Biaknak caah Kan i Pumhnak a Ruang

1-3. (a) Khrihfa hna nih pumhnak an sunsak kha zeitindah an langhter? (A hramthawknak hmanthlak zoh.) (b) Hi capar ah zei kong dah kan i ruah hna lai?

UNAUNU Corinna cu kum 17 a si ah a nu kha an tlaih i rianhrang ṭuannak thonginn ah an kuat. A hnuah Corinna zong an inn in meng tampi aa hlatnak Siberia ah ṭhawl a si ve. Cuka ah sal bantukin an pehtlaih i lo ah rian a ṭuan. A caan ah a kih tuknak ramlak ah angki pante in rian a ṭuan. Cu bantuk thil sining lakah Corinna le a dang unaunu pakhat cu i pumh awkah bia an khiak.

² Corinna nih hitin a chim: “Zanlei ah rian kan ṭuannak in kan i thawh i meng 15 (25 km) aa hlatnak i a ummi tlanglawng dinhnak ah kan ke in kan kal. Tlanglawng cu zinglei suimilam pahnih in a chuak i suimilam paruk chung kan i cit, cun pumhnak hmun phanh awkah mengruk (10 km) kan ke in kan kal ṭhan.” Cutin an kalmi cu a phu maw? Corinna nih hitin a chim: “Pumhnak ah Vennak Innsang kan cawng i Pennak hla kan sa. Mah nih kan zumhnak a fehter taktak.” Unaunu pahnih cu nithum hnuah lo ah an kir ṭhan, asinain lo zohkhenhtu nih an kalmi kha a hngal lo.

³ Jehovah miphun nih hmunkhat i, i pumh kha an sunsak zungzal. Tahchunhnak ah, Khrihfabu dirh a si hnuah Jesuh zultu hna cu “nifate in a bu tein biakinn chungah khan an i pum.” (Lam. 2:46) Nang zong hmaan tein i pumh kha na duh tuk ko lai. Asinain hmaan tein i pumh cu unau tampi caah a har ko lai. Vawlei lei rian ruangah, ṭuan awk rian tampi a um ruangah le na tha a bat ruangah hmaan tein i pumh cu a har men lai. Cu a si ah hmaan tein i pumh khawh awkah zeinihdah a kan bawmh lai?^[1] Hmaan tein i pumh awkah Baibal kan cawnpiakmi hna le midang kha zeitindah tha kan pek khawh hna? Hi capar ah pumhnak nih (1) ṭhatnak a kan pekning, (2) midang a bawmh hnaning le (3) Jehovah lung a lawmhterning kha kan i ruah hna lai.^[2]

Pumhnak Nih Ṭhatnak A Kan Pek

4. Pumhnak nih Jehovah kong tam deuh in hngalh awkah zeitindah a kan bawmh?

⁴ Pumhnak nih a kan cawnpiak. Pumhnak vialte nih Jehovah kong tam deuh in hngalh awkah a kan bawmh. Tahchunhnak ah, Khrihfabu tam deuh ah Jehovah kha Naih timi cauk kha nai ah kan rak cawng hna. Jehovah sining kong kan hlathlai tik le unau pawl nih an pekmi a phi hna na theih tikah zeitindah na um? Mah nih Jehovah na dawtnak a fehter deuh lai ti cu a fiang ko. Pumhnak ah phungchimnak, hmuhsaknak le Baibal relnak hna kan theih tikah Baibal kan hngalhnak a karh chin. (Neh. 8:8) Zarh fatin Baibal relnak ca kan i timh tik, an fiantermi hna kan theih tikah thlaraulei ah zeitluk in dah kan ṭhancho ti kha ruat.

5. Pumhnak nih Baibal phunglam hna hman awk le phungchimnak i ṭhancho awkah zeitindah aan bawmh?

⁵ Pumhnak nih kan nunnak ah Baibal phunglam hna hman khawh awkah a kan cawnpiak. (1 Thes. 4:9, 10) Tahchunhnak ah, Jehovah rian ah tam deuh in i tel awk, na thlacamning ṭhanchoter awk le unau pawl ngaihthiam awkah aan bawmmi Vennak Innsang Cawnnak kha naa cinken maw? Zarhlai ah tuahmi pumhnak nih zeitindah thawngṭha kan chim lai ti le midang nih biatak an hngalhthiam khawh nakhnga zeitindah kan bawmh hna lai ti kha a kan cawnpiak.—Matt. 28:19, 20.

6. Pumhnak nih zeitindah thazaang a kan ngeihter?

⁶ Pumhnak nih thazaang a kan ngeihter. Satan vawlei nih kan zumhnak a der nakhnga le kan lung a dongh nakhnga aa zuam. Asinain pumhnak nih Jehovah biak zungzal awkah thazaang a kan ngeihter. (Lamkaltu 15:30-32 rel.) Baibal chimchungbia pawl zeitindah a tlin ti kha kan i ruah tawn. Mah nih hmailei kong he aa tlaimi Jehovah biakam vialte an tling dih lai timi kan zumhnak kha a fehter chin. Phungchimnak, unau pawl nih an pekmi a phi le lungthin dihlak in hla an sakmi hna nih thazaang a kan ngeihter. (1 Kor. 14:26) Pumh thawk hlan le pumh dih hnuah unau pawl he bia kan i ruah tikah hrimhnak le lungdaihnak kan hmu.—1 Kor. 16:17, 18.

7. Pumhnak cu zeicah a biapit tuk?

⁷ Pumhnak ah Pathian thiang thlarau bawmhnak kan hmu. Jesuh nih thiang thlarau hmangin Khrihfabu kha a hruai. “Thlarau nih khrihfabu hna sinah a chimmi bia cu ngai ko u” tiah Jesuh nih a kan ti. (Biat. 2:7) Tukforhnak doh khawh awk, ralṭha tein phungchim khawh awk le a hmaanmi biakhiahnak tuah khawh awkah thiang thlarau bawmhnak kan herh. Cucaah a si khawh chung hmaan tein kan i pum awk a si i thiang thlarau bawmhnak hmuh awkah kan i zuam awk a si.

Pumhnak ah Midang Kan Bawmh Khawh hna

8. Kan i pumhmi, a phi kan pekmi le hla kan sakmi nih unau pawl kha zeitindah a bawmh khawh hna? (“Pumhnak in Ka Ṭin tik paohah Ka Dam Deuh tawn” timi rinli kulh zong zoh.)

⁸ Pumhnak ah unau pawl kan dawt hnanak langhternak caanṭha kan hmu. Khrihfabu chung i unau tampi cu sifah harnak tampi an tong. Lamkaltu Paul nih “pakhat le pakhat . . . i bawm tliahmah u sih” tiah a ti hnuah “hmunkhat i, i pumh lengmang kha ngol hlah u sih” tiah a ti. Cutin an tuahnak thawngin an i bawm kho hna lai. (Heb. 10:24, 25) Hmaan tein kan i pumhnak thawngin unau pawl he umṭi kan duh, anmah he biaruah kan duh i an intuarmi hngalh kan duh ti kha kan langhter. Cun a phi kan pekmi le lungthin dihlak in hla kan sakmi an theih tikah unau pawl zong thazaang an hmu.—Kol. 3:16.

9, 10. (a) Johan 10:16 i Jesuh bia nih unau pawl he hmunkhat i, i pumhṭi awkah zeitindah aan forh ti kha fianter. (b) Hmaan tein kan i pumh ahcun chungkharmi hlawtnak a tongmi hna caah zeitindah bawmtu kan si khawh?

⁹ Pumhnak nih unau pawl he a kan naihter deuh. (Johan 10:16 rel.) Jesuh nih amahle amah kha tuukhal in aa tahchunh i a zultu hna kha tuurun pakhat he a tahchunh hna. Mah hi ruathmanh: Tuu pahnih cu tlang cungah an um, a dang pahnih cu nelrawn ah an um i a dang pakhat cu hmun pakhatkhat ah a um hei ti u sih. Mah tuu panga cu tuurun pakhat an si tiah ti khawh a si lai maw? A si lo, zeicahtiah tuurun pakhat cu hmunkhatte ah an tlawngṭi i an tuukhal hnu kha an zulh caah a si. Cu bantukin kannih zong i pumh loin kanmah tein kan um awk a si lo. “Tuukhal pakhat” i lamhruainak tangah a ummi “tuurun runkhat” chung i a ummi si awkah hmunkhatte ah kan i pumh a hau.

¹⁰ Pumhnak nih unau pawl lungrual tein um awkah a kan bawmh. (Salm 133:1) Unau cheukhat cu an nu le an pa asiloah an unau ti bantuk chungkharmi hna hlawtnak an tong. Asinain Jesuh nih anmah a daw i an zawn a ruatmi langhternak chungkhar kaan pek hna lai tiah bia a kamh hna. (Mar. 10:29, 30) Hmaan tein naa pumh ahcun mah unau pawl caah an pa, an nu asiloah an unau bantuk na hung si lai. Mah kong ruahnak nih pumhnak vialte ah na si khawh chung, hmaan tein i pumh awkah aan forh ko lai.

Jehovah Lung Kan Lawmhter Khawh

11. Pumhnak nih Jehovah kha hmuh awkah aa tlakmi pek dingin zeitindah a kan bawmh?

¹¹ Jehovah nih hmuh awkah aa tlakmi kha kan i pumhnak thawngin kan pek. Jehovah cu a kan Sertu a si caah kan sinin lawmhnak, upatnak le thangṭhatnak hmuh awkah aa tlak. (Biathlam 7:12 rel.) Pumhnak ah Jehovah sin thla kan cam tik, hla in kan thangṭhat tik le a kong kan chim tikah cutin kan tuah khawh. Jehovah biak awkah zarh fatin caanṭha kan hmuhmi cu zeitluk tinvo sung dah a si.

12. Hmaan tein i pum u timi nawlbia kan ngaih tikah Jehovah cu zeitindah a um?

¹² Jehovah cu a kan sertu a si caah a nawl kan ngaih awk a si. A hleiin hi donghnak caan ah hmaan tein i pumh awkah nawl a kan pek. Mah nawlpekmi kan ngaih tikah Jehovah cu aa lawm. (1 Johan 3:22) Pumhnak vialte i pumh awkah kan i zuammi kha Jehovah nih a hmuh i a sunsak.—Heb. 6:10.

13, 14. Pumhnak ah Jehovah le Jesuh kha zeitindah kan naih khawh hna?

¹³ Kan i pumhmi nih Jehovah le a Fapa naih kan duh hna ti kha a langhter. Pumhnak ah Jehovah nih Baibal hmangin lam a kan hruai. (Isa. 30:20, 21) Cutin lam a kan hruaimi kha a rak i pum vemi, Jehovah a bia lomi hna hmanh nih an hngalh. (1 Kor. 14:23-25) Jehovah nih thiang thlarau hmangin pumhnak kha thluachuah a pek i cawnpiaknak hna kha lam a hruai. Cucaah kan i pumh tikah Jehovah chimmi kha kan theih i zeitluk in dah a kan dawt ti kha kan hngalh. Mah tikah Jehovah he kan i naih chin.

¹⁴ Khrihfabu Lu a simi Jesuh nih hitin a chim: “Ka min in pahnih, pathum nan i pumhnak ah kei zong nan sinah ka um ve.” (Matt. 18:20) Cun Jesuh cu Khrihfabu ‘lakah aa chawk’ tiah Baibal nih a ti. (Biat. 1:20–2:1) Cucaah pumhnak ah Jehovah le Jesuh cu kan sinah an um i thazaang a kan pek ti cu a fiang ko. Na si khawh chungin Jehovah le a Fapa he i naih awkah naa zuammi kha Jehovah nih a hmuh tikah zeitindah a um lai tiah na ruah?

15. Kan i pumhnak thawngin Pathian nawlngaih kan duh kha zeitindah kan langhter?

¹⁵ Kan i pumh tikah Jehovah nawlngaih kan duh kha kan langhtermi a si. Jehovah nih a nawlbia zulh awkah a kan hnek lo. (Isa. 43:23) Cucaah Jehovah kha zeitluk in dah kan dawt, cungnung bik a sinak kha zeitluk in dah kan cohlan ti langhter awkah kan i thim khawh. (Rom 6:17) Tahchunhnak ah, rianngeitu nih hmaan tein i pumh khawh lo tiangin rian tam tuk a kan ṭuanter ahcun zeidah kan tuah lai? Asiloah cozah nih Jehovah biak awkah pumhnak nan tuah ahcun tangka in dan kan in tat hna lai, thong kan in thlak hna lai asiloah fakpi in dan kan in dat hna lai tiah nawl an chuah ahcun zeitindah kan tuah lai? Asiloah i pumh loin kan huammi thil pakhatkhat tuah awkah lem kan si men lai. Cu bantuk thil sining hna ah mah tein biakhiahnak tuah awkah Jehovah nih nawl a kan pek. (Lam. 5:29) Asinain Jehovah nawlngaih awkah kan i thim ahcun Jehovah cu aa lawm tuk lai.—Ptb. 27:11.

Bau Lo Tein I Pum

16, 17. (a) Kumzabu pakhatnak i Khrihfa hna caah pumhnak cu a biapi tuk ti kha zeitindah kan hngalh khawh? (b) Khrihfabu pumhnak he aa tlaiin Unaupa George Gangas nih zeitindah a hmuh?

¹⁶ A hmasa Khrihfa hna cu AD 33, Pentekos puai a dih hnuah “nifate in, a bu tein biakinn chungah khan an i pum.” (Lam. 2:46) Rom cozah le Judah biaknaklei hruaitu hna hremnak an tong ko nain hmunkhat i, i pumh kha an ngol lo.

¹⁷ Tuchan zongah Jehovah salle nih pumhnak kha an sunsak tuk. Uktu Bu chungtel in kum 22 leng a rak ṭuanmi George Gangas nih hitin a chim: “Unau pawl he i pumhṭinak cu ka nunnak ah a sunglawi bikmi le thazaang a ka pe bikmi a si. A si khawh ahcun Biakinn ah hmasa bik ah a phanmi le a hnu bik ah a ṭinmi si ka duh. Pathian miphun he bia kan i ruah tikah kaa nuam tuk. An sin i ka um tikah ka innchungkharmi he hmunkhat i um bantuk le thlaraulei paradis i a phanmi bantukin kaa ruat.” Cun hitin a chim chap: “Ka duh bikmi cu bau lo tein i pumh hi a si.”

18. Pumhnak he aa tlaiin zeitindah na ruah, zei tuah awkah dah bia na khiah?

¹⁸ Nangtah Jehovah biak awkah i pumhnak he aa tlaiin cutin na ruat ve maw? Cutin na ruah ahcun hmaan tein i pumh khawh awkah ka si khawh chungin kaa zuam lai tiah biakhiahnak tuah. “BAWIPA, na umnak inn kha ka tlaihchan i na sunparnak a umnak hmun kha ka duh” tiah a chimmi Siangpahrang David bantukin na intuar ve kha Jehovah sinah langhter.—Salm 26:8.