Zumtu Khat Kha Hmaizahnak Ah Lamhruai Hna

‘Pakhat le pakhat kha Khrih ah u le nau bantukin i daw cikcek u law pakhat le pakhat kha hmaizahnak ah lam i hruai u.’—ROM 12:10, NW.

1, 2. (a) Paul nih Rom Khrihfa hna sin a cakuat in zeidah a kan forh? (b) Zei biahalnak hna dah kan i ruah lai?

LAMKALTU Paul nih Rom Khrihfabu sin a cakuat ah Khrihfabu ah dawtnak langhter a biapitnak kha a hlei in a ṭial. “Lungthin taktak in” i daw u tiah a kan ti. Cun “u le nau bantuk in i daw cikcek u” ti zong in a kan ti.—Rom 12:9, 10a.

² U le nau bantuk in i dawt cu midang kha thanuam tein komh lawng a si lo. Tuahsernak in langhter a hau. Kan dawtnak kha lam khatkhat in kan langhter lo ahcun an hngal lai lo. Cucaah Paul nih ‘pakhat le pakhat kha hmaizahnak ah lam i hruai u’ tiah a kan forh. (Rom 12:10b) Hmaizahnak langhternak ah zeidah aa tel? Zumtu khat kha hmaizahnak ah lamhruai cu zeicah a biapit? Zeitindah tuah khawh a si?

Upatnak le Hmaizahnak

3. “Hmaizahnak” timi a hrampi Baibal biafang cu zei sullam dah a ngeih?

³ “Hmaizahnak” timi a hrampi Hebru biafang cu mi pakhat a biapimi in hmuh ti sullam a ngei. Mah biafang hi Baibal ah ‘nawlngeihnak’ tiah an leh tawn i hmaizahmi kha upat tuk tinak a si. (Gen. 45:13) Baibal ah “hmaizahnak” tiah lehmi Greek biafang cu upatnak, mansung chiahnak le sunsaknak ti sullam a ngei. (1 Pit. 3:7) Cucaah kan hmaizahmi hna cu mansung chiahmi le sunsakmi an si.

4, 5. Hmaizahnak langhter le upatnak ngeih cu zeitindah aa pehtlaih? Fianter.

⁴ Midang hmaizahnak ah zeidah aa tel? Hmaizahnak langhter awkah upatnak ngeih hmasa a herh. “Hmaizahnak” le “upatnak” timi biafang cu a sullam aa khah pah caah hman ṭi a si tawn. Hmaizahnak cu upatnak in langhter a si. Unau pawl kan upat hna ti tikah zeitindah kan hmuh hna kha a langhter i kan hmaizah hna ti tikah zeitindah kan pehtlaih hna kha a langhter.

⁵ Khrihfa pakhat nih zumtu khat pawl lungtak in a upat hna lo ahcun zeitindah lungtak in a hmaizah khawh hna lai? (3 Johan 9, 10) Thingkung pakhat cu vawlei ṭha ah hram a sih lawngah a ṭhang lai i sau a nun lai bantuk in lungtak in upat lawngah hmaizahnak cu a hmaanmi le a fekmi a si lai. Upatnak taktak a si lomi titer hmaizahnak cu sau a nguh lai lo. Cucaah Paul nih hmaizahnak langhter u ti a chim hlan ah “dawtnak taktak” ngei u tiah ralrin a kan pek.—Rom 12:9; 1 Piter 1:22 rel.

“Pathian Mui In Sermi” Minung kha Hmaizah hna

6, 7. Midang kha zeicah upat awk an si?

⁶ Lungtak in upatnak ngeih lawngah hmaizahnak langhter khawh a si caah unau pawl zei ruangah upat awk an si Baibal chimmi kha philh lo awk a si. Mah a ruang pahnih kha zoh u sih.

⁷ Minung cu thilnung dang he i lo loin “Pathian mui in sermi” kan si. (Jeim 3:9) Cucaah Pathian ziaza dawtnak, fimnak, dinnak kha kan ngei. A kan Sertu sin in kan hmuhmi a dang pakhat zong zohhmanh. Salm caṭialtu nih hitin a chim: “[Jehovah] . . . Nangmah thangṭhatnak hi van tiang a phan i . . . Nangmah lawnglawng hi a cungah a ummi na si i sunparnak le upatnak cu [minung] lu ah na chinh.” (Salm 8:1, 4, 5; 104:1)a Pathian nih minung kha a zeimaw zat tiang upatnak a peknak thawngin sunparnak kha a lu ah a chinh. Cucaah mi pakhat kan upat tikah minung a upat hmasa bikmi Jehovah kan cohlan a si. Mi vialte upat ding a ruang kan hngalh cang caah zumtu khat pawl kha upat chinchin ding an si.—Johan 3:16; Gal. 6:10.

Innchungkhar kan Si

8, 9. Zumtu khat pawl upat awk a ruang kha Paul nih zeitindah a chim?

⁸ Midang upat ding a ruang dang pakhat kha Paul nih a chim ṭhan. Hmaizahnak langhter ding a chim hlan ah Paul nih “u le nau bantuk in i daw cikcek u” tiah a ti. “I daw cikcek u” tiah lehmi Greek biafang cu pakhat le pakhat aa daw i aa bawmmi chungkhar lung a rualtermi hrifek a si. Khrihfabu pehtlaihnak cu a lung aa rualmi chungkhar pehtlaihnak bantuk a si awk a si kha langhter awkah Paul nih i daw cikcek u timi bia hi a hman. (Rom 12:5) Mah bia cu chiti thuhmi hna caah ṭialmi a si kha philh hlah. Annih cu Jehovah nih fa ah aa sermi an si. Cucaah chungkhar pakhat an hung si. Cu ruangah Paul chan chiti thuhmi Khrihfa hna cu pakhat le pakhat an i upat awk a si. Tuchan chiti thuhmi hna zong an i upat awk a si ve.

⁹ “Tuu dang” hna tah zeitin? (Johan 10:16) Pathian nih fa ah aa ser rih hna lo nain vawlei pumpi ah lung aa rualmi Khrihfa chungkhar an si caah pakhat le pakhat kha unau tiah an i auh cu aa tlak. (1 Pit. 2:17; 5:9) Cucaah tuu dang hna nih “unau pa,” “unau nu” tiah an i auhnak a ruang kha ṭha tein an hngalh ahcun zumtu khat pawl kha lungtak in an upat khawh hna lai.—1 Piter 3:8 rel.

Zeicah A Biapit?

10, 11. Upatnak le hmaizahnak langhter cu zeicah a biapit?

¹⁰ Upatnak le hmaizahnak langhter zeicah a biapit? Hi ruangah a si: Unau hna cungah hmaizahnak langhternak nih Khrihfabu ah ṭhatnak le lungrualnak a chuahter caah a si.

¹¹ Jehovah he pehtlaihnak ṭha ngeih le a thlarau bawmhnak hmuh cu a hmaanmi Khrihfa hna caah thazang petu hrampi a si kan hngalh. (Salm 36:7; Johan 14:26) Cun zumtu khat pawl nih an kan sunsak an langhtermi zong in thazang kan hmu. (Ptb. 25:11) Unau pakhat nih a bia le tuahsernak in a kan upat a langhter tikah kan lung a tho. Mahnih kan biakhiah ning in nunnak lam ah lunglawm tein kal peng awk a kan bawmh. Cu bantuk thil na tong bal lai ti cu a fiang ko.

12. Khrihfabu ah dawtnak a um nakhnga pakhat cio nih zeidah tuah khawh a si?

¹² Nu hrinnak in upatnak a herhmi kan si kha Jehovah nih a hngalh caah Baibal hmang in “pakhat le pakhat kha i hmaizah u” tiah a kan forh. (Rom 12:10; Matthai 7:12 rel.) Mah ruahnak cheuhnak kan zulhnak thawngin unau karlak ah dawtnak le zaangfahnak a um lai. Cucaah hitin kan i hal awk a si, ‘Khrihfabu ah unau pakhatkhat kha ka bia le tuahsernak in lungtak in ka upat kha zeitikah dah ka langhter?’—Rom 13:8.

Kan Zapi Ngeihmi Rian

13. (a) Hmaizahnak langhternak ah ahonihdah lamhruai awk a si? (b) Rom 1:7 Paul bia nih zeidah a langhter?

¹³ Hmaizahnak kha ahonihdah lamhruai awk a si? Paul nih Hebru Khrihfa hna sin a cakuat ah Khrihfa upa hna kha “hruaitu” an si tiah a ti. (Heb. 13:17) Khrihfa upa pawl cu Khrihfabu rian tampi an ngei ko nain tuurun zohkhenhtu tuukhal an si caah an rian ṭuanṭi hawi le zumtu khat hmaizahnak ah hruaitu an si a hau. Tahchunhnak ah, Khrihfabu ah a herhmi an i ruah ceih tikah pakhat le pakhat an bia ṭha tein an i ngaihpiaknak thawngin hmaizahnak an langhter. Biakhiahnak an tuah tikah Khrihfa upa dihlak an hmuhning an chimmi ruahpiaknak thawng zongin hmaizahnak an langhter. (Lam. 15:6-15) Asinain Paul nih Rom cauk a ṭial tikah Khrihfa upa ca lawng si loin Khrihfabu unau dihlak caah a ṭial kha philh lo ding a si. (Rom 1:7) Cucaah hmaizahnak ah lam i hruai u timi cawnpiaknak cu tuchan Khrihfa dihlak ca zongah a si.

14. (a) Hmaizahnak langhter le hmaizahnak ah lamhruai aa dannak kha fianter? (b) Zei bia dah kan i hal awk a si?

¹⁴ Paul nih Rom ah a ummi zumtu khat hna kha hmaizahnak langhter u tiah ti loin hmaizahnak ah lam i hruai u tiah a ti hna kha philh hlah. Mah pahnih cu zeitindah aa dan? Hi tahchunhnak hi zohhmanh. Saya nih carel a thiammi siangngakchia kha carel cawng u a ti hna lai maw? A ti hna lai lo. Annih cu carel a thiam cangmi an si. Ṭha deuh in relthiam awk tu saya nih a bawmh hna lai. Cu bantuk in pakhat le pakhat hmaizahnak langhter ding a kan forhtu dawtnak cu a hmaanmi Khrihfa hna hmelchunh a si. (Johan 13:35) Carel thiammi siangngakchia nih carel thiam deuh ding aa zuam khawh bantuk in kannih zong hmaizahnak langhternak ah lamhruainak in ṭhancho khawh a si. (1 Thes. 4:9, 10) Mah rian cu kan dihlak rian a si. Hitin kan i hal awk a si: ‘Khrihfabu ah unau cung hmaizahnak langhter hmasanak thawngin ka rian cu ka ṭuan maw?’

“Misifak” kha Hmaizah hna

15, 16. (a) Hmaizahnak langhter tikah ahotedah hrelh lo ding an si? Zeiruang ah? (b) Unau dihlak lungtak in kan upat hna kha zeinihdah a langhter lai?

¹⁵ Hmaizahnak langhter tikah Khrihfabu ah ahotedah hrelh lo ding an si? Baibal nih hitin a ti: “Misifak cungah zaangfahnak na ngeih ahcun BAWIPA kha chaw na coih bantuk a si. BAWIPA nih tling tein an cham lai.” (Ptb. 19:17) Mah Baibal cang hi hmaizahnak ah lamhruai ding kan i zuam tikah zeitindah zulh awk a si?

¹⁶ Mi tam deuh nih cun anmah nakin a sang deuhmi kha an hmaizah hna i anmah nakin a niam deuh ti an ruahmi hna kha an upat hna lo ti cu na hna a tla ko lai. Asinain Jehovah cu cu bantuk cu a si lo. “A ka upatmi cu ka upat hna lai” tiah a ti. (1 Sam. 2:30; Salm 113:5-7) Jehovah nih amah a biami le a hmaizahmi hna kha a hmaizah ve hna. Sifakmi zong zeirel loin a um hna lo. (1 Samuel 2:8 rel; 2 Chan. 16:9) Jehovah nawl i cawn kha kan duh. Midang kha kan hmaizah taktak hna maw ti hngalh kan duh ahcun hitin kan i hal awk a si, ‘Khrihfabu ah a langlomi le rian a ngeilomi hna kha zeitindah ka pehtlaih hna?’ (Johan 13:14, 15) Mah a phi nih midang kha zeitluk in dah lungtak in kan upat hna ti a langhter lai.—Filipi 2:3, 4 rel .

Caan Pek in Hmaizahnak Langhternak

17. Hmaizahnak ah lam i hruai khawhnak a biapi bik lam khat cu zeidah a si? Asinain zeidah kan hngalh awk a si?

¹⁷ Khrihfabu ah unau dihlak hmaizahnak ah lam i hruai khawhnak a biapi bik lam khat cu zeidah a si? Midang caah a caan pek a si. Mah cu zeicah a biapit? Zeicahtiah kan dihlak in kan rian a tam i a biapimi Khrihfabu rian ca zongah a caan tampi kan pek. Cucaah unau pawl sin in caan tampi hmuh lai kan i ruahchan lo. Cu bantuk in unau pawl nih bawmh an herh tikah kan sin in caan tampi hmuh lai an i ruahchan ve lo caah kan i lawm.

18. Cahmai 18 hmanthlak zoh tikah zumtu khat ca lungtho tein a caan pek kan duh zeitindah kan langhter khawh?

¹⁸ Kan dihlak in (a hlei in tuukhal a simi) nih rian chia ta in zumtu khat ca caan peknak nih kan upat hna a langhter ti kha kan hngalh. Cucu zeitindah a si khawh? Kan ṭuan liomi rian chia ta in unau caah caan pek cu ‘ka rian nakin nangmah hi na biapi deuh’ ti chim he aa lo. (Mar. 6:30-34) Asinain unau pawl ca caan pek awkah kan rian ngol kan duhlo a si ahcun ka caah na biapi lo tinak a si lai. Ngol awkah a ṭhalomi a biapi tukmi rian a um ti cu theihthiam a si ko. Asinain midang caah lungtho tein a caan kan pek asiloah pek kan duh lomi nih unau pawl kan upatnak a thuh, puanh a langhter.—1 Kor. 10:24.

Lamhruai awk Biakhiak

19. Zumtu khat kan hmaizah hna kha caan peknak lawng si loin zei lam zong in dah langhter khawh a si?

¹⁹ Zumtu khat cung hmaizahnak langhter khawhnak a dang a biapimi lam a um rih. Tahchunhnak ah, caan kan pek hna tikah kan lungthin aa tel awk a si. Hi zawn zongah Jehovah cu zohchunhawk ṭha a si. Salm caṭialtu David nih hitin a ti: ‘A dingmi cu BAWIPA nih a zoh hna i an aunak kha a theih.’ (Salm 34:15) Bawmhnak a kan halmi hna kha kan mit le kan hna hmang in lungtak in an bia kan ngaihnak thawngin Jehovah nawl cawn kan i zuam. Cuticun hmaizahnak kan langhter.

20. Hmaizahnak langhternak ah zei ralrin peknak dah cinken kan duh?

²⁰ Kan cawn cang bantuk in zumtu khat pawl lungtak in upat ding a ruang kha i cinken kan duh. Cun sifakmi tel in unau dihlak cungah hmaizahnak langhter hmasa awk caan ṭha kan kawl. Cuti tuahnak thawngin Khrihfabu ah unau dawtnak le lungrualnak kan fehter. Cucaah kan dihlak in unau hmaizahnak langhter lawng si loin hmaizahnak ah lam i hruai u sih. Cuti tuah awkah bia na khiak maw?

[A Tanglei Fianternak]

Naa Cinken Maw?

• Hmaizahnak le upatnak cu zeitindah aa pehtlaih?

• Zumtu khat hmaizah ding zei a ruang dah a um?

• Pakhat le pakhat i hmaizah cu zeicah a biapit?

• Zumtu khat cungah zeitindah hmaizahnak langhter khawh a si?

[Cahmai 18 Hmanthlak]

Zumtu khat hmaizahnak kha zeitindah kan langhter khawh?