton tikah toidornak lengah ralṭhatnak le zumhnak ngeih zong a hau.—1 Piter 5:6.
7, 8. Zei lam hna in dah toidornak kha kan ṭhanchoter khawh?
7 Mi pakhat nih porhlawtnak kha tei in ‘midang cu keimah nakin an ṭha deuh tiah ruat in toidor’ tein zeitindah a nun khawh lai? (Filipi 2:3, NW) Jehovah nih a hmuh bantukin amah le amah aa hmuh a herh. “Tuah u tiah fialmi rian kha nan tuah dih tikah, ‘Kannih cu sal santlailo kan si, kan tuah awk hnga rian a simi lawng pei kan tuah ko cu,’ va ti u” timi bia Jesuh nih a rak chim tikah lungput hman kong kha a fianter. (Luka 17:10) Jesuh tuahmi le kan tuahmi hi zei ti hmanh in tahchunh khawh a si lo ti kha philhhlah. Asinain, Jesuh cu aa toidor.
8 Cupin ah, mah le mah a hmaanmi hmuhnak ngeih awkah Jehovah bawmhnak hal khawh a si. “Na nawlbia kha kaa bochan hna caah fimnak le hngalhnak ka pe ko” tiah salm caṭialtu bantukin thla cam khawh a si. (Salm 119:66) Jehovah nih kanmah le kanmah a tlari in i hmuh khawh nak, fimnak ngeih awkah a kan bawmh lai i, kan i toidor ruangah thluachuah a kan pek lai. (Phungthlukbia 18:12) Jesuh nih “mah le mah aa nganter mi cu ṭhumh an si lai i mitoi ah aa dormi cu mi ngan ah ser an si lai” tiah a rak ti.—Matthai 23:12.
A Hmaan le Hmaan Lo Cung I A Hmaanmi Hmuhnak
9. Jesuh nih a hmaanmi le a hmaanlo mi kha zeitindah a rak hmuh?
9 Jesuh cu kum 33 chung a tlinglomi minung lakah a rak nung nain, “sualnak bel zeihmanh a tuah lo.” (Hebru 4:15) Salm caṭialtu nih Messiah kong profet chimchungbia kha hitin a rak chim: “A hmaanmi thil ṭha kha na duh i a ṭhalomi thil kha na huat.” (Salm 45:7; He-bru 1:9) Hi zon zongah hin Khrihfa nih Jesuh i zohchunh an i zuam. Annih nih a hmaan hmaan lo an thleidan khawh lawng si loin; ṭhatlonak kha an huat i ṭhatnak kha an duh. (Amos 5:15) Mah nih khan an i chuahpimi sual tuah duhnak kha doh awkah a bawmh hna.—Ge-nesis 8:21; Rom 7:21-25.
10. I ngaihchih loin “thil ṭhalo” kan tuah ahcun, zei lungput kan langhter dah a si?
10 Jesuh nih Farasi mi Nikodemu kha hitin a rak ti: “Thil ṭhalo a tuahmi paoh nih cun ceunak kha a huat i ceunak i rat kha a duh lo, zeicah ti ahcun thil ṭhalo a tuahmi langh kha a duh lo. Sihmanhsehlaw thil hmaan a tuahmi cu ceunak ah khan a ra i a tuahmi kha Pathian duhnak zulh in a si ti cu ceunak nih cun a langhter.” (Johan 3:20, 21) Johan nih Jesuh kha “mi vialte a ceuhtu ceunak” in a langhter kha ruat hmanh. (Johan 1:9, 10) Asinain, Pathian cohlan khawh lomi, thil hmaanlo a simi “thil ṭhalo” kha kan tuah ahcun ceunak kan huat ah a tla tiah Jesuh nih a rak ti. Jesuh le a nunphung huat kha na ruat kho maw? Asinain i ngaihchih loin sualnak tuah ahcun cutin a si kho. Annih nih cun cutin an ruat lo nain, Jesuh nih cun cutin a ruah ti kha a fiang ko.
A Hmaan le Hmaan Lo Cung I Jesuh Hmuhning Ṭhanchoter Ning
11. A hmaan le hmaan lo cung i Jesuh hmuhning phun ṭhanchoter awkah zeidah a biapi?
11 A hmaan le hmaan lo cungah Jehovah hmuhning zei a si ti kha fiang tein hngalhthiam kan hau. Mah hngalhthiamnak cu Pathian Bia, Baibal kan hlathlai lawngah kan hmuh khawh lai. Hlathlainak tuah tikah “Maw Bawipa, na lam kha ka cawnpiak hna law ka hngalhter hna” tiin salm caṭialtu bantuk in thlacam kan herh. (Salm 25:4) Sihmanhsehlaw, Satan cu hlen a hmang ti kha philhhlah. (2 Korin 11:14) A hmaan lomi kha ṭha tein aa ralring lomi Khrihfa pakhat i cohlan khawhmi in hmu dingah a tuah khawh. Cucaah, kan cawnmi kha fak piin ruahtuak le “zumh-awk a tlakmi le a fimmi sal” cawnpiaknak kha naih tein ngaih kan hau. (Matthai 24:45-47) Kan cawnmi hlathlainak, thlacamnak le fak piin ruah le tuaknak nih nutling patling siter in “chia le ṭha thleidan khawhnak a ngei” mi a kan siter khawh. (Hebru 5:14) Cu tikah a hmaan lomi kha kan huat lai i a hmaanmi kha kan duh lai.
12. Ṭhatlonak tuah lo awkah zei Baibal cawnpiaknak nih dah a kan bawmh?
12 A hmaan lomi kan huat a si ahcun, kan lung chungah thil hmaan lo tuah duhnak kha ṭhanternak nawl kan pe lai lo. Jesuh a thih hnu kum tampi a rauh hnuah, lamkaltu Johan nih hitin a rak ṭial: “Vawlei hi siseh, a chung thilri hi si hna seh, tlaihchan hna hlah u. Vawlei hi nan tlaihchan ahcun, Pathian dawtnak kha nan chungah a um lo. Vawlei ta a simi thil paohpaoh—pumsa duhnak te hna, mi nih zoh an duhmi thil hna, mi nih porhlawtnak ah an hmanmi thil te hna hi Pa sinin a rami an si lo; vawlei in a rami lawngte an si dih.”—1 Johan 2:15, 16.
13, 14. (a) Zeicah hi vawlei thil duh cu Khrihfa hna caah ṭih a nun? (b) Hi vawlei thil duh deuhdeuhnak kha zeitindah kan hrial khawh?
13 Hi vawlei thil zeizong vialte hi a ṭha lomi an si dih lo tiah mi a cheu nih an ruah men lai. Cuti a si hmanhah hi vawlei le vawlei i lungthin a lami hna nih Jehovah kan biaknak khan fawite in kan lung a vaihter khawh. Hi vawlei nih hin zei ti hmanh in Pathian he a kan naihter kho lo. Cu a si caah, vawlei thil, mah thil cu a ṭhalomi a va si lo hmanhah, kan hun duh deuhdeuh a si ahcun, ṭihnungmi lam ah kan kal cang. (1 Timote 6:9, 10) Mahhlei ah, vawlei thil tamdeuh cu a hmaan tein an ṭha lo, a kan rawhter khawh. Zang-ennak, thilri biapi chiahnak asilole nulepa lei ziaza ṭhatlonak a langhter khunmi baisikup asiloah TV kan zoh a si ahcun, kha thil kha cohlan khawhmi thil ah an hung cang kho i a kan tukforh khawh. An nuncan ṭhanchoter nak ca asilole rian karhchoter nak caanṭha caah a bik in a lung a chia khunmi he kan i kawmh ahcun, kha hna kha kanmah ca zongah a biapi bik cem an hung si kho.—Matthai 6:24; 1 Korin 15:33.
14 Khatte lei in cun, Jehovah Bia relnak ah kan i lawmh ahcun, “pumsa duhnak te hna, mi nih zoh an duhmi thil hna, mi nih porhlawtnak ah an hmanmi thil te hna” tukforhnak cu a zor deuh ngaingai lai. Cupin ah, Pathian Pennak ṭhatnak ca hmasa bik ah a chiami hna he kan i kawmh ahcun, anmah bantuk in kan si lai i an duhmi kha kan hun duh lai i an hrialmi kha kan hun hrial ve lai.—Salm 15:4; Phungthlukbia 13:20.
15. Jesuh bantukin dinnak duhnak le ṭhatlonak huatnak nih zeitindah a kan ṭhawnter lai?
15 Jesuh nih ṭhatlonak kha a huat i dinnak kha a duh caah “a hmai ka i chiahmi lunglawmhnak” ah a lung a rak chiah khawh peng. (Hebru 12:2, NW) Kannih zong cutin kan si kho ve. ‘Vawlei le a chung i a ummi thil an lo cuahmah cang’ lai ti kha kan hngalh. Hi vawlei pek khawh mi zei lunglawmhnak hmanh hi caan tawite ca lawng a si. Sihmanhsehlaw, “Pathian duhnak a tuahmi cu zungzal in an nung.” (1 Johan 2:17) Jesuh nih Pathian duhnak a tuah caah, minung caah zungzal nunnak lam a rak hun khawh. (1 Johan 5:13) Kan zapi in amah kha i zohchunh in a zumhfehnak khan ṭhatnak hmu hram u sih.
Hremnak Innak
16. Zeicahdah Jesuh nih pakhat le pakhat i dawt awkah a zultu hna kha a rak forh hna?
16 Jesuh nih amah i zohchunh khawh a simi a dang lam khat kha a langhter i hitin a rak chim: “Keimah ka nawlbia cu hihi a si: Keimah nih kan dawt hna bantukte hin pakhat le pakhat i daw u.” (Johan 15:12, 13, 17) Khrihfa hna nih an unau an dawtnak hna a ruang tampi a um. Kha lio caan ahkhan, annih nih hi vawlei huatnak an ton lai timi kha a hleiin Jesuh lung chungah a rak um. Hitin a rak ti hna: “Vawlei nih an huat hna ahcun keimah a rak ka huat hmasa ti kha philh hlah u. . . . Sal cu a bawipa nakin angan deuh bal lo. Keimah kha an ka hrem ahcun nannih zong an in hrem ve ko hna lai.” (Johan 15:18, 20) A si ko, Khrihfa cu hrem an si hmanhah Jesuh bantuk an si. Annih nih huatnak an inkhawh nakhnga a fekmi dawtnak hri in an i ṭem a hau.
17. Zeicahdah a hmaanmi Khrihfa cu vawlei nih a huat hna?
17 Zeicahdah vawlei nih Khrihfa cu a huat hna? Jesuh bantuk in, “hi vawlei ta an si lo caah” a si. (Johan 17:14, 16) Annih cu raltuknak le nainganzi ah khoika lei hmanhah an ṭanglo, Baibal nunphung kha an zul, nunnak kha an upat i a sangmi ziaza lei nunphung ningin an nung. (Lamkaltu 15:28, 29; 1 Korin 6:9-11) An kawltung bik cu thilri si loin thlarau lei a si. Hi vawlei ahhin an um ko nain, Paul nih a rak ṭial bantuk khan, ‘vawlei thil cu tlamtling in an tawngtham’ lo. (1 Korin 7:31) A si, a cheu nih cun Jehovah Hngaltu hna i a sangmi an nunphung an duhnak kha an langhter. Sihmanhsehlaw Jehovah Hngaltu hna nih mi duhmi le mi cohlanmi si awk ah an tuahmi a si lo. Cucaah vawlei mi tam deuh nih an theithiam hna lo i mi tampi nih an huat hna.
18, 19. Jesuh nunning aa zohchunhmi Khrihfa hna nih ralchannak le hremnak kha, zeitindah an ton?
18 Jesuh an tlaih i an rak thah tikah khan hi vawlei huatnak a fah zia le mah huatnak kha Jesuh nih zeitindah a rak ton ti kha a lamkaltu nih an rak hmuh. Gethsemane dum ah Jesuh a dohtu biaknak lei lamhruaitu hna cu Jesuh tlaih awkah an rak ra. Piter nih nam i zuh in Jesuh kha huhphenh awkah a rak i zuam nain Jesuh nih Piter kha hitin a rak ti: “Na nam cu a kawng ah sawh ṭhan ko, zeicahtiah hriamnam a la mi cu hriamnam in an thi lai.” (Matthai 26:52; Luka 22:50, 51) Hlanlio Israel mi hna nih cun an ral kha nam in an rak doh hna. Atu cu thil sining kha aa thleng cang. Pathian Pennak cu “hi vawlei ta hi a si lo” i huhphenh awk ramri zong a um lo. (Johan 18:36) A rauh hlanah Piter cu vancung rammi sinak nawl a hmu hngami thlarau miphun chungmi a si cang lai. (Galati 6:16; Filipi 3:20, 21) Cu a si caah, kha caan in khan Jesuh zultu nih huatnak le hremnak kha Jesuh bantuk in ṭihnak ngei lo le dai te tuin an rak ton. A chuak laimi thil kha Jehovah kut ah zumhfek tein chiah ta in inkhawh awk thazang caah amah kha an i bochan.—Luka 22:42.
19 Kum tam nawn a rauh hnuah Piter nih hitin a rak ṭial: “Khrih hrimhrim nih nan caah khan a in cang i ka keneh ka zul hna seh tiah i zohchunh awk an chiah piak cang hna. Serhsatnak bia in an ti tikah serhsatnak bia in a let hna lo, temhnak a in tikah a tlerh hna lo, dingte in bia a ceihtu Pathian tu kha aa bochan.” (1 Piter 2:21-23) Jesuh nih ralrinnak bia a rak chimh hna bantukin kum thluangthluan hremnak fak ngaiin an rak tong. Kum zabu pakhatnak he tuchan he Jesuh nunning an zulhmi le zumhawktlak in an inkhawhnak kong kha ṭial a si, cuti cun a daimi le zumhfek mi an si kha an langhter. (Biathlam 2:9, 10) Mah bantuk thil umtuning a chuah tikah anmah bantuk si kho u sih.—2 Timote 3:12.
“Bawi Jesuh Kha I Hruk U”
20-22. Zei lam hna in dah Khrihfa nih ‘Bawi Jesuh kha an i hruk’?
20 Paul nih Rom khua khrihfabu sinah hitin ca a rak ṭial: “Bawi Jesuh kha i hruk u law pumsa duhnak tuah ding khua khang hlah u.” (Rom 13:14, NW) Khrihfa hna nih Jesuh kha hnipuan bantuk in an i hruk. A tlinglomi minung an si ko nain, an si khawh tawk in an Bawipa ziaza le tuahsernak kha cawn an i zuam.—1 Thesalon 1:6.
21 Kan bawipa nunning ṭha tein kan hngalh i a nunning in nun kan i zuam ahcun, ‘Bawi Jesuh kan i hruknak’ ah kan hlawh a tling lai. Aa toidornak, dinnak a duhnak, ṭhatlonak a huatnak, unau a dawt hna nak, vawlei ta a si lonak le harnak lungsau in a innak te hna kha kan i cawn. Kannih cu ‘pumsa duhnak tuah kha kan i tim lo,’ chim duhmi cu kan nunnak ah vawlei lei kawltung phanh awk asilole pumsa duhnak tlinter awkah a bik in kan i tim lo ti nak a si. Mah nakin cun, biakhiahnak tuah tik asilole buainak tonghtham tikah ‘Jesuh hei si sehlaw hi umtuning ahhin zeidah a tuah hnga? Kei tah zeidah tuah seh ti a ka duh hnga?’ tiah bia kan i hal lai.
22 A hnu bik ah, i manh lo ngaiin ‘thawngṭha bia chim’ nak in Jesuh nawl kan i cawn. (Matthai 4:23; 1 Korin 15:58) Cu ti zong in cun Khrihfa hna nih Jesuh tuah piakmi i zohchunh awk kha an tuah i, a hnu capar ah i zohchunh in zeitindah an zulh ti kong i ruah a si lai.
[Cahmai 8nak i Hmanthlak]
Na Fianter Kho Maw?
• Zeicah Khrihfa pakhat nih i toidor cu a biapit?
• A hmaan le hmaan lo cung i a hmaanmi hmuhnak kha zeitindah ṭhanchoter khawh a si?
• Ralchannak le hremnak hna ton tikah Khrihfa nih Jesuh kha zeitindah an i zohchunh?
• ‘Bawi Jesuh i hruk’ cu zeitindah a si khawh?