CAWN DINGMI 49
Na Innchungkhar Kha Zeitindah Na Nuamhter Khawh?—Ṭhen 1
Aa ṭhium kami nuva hna nih an i ṭhitum ni thawkin kan i nuam zungzal lai tiah an i ruahchan. Mah cu a si kho ko. An i ṭhitumnak kum saupi a si cang i Baibal ruahnak cheuhnak zulh awkah aa zuammi Khrihfa hna zong nih cutin an ruah ve.
1. Baibal nih vale kha zei ruahnak dah a cheuh hna?
Jehovah nih vale kha chungkhar lu in rian a pek hna. (Efesa 5:23 rel.) Cun vale nih an chungkhar caah a ṭhami biakhiahnak tuah hna seh ti a duh. Baibal nih vale kha hitin ruahnak a cheuh hna: “Nan nupile kha nan dawt hna awk a si.” (Efesa 5:25) Mah cu zei sullam dah a si? A nupi a dawmi va pakhat nih cun a nupi kha mi hmuhnak ah siseh, mi hmuh lonak ah siseh dawtnak he a pehtlaih. Ṭih a nungmi thil in a kilven i pumsalei le lungthinlei ah a herhmi kha tuahpiak awkah a si khawh chungin aa zuam. (1 Timote 5:8) A biapi bikmi thil a simi thlaraulei i a herhmi zong kha a bawmh. (Matthai 4:4) Tahchunhnak ah, a nupi he thla an camṭi kho i Baibal an relṭi kho. A nupi dawtnak he a zohkhenhmi va pakhat cu Jehovah he zong a ṭhami pehtlaihnak a ngei.—1 Peter 3:7 rel.
2. Baibal nih nupile kha zei ruahnak dah a cheuh hna?
Baibal nih nupile kha “nan vale cu nan hmaizah hna lai” tiah ruahnak a cheuh hna. (Efesa 5:33) Nupi pakhat nih cutin zeitindah a tuah khawh? A vapa i a sining ṭha hna le an chungkhar zohkhenh awkah aa zuam ning kong hna kha a ruah ṭhan khawh. Cun a vapa cu zumlotu a si hmanhah a biakhiahnak a cohlannak thawngin le nem tein a pehtlaihnak thawngin a upat kha a langhter khawh.
3. Nuva hna nih an innchungkhar kha zeitindah an fehter khawh?
Baibal nih aa ṭhiummi nuva hna kong he aa tlaiin hitin a ti: “Cu hna pahnih cu pumkhat an si lai.” (Matthai 19:5) A sullam cu an i dawtnak a zorter khomi zei bantuk thil paoh an hrial a hau tinak a si. Hmaan tein caan an hmanṭinak thawngin le pakhat le pakhat an ruahnak le an intuarnak kong zalong tein an i chimhnak thawngin cutin an tuah khawh. Jehovah dah ti lo cu an innchungkhar nakin a dang a biapi deuhmi thil asiloah mi pakhat kha umnak nawl an awnh awk a si lo. Cun midang he naih tuk in i pehtlaih lo awkah a hleiin an i ralrin a hau.
TAM DEUH IN HLATHLAI
Nan innchungkhar a fehter khomi Baibal phunglam hna kha hlathlai.
4. Vale hna—nan nupile kha daw hna u law ṭha tein zohkhenh hna u
Baibal nih “pa nih an nupile cu anmah pum an i dawt bantukin an dawt hna awk a si” tiah a ti. (Efesa 5:28, 29) Mah cu zei sullam dah a si? VIDEO kha piah, cun a tanglei biahalnak hi i ruah u.
Va pakhat nih a nupi a dawt i a zohkhenh ti kha zeitindah a langhter khawh?
Kolose 3:12 rel law mah biahalnak hi i ruah u:
Va pakhat nih a innchungkhar ah mah sining hna kha zeitindah a langhter khawh?
5. Nupile hna—nan vale kha daw hna u law upat hna u
Nupi pakhat kha a vapa cu Jehovah a biami a si zong, si lo zongah upat dingin Baibal nih tha a pek. 1 Peter 3:1, 2 rel law mah biahalnak hna hi i ruah u:
Zumlotu va a ngeimi na si ahcun na vapa nih Jehovah kha bia seh ti na duh ko lai. Zeitin na bawmh ah dah a ṭhat deuh lai? Atu le atu phung chimh maw asiloah a ṭhami ziaza le upatnak langhter dah? Zeicah?
Vale le nupile nih hmunkhat ah a ṭhami biakhiahnak kha an tuahṭi khawh. Asinain a nupi nih a vapa biakhiahnak kha a hna a tlak lo caan a um kho men. Mah bantuk caan ah a ruahnak kha lungdai te le upatnak tein a chimh khawh. Asinain vale cu chungkhar caah a ṭhami biakhiahnak tuah awkah Jehovah nih rian a pek hna ti kha a hngalh a hau. Cun a biakhiahnak cohlan awkah a si khawh chungin aa zuam zong a hau. Cutin a tuahnak thawngin an chungkhar a nuamh nakhnga a bawmh khawh. 1 Peter 3:3-5 rel law mah biahalnak hi i ruah u:
A nupi nih a vapa a upat tikah Jehovah cu zeitindah a um?
6. Innchungkhar buaibainak hna kha na tei khawh
A tlingmi innchungkhar timi cu a um lo. Cucaah nuva hna nih buaibainak kha an tawnghthamṭi a hau. VIDEO kha piah, cun a tanglei biahalnak hna hi i ruah u.
Mah video ah nuva hna cu an i dawtnak a zor ti kha zeinihdah a langhter?
An innchungkhar fehter awkah zei hna dah an tuah?
1 Korin 10:24 le Kolose 3:13 rel. Baibal caang pakhat cio nan rel dih hnuah mah biahalnak hi i ruah u:
Mah ruahnak cheuhnak zulhnak nih na innchungkhar kha zeitindah a fehter khawh?
Baibal nih pakhat le pakhat kan i hmaizah awk a si tiah a ti. Hmaizahnak langhter timi ah mi pakhat kha zaangfahnak le upatnak he pehtlaih zong aa tel. Rom 12:10 rel law mah biahalnak hna hi i ruah u:
Vale asiloah nupile nih an innchunghawi nih an cungah hmaizahnak langhter hmasa dingin an hngah awk a si maw? Zeicah a si asiloah zeicah a si lo?
MI CHEUKHAT CHIMMI: “Ka innchunghawi he a hlan bantukin kan i daw ti lo.”
Baibal nih a bawmh khawh hna ti kha zeitindah na chimh hna lai?
A TAWINAK
Nupi le vale nih pakhat le pakhat an i dawt, an i upat i Baibal phunglam an zulh ahcun an i nuam kho.
I Ruahṭi Ṭhannak
A nuammi innchungkhar si awkah va pakhat nih zeidah a tuah khawh?
A nuammi innchungkhar si awkah nupi pakhat nih zeidah a tuah khawh?
Innchunghawi a ngeimi na si ahcun na innchungkhar fehter awkah zei Baibal phunglam nih dah aan bawmh khawh?
HLATHLAI CHAP
Na innchungkhar a nuamh khawh nakhnga aan bawm khomi zulhawk a tlakmi ruahnak cheuhnak hna kha hlathlai.
A Nuammi Chungkhar Nunnak Zeitindah Hmuh Khawh A Si? (brochure)
Innchungkhar ah Pathian ruahnak cheuhnak zulhnak in hmuhmi thluachuah kong kha mah music video ah zoh.
Vale lu sinak upat timi cu zei sullam dah a si timi kong kha hlathlai.
“Nupile Nih Zeicah An Lu Nawl An Ngaih?” (2010, May 15, Vennak Innsang)
Nuva tuahkhat nih i maknak ti bantuk buaibainak ngan hna kha zeitindah an tawnghtham khawh?