Zawnruahnak Langhter

Buaibainak

Midang cu kanmah he zeitluk in dah an i dan timi cungah lungthin kan pek tuk ahcun cu bantuk i dannak kha chambaunak le tlinlonak in kan hun hmuh khawh. Mah nih kanmah sining he aa dangmi hna cungah thleidannak a kan ngeihter khawh. Mah bantuk a ṭhalomi hmuhnak kan ngeih ahcun zawnruahnak langhter kha kan hun i harh lai. Zawnruahnak kan ngeih lo ahcun thleidannak lungput kan ngeihmi cu a zual chin lai.

Baibal Phunglam

“Aa lawmmi sinah vaa lawm ve u, a ṭapmi sinah va ṭap ve u.”—ROM 12:15.

Mah cu zei sullam dah a si? Mah phunglam nih zawnruahnak kan langhter a hau ti kha a kan cawnpiak. Zawnruahnak timi cu midang zaka ah i umter le a intuar bantukin intuar khawh ve kha a si.

Zawnruahnak Nih A Kan Bawmh Khawh Ning

Mi pakhat cungah zawnruahnak kan langhter tikah mah pa he zeitluk in dah kan i lawh ti kha kan hun hngalh. Kanmah bantukin a intuar ve i a lehrulh ve ti kha kan hun hngalh lai. Zawnruahnak nih zei bantuk hnulei sining a ngeimi an si hmanhah mi vialte cu minung chungkhar pakhat ah kan i tel dih ti kha hngalhthiam awk zongah a kan bawmh. Kanmah he an i lawhnak cungah lungthin kan pek ahcun an cungah a ṭhami hmuhnak kan ngei deuh lai.

Zawnruahnak nih midang kha upat awk zongah a kan bawmh lai. Mi tampi nih an nautatmi miphun pakhat kha Senegal in a rami Anne-Marie nih a nautat ve hna. Zawnruahnak nih a bawmh ning kha hitin a chim: “Mi nih an nautatmi miphun hna nih harnak an tonmi ka hmuh tikah an sining ah hei um ve ning law zeitindah ka intuar hnga tiah kaa hal. Mah tikah anmah nakin ka ṭha deuh hlei lo ti kha ka hun hngalh. Anmah nakin a ka ṭhatter deuhmi zei thil hmanh ka tuahmi a um lo.” Midang nih an tonmi harnak hna hngalhthiam awkah kan i zuam ahcun soisel loin an cungah zawnruahnak tu kan hun ngei lai.

Na Tuah Khawhmi

A chiatnaklei in na hmuhmi phu pakhat cungah nan i dannak kha si loin nan i lawhnak tu kha hngalh awkah i zuam. Tahchunhnak ah, a tanglei ah langhtermi thil hna an tuah tikah an intuar ning kha ruathmanh:

Zawnruahnak nih mi vialte cu minung chungkhar pakhat ah kan i tel dih ti kha hngalhthiam awkah a kan bawmh

an innchungkhar he rawl an eiṭi tik
rian har an liim tik
hawikom he caan an hmanṭi tik
an duh tukmi music pawl an ngaih tik

Cun an sining ah i umter. Hitin i hal:

‘Mi pakhat nih man ka ngei lo timi ruahnak a ka ngeihter ahcun zeitindah ka lehrulh lai?’
‘Midang nih ka kong hmanh an hngalh hlanin sual an ka phawt ahcun zeitindah ka um lai?’
‘A chiatnak in ka hmuhmi phu lakah i tel ve ning law midang nih zeitindah rak ka pehtlaih hna seh ti ka duh lai?’

Mah a tak rong a raangmi pa le Sikh mi pa nih an chungkhar, an duhmi zaang-lentecelhnak le an rian ti bantuk he aa tlaiin hmanhthlak an i piah lio.

A Cang Taktakmi: Robert (Singapore)

“A hlanah cun a hna a chet i a holh kho lomi hna kha hawi he aa lo lomi, khuaruah khawhnak a ngei lomi le a thinhun a fawimi in ka rak ruah hna. Cucaah ka hrial hna. Asinain mah ka hmuh ning kha thleidannak in ka rak ruat lo, zeicatiah mah nih ahohmanh harnak a pe hna lomi a lo.

“A hna a chet i a holh kho lomi hna cungah zawnruahnak ngeihnak nih thleidannak ka ngeihmi kha hloh awkah a ka bawmh. Tahchunhnak ah, ka chawnh hna tikah zei intuarnak hmanh langhter loin an ka zoh caah khuaruah khawhnak an ngei lo tiah ka rak ruah. Cucaah pakhatkhat nih an ka chawnhmi ka theih khawh lo tikah zeitindah ka um hnga tiah ka ruat. Ka mithmai ah zei bantuk intuarnak hmanh a lang ve lai lo. Theih khawhnak caah bawmtu a simi thil ka ngeih hmanhah theih awkah kaa zuam chih lioah ka mithmai zong nih ‘hngalhthiam awkah kaa zuam’ ti kha a langhter men ko lai.

“A hna a chet i a holh kho lomi zaka in kaa umter tikah thleidannak ka ngeihmi cu a tlau.”