Hell Cu A Um Taktak Maw? Baibal Chimmi Ningin Hell Timi Cu Zeidah A Si?

Baibal chimmi

King James Version ti bantuk hlanlio Baibal Lehnak i Baibal caang cheukhat ah “hell” timi biafang kha an hman. (Salm 16:10; Lamkaltu 2:27 a) Hi capar ah kan hmuhmi biaknaklei hmanthlak bantukin mi tampi nih hell timi cu miṭhalo pawl mei in zungzal in an hrem hnanak hmun a si tiah an zumh. Asinain mah kong he aa tlaiin Baibal cawnpiaknak cu zeidah a si?

Hi capar ah

Hell timi cu zungzal hremnak hmun a si maw?

A si lo. Hlanlio Baibal lehnak cheukhat ah “hell” tiah an lehmi a hrampi biafang (Hebru holh in “Sheol”; Greek holh in “Hades”) nih Thlan kha a chim duhmi a si. Baibal nih “Thlan” ah a ummi hna cu nunnak an ngei ti lo tiah a ti.

Mithi cu zeihmanh an hngalh ti lo caah sifah harnak zong an ing ti lo. “Hell ah cun rian siseh, ruahnak siseh, hngalhnak siseh, fimnak siseh a um ti lo.” (Phungchimtu 9:10, Douay-Rheims Version) Hell ahcun harnak ruangah aihramnak a um lo. Mah canah Baibal nih hitin a ti: “Miṭhalo cu sung hna seh, mithi khua [hell, Douay-Rheims] ah dai tein um hna seh.”—Salm 31:17; King James Version (30:18, Douay-Rheims); Salm 115:17.
Pathian nih sualnak ruangah dantatnak cu hell mei hremnak si loin thihnak a si tiah a ti. Pathian nih hmasa bik mipa Adam kha nawlbia na buar caah na thi lai tiah a ti. (Genesis 2:17) Hell mei in zungzal hremnak kong kha a chim lo. Adam nih sualnak a tuah hnuah Pathian nih zei bantuk dantatnak dah a in lai ti kha hitin a chimh: “Leidip na si i leidip ah na kir ṭhan lai.” (Genesis 3:19) Anih cu a um ti lai lo. Pathian nih Adam kha hell mei in hrem taktak sehlaw mah kong kha a langhter ko lai. A nawlbia a buarmi hna caah Pathian dantatnak cu aa thleng lo. Adam nih sualnak a tuah hnu caan saupi hnuah Pathian nih Baibal ṭialtu pakhat sinah hitin thaw a chuah hnawh: “Sualnak man cu thihnak a si.” (Rom 6:23) “Minung cu a thih tikah cun sual ṭhawnnak chung khan a luat” tiah a ti caah a dang dantatnak in a hau ti lo.—Rom 6:7.
Zungzal hremnak timi ruahnak cu Pathian nih a huat tuk. (Jeremiah 32:35) Mah ruahnak cu “Pathian cu dawtnak a si” timi Baibal cawnpiaknak he aa ralkahmi a si. (1 Johan 4:8) Pathian nih zungzal hremnak ṭih ruangah si loin amah kan dawt ruangah kan biakmi kha a duh.—Matthai 22:36-38.
Miṭha pawl zong hell ah an kal. “Hell” timi biafang aa telnak Baibal caang ningin zumhfekmi Jakob le Job ti bantuk zong nih hell ah kan kal lai ti kha an hngalh. (Genesis 37:35; Job 14:13) Baibal nih Jesuh Khrih hmanh a thih in a thawh ṭhan hlanah hell ah a um tiah a ti. (Lamkaltu 2:31, 32) Cucaah mah Baibal chung i “hell” timi biafang nih Thlan kha a chim duhmi a si ti cu a fiang ko.

Jesuh bianabia chung i mirumpa le Lazaruh kong cu zei sullam dah a si?

Jesuh chimmi mah bianabia kha Luka 16:19-31 ah langhter a si. Mah bianabia nih ziazalei le thlaraulei kong he aa tlaimi biatak kha a kan cawnpiak. Mirumpa le Lazaruh kong bianabia cu a cang taktakmi a si lo. (Matthai 13:34) Mah kong kha tam deuh in hngalh awkah “Mirumpa Le Lazaruh Cu Ahodah An Si?” timi capar kha rel.

Hell nih Pathian he pehtlaihnak ngeih lo kha a chim duhmi a si maw?

A si lo. A thimi nih Pathian he pehtlaihnak an ngeih lo kha an hngalh timi cawnpiaknak cu Baibal cawnpiaknak he aa ralkahmi a si. Baibal nih a thimi nih cun zeihmanh an hngal lo tiah fiang tein a kan cawnpiak.—Salm 146:3, 4; Phungchimtu 9:5.

Hell in a luatmi an um bal maw?

An um. Baibal ah (cheukhat Baibal lehnak ah “hell” tiah an lehmi) Thlan ah a kalmi minung pakua an thawhṭhannak kong kha a langhter.b Mah mi hna nih hell i an um lioah an pawngkam ah a cangmi thil kha an hngalh ahcun an hmuhtonmi kong kha an chim ko lai. Asinain ahohmanh nih hremnak kan tong asiloah a dang thil hna kan tong tiah an chim lo. Zei ruangah? Baibal cawnpiaknak ningin thu thluahmah in aa ‘hngilhmi’ bantukin a cangmi thil kha zeihmanh an hngalh lo caah a si.—Johan 11:11-14; 1 Korin 15:3-6.

a Chanthar Baibal lehnak tam deuh ahcun Lamkaltu 2:27 ah “hell” timi biafang kha an hmang ti lo. Mah canah cheukhat Baibal lehnak ahcun “thlan” (New Century Version); “mithi khua,” “thihnak” (The Passion Translation) tiah an hman. A dang Baibal lehnak ahcun Greek biafang “Hades” timi ningin an hman—Holman Christian Standard Bible, NET Bible, New American Standard Bible, English Standard Version.

b 1 Siangpahrang 17:17-24; 2 Siangpahrang 4:32-37; 13:20, 21; Matthai 28:5, 6; Luka 7:11-17; 8:40-56; Johan 11:38-44; Lamkaltu 9:36-42; Lamkaltu 20:7-12 ah zoh.

Hell asiloah Thlan kong he aa tlaimi Baibal caang hna

Job 14:13: “Pathian, Sheol [Thlan] [“hell,” Douay-Rheims Version] ah khin ka thup law ka duh, . . . Khika ah cu tiangin na um lai tiah caan ka khiahpiak law cun ka hngal ṭhan te tuah!”

A sullam: Zumhfekmi Job nih hell (Thlan) ahcun fahnak a um lo i Pathian nih a ka thawhter ṭhan khawh ti kha a hngalh.

Salm 145:20: “Amah a dawtu cu an dihlak in a huhphenh hna, sihmanhsehlaw miṭhalo cu a hrawh dih hna lai.”

A sullam: Pathian nih miṭhalo pawl cu a hrawh dih hna lai. Hrem awkah hell ah a nunter hna lai lo.

Phungchimtu 9:10: “Na tuahmi cu a ṭhat khawh chungin tuah, zeicahtiah Sheol [“hell,” Douay-Rheims Version] ah cun rian siseh, ruahnak siseh, hngalhnak siseh, fimnak siseh a um ti lo i cuka cu na kalnak ding hmun cu a si.”

A sullam: Thlan asiloah hell ah a ummi hna nih zeihmanh an hngal ti lo i hremnak zong an tong lai lo. Cucaah Baibal ṭialtu nih mah fimnak aa telmi bia kha miṭha pawl zong a chimh hna.

Lamkaltu 2:31: “Khrih cu a tho ṭhan lai ti kha a hngalh caah Khrih cu hell ah a kaltak lo.”—King James Version.

A sullam: Jesuh Khrih cu a thih lioah hell (Thlan) ah a phan.

Rom 6:23: “Sualnak man cu thihnak a si.”

A sullam: Sualnak ruangah dantatnak cu hell ah hrem si loin thihnak kha a si.

Biathlam 20:13: “Thihnak le mithi khua zong nih khan an hrenmi mithi kha an hun chuah ve hna.”—King James Version.

A sullam: Hell ah a kalmi hna cu a thimi an si. Annih cu an tho ṭhan lai.

Biathlam 20:14: “Thihnak le mithi khua cu mei tili chungah khan an paih hna.”—King James Version.

A sullam: Thlan ah a ummi mithi vialte an thawhṭhan hnuah thlan [hell] cu mei in hrawh a si lai. Mah hnuah Adam sualnak ruangah a chuakmi thihnak cu a um ti lai lo.—Rom 5:12.

Hell mei cawnpiaknak kong tuanbia

A hmaan lomi zumhnak aa thawknak: Hlanlio Izipt mi hna nih hell mei cawnpiaknak kha an zumh. BC kumzabu 16 i tuanbialei mifim pawl nih an chimmi, ruak vuinak ah an hman tawnmi Ȧm-Ṭuat (Amduat) timi Cauk nih “mei tili chungah thlak an simi hna cu . . . mei alh chungin an luat kho lai lo” tiah a ti.—The Egyptian Heaven and Hell.

Hmasa Khrihfa hna nih an cawnpiak hna lo: “Biakam Thar Baibal ah hmasa Khrihfa hna nih an cawnpiaknak ah hell mei kong aa tel lomi cu cinken awk tlak a si.”—A Dictionary of Christian Theology.

Greek fimnak cu biaknak cungah huham a hun ngei: “AD kumzabu 2 a lai ah Greek fimnak a cawngmi Khrihfa cheukhat nih an zumhnak kong kha Geek fimnak ningin fianter a hau tiah an hun ruah . . . An uar bikmi cu Plato cawnpiaknak kha a si.” (Encyclopædia Britannica) Mah ah thih hnuah hell mei in hremnak timi zumhnak aa tel. “Hell kong a cawnpiakmi Greek mifim pawl lakah huham a ngei bikmi cu Plato a si.”—Histoire des enfers (The History of Hell).

Midang hrem cu a palh lo ti kha hell mei cawnpiaknak hmangin an i silhnalh: Spanish Inquisition tiah mi nih hngalhmi chan lioah biaknaklei cawnpiaknak a ralchanhmi pakhat tung cungah mei in khangh cu “hell mei zeidah a lawh” ti hngalhter awk le a thih hlanah aa ngaihchih nakhnga caah a si tiah an ti. (The Spanish Inquisition, by Jean Plaidy) England Siangpahrang nu Mary I zong nih Protestant minung 300 hrawng kha tung cungah mei in a khangh hna. “Zumhnak hmaan lo a ngeimi hna i an thlarau cu hell mei in zungzal hrem an si lai caah miṭhalo pawl Pathian nih dan a tatmi hna kha i zohchunh in vawleicung ah mei in khangh cu aa tlakmi a si ko” tiah a ti.—Universal History, by Alexander Tytler.

Tuchan ah thlennak hna: Biaknak cheukhat nih hell mei kong cawnpiaknak kha an dinhdorh deuh. Asinain mah cu a hmaan lomi cawnpiaknak al duh ah si loin an mi pawl nih an cohlan hna nakhnga caah a si. (2 Timote 4:3) “Mi nih dawtnak le zaangfahnak a ngeimi Pathian kha an duh deuh . . . Tuchan ah sualnak le sualnak ka ngei timi kong chim kha mi nih an duh ti lo.”—Professor Jackson W. Carroll.