4. Dawtnak An Ngei Lai Lo

‘Mi cu an chungkhar cungah dawtnak an ngei lai lo.’​—2 TIMOTE 3:​1-3.

● Chris cu Chaklei Wales, innchungkhar zaangennak a dohmi phu bawmhnak ah rian a ṭuanmi a si. Chris nih hitin a ti: “Fakpi in velh a tongmi nu pakhat ka zung khaan ah a rak ratmi kha kaa cinken rih. Hmanung bik ka hmuh lio caan he cun aa dang tuk. A theih hmanh ka thei ti lo. Cheukhat nu hna cu an lung a dongh tuk caah tanglei lawng kha an zoh tawn.”

Mah Nih Zeidah A Langhter? Africa ram pakhat lawngah nu 3 ah 1 cu an ngakchiat lioah tlaihhremnak an tong. Cauk pakhat nih mah ram ah pa pathum ah pakhat leng nih cun kan nupile kha kan velh hna awk a si tiah an ruah tiah a ti. Asinain innchungkhar zaangennak cu nu lawng nih an tonmi a si lo. Tahchunhnak ah, Canada ram ah pa 10 ah 3 hrawng cu an innchunghawi velhnak asiloah a ding loin pehtlaihnak an tong.

Mi Tam Deuh Nih Zeitindah An Lehrulh? Innchungkhar zaangennak timi cu a um zungzal ko. Atu ah mi nih hlan nakin biapi ah an hun chiah deuh caah a si.

Mi Tam Deuh Lehrulh Ning Cu Zumh Khawh A Si Maw? A luancia kumhrabu chungah mi nih innchungkhar zaangennak kha biapi ah an hun chiah. Asinain mi nih biapi ah an hun chiah caah innchungkhar zaangennak cu a tlawm deuh maw? A tlawm deuh lo. Chungkhar cungah dawtnak ngeih lonak cu hlan nakin a tam chinchin.

Nangtah Zeitindah Na Ruah? 2 Timote 3:​1-3 bia cu a tling cang maw? Mi nih an chungkhar cungah an langhter awk a simi dawtnak kha an langhter ti maw?

[Cahmai 7nak i a tawinak in langhternak]

“Minung phu ah a ṭha lo bikmi zaangennak hna lakah innchungkhar zaangennak zong hi pakhat a si ve. Zatuak in nu pakhat nih palik sin i report a tuah hlanah a innchunghawi velhnak voi 35 hrawng a tong cang.”—WALES AH INNCHUNGKHAR A DING LOIN PEHTLAIHNAK A TONGMI HNA BAWMHNAK PHU AH BIACHIMNAK NAWL A NGEIMI NU PAKHAT.