“A Ṭha Bikmi” Dawtnak “Lam” Kha Na Zul Maw?

“PATHIAN cu dawtnak a si.” Lamkaltu Johan ṭialmi mah bia nih Pathian sining ah a lang bikmi sining a langhter. (Johan 4:8) Pathian he a kan naihter khomi le pehtlaihnak ṭha a kan ngeihter khomi cu minung cung a ngeihmi a dawtnak a si. Pathian dawtnak nih a dang zeitilam in dah a kan ṭhathnem? Hitin an chim tawn: “Kan duhmi phun in a kan ser.” Cucu a hmaan. Asinain kan dawtmi le a kan dawmi thawng in sersiam kan si ti zong a hmaan. Pathian he i lo in sermi kan si caah Pathian dawtnak kha kan langhter khawh. (Gen. 1:27) Cucaah Pathian kan dawt cu “a kan dawt hmasa caah a si” tiah lamkaltu Johan nih a ṭialnak a si.—1 Johan 4:19.

Dawtnak Langhtermi Biafang Pali

Lamkaltu Paul nih dawtnak kha “a ṭha bikmi lam” tiah a ti. (1 Kor. 12:31, NW) Dawtnak kha zeicah hi lam in a langhter? Paul nih zei bantuk dawtnak dah a chim? A phi hngalh awkah “dawtnak” timi biafang sullam kha ṭha tein zoh u sih.

Hlanlio Greek miphun nih dawtnak langhternak ah pungsan a phunphun in an hmanmi a hrampi biafang pali an ngei: stor·geʹ, eʹros, phi·liʹa le a·gaʹpe an si. Mah chungah a·gaʹpe cu “dawtnak” a simi Pathian kong chim tikah hmanmi a si.a Mah dawtnak he aa tlai in Professor William Barclay nih a Biakam Thar Baibal Biafang cauk ah hitin a chim: “Agapē cu lungthin he aa tlai; kan lung chungah amah tein a hung chuakmi lungduhnak menmen a si lo; timhciammam in kan zulhmi phunglam a si. Agapē cu lungput he aa pehtlai bik.” Mah biapehnak ah a·gaʹpe cu phunglam in uk asiloah lamhruaimi dawtnak a si nain cucu lungduh tuknak he aa pehtlai tawn. A ṭhami le a ṭhalomi phunglam a um, Khrihfa a simi nih Jehovah Pathian theng nih Baibal ah a khumhmi a ṭhami phung lamhruainak zulh awk a si a fiang. Dawtnak fianternak ah Baibal nih a hmanmi a dang biafang le a·gaʹpe he aa tlaimi Baibal chimmi kan tahchunh tikah langhter awk a simi dawtnak kha kan hngalhthiam deuh lai.

Innchungkhar Ah A Ummi Dawtnak

A nuammi le lung aa rualmi chungkhar ah um cu a nuam tuk! Stor·geʹ cu innchungkhar lakah a ummi chungkhar dawtnak langhter awkah hmanmi Greek biafang a si. Khrihfa hna nih an innchungkhar ah a ummi hna kha dawt awkah an i zuam. Ni hmanung bik caan ah mi tampi cu ‘chungkhar dawtnak a ngei lomi’ an si lai tiah Paul nih a chimchung.b—2 Tim. 3:1, 3.

Innchungkhar lakah a ummi kokek dawtnak cu ngaihchiat awk tlak in nihin vawlei ah a um ti lo. Nau a pawimi nu tampi nih zeicah nau an hrawh? Chungkhar tampi nih tar nu le pa cungah zeicah siaherhnak an langhter ti lo? I ṭhennak hi zeicah tampi a um? Aphi cu chungkhar dawtnak a um lo caah a si.

Cun “lungthin hi zeizong vialte nakin a zer bik” tiah Baibal nih a ti. (Jer 17:9) Chungkhar dawtnak ah kan lungthin le intuarnak aa tel. Asinain a va nih a nupi cungah a langhter hngami dawtnak kong Paul nih a chim tikah a·gaʹpe a hmanmi hi hngalh duh awk ngai a si. Paul nih mah dawtnak kha Khrih nih Khrihfabu a dawtnak he a tahchunh. (Efe. 5:28, 29) Mah dawtnak cu innchungkhar hram a thawktu Jehovah chiahmi phung cungah aa bunh.

Chungkhar dawtnak nih tar nu le pa cungah siaherhnak langhter awk asiloah fale cungah ṭuanvo lak awk a kan forh. Cun fale kha a herh tikah dawtnak he cawnpiak awkah nu le pa kha a forh hna i fale duhnak zulh tuknak a chuahtermi lungthin tuahsernak in a kham hna.—Efe. 6:1-4.

Nu le Va Dawtnak le Baibal Phunglam

Aa ṭhiummi nu le va kar dawtnak cu Pathian sinin laksawng pakhat taktak a si. (Ptb. 5:15-17) Asinain nu le va dawtnak a langhtermi eʹros biafang kha Baibal ṭialtu nih an hmang lo. Zei ruangah a si? Kan hnulei kum tampi lio ah Vennak Innsang nih hitin a chim: “Nihin vawlei pumpi nih hlanlio Greek miphun nih an tuahmi sualnak kha an tuahmi a lo. Annih nih Eros kha dawtnak pathian in an biak, a biakṭheng ah an bawk i rai an thawi. . . . Asinain nu le pa sualnak he aa pehtlaimi mah biaknak cu a ṭha lomi, duhpaoh in umnak le ziaza rawhnak lawng a si tiah tuanbia nih a langhter. Cucaah mah biafang kha Baibal ṭialtu hna nih an hmanlonak a si men lai.” Mui in lemsoinak, lungthli saduhthahnak cungah aa hngatmi pehtlaihnak hrial awkah Baibal phunglam in uk asiloah i sum awk a si. Cucaah hitin kan i hal awk a si, ‘Ka lungthli saduhtahnak intuarnak cu innchunghawi cungah ka ngeihmi dawtnak taktak he aa tluk maw?’

Nu le pa um ṭi duhnak a ṭhawn tuk lio ‘nungak tlanval siling’ caan ah Baibal phunglam aa tlaihmi mino pawl cu ziaza thiang tein an nung ko lai. (1 Kor. 7:36, NW; Kol. 3:5) Ṭhitumnak kha Jehovah sin a thiangmi laksawng in kan hmuh. Aa ṭhiummi hna he aa tlai in Jesuh nih hitin a chim: “Pathian nih a fonhmi hna cu mi nih an ṭhen awk hna a si lo.” (Matt. 19:6) Pakhat le pakhat duhnak ngeih tiang lawng um ṭi phun si lo in ṭhitumnak kha a fekmi biakamnak in kan hmuh. Nu le va karlak ah buaibainak a um tikah fawi tein i ṭhen ding kha si lo in chungkhar nunnak a nuamhtermi Pathian duhmi sining hna langhter awkah fakpi in kan i zuam. Cu ti i zuamnak nih a hmunmi lunglawmhnak kha a chuahter lai.—Efe. 5:33; Heb. 13:4.

Hawikom Lak I A Ummi Dawtnak

Hawikom ngeih lo nunnak cu umhar tuk a si lai! Baibal phungthlukbia ah hitin a chim: “Unau nakin a fek deuhmi hawikom zong an um.” (Ptb. 18:24) Jehovah nih hawikom ṭha taktak ngei hna seh ti a kan duh. David le Jonathan cu aa kom tukmi an si kha mi tam nih kan hngalh. (1 Sam. 18:1) Cun lamkaltu Johan kha Jesuh “dawtmi” tiah Baibal nih a ti. (Johan 20:2) ‘Tlaihchannak’ asiloah ‘hawikomhnak’ caah Greek biafang cu phi·liʹa a si. Khrihfabu ah hawikom ṭha ngeih cu a palh lo. Asinain 2 Piter 1:7 ah “unau bantuk in i dawtnak” (phi·la·del·phiʹa, ‘hawikom’ timi Greek biafang phiʹlos le “unau” timi Greek biafang a·del·phosʹ he komhmi biafang) ah dawtnak (a·gaʹpe) kha chap awkah tha a kan pek. A fekmi hawikom si awkah mah ruahnak cheuhmi kha zulh kan herh. Hitin kan i hal awk a si, ‘Hawikomhnak ah ka intuarmi hi Baibal phunglam he aa tluk maw?’

Hawi he i komh tikah duhdanhnak ngeih kha hrial awkah Baibal phunglam nih a kan bawmh. Phunglam pahnih, kan hawikom caah zaangfahnak phunglam le hawikom a si lomi caah a harmi phunglam kan hmang lo. Cun i hawikomh duh ah fak phun zong kan hmang lo. A biapi bik cu Baibal phunglam hmannak nih hawikom i thim awk le ‘hawi ṭhalo ziaza ṭha a hrawkmi’ hna kha hrial awkah a herhmi thleidanthiamnak a kan pek.—1 Kor. 15:33.

Aa Phundangmi Dawtnak Hri

Khrihfa lung a rualtermi hri cu aa phundangmi a si taktak! Lamkaltu Paul nih hitin a ṭial: ‘Kan i dawtnak hi lungthin taktak in a si awk a si. . . . Pakhat le pakhat kha . . . u le nau bantukin i daw cikcek u law tlaihchanmi dawtnak ngei u.’ (Rom 12:9, 10, NW) A si, Khrihfa hna cu ‘dawtnak taktak (a·gaʹpe)’ an ngei. Mah dawtnak cu lung ah a hung chuakmi in rikhiah a si lo. Baibal phunglam ah thukpi in hram sihmi a si. Asinain Paul nih “u le nau bantuk in i daw cikcek u” (phi·la·del·phiʹa) le ‘tlaihchanmi dawtnak’ (phi·loʹstor·gos, phiʹlos le stor·geʹ komhmi biafang) kong zong a chim. Baibal thiamsang pakhat chimmi ah, “u le nau bantuk in i daw cikcek u” cu “tlaihchanmi dawtnak, zaangfahnak langhternak, zawnruahnak, bawmhnak” a si. Mah cu a·gaʹpe dawtnak he fonh tikah Jehovah a biami hna lak ah a ummi naih tein i hawikomhnak a chuahter. (1 Thes. 4:9, 10) ‘Tlaihchanmi dawtnak’ tiah lehmi hi Baibal ah voikhat lawng aa tel i innchungkhar khar khat bantuk in aa naihmi komhnak kha a sawh.c

A hmaanmi Khrihfa lung a rualtermi hri cu innchungkhar dawtnak le hawikom tak dawtnak kha Baibal phunglam ah hrambunhmi dawtnak in hruaimi pehtlaihnak dihlak fonhmi a si. Khrihfa bu cu zatlang komhmi bu asiloah vawlei lei bu pakhat si loin Jehovah Pathian biaknak ah lungrual in aa kommi chungkhar a si. Zumtu hawi pawl kha unau nu, unau pa tiah kan auh hna i cuticun kan hmuh hna. Annih cu thlaraulei innchungkhar an si, hawikom in kan dawt hna, Baibal phunglam he aa tlak in kan pehtlaih hna. A hmaanmi Khrihfa bu lung a rualter i aho kan si a langhtermi dawtnak hri kha kan dihlak in langhter peng hna u sih.—Johan 13:35.

[A Tanglei Fianternak]

[Cahmai 12nak i hmanthlak]

Kan lung a rualtermi dawtnak hri zeitindah na langhter?