Ṭhen 11
Atu Kan Caan Hi Hmanung Bik Ni Hna An Si!
1. Zeicahdah mi tampi cu vawlei umtuzia an ruah tikah an khuaruah a har, sihmanhsehlaw vawlei cung i a tlungmi thil hna kong he aa tlaiin bochan awk tlakmi fianternak cu khoikadah hmuh khawh a si lai?
KAN VAWLEI cu zeitindah hitluk hnahnok ngaimi umtuzia hi a phanh? Khoikalei dah kan panh cuahmah cang? Cubantuk biahalnak cu nang na tuah bal maw? Mi tampi cu vawlei umtuzia kha an zoh tikah an khuaruah a har ko. A um taktakmi raldohnak, zawtnak le sualnak hna nih hmailei kongah khuaruahhar le lungawṭawm in a umter hna. Cozah a hruaitu hna nihcun ruahchannak tlawmpalte lawng an pek khawh. Sihmanhsehlaw hi lungretheihnak ni hna kong he aa tlaiin bochan awk tlakmi fianternak cu Pathian sinin a Bia chungah hmuh khawh a si. Caan tiluannak khuazeiahdah kan phanh cang ti hngalh awkah bochan awk tlakin Baibal nih a kan bawmh. Kannih cu atu lio thil hna ningcang “hmanung bik ni hna” ah kan phan cang ti hngalh awkah bochan awk tlakin Baibal nih a kan bawmh. Kannih cu atu lio thil hna ningcang “hmanung bik ni hna” ah kan phan cang ti kha a langhter.—2 Timote 3:1.
2. Jesuh cu a zultu pawl nih zei bia dah an rak hal i, zeitindah a rak leh hna?
2 Tahchunhnak ah, a zultu pawl nih an rak tuahmi biahalnak he aa tlaiin Jesuh nih a lehnak hna hi ruat tuah hmanh. Jesuh a thih hlan ni thum lioah, annih nih hitin an rak hal: “Na umnak le thil hna ningcang donghnak hmelchunhnak cu zeidah a si lai?”a (Matthai 24:3) A lehnak hnaah, Jesuh nihhi Pathian zei i a rel lomi ningcang a hmanung bik ni hna ah a luhnak fiang tein a langhtermi vawlei cungah a tlung hnga dingmi thil le umtuzia hna kha a rak chim.
3. Zeicahdah Jesuh uknak a thawk tikah vawlei umtuzia cu a ṭhatlo chin lengmang?
3 A cunglei ṭhen chung i kan langhter cang bantukin, Baibal caan tuaknak nih Pathian Pennak nih uknak a thawk cang ti a fianter. Sihmanhsehlaw cucu zeitindah a si khawh lai? Thil umtuzia cu ṭhat deuh loin a chiat chin lengmang ko ṭung. Angaite ti ahcun, hi cu Pathian Pennak nih uknak a thawk cang ti a fiang tein a langhtertu a si lehlam. Zeicah cutin kan chim khawh? Salm 110:2 nih Jesuh cu ‘a ral hna karlakah’ caan khat chung a uk lai tiah a kan hngalhter. A hmaan tein, vancung Siangpahrang in a tuah hmasa bikmi cu Satan le a khuachia vancungmi pawl vawlei velchum i run thlak kha a si. (Biathlam 12:9) Mah ruang ahcun a phichuak zeidah a si? Beathlam 12:12 a chimchung bantuk hi a si: “Vawlei le rili cu in chiat ko hna seh, zeitintiah Rulhreu cu caan tawite lawng ka ngeih cang ti kha a hngalh i thinhunnak nganpi he nan sinah a rung ṭum cang.” Atu ah kannih cu cu “caan tawite” chung ahcun kan nung cang.
4. Hmanung bik ni hna hmelchunhnak cheukhat cu zeidah an si i, mah nihcun zeidah an langhter? (Rinlikulh zoh.)
4 Cucaah zeihmanh khuaruahhar awk um loin, a umnak le thil hna ningcang donghnak hmelchunhnak kong Jesuh an rak hal tikah, a lehnak hna cu fimnak he a khatmi a rak si. Cu hmelchunhnak chung i aa telmi phun dangdang hna cu cahmai 102 i rinlikulh chungah hmuh khawh an si. Lamkaltu Paul, Piter le Johan zong nih hmanung bik ni hna he aa tlaimi thil dang a neknok tiangin an pek ti kha na hmuh khawh ko. Hmelchunhnak le hmanung bik ni hna he aa tlaimi thil hna a tam deuh ahcun lungretheihnak umtuzia hna aa tel ti cu a hmaan ko. Sihmanhsehlaw hi chimchungbia hna a tlinnak nih, hi ningcang ṭhalo cu a donghnak a nai cang ti kha a kan zumhter awk a si. Hmanung bik ni hna hmelchunhnak lak i a lang khunmi cheukhat hna cu zoh tuah u sih.
HMANUNG BIK NI HNA I A LANG DEUHMI HMELCHUNHNAK HNA
5, 6. Raldohnak le mangṭam kong he aa tlaimi chimchungbia cu zeitindah an tlin?
5 “Mi phunkhat le phunkhat, pengkhat le pengkhat an i rallai.” (Matthai 24:7; Biathlam 6:4) Caṭialtu Ernest Hemingway nih Vawlei Ralpi 1 kha “vawlei cung i a tlung balmi vialte lakah a ngan bik, a puarhrang bik, a hmaan lo bikmi mithahnak asi,” tiah a rak ti. The World in the Crucible—1914-1919 timi cauk a chim bangin Vawlei Ralpi 1 cu “minung tuanbia ah a hmasa bikmi thazang dihlak chuahin dohmi ral, raldohnak phun thar a si. A caan, a hmual fahning le a nganning nih a hlanah hngalh balmi asiloah a tlangpi in ruah balmi zei dang vialte kha a lonh dih hna.” Cuhnuah Vawlei Ralpi 1 nakin let tampi in thil a hrawk khomi Vawlei Ralpi II nih a hun zulh. Tuanbia saya Hugh Thomas nih: “Kum zabu pakulnak cu set meithal, tank, B-52, (B-52 bom thlaknak vanlawng), nuclear bom, a donghnak ah bom kahnak meithal nih an uk. A dang zeibantuk chan nak hmanhin thisen chuahnak le hrawhnak a chuahter deuhmi raldohnak in hmelchunh a si,” tiah a ti. A hmaan ko, Akikmi Raldohnak a dih hnuin hriamnamhrawhnak kong cu tampi an ceih ko. Asinain, an chimmi hriamnam ṭhumhnak hnuah, Vawlei Ralpi II lio i an hmanmi hriamnam thazang i let 900 nakin a tam deuhmi—nuclear bomlu 10,000 in 20,000 tiang a tang rih ko tiah cazin pakhat nihcun a ti.
6 “Rawl a har lai.” (Matthai 24:7; Biathlam 6:5, 6, 8) 1914 kum thawk inkhan a tlawm bikah mangṭam nganpi 20 tluk a um cang. Mangṭam a tlunnak ram hna ahcun Bangladesh, Burundi, Cambodia, Ethiopia, India, Krik, Nigeria, Russia, Rwanda, Somalia, Sudan le Tuluk an i tel. Sihmanhsehlaw mangṭam cu rawl um lo ruanglawngah a si zungzal lo. Lothlawhnaklei le hunchonaklei mifim pawl bukhat nih: “Aluan ciami kum sawm tlawmpal chungah vawlei rawl chuahning cu minung karhning nakin khulrang ngaiin a karh cang. Sihmanhsehlaw vawlei minung a tlawm bikah nuai 800 cu sifahnak nganpi chungah an hmunh ko caah rawl tampi um ko hmanhsehlaw . . . caan saupi chung rawl i zat lo ruang i a chuakmi zawtnak in luat awkah duhdim le tlamtling in an i cawk kho lo,” tiah an ti. A dang kong hna ahcun nainganzi cawhkalhnak aa tel. Toronto University in Dr. Abdelgalil Elmekki nih an ram chung mi thong tampi rawlṭam in an um lioah ram dang ah rawl tampi a zuarmi ram pahnih kha tahchunhnak ah a chim. Cu ram cozahpawl cu an ram chung mi cawmnak nakin an raldohnak caah a herhmi ram dang tangka hmuhnak tu kha biapi deuhin an chiah. Dr. Elmekki nihcun zeitindah biatlang a kawm? Mangṭam cu “phawtzamhnak le cozah policy ruangah” a si tawn.
7. Tlangrai zawtnak kong he aa tlaiin tuchan i a cang taktakmi cu zeidah an si?
7 “Tlangrai zawtnak.” (Luka 21:11; Biathlam 6:8) 1918-19 kum chungah a rak tlungmi Spain khuh zawtnak ruangah a tlawm bik mi nuai 21 an rak thi. A.A. Hoehling nih The Great Epidemic cauk chungah: “Vawlei tuanbia chungah hitluk a tammi minung kha hitluk khulrangin a thatmi mithattu nih vawlei hi a rak hrawk bal lo,” tiah a ṭial. Nihin ah tlangrai zawtnak hna cu tei khawh ti lo dingin an karh chin cang. Kum fate, khensar nih mi nuai nga a thah hna, chungtlik zawtnak caah ngakchia nuai thum an thi i, t.b zawtnak nih mi nuai thum a thah hna. Thawchuahnak he aa pehtlaimi chawnh khawhmi zawtnak, a bikin tangfah zawtnak (pneumonia) nih kum ngatang ngakchia pawl kha nuai 3.5 kha kum fate a thah hna. Vawlei minung hnarceu tluk a simi nuai 2,500 cu—ti harnak, asiloah a thiang lomi ti le thenhhlimhnak a ṭhatlo ruangah a chuakmi zawtnak an ing hna. AIDS zawtnak cu minung nih siilei ah a biapimi hlawhtlinnak hmu hmanh hna sehlaw, zawtnak andohnak ah an tei khawhlonak ralrin peknak a dang pakhat a si.
8. Mi hna cu “tangka duhmi” an sinak kha zeitindah an langhter?
8 “Mi cu . . . tangka duhmi an si lai.” (2 Timote 3:2) Vawlei dihlak ram tampi ah minung an rumnak caah a di a riam kholomi duhnak a ngeimi an lo. “Teinak” cu mi pakhat i a hmuhmi tangka tlawmtam in an tah i, “hlawhtlinnak” cu mi pakhat nih a ngeihmi inkhan an tah tawn. “Thilri le chawhlawn kawlnak cu Amerikan mi hna lakah mi a hruai khomi a si rih ko lai i . . . hunchonak dawrhmun nganpipi ah duhsah duhsah tein a biapi deuh chin lengmangmi ṭhawnnak pakhat in a hmun rih lengmang ko lai,” tiah thawngthanhnak rian pakhat i president changtupa nih a thanh. Nangmah na umnak hmun zongah cucu a si ve maw?
9. Chimchungmi nu le pa upatlonak kong ah zeidah kan chim khawh?
9 “Nu le pa nawl a ngailomi.” (2 Timote 3:2) Tuchan nu le pa hna, sayale le mi dang tampi nih fale tampi cu upatnak a ngeilomi le nawl a ngailomi lawngte an si ti dairekin a langhtermi thil an ngei. Hi seinomi cheukhat hna cu nu le pa an ziaza ṭhatlonak kha an lehrulh hna asiloah an i zohchunhmi hna a si. Sianginn, upadi, biaknak le an nu le an pa cungah zumhnak ngei loin—a ralchanmi ngakchia cu—an tam deuh chin lengmang cang. “Chan tiluan ningin ngakchia cu zeihmanh kha zei i a rel ti lomi an lo,” tiah caan saupi sianginn saya a rak ṭuanmi pakhat nih a chim. Sihmanhsehlaw, Pathian a ṭihmi ngakchia tampi cu umtu ziazalei ah zohchunh awk ṭha ngai an si caah lunglawmh awk ngai a si ko.
10, 11. Mi cu ṭih an nung i kokek dawtnak an ngei lo ti langhter tu thil zeidah a um?
10 “Ṭih a nungmi.” (2 Timothy 3:3) “Ṭih a nungmi” tiah an lehmi Krik biafang cu ‘hremlomi, a pingmi, minung zangfahnak le zawnruahnak a ngei lomi,’ tinak a si. Nihin i zang-ennak a tuahtu hna he hi cu zeitluk in dah aa tlak! “Minung nunnak cu hitluk ṭihnung a si i hitlukin thisen chuahnak le tukthahnak a tam tuk caah nifa tein tadinca rel awk hmanh hi lung ṭhawn taktak a herh,” tiah ca ṭialtu ruahnak pakhat nihcun a ti. Inn vengtu palik senthum pakhat nih, seino mi tampi hna cu anmah tuahsernak thawngin a chuakmi thil kha zeihmanhah a rel lomi an lo tiah a hmuh. “‘Thaizing kong cu kan hngal lo. Nihin i ka duhmi cu nihin ah ka hmuh ko lai,’ timi ruahnak nih a khuh dih cang hna,” tiah a ti.
11 “kokek dawtnak a ngeilomi.” (2 Timothy 3:3) Hi biafangbu cu “zangfahnak a ngeilomi, zawnruahnak a ngeilomi,” ti sullam a ngeimi Krik biafang pakhat in lehmi a si i “chungkhar cungah kokek dawtnak a ngeilomi” tinak a si. (The New International Dictionary of New Testament Theology) A hmaan ko, dawtnak cu a ṭhancho nak hnga dingmi—innchungkhar hmanhah a um kho ti tawn lo. Nu le va, fale le a tar cangmi nu le pa hna hmanh a ningcang loin an tuahtonnak hna thawngpang cu thinphan awk tlakin a karh cang. A hlathlaimi bu pakhat nih: “Minung zang-ennak—benghnak asiloah namchihnak, namte in chunhnak asiloah meithal in kahnak cu—hmun dang nakin innchungkhar chungah a tam deuh cang,” tiah an ti.
12. Mi hna cu Pathian sin i peknak ziaza kha an i ngeihter sawhsawhmi lawng a si tiah zeicah kan chim khawh?
12 “Pathian sin i pumpeknak nunnak an i ngeihter, sihmanhsehlaw cu he aa tlaimi ṭhawnnak kha cu an hlawt.” (2 Timote 3:5) Baibal cu nunnak kha ṭhatnaklei ah thlen khawhnakṭhawnnak a ngei. (Efesa 4:22-24) Asinain, tuchan minung tampi nih an biaknak cu a hnulei in Pathian lung a lawmhter lomi a ding lomi tuahsernak tuahnak puanzar ah an hman. Lih chimnak, firnak le nu le pa sualnak hna kha an biaknak lamhruaitu pawl nih an i hngalhter tawn lo. Biaknak tampi nih dawtnak kong cu an cawnpiak ko nain raldohnak kha tha an pek i an bawmh. India Today magazine i ca ṭialtupa nih: “Cungnung bik Sertu min in minung nih an minung hawi cungah fih a nung bikmi ṭhatlonak an tuah,” tiah a ti. A hmaan tein, kan hnu naite i a cangmi thisen chuahnak a tam bikmi raldohnak pahnih a si mi—Vawlei Ralpi 1 le II cu— Krifaram chungin a chuak.
13. Vawlei cu hrawh a si taktak ko ti zeinihdah a langhter?
13 “Vawlei hrawhnak.” (Biathlam 11:18) Union of Concerned Scientists (UCS) nih an chuahmi ralrin peknak pakhat, Nobel laksawng a hmumi 104 zong i telin vawlei pumpuluk in scientist 1,600 leng nih min an thutmi nih: “Minung le a pawngkam i a um ciami vawlei hna cu hmaiton in i khonnak lampi cungah an phan cang . . . Hi tlerhkhonnak hna kha hrial khawh nak caanṭha cu hmailei kum sawm tlawmpal chungah kan sung kho lai,” tiah a ti. Minung nunnak kha harnak a pemi minung tuahsernak hna cu “Hi vawlei kha atu ning bantuk hin thilnung hna kha hmunhter khawhlonak umtuzia ah a thlen khawh,” tiah a ṭial. Ozone dat a dihnak, ti a thurnak, tupi a phawnnak, vawlei ṭha a lohnak, le saram le thingkung phun tampi an lohnak hna kha khulrang in ṭuan a herhmi a biapimi harnak an si tiah zong a ti. “Thilnung hna pakhat le pakhat an i hngatchannak kan tuaitamnak nihhin a kong a pelpoite lawng kan hngalh rihmi thilnung hna ningcang rawhralnak aa telmi ṭhatlonak tampi kha a puahter kho,” tiah UCS nih a ti.
14. Matthai 24:14 cu kanmah chan chungah a tling cang tiah zeitindah na fianter khawh lai?
14 “Hi pennak thawng ṭha kha minung umnak vawlei dihlak ah chim a si lai.” (Matthai 24:14) Jesuh nih Pennak thawng ṭha cu miphun vialte ca i tehte si awkah vawlei dihlak ah chim a si lai tiah a rak chimchung. Pathian bawmhnak le thluachuahnak thawngin, Jehovah Hngaltu nuai tampi hna nih, phungchimnak le zultu sernak rian caah suimilam nuai thong tampi an pek. (Matthai 28:19, 20) A si ko, Hngaltu hna nih thawng ṭha kha kan thanh lo ahcun thisensualnak kan ngei lai ti an hngalh. (Ezekiel 3:18, 19) Sihmanhsehlaw kumfa tein minung thong tampi nih Pennak thawng ṭha an chimmi kha lunglawm tein an cohlan i a hmaanmi Krifa, Jehovah Hngaltu hna in dirhmun an i lak caah annih cu a lung aa lawm ngaingai. Jehovah kha biakin Pathian hngalhnak thanh cu a man chim cawk lomi tinvo ṭha a si. Cun minung umnak vawlei dihlak ah hi thawng ṭha chim a si dih hnuah, hi ningcang ṭhalo donghnak cu a ra lai.
LANGHTERTU THIL HE AA TLAKIN NUNG
15. Tuchan ningcang ṭhalo cu zeitindah a dongh te lai?
15 Hi ningcang cu zeitindah a dongh lai? Baibal nih a hmaan lomi biaknak vawlei uknak a simi “A Liannganmi Babilon” kha vawlei nainganzi uknak nih dohnak in aa thawk hngami “sifah harnak nganpi” pakhat kong a chm. (Matthai 24:21; Biathlam 17:5, 16) Jesuh nih cu caan ahcun ‘ni cu a mui lai i, thlapa cu a tlang lai lo i, arfi hna cu van in an tla lai i, vancung ṭhawnnak cu aa hnin lai,’ tiah a rak ti. (Matthai 24:29) Hi bia cu vanlei thil a um taktakmi kong a chimmi a si kho. Zeikhum a si ah, biaknak vawlei i mi min thang hna cu langhter le hloh dih an si lai. Khi hnu ah “Magog ram in Gog” timi Satan nih miṭhalo hna kha hmangin Jehovah a miphun hna kha a ṭhawn khawh chungin a doh hna lai. Sihmanhsehlaw Satan cu a sung lai, Zeitintiah Pathian nih annih cu a khamh hna lai. (Ezekiel 38:1, 2, 14-23) “Sifah harnak nganpi” cu Armageddon, “Lianngan Bik Pathian nipi ni raldohnak” ah a sang bik a phan lai. Mah nihcun vawlei i Satan a bupi hmelchunhnak hmanung bik thil vialte kha a hrawh dih lai i, a luatmi minung sinah a dong kho lomi thluachuahnak a phanh khawh nak hnga lam a hunpiak lai.—Bathlam 7:9, 14; 11:15; 16:14, 16; 21:3, 4.
16. Zeitindah chimchungmi hmanung bik ni hna hmelchunhnak cu kanmah caan he aa tlaimi a si tiah kan hngalh khawh?
16 Hmanung bik ni hna kong a chimmi chimchungbia hna lak i thil cheukhat hna cu anmah pakhatte cioin chim ahcun tuanbia caan dangdang cio he aa tlaimi a lo. Sihmanhsehlaw vun fonh dih tik ahcun, chimchungmi thil hna nihcun kanmah chan hi fiang tein a sawh dih ko. Tahchunhnak ah: Mi pakhat a kutṭial chung i a lam hna cu mi dang aho kutṭial he he hmanh aa lo lomi muisam phundangte a si. Cubantukte cun, hmanung bik ni hna nihcun aa phun dangmi muisam asiloah thil an ngei ve hna. Cu hna nihcun zeibantuk caan hmanh nih a ngeih khawh lomi“kutlam” kha a chuahter. Pathian vancung Pennak nih atu ah a uk cang ti a langhtermi Baibal a chimmi hna he vun ruahchunh tikah, a cangmi thil hna nih atu kan caan hi cu hmanung bik ni an si ko tiah ti khawhnak ding a fekmi hram an chuahter. Culengah, atu lio i ningcang ṭhalo cu a rauh hlanah hrawh dih asi cang lai ti a langhtermi a fiangmi Baibal cherhchan zong a um rih fawn.
17. Atu kan caan cu hmanung bik ni hna an si ti hngalhnak nih kanmah kha zei tuah dah a kan forh awk a si?
17 Atu kan caan cu hmanung bik ni an si ti a langhtermi thil hna he aa tlakin zeitindah nang na nun lai? Hihi ruat hmanh: Thil tampi a hrawk khomi ṭihnung ngaimi thlichia a hrang lai ti a si ahcun, a ran khawh chungin ralrinnak rian kan ṭuan ko lai. A si ko, atu i a um liomi ningcang ca i Baibal nih a chimchungmi nihcun rian a kan ṭuanter ve awk a si. (Matthai 16:1-3) Hi vawlei ningcang i a hmanung bik ni hna chungah kan nung cang ti a fiang tein kan hmuh khawh cang. Mah nihcun Pathian zangfahnak kan hmuh khawh nak hnga a herhmi thlennawnnak le remhnak tuah awkah a kan forh awk a si ko. (2 Piter 3:3, 10-12) Jesuh nih amah le amah cu khamhnak ca i lamkaltu in aa chim i, hitin biapi ngaiin a kan forh: “Eituk, din tuknak le khuasak tintuk harnak ca i lungrethei in nan um lioah, khi ni nihcun ruahlopi in chikkhatte ah rap bantukin an tlunhnawh sual nak hna hnga lo nanmah le nanmah kha i ralring tuah u. Zeicahtiah cu ni cu vawlei cung i a ummi vialte cungah a tlung lai. Cucaah hi a tlung hnga dingmi vialte in luatnak ah nan hlawhtlin khawh nak hnga le mi Fapa hmai i nan dir khawh nak hnga, i hlau peng u law thla va cam zungzal ko u.”—Luka 21:34-36.
[Footnotes]
a Baibal cheukhat nih “thil hna ningcang” canah “vawlei” timi biafang an hman. W.E. Vine ṭialmi Expository Dictionary of New Testament Words nih Krik biafang ai·on’ cu “Chan asiloah caan khat chung i a tlungmi thil he aa tlaiin rikhiah lomi caan caankhat kha a langhter,” tiah a ti. Parkhurst’s ṭialmi Greek and English Lexicon to the New Testament cauk (cahmai 17) ah Hebru 1:2 i ai·oʹnes (plural) a hmannak kong a chimnak ah “hi thil hna ningcang” timi kha a telh. Cucaah “hi thil hna ningcang” ti hmannak cu a hramthawk Krik cauk he aa tlakmi a si..
NA HNGALHNAK KHA I HNEKSAK TUAH
Kri uknak a thawk tikah a cang hnga dingmi vawlei cung i ṭhanchonak hna kong he aa tlaiin zeidah Baibal nih a chim?
Hmanung bik ni hna i hmelchunhnak cheukhat cu zeidah an si?
Atu caan hi hmanung bik ni hna an si ti cu zeinihdah an hngalhter?
HMANUNG BIK NI HNA I HMELCHUNHNAK CHEUKHAT PAWL
• A um bal lomi raldohnak.—Matthai 24:7; Biathlam 6:4.
• Mangṭam.—Matthai 24:7; Biathlam 6:5, 6, 8.
• Tlangrai zawtnak.—Luka 21:11; Biathlam 6:8.
• Sualnak a karhnak.—Matthai 24:12.
• Vawlei hrawhnak.—Biathlam 11:18.
• Lihnin.—Matthai 24:7.
• Tuar a harmi caan ṭhalo.—2 Timote 3:1.
• A hleihluat in tangka duhnak.—2 Timote 3:2.
• Nu le pa nawlngaihlonak.—2 Timote 3:2.
• Kokek dawtnak ngeihlonak.—2 Timote 3:3.
• Pathian nakin nuamhngaihnak duh deuhnak.—2 Timote 3:4.
• Sumnak ngeihlonak.—2 Timote 3:3.
• Ṭhatnak duhlonak.—2 Timote 3:3.
• A tlung dengmi harnak kha zeirellonak.—Matthai 24:39.
• Nehsawh hmangmi hna nih hmanung bik ni hnahmelchunhnak kha an al.—2 Piter 3:3, 4.
• Pathian Pennak kong vawlei pumpuluk chim dihnak.—Matthai 24:14.